Kaxxa għall-Mistoqsija
◼ B’liema modi prattiċi nistgħu ngħinu lill-pijunieri?
Madwar id-dinja matul is-sena taʼ servizz 2009, kważi 800,000 ħu u oħt qdew bħala pijunieri regulari u speċjali. Dawn il-qaddejja full-time jissagrifikaw l-aħjar mill-ħin, l-enerġija, u r-riżorsi materjali tagħhom biex ixerrdu l-aħbar tajba tas-Saltna. (Prov. 3:9) Min jaf kemm hu ferħan Ġeħova bl-isforzi tagħhom! B’liema modi nistgħu nuru li naqblu mal-ħarsa taʼ Ġeħova u ngħinu lill-pijunieri tagħna biex isibu l-ferħ u jissaportu fis-servizz taʼ pijunier?
Żgur li l-kliem tagħna magħżul bir-reqqa jistaʼ jħeġġiġhom biex jibqgħu jaqdu bħala pijunieri. (Prov. 25:11) Nistgħu aħna naġġustaw l-iskeda tagħna taʼ kull ġimgħa ħalli nkunu nistgħu naħdmu magħhom fil-ministeru? Meta naħdmu flimkien, nistgħu noffru li nużaw il-karozza tagħna minflok tagħhom. U jekk nirkbu fil-karozza tagħhom, forsi nistgħu noffru xi ħaġa tal-flus biex ngħinuhom fl-ispejjeż. (1 Kor. 13:5; Flp. 2:4) Ukoll, nagħtu l-appoġġ kollu mħabba tagħna billi nuru l-ospitalità u kull tant żmien nistiednu lill-pijunieri d-dar tagħna għal xi ikla.—1 Pt. 4:8, 9.
L-Iskrittura tagħti garanzija li Ġeħova se jipprovdi l-bżonnijiet għal dawk li jfittxu l-ewwel is-Saltna tiegħu. (Salm 37:25; Mt. 6:33) Mod wieħed kif jagħmel dan hu permezz tal-fratellanza Kristjana tagħna kollha mħabba. (1 Ġw. 3:16-18) Ovvjament, il-pijunieri ma jistennewx li ħaddieħor jieħu ħsieb ir-responsabbiltajiet finanzjarji tagħhom. U forsi ma jiħdux l-inizjattiva biex jgħidu lil ħaddieħor meta jkollhom bżonn taʼ xi ħaġa. Madankollu, nistgħu ngħinu lill-pijunieri leali u ‘nagħmlu tajjeb għan-nieqes tagħhom’ b’modi prattiċi jekk noqogħdu attenti u nosservaw.—2 Kor. 8:14, 15.
Meta Febe, evanġelizzatriċi żeluża fil-kongregazzjoni taʼ Kenkre tal-ewwel seklu, marret Ruma, Pawlu ħeġġeġ lill-aħwa f’Ruma: “Ilqgħuha fil-Mulej kif jixraq lill-qaddisin, u . . . għinuha f’kulma jistaʼ jkollha bżonnkom.” (Rum. 16:1, 2) Aħna għandna l-opportunità li nagħtu l-istess appoġġ kollu mħabba lil dawk fil-kongregazzjoni tagħna li qed jiddikjaraw bla heda l-aħbar tajba bħala pijunieri regulari u speċjali.—Atti 5:42.