Nagħtu Xhieda bir-​Reqqa Dwar is-​Saltna t’Alla

1. X’se nikkunsidraw fl-​Istudju tal-​Bibbja tal-​Kongregazzjoni mill-​ġimgħa li tibda fl-​14 taʼ Marzu?

¹ Matul il-​ġimgħa li tibda fl-​14 taʼ Marzu, 2011, se nibdew nikkunsidraw il-​ktieb Nagħtu Xhieda bir-​Reqqa Dwar is-​Saltna t’Alla fl-​Istudju tal-​Bibbja tal-​Kongregazzjoni. Din il-​pubblikazzjoni tkopri l-​ktieb tal-​Atti b’tali mod li l-​qarrej jistaʼ jħoss l-​eċċitament tal-​ġrajjiet li ġraw waħda wara l-​oħra u li huma mniżżlin fih. Minflok ma jipprovdi kummentarju vers b’vers, il-​ktieb Nagħtu Xhieda jislet lezzjonijiet mill-​ġrajjiet tal-​Atti u jgħinna naraw kif nistgħu napplikawhom personalment.—Rum. 15:4.

2. Spjega xi aspetti tal-​ktieb Nagħtu Xhieda.

² Aspetti tal-​Ktieb: L-​introduzzjoni f’paġna 2 hija ittra kordjali mill-​Ġemgħa li Tiggverna li tesprimi kif tridna nibbenefikaw minn din il-​pubblikazzjoni. Minn kapitlu 2 ’il quddiem, hemm frażi li tispjega l-​punt prinċipali taʼ kull kapitlu u Skrittura ċitata li tindika s-​silta mill-​ktieb tal-​Atti li se tiġi diskussa. Ħafna kapitli fihom kaxxi informattivi li jagħtu iktar dettalji dwar nies, postijiet, jew ġrajjiet. Marġni wesgħin2201 jagħmluha possibbli għalina biex niktbu noti. Matul il-​ktieb hemm stampi mill-​isbaħ b’ħafna dettalji li se jgħinuna nġibu quddiem għajnejna ġrajjiet importanti, u fl-​aħħar paġna hemm indiċi tal-​istampi utli li jispjega x’qed jintwera fid-​diversi stampi. Fuq in-​naħa taʼ ġewwa tal-​qoxra taʼ quddiem u taʼ wara hemm mapep li jgħinuna nsegwu l-​progress taʼ sħabna fit-​twemmin fl-​ewwel seklu hekk kif bdew ixerrdu l-​aħbar tajba “sa l-​iktar parti mbiegħda taʼ l-​art.”—Atti 1:8.

3. Liema mistoqsijiet importanti se jitwieġbu jekk nistudjaw il-​ktieb tal-​Atti?

³ Tweġibiet Għal Mistoqsijiet Importanti: Jekk nikkunsidraw il-​ktieb tal-​Atti se niġu megħjunin nagħrfu b’mod ċar it-​tweġibiet għal mistoqsijiet importanti dwar il-​ministeru Kristjan. Pereżempju, liema xogħol u messaġġ jidentifika lis-​segwaċi veri taʼ Ġesù Kristu? Min jidderieġi x-​xogħol tal-​ippritkar li qed isir madwar id-​dinja, u kif? Il-​persekuzzjoni u l-​oppożizzjoni joħolqu liema opportunitajiet għall-​ministri? Xi rwol għandu l-​ispirtu qaddis fil-​ministeru tagħna?

4. Kif nistgħu nibbenefikaw bis-​sħiħ mill-​konsiderazzjoni tagħna taʼ din il-​pubblikazzjoni?

⁴ Sabiex tibbenefika bis-​sħiħ, studja l-​materjal minn qabel, u pprepara ħalli tieħu sehem fid-​diskussjoni tal-​kongregazzjoni. Attendi kull laqgħa, u aħseb fil-​fond dwar kif tistaʼ tapplika l-​lezzjonijiet li titgħallem fil-​ministeru persunali tiegħek. Jalla l-​konsiderazzjoni tagħna taʼ din il-​pubblikazzjoni eċċitanti tqanqalna nagħtu xhieda bir-​reqqa dwar is-​Saltna t’Alla!—Atti 28:23.