Imita l-fidi tagħhom
1. Mill-ġimgħa li tibda fid-19 t’Ottubru, x’se nikkunsidraw fl-Istudju tal-Bibbja tal-Kongregazzjoni?
1 Matul il-ġimgħa li tibda fid-19 t’Ottubru 2015, se nibdew nikkunsidraw il-ktieb Imita l-fidi tagħhom fl-Istudju tal-Bibbja tal-Kongregazzjoni. Din il-pubblikazzjoni teżamina rakkonti Bibliċi taʼ 14-il raġel u mara taʼ fidi. Il-ktieb hu miktub b’tali mod li lil dawn l-uħud leali nkunu nistgħu nġibuhom quddiem għajnejna, u jgħinna narawhom bħal nies reali li ffaċċjaw sfidi hekk kif qdew lil Ġeħova. Barra minn hekk, il-ktieb jgħallem lezzjonijiet minn dawn ir-rakkonti li jgħinuna napplikawhom f’ħajjitna llum.—Ebr. 6:12.
2. Spjega xi ftit mill-affarijiet li fih il-ktieb Imita l-fidi tagħhom.
2 X’fih il-ktieb: Il-ktieb fih linja kronoloġika u mapep li jgħinuna nkunu nafu meta u fejn kull karattru għex. Apparti minn hekk, kull kapitlu għandu bħal kaxxa bit-titlu “Aħseb dwar dan . . . ,” li se tgħinna nimmeditaw fuq ir-rakkonti u napplikaw il-lezzjonijiet prattiċi li nkunu tgħallimna. Fil-ktieb hemm ukoll stampi li saret ħafna riċerka għalihom, b’ħafna kuluri u dettalji, li jgħinu biex ir-rakkonti ntuhom il-ħajja.
3. X’nistgħu nagħmlu biex nibbenefikaw mill-istudju tagħna taʼ din il-pubblikazzjoni?
3 Kif tistaʼ tibbenefika: L-ittra li hemm fil-bidu tal-ktieb mill-Ġemgħa li Tiggverna tinkuraġġina b’dan il-kliem: “Uża l-immaġinazzjoni u s-sensi tiegħek. Ipprova ħoss u ara dak li ħassu u raw dawn il-karattri tal-Bibbja. Qabbel ir-reazzjoni tagħhom maʼ tiegħek li kieku ssib ruħek fl-istess sitwazzjoni.” Ovvjament, li nużaw l-immaġinazzjoni ma jfissirx li għandna nispekulaw bl-addoċċ. Imma, minflok, ifisser li nġibu quddiem għajnejna dak li jgħid ir-rakkont ispirat u biex nidħlu fiż-żarbuna tal-karattri Bibliċi involuti. Li tagħmel dan jitlob ħin u meditazzjoni. (Neħ. 8:8) Jekk il-lezzjoni tibda f’nofs kapitlu, dak li jikkonduċi għandu jibda b’reviżjoni tal-lezzjoni taʼ qabel li għandha ddum bejn 30 u 60 sekonda. Mistoqsija jew tnejn jistgħu jsiru bħala reviżjoni għal konklużjoni. Dan għandu jsir f’każ li l-lezzjoni ma tinkludix il-kaxxa “Aħseb dwar dan . . . ”
4. Għala hemm bżonn li nistudjaw il-ktieb Imita l-fidi tagħhom?
4 Aħna qed ngħixu f’dinja li kuljum trid iddgħajjef il-fidi tagħna b’xi mod jew ieħor. Dan il-ktieb—u anki s-serje t’artikli fit-Torri tal-Għassa li fuqhom huwa bbażat il-ktieb—hu għotja mingħand Ġeħova biex jgħinna nsaħħu l-fidi tagħna. (Ġak. 1:17) Ejja nieħdu vantaġġ sħiħ minnu billi nattendu l-Istudju tal-Bibbja tal-Kongregazzjoni b’mod regulari u billi nieħdu sehem kemm jistaʼ jkun f’li nikkummentaw waqt li nistudjaw din il-pubblikazzjoni flimkien!