Intejbu l-​abbiltajiet tagħna fil-​ministeru—Nieħdu nota tal-​interess

“Oqgħod attent il-​ħin kollu għalik innifsek u għat-​tagħlim tiegħek.” (1 Tim. 4:16) Dan il-​parir ispirat li l-​appostlu Pawlu ta lil Timotju jindika li, sew jekk għadna ġodda u sew jekk għandna l-​esperjenza, għandna nagħmlu ħilitna biex nagħmlu progress. Biex niġu megħjuna nagħmlu dan, serje ġdida bit-​titlu “Intejbu l-​abbiltajiet tagħna fil-​ministeru” se tibda tidher fil-​Ministeru tas-​Saltna. Kull artiklu se jiddiskuti abbiltà importanti u se jipprovdi suġġerimenti kif nistgħu niżviluppawha. Matul ix-​xahar, kulħadd hu inkuraġġit biex jaħdem fuq din l-​abbiltà. Wara li jispiċċa x-​xahar, parti mil-​Laqgħa tas-​Servizz se tagħtina opportunità biex nikkummentaw dwar kif ibbenefikajna billi ħdimna fuq din l-​abbiltà. Dan ix-​xahar aħna inkuraġġiti biex naħdmu fuq li nieħdu nota tal-​interess.

Għala hu importanti: Biex inwettqu l-​inkarigu tagħna, m’għandniex biss nippritkaw. Irridu nerġgħu mmorru għand dawk li juru interess u ngħallmuhom, jiġifieri nsaqqu ż-​żrieragħ tal-​verità li nkunu żrajna. (Mt. 28:19, 20; 1 Kor. 3:6-​9) Dan jeħtieġ li nerġgħu nsibu lil dak li jkun, nitkellmu dwar dak li jinkwetah, u nkomplu nibnu fuq il-​konversazzjoni li kellna qabel. Għalhekk, meta nsibu l-​interess huwa neċessarju li nieħdu nota tiegħu.