Iż-Żrieragħ Iridu Jissaqqew Sabiex Jikbru
1. X’għandu jissaqqa sabiex jikber?
1 Iż-żrieragħ li jinżergħu fi ġnien iridu jissaqqew sabiex jikbru. L-istess hu minnu rigward iż-żrieragħ tal-verità li jinżergħu fil-qlub tan-nies fit-territorju tagħna. (1 Kor. 3:6) Irridu nagħmlu żjajjar lura u nsaqqu dawn iż-żrieragħ figurattivi bil-Kelma t’Alla jekk irriduhom jagħmlu l-għeruq, jikbru, u jiffjorixxu.
2. Kif nistgħu nagħmlu l-pedament għaż-żjara li jmiss?
2 Qajjem Mistoqsija: Meta tipprepara l-preżentazzjoni tiegħek, għala ma tippreparax ukoll mistoqsija li tqajjem l-interess li tistaʼ twieġeb fiż-żjara lura? Qajjimha fil-konklużjoni tal-ewwel konversazzjoni, u agħmel arranġamenti fissi biex tmur lura. Ħafna jsibuha t’għajnuna li jagħżlu xi ħaġa mill-ktieb Il-Bibbja X’Tgħallem? li se tgħinhom juru kif isir studju tal-Bibbja.
3. Liema informazzjoni tistaʼ tinkludi meta tikteb x’ġara fl-ewwel żjara?
3 Ħu Noti Tajbin: Hekk kif tħalli lill-inkwilin fl-ewwel żjara, ħu l-ħin biex tikteb dak kollu li tkellimtu dwaru. Ikteb l-isem u l-indirizz tal-individwu. Huwa tajjeb ukoll li tniżżel id-data u l-ħin li kellimtu, dwar xiex tkellimtu, u x’letteratura ħallejtlu, jekk aċċetta. Qal jekk huwiex f’ċerta reliġjon? Għandu familja? Semma dak li jinteressah u dak li jinkwetah? Informazzjoni bħal din se tgħinek tiddiskuti suġġetti li huma importanti għalih meta tagħmillu żjara lura. Ikteb ukoll meta ftehemtu li tmur lura u l-mistoqsija li se twieġeb.
4. Għala m’għandniex naqtgħu qalbna meta mmorru lura biex inkellmu lin-nies li juru interess fil-messaġġ tagħna?
4 Taqtax Qalbek: Satana mhux se jnaqqas l-isforzi tiegħu biex “jieħu l-kelma” li nżergħet f’qalb individwu. (Mk. 4:14, 15) Għalhekk, taqtax qalbek jekk issibha diffiċli biex terġaʼ ssib lill-individwu interessat id-dar. Tistaʼ int tibgħat ittra jew tħalli nota mal-bieb? Pijuniera bdiet studju fuq l-għatba maʼ waħda mara imma ma rnexxilhiex terġaʼ ssibha d-dar, u allura bagħtitilha ittra. Meta l-oħt eventwalment sabitha d-dar, il-mara esprimiet kemm l-interess persunali li ntwera fiha messilha qalbha. Hekk kif insaqqu ż-żrieragħ tal-verità, nistgħu nesperjenzaw il-ferħ li jiġi milli narawhom jinbtu, jimmaturaw, u “jagħtu l-frott, min tletin u min sittin u min mija.”—Mk. 4:20.