Kun Żgur li Terġaʼ Tmur Lura!

¹ “X’konversazzjoni sabiħa kelli! Irrid niftakar nagħmel żjara lura.” Ġieli għedtu dan il-​kliem u wara tinsa fejn toqgħod dik il-​persuna? Jekk inhu hekk, int taf li l-​uniku mod li bih tistaʼ tkun żgur li terġaʼ tmur lura hu li tikteb.

² Ikteb Kollox: Sakemm il-​konversazzjoni maʼ persuna interessata tkun għadha friska f’moħħok, ħu ftit ħin biex tikteb l-​informazzjoni kollha meħtieġa dwar iż-​żjara. Niżżel l-​isem taʼ l-​inkwilin u kif se terġaʼ tagħrfu. Ikteb l-​indirizz, imma mhux billi tipprova taqtaʼ x’inhu—iċċekkja biex tkun ċert li tiktbu sew. Niżżel is-​suġġett li tkellimtu dwaru, kull skrittura li qrajtu, u liema letteratura ħallejt.

³ Jekk ħallejt lill-​inkwilin b’xi mistoqsija li se tweġibhielu fiż-​żjara li jmiss, iktibha. Sirt taf xi ħaġa dwaru, dwar il-​familja tiegħu, jew dwar ir-​reliġjon tiegħu? Jekk inhu hekk, iktibha. Imbagħad jekk fiż-​żjara li jmiss issemmiha, int tkun qed turi l-​interess persunali li għandek fl-​individwu. Fl-​aħħar, niżżel il-​ġurnata u l-​ħin meta għamilt l-​ewwel żjara u meta għedt li se tirritorna. Billi tniżżel in-​noti bir-​reqqa, int se jkollok tfakkiriet ċari u x’aktarx inqas se tinsa l-​wegħda li għamilt li terġaʼ tmur lura.—1 Tim. 1:12.

⁴ Hekk kif tlesti mill-​kitba, poġġi dak li tkun ktibt mal-​kumplament taʼ l-​affarijiet tiegħek tas-​servizz taʼ l-​għalqa—il-​basket, il-​Bibbja, il-​ktieb Reasoning, u l-​letteratura—sabiex dejjem issibu meta tiġi bżonnu. Huwa tajjeb li tniżżel lil dawk li ma jkunux id-​dar f’note book differenti minn dak li tuża biex tniżżel iż-​żjajjar lura fih. M’għandniex xi ngħidu, minkejja x-​xogħol li tieħu biex iżżomm noti bir-​reqqa taż-​żjajjar lura, l-​iktar ħaġa importanti hi li tkun żgur li terġaʼ tmur lura!

⁵ Aħseb Dwar l-​Individwu: Meta tkun qed tipprepara għall-​ministeru, irrevedi n-​noti tiegħek taż-​żjajjar lura. Aħseb fuq kull individwu u x’inhu l-​aħjar mod li bih tistaʼ tavviċinah meta tkun se terġaʼ tmur. Aħseb kif se tiżviluppa l-​interess taʼ l-​inkwilin fi studju tal-​Bibbja fid-​dar. Ippjanar bħal dan jistaʼ jżid il-​produttività tiegħek bħala ministru taʼ l-​aħbar tajba, u għalhekk il-​ferħ persunali tiegħek jiżdied ukoll.—Prov. 21:5a.

⁶ Għalhekk, meta darb’oħra ssib lil xi ħadd li joqgħod jismaʼ, tirraġunax li faċilment se tiftakar min u fejn joqgħod. Minflok, ikteb, irrevedi n-​noti tiegħek, kompli aħseb dwar l-​inkwilin, u mbagħad kun żgur li terġaʼ tmur lura!