Nikkonduċu studji tal-Bibbja effettivi
1. X’responsabbiltà għandhom il-pubblikaturi li jikkonduċu studji tal-Bibbja?
1 Ebda bniedem ma jistaʼ jaqdi ’l Alla jekk “ma jiġbdux” Ġeħova. (Ġw. 6:44) Minkejja dan, il-pubblikaturi li jikkonduċu studji tal-Bibbja għandhom jagħmlu l-parti tagħhom f’li jgħinu lin-nies jersqu qrib taʼ Missierhom tas-sema. (Ġk. 4:8) Dan jirrikjedi preparazzjoni. Il-fatt li jinqara kull paragrafu u nsaqsuhom il-mistoqsijiet stampati biss, ma jkunx biżżejjed biex ngħinu l-istudenti jifhmu sew il-messaġġ u jagħmlu progress.
2. Studju tal-Bibbja effettiv xi jwettaq?
2 Sabiex il-pubblikaturi jikkonduċu studji effettivi, għandhom jgħinu l-istudenti tagħhom biex (1) jifhmu dak li tgħallem il-Bibbja, (2) jaċċettaw dak li tgħallem il-Bibbja, u (3) japplikaw dak li tgħallem il-Bibbja. (Ġw. 3:16; 17:3; Ġak. 2:26) Jistaʼ jkun li jgħaddu x-xhur biex dak li jkun jgħin individwu biex jieħu dawn il-passi. Madankollu, kull pass jgħin l-istudent jiżviluppa relazzjoni maʼ Ġeħova u biex jiddedika ruħu lilu.
3. Għalliema effettivi għala jsaqsu mistoqsijiet li jitolbu opinjoni?
3 X’inhu jaħseb l-istudent tal-Bibbja?: Sabiex tagħraf jekk l-istudent tal-Bibbja hux jifhem u jaċċetta dak li qed jitgħallem, evita milli titkellem int biss u inkuraġġixxi l-istudent jesprimi lilu nnifsu. (Ġak. 1:19) Qed jifhem dak li tgħid il-Bibbja fuq is-suġġett li qed tikkunsidra? Jistaʼ jispjega s-suġġett fi kliemu? Kif iħossu dwar dak li hu tgħallem? Jemmen li dak li tgħallem il-Bibbja hu raġunevoli? (1 Tess. 2:13) Qed jifhem li dak li qed jitgħallem għandu jeffettwa l-mod kif jgħix ħajtu? (Kol. 3:10) Biex ikollna tweġibiet għal mistoqsijiet bħal dawn, jeħtieġ li bit-tattika nsaqsu mistoqsijiet li jitolbu opinjoni u mbagħad għandna nagħtu widen.—Mt. 16:13-16.
4. X’għandu jsir jekk student qed isibha diffiċli biex jifhem jew biex japplika dak li qed jitgħallem mill-Bibbja?
4 Ċerti drawwiet u ħsibijiet spiss irabbu l-għeruq fil-fond f’dak li jkun u jieħdu ż-żmien biex jinqalgħu. (2 Kor. 10:5) Imma xi ngħidu jekk l-istudent tagħna mhux jaċċetta jew mhux japplika dak li qed jitgħallem? Hemm bżonn il-paċenzja biex tħalli ammont taʼ żmien raġunevoli għall-Kelma t’Alla u l-ispirtu qaddis biex jaħdmu f’qalb l-istudent. (1 Kor. 3:6, 7; Ebr. 4:12) Minflok tagħmel pressjoni fuq l-istudent, spiss ikun aħjar li tmur fuq suġġett ieħor jekk ikun qed isibha diffiċli biex jifhem jew biex japplika xi tagħlim tal-Bibbja. Hekk kif inkomplu ngħallmuh bil-paċenzja u bl-imħabba mill-Bibbja, għandu mnejn li maż-żmien jitqanqal biex jagħmel il-bidliet meħtieġa.