Miljuni taʼ Refuġjati Jaħarbu mill-​Ukrajna

Fl-​24 taʼ Frar 2022, ir-​Russja attakkat l-​Ukrajna. Minħabba f’hekk, miljuni taʼ nies huma fil-​periklu u qed jipprovaw jaħarbu malajr mill-​pajjiż.a

“Kien hemm il-​bombi u l-​isplużjonijiet. Diffiċli biex nispjega daqskemm kienet tal-​biżaʼ. Meta sirna nafu li kien hemm it-​trains apposta biex naħarbu, iddeċidejna li nitilqu. Kellna nħallu kollox warajna għax kull persuna setaʼ jkollha basket wieħed biss. Kulma stajna nieħdu kienu d-​dokumenti tagħna, mediċina, ilma u xi ħaġa x’nieklu. Il-​bqija ħallejna kollox id-​dar. Tlaqna biex naqbdu t-​train waqt li kienu neżlin il-​bombi.”—Nataliia, minn Kharkiv, l-​Ukrajna.

“Domna sal-​aħħar minuta naħsbu li mhux se jkun hemm gwerra. Bdejt nismaʼ l-​bombi jisplodu fil-​belt u t-​twieqi bdew jitriegħdu. Iddeċidejt naqbad l-​iżjed affarijiet importanti u nitlaq. Fit-​8 taʼ filgħodu tlaqt mid-​dar, qbadt train għal Lviv u mbagħad tal-​linja għall-​Polonja.”—Nadija, minn Kharkiv, l-​Ukrajna.

F’dan l-​artiklu

• X’inhuma r-​raġunijiet vera għala ħafna qed isiru refuġjati?

• Ir-​refuġjati fejn jistgħu jsibu tama?

• Il-​Bibbja tistaʼ tgħin lir-​refuġjati?

X’inhuma r-​raġunijiet vera għala ħafna qed isiru refuġjati?

Ħafna fl-​Ukrajna qed isiru refuġjati għax l-​armata tar-​Russja attakkat il-​pajjiż. Imma l-​Bibbja turi li hemm raġunijiet oħra għala ħafna nies qed jispiċċaw refuġjati:

• Il-​gvernijiet madwar id-​dinja ma rnexxilhomx jagħtu lin-​nies dak li għandhom bżonn. Ħafna drabi, il-​gvernijiet jużaw il-​qawwa li għandhom biex jikkontrollaw in-​nies u jittrattawhom ħażin.—Ekkleżjasti 4:1; 8:9.

• Satana x-​Xitan hu “l-​ħakkiem tad-​dinja.” Hu tant qed jinfluwenza n-​nies biex jagħmlu l-​ħażin li l-​Bibbja tgħid: “Id-​dinja kollha qiegħda taħt il-​qawwa tal-​Ħażin.”—Ġwanni 14:30; 1 Ġwanni 5:19.

• In-​nies ilhom ibatu minħabba xi problemi għal mijiet taʼ snin. Imma issa qed ngħixu fi żmien li l-​Bibbja kienet tkellmet dwaru: “Fl-​aħħar jiem ikun hawn żminijiet kritiċi li diffiċli biex issib tarfhom.” (2 Timotju 3:1) Dawn il-​jiem nistgħu nagħrfuhom minħabba l-​gwerer, diżastri naturali, nuqqas t’ikel, u mard li jittieħed. Dawn l-​affarijiet kollha jġiegħlu n-​nies jitilqu mid-​dar tagħhom.—Luqa 21:10, 11.

Ir-​refuġjati fejn jistgħu jsibu tama?

Il-​Bibbja turina li l-​Ħallieq tagħna Ġeħova,b iħobb lir-​refuġjati u jħoss għan-​nies li kellhom jitilqu mid-​dar tagħhom. (Dewteronomju 10:18) Hu jwiegħed li se juża l-​gvern tiegħu fis-​sema biex isolvi l-​problemi tar-​refuġjati. Dan il-​gvern jismu s-​Saltna t’Alla u se jieħu post il-​gvernijiet tan-​nies. (Danjel 2:44; Mattew 6:10) Ġeħova se juża s-​Saltna tiegħu biex ineħħi lil Satana x-​Xitan. (Rumani 16:20) Dik is-​Saltna se tkun il-​gvern tad-​dinja kollha u se tneħħi l-​firda bejn il-​pajjiżi kollha. In-​nies kollha tad-​dinja se jkunu magħqudin flimkien bħal familja. Ħadd iżjed mhu se jkollu għalfejn jitlaq mid-​dar tiegħu għax il-​Bibbja twiegħed: “Joqogħdu bil-​qiegħda, kull wieħed taħt id-​dielja tiegħu u taħt is-​siġra tat-​tin tiegħu, u ma jkunx hemm min ibeżżagħhom; għax dan qalu fomm Ġeħova taʼ l-​armati.”—Mikea 4:4.

Is-​Saltna t’Alla biss tistaʼ ssolvi għal dejjem il-​problemi li minħabba fihom ħafna jispiċċaw refuġjati. Ġeħova se juża s-​Saltna tiegħu biex ineħħi problemi bħal:

• Gwerer. Ġeħova se “jwaqqaf il-​gwerer sa tarf l-​art.” (Salm 46:9) Biex issir taf iżjed kif Alla se jneħħi l-​gwerer, aqra l-​artiklu “Il-​Paċi fuq l-​Art—Kif Se Tinkiseb?”

• Il-​moħqrija u l-​vjolenza. ‘Mill-​moħqrija u mill-​vjolenza Ġeħova se jeħlishom.’ (Salm 72:14) Aqra l-​artiklu “Int Tistaʼ Tegħleb il-​Mibegħda” biex tara kif in-​nies jistgħu jinbidlu anki meta jkunu ilhom żmien twil b’attitudni ħażina.

• Faqar. Ġeħova “se jeħles lill-​fqir li jgħajjatlu għall-​għajnuna.” (Salm 72:12) Biex tara kif Alla se jsolvi l-​problema tal-​faqar, aqra l-​artiklu “L-​Ekonomija Qatt Se Tkun Tajba għal Kulħadd?”

• Nuqqas t’ikel. “Se jkun hemm ħafna qmuħ fuq l-​art.” (Salm 72:16) Aqra l-​artiklu “A World Without Hunger?” biex tara kif Alla se jagħmel ċert li ħadd ma jkun bil-​ġuħ.

Il-​Bibbja tistaʼ tgħin lir-​refuġjati?

Iva. Il-​Bibbja tagħti lir-​refuġjati tama vera għall-​futur. Imma tistaʼ tgħinhom ukoll ikampaw mal-​problemi issa.

Prinċipju tal-​Bibbja: “Tkunu ansjużi fuq xejn, imma f’kollox b’talb u b’suppliki flimkien maʼ radd il-​ħajr ħallu lil Alla jkun jaf x’teħtieġu; u l-​paċi t’Alla li tisboq kull ħsieb tgħasses lil qalbkom u l-​qawwa mentali tagħkom.”—Filippin 4:6, 7.

X’tistaʼ tagħmel: Saqsi lil Alla biex jgħinek tibqaʼ kalm tkun xi tkun is-​sitwazzjoni. Ara l-​artiklu “Philippians 4:6, 7—‘Do Not Be Anxious About Anything.’”