Ilqugħ għar-Riħ
FL-GĦOLI fuq l-Alpi taʼ l-Ewropa, tħobb tikber siġra żgħira b’saħħitha msejħa l-warda taʼ l-Alpi mill-familja tar-rododendru. Din taʼ spiss tikber bl-abbundanza u ġo xulxin, imqabbda sew maʼ l-art bħala protezzjoni kontra l-irwiefen kbar tar-reġjun muntanjuż. Ir-riħ kontinwu jhedded l-eżistenza tal-pjanti alpini billi jbaxxilhom it-temperatura, jixxottalhom l-arja u l-ħamrija, u jipprova jaqlagħhom mill-għeruq.
Il-warda taʼ l-Alpi taʼ spiss jirnexxilha tevita l-ħsara mir-riħ billi tikber fi xquq ġol-blat. Għalkemm jistaʼ ma jkunx hemm ħafna ħamrija f’dawn il-postijiet, ix-xquq fil-blat jipprovdu protezzjoni kontra r-riħ u jgħinu lill-pjanta biex iżżomm l-ilma. Waqt li ma tantx jidhru fil-biċċa l-kbira tas-sena, fis-sajf dawn is-siġar żgħar iżejnu l-muntanji bi fjuri lewn vjola ħamrani.
Il-profeta Isaija spjega li “prinċpijiet” kellhom jiġu maħturin minn Alla, u kull wieħed kellu jaqdi bħala “lqugħ għar-riħ.” (Isaija 32:1, 2) Taħt id-direzzjoni tas-Sultan, Kristu Ġesù, dawn il-prinċpijiet spiritwali, jew indokraturi, ikunu bħal blat li ma jitħarrikx, sodi fi żminijiet taʼ stress u niket. Huma joffru kenn taʼ min joqgħod fuqu meta xi ħadd jiffaċċja l-għawġ u jgħinu wħud fil-bżonn biex jissalvagwardjaw ir-riżervi tagħhom taʼ ilma spiritwali mill-Kelma t’Alla.
Irwiefen taʼ persekuzzjoni, skuraġġiment, jew nuqqas taʼ saħħa jistgħu jagħtu daqqa taʼ ħarta lil Kristjan, u jnaqqsulu l-fidi jekk ma jkollux protezzjoni. L-anzjani Kristjani jistgħu jipprovdu protezzjoni billi jisimgħu b’attenzjoni x’inhi l-problema tiegħu, joffrulu pariri bbażati fuq il-Bibbja, u jagħtuh inkuraġġiment jew għajnuna prattika. Bħas-Sultan maħtur tagħhom, Kristu Ġesù, huma jridu jgħinu lil dawk li jispiċċaw “mitluqa.” (Mattew 9:36) U jixtiequ jgħinu lil oħrajn li ġew effettwati mill-irwiefen tat-tagħlim falz. (Efesin 4:14) Għajnuna bħal din fi żmien opportun tistaʼ tkun vitali.
“Jien għaddejt minn perijodu trawmatiku f’ħajti meta xi ħbieb mill-qrib telqu mill-kongregazzjoni u, fl-istess ħin, missieri kellu emorraġija f’rasu,” tispjega Miriam. “Sabiex nipprova negħleb id-dipressjoni li qabditni, bdejt noħroġ maʼ ġuvni tad-dinja. Ftit wara, tant bdejt inħossni miniex denja li informajt lill-anzjani tal-kongregazzjoni li kont iddeċidejt li nitlaq mill-verità, ladarba kont ċerta li Jehovah ma setax jibqaʼ jħobbni.
“F’dan il-mument kritiku, anzjan li jħenn fakkarni dwar is-snin li kont qdejt fil-ministeru bħala pijuniera regulari. Hu qalli li dejjem kien jammira l-fedeltà tiegħi, u talabni bil-ħlewwa biex inħalli lill-anzjani jgħinuni, ħalli jassigurawni li Jehovah iħobbni. L-interess kollu mħabba li wrewni f’dan iż-żmien kritiku kien bħal ‘ilqugħ’ għalija matul it-tempesta spiritwali li kont għaddejja minnha. Fi żmien xahar, temmejt ir-relazzjoni li kelli man-namrat, u minn dakinhar ’l hawn komplejt nimxi fit-triq tal-verità.”
L-anzjani jħossuhom premjati meta jaraw lill-Kristjani sħabhom jiffjorixxu spiritwalment, grazzi għall-protezzjoni li tkun ngħatatilhom fil-ħin xieraq. U dawn l-“ilqugħ” jipprovdulna indikazzjoni żgħira bil-quddiem taʼ l-għajnuna spiritwali abbundanti li se ngawdu matul ir-Renju Millennjali taʼ Kristu.