Il-​Fidi Vera—Għadha Possibbli?

“Il-​fidi hija fiduċja ħajja u qawwija fil-​grazzja t’Alla, tant żgura u ċerta li l-​kredent ikun lest li jissogra ħajtu elf darba għaliha.”—Martin Luther, 1522.

“Effettivament aħna diġà soċjetà sekulari fejn il-​fidi u l-​prattiċi Kristjani tistaʼ tgħid li m’għadhomx jeżistu.”—Ludovic Kennedỵ, 1999.

HEMM ħarsiet differenti dwar x’inhi l-​fidi. Fil-​passat, il-​fidi f’Alla kienet xi ħaġa komuni. Illum, f’dinja kollha xettiċiżmu u sofferenza, il-​fidi vera f’Alla u fil-​Bibbja qed tisparixxi bil-​ħeffa.

Il-​Fidi Vera

Għal ħafna, il-​“fidi” tfisser biss li jkollok twemmin reliġjuż jew issegwi forma taʼ qima. Madankollu, kif inhi użata fil-​Bibbja, il-​“fidi” bażikament tfisser fiduċja totali—fiduċja kompleta u soda f’Alla u l-​wegħdi tiegħu. Hija kwalità li timmarka dixxiplu taʼ Ġesù Kristu.

F’okkażjoni waħda, Ġesù Kristu tkellem dwar il-​bżonn li nitolbu u ‘ma naqtgħux qalbna.’ Rigward dan, hu qajjem mistoqsija dwar jekk fi żmienna se tkunx teżisti l-​fidi vera. Hu staqsa: “Meta jiġi Bin il-​bniedem, isib [din] il-​fidi fuq l-​art?” Għala staqsa mistoqsija bħal din?—Luqa 18:​1, 8, Karm Żammit.

Fidi Mitlufa

Ħafna affarijiet jistgħu jġagħlu lin-​nies jitilfu kwalunkwe fidi li jistaʼ jkollhom. Fost dawn l-​affarijiet hemm trawmi jew provi fil-​ħajja taʼ kuljum. Per eżempju, il-​Professur Michael Goulder kien kappillan taʼ parroċċa f’Manchester, l-​Ingilterra, fiż-​żmien taʼ l-​1958 meta kien ikkraxxja l-​ajruplan fi Munich u li fih kienu mietu ħafna mit-​tim tal-​futbol tal-​Manchester United. Fi programm tat-​televixin tal-​BBC, l-​annunzjatriċi Joan Bakewell spjegat li Goulder “ħassu li ma jistaʼ jagħmel xejn meta ra kemm kien kbir in-​niket tan-​nies.” Bħala riżultat “tilef il-​fidi tiegħu f’Alla li jintervieni fid-​destin tal-​bniedem.” Goulder stqarr it-​twemmin tiegħu li “l-​Bibbja m’hijiex . . . il-​kelma infallibbli t’Alla” imma, pjuttost, “il-​kelma fallibbli tal-​bniedem, forsi b’xi ispirazzjoni divina ’l hawn u ’l hemm.”

Xi drabi, il-​fidi sempliċement tispiċċa fix-​xejn. Hekk ġara fil-​każ tal-​kittieb u preżentatur Ludovic Kennedy. Hu jgħid li mit-​tfulija “kultant kien [ikollu] dubji u inċertezzi [dwar Alla] u t-​twemmin [tiegħu] beda jonqos.” Mid-​dehra, ħadd ma setaʼ jagħtih tweġibiet sodisfaċenti għall-​mistoqsijiet tiegħu. Il-​mewt taʼ missieru fil-​baħar kienet daqqa taʼ ħarta għall-​fidi tiegħu li diġà kienet dgħajfa ħafna. Talb lil Alla, bħal “ippreservana mill-​perikli tal-​baħar u mill-​vjolenza taʼ l-​għadu” ma ġiex imwieġeb hekk kif il-​bastiment tal-​passiġġieri, li kienu saru xi bidliet fih u li missieru kien fuqu, ġie attakkat u meqrud mill-​bastimenti tal-​gwerra Ġermaniżi matul it-​Tieni Gwerra Dinjija.—All in the Mind​—A Farewell to God.

Esperjenzi bħal dawn huma komuni. “Mhux kulħadd għandu l-​fidi,” jgħid l-​appostlu Pawlu. (2 Tessalonikin 3:2) X’taħseb? Għadha possibbli l-​fidi vera f’Alla u fil-​Kelma tiegħu f’dinja fejn ix-​xettiċiżmu dejjem jiżdied? Eżamina x’għandu x’jgħid l-​artiklu li jmiss fuq dan is-​suġġett.