Saħħa Tajba għal Kulħadd—Tistaʼ Tintlaħaq Din il-​Mira?

TIXTIEQ li int u l-​familja tiegħek tkunu tistgħu tgawdu saħħa aħjar? Dażgur li tixtieq. Imma filwaqt li l-​biċċa l-​kbira minna nimirdu biss darba kultant b’mard mhux serju, miljuni taʼ nies ikollhom jgħixu għomorhom kollu bil-​mard u bl-​uġigħ li dan iġib miegħu.

Madankollu qed isiru sforzi kbar biex il-​mard ma jibqax jiżdied daqshekk. Ikkunsidra l-​Organizzazzjoni Dinjija tas-​Saħħa (World Health Organization [WHO]), li hija waħda mill-​aġenziji tal-​Ġnus Magħquda. F’konferenza sponsorjata mill-​WHO fl-​1978, delegati minn 134 pajjiż u 67 organizzazzjoni tal-​Ġnus Magħquda qablu li s-​saħħa m’hijiex sempliċement li wieħed ma jkunx marid. Is-​saħħa, skond kif iddikjaraw huma, hija “stat taʼ benesseri fiżiku, mentali u soċjali totali.” Id-​delegati mbagħad iddikjaraw bil-​kuraġġ li s-​saħħa hija “dritt fundamentali tal-​bniedem”! B’hekk, il-​WHO għamlet mira li tilħaq “livell aċċettabbli taʼ saħħa għan-​nies kollha tad-​dinja.”

Din il-​mira hija sabiħa, u saħansitra nobbli. Imma kemm hemm ċans li xi darba tintlaħaq? Mill-​oqsma kollha taʼ l-​attivitajiet tal-​bniedem, il-​qasam tal-​mediċina żgur li sar wieħed mill-​iktar fdati u ammirati. Skond il-​gazzetta Britannika The European, in-​nies fil-​pajjiżi tal-​Punent draw il-​konċett mediku tradizzjonali tal-​kura maġika, jiġifieri li teżisti pillola għal kull problema li tqum. Fi kliem ieħor, għal kull marda, nistennew li l-​qasam tal-​mediċina jagħtina kura sempliċi u eżatta. Tistaʼ l-​professjoni medika tassew twettaq dawn l-​affarijiet kbar li huma tant mistennija minnha?