Għala Mmutu?
“Fuq l-għoljiet kollha hemm il-kwiet issa, fil-qċaċet tas-siġar kollha bilkemm tismaʼ nifs; l-għasafar reqdin fis-siġar: stenna; dalwaqt bħal dawn int se tistrieħ.”—JOHANN WOLFGANG VON GOETHE, POETA ĠERMANIŻ.
1, 2. (a) Il-bnedmin inħolqu b’liema xewqa? (b) Liema xorta taʼ ħajja gawdiet l-ewwel koppja umana?
ALLA ħalaq ’il-bnedmin b’xewqa kbira li jgħixu għal dejjem. Tabilħaqq, il-Bibbja tgħid li hu poġġa “f’qalb ulied il-bniedem il-ħsieb taʼ l-eternità.” (Ekkleżjażti 3:11, KŻ) Imma Alla mhux biss ta lill-bnedmin ix-xewqa li jgħixu għal dejjem. Hu tahom ukoll l-opportunità li jagħmlu hekk.
2 L-ewwel ġenituri tagħna, Adam u Eva, inħolqu perfetti, mingħajr ebda difett fil-moħħ jew fil-ġisem. (Dewteronomju 32:4) Immaġina—ebda mard u wġigħ kroniku, ebda biżaʼ u ansjetajiet morbużi! Iktar minn hekk, Alla poġġiehom f’dar ġenna sabiħa. Kien l-iskop t’Alla li l-bniedem jgħix għal dejjem u li maż-żmien l-art tkun mimlija bin-nisel perfett tiegħu. (Ġenesi 1:31; 2:15) Allura, għala mmutu?
Id-Diżubbidjenza Ġġib il-Mewt
3. Il-ħajja eterna għal Adam u Eva kienet tiddependi fuq liema ħaġa?
3 Alla kkmanda lil Adam: “Mis-siġar kollha tal-ġnien tistaʼ tiekol, imma mis-siġra taʼ tagħrif it-tajjeb u l-ħażin, la tikolx minnha, għax dak in-nhar li tiekol minnha żgur li tmut.” (Ġenesi 2:16, 17) Mela ħajja eterna għal Adam u Eva kienet taħt kundizzjoni; kienet tiddependi fuq l-ubbidjenza tagħhom lejn Alla.
4. Meta Adam u Eva dinbu, għala tilfu l-prospett li jgħixu għal dejjem fil-Ġenna?
4 Traġikament, madankollu, Adam u Eva ma obdewx il-liġi t’Alla. (Ġenesi 3:1-6) Kaġun taʼ dan, saru midinbin, għax “id-dnub huwa l-ksur tal-liġi.” (1 Ġwann 3:4) Bħala riżultat, Adam u Eva ma kellhomx iktar il-prospett taʼ ħajja eterna. Għala? “Għax il-ħlas tad-dnub hu l-mewt.” (Rumani 6:23) B’hekk, meta Alla ddikjara s-sentenza fuq Adam u Eva, hu qal: “Trab int, u fit-trab terġaʼ tmur.” L-ewwel ġenituri tagħna mbagħad ġew espulsi mid-dar Ġenna tagħhom. Fil-jum li dinbu, Adam u Eva bdew il-proċess bil-qajla, imma kontinwu, tal-mewt.—Ġenesi 3:19, 23, 24.
“Il-Mewt Laħqet il-Bnedmin Kollha”
5. Il-mewt kif infirxet għal fuq ir-razza umana intiera?
5 Adam u Eva issa kellhom id-dnub minqux fil-fond fil-ġeni tagħhom. Għaldaqstant, ma setgħux jipproduċu nisel perfett, daqs kemm tistaʼ forma imperfetta tipproduċi oġġett perfett. (Ġob 14:4) Tabilħaqq, kull twelid uman jikkonferma li l-ewwel ġenituri tagħna tilfu saħħa perfetta u ħajja eterna għalihom infushom u għal taʼ warajhom. L-appostlu Kristjan Pawlu kiteb: “Bħalma kien permezz taʼ bniedem wieħed li fid-dinja daħal id-dnub, u permezz tad-dnub il-mewt, u hekk il-mewt laħqet il-bnedmin kollha, għax kollha dinbu.”—Rumani 5:12; qabbel Salm 51:7 [51:5, NW].
6. Għala mmutu?
6 Illum ix-xjenzati ma jafux eżatt għala l-bnedmin jixjieħu u jmutu. Il-Bibbja, madankollu, tispjega li aħna mmutu għaliex nitwieldu midinbin, billi writna din il-kundizzjoni mingħand l-ewwel ġenituri umani tagħna. Imma x’jiġrilna meta mmutu?