Il-​Ġenna tal-​Art Mitlufa

ĦAFNA qabel ma ħalaq lill-​bnedmin, Alla ħalaq ħafna ħlejjaq spirti inviżibbli—l-​anġli. Fl-​Għeden, anġlu ribelluż, li sar magħruf bħala Satana x-​Xitan, b’makakkerija għamel ħiltu biex iħajjar lil Eva ħalli tiekol mill-​frott tal-​unika siġra projbita minn Alla.

Billi nqeda b’serp biex ikellimha, Satana sostna li Alla kien qed iċaħħad lill-​mara u lil żewġha minn xi ħaġa mixtieqa. L-​anġlu qal lil Eva li hi u r-​raġel tagħha ma kinux se jmutu jekk jieklu mill-​frott projbit. B’hekk, Satana akkuża lil Alla li gideb lill-​ulied Tiegħu l-​bnedmin. Il-​Qarrieq ippreżenta d-​diżubbidjenza lejn Alla bħala xi ħaġa attraenti li kienet se twassal għal għarfien speċjali u libertà. Imma din ma kienet xejn ħlief gidba—fil-​fatt, kienet l-​ewwel gidba li qatt intqalet fuq l-​art. Il-​veru qofol tal-​kwistjoni kienet tinvolvi s-​sovranità, jew il-​ħakma suprema, t’Alla—jekk Alla għandux id-​dritt li jaħkem u jekk jaħkimx b’mod ġust u fl-​aħjar interessi tas-​sudditi tiegħu.

Eva emmnet il-​gidba taʼ Satana. Bdiet tixxennaq għall-​frott, u mbagħad spiċċat biex kielet minnu. Iktar tard, tat ftit lil żewġha, u hu wkoll kiel minnu. B’hekk, saru midinbin. Dan l-​att li jidher li mhu xejn fil-​fatt kien espressjoni taʼ ribelljoni. Billi minn jeddhom għażlu li ma jobdux il-​kmand t’Alla, Adam u Eva ċaħdu l-​ħakma tal-​Ħallieq li kien tahom kollox, inkluż ħajja perfetta.

Alla talab kont mir-​ribelli għall-​azzjonijiet tagħhom. Hu wiegħed il-​miġja tan-​Nisel, jew Ħellies, li kellu jeqred lil Satana, il-​wieħed rappreżentat mis-​serp. Alla ma wettaqx mill-​ewwel is-​sentenza tal-​mewt li kien ta lil Adam u Eva, u b’hekk wera ħniena mad-​dixxendenti tagħhom li kienu għadhom ma twildux. Dawn l-​ulied kien se jkollhom bażi għal tama għax Dak li Alla kien se jibgħat kellu jġib fix-​xejn il-​konsegwenzi traġiċi li rriżultaw mill-​irvell fl-​Għeden. Bil-​mod il-​mod, hekk kif kompliet tinkiteb il-​Bibbja, ġie rivelat eżattament kif kien se jitwettaq l-​iskop t’Alla dwar dan is-​Salvatur li kellu jiġi fil-​futur—u dwar min kien se jkun Dan il-​mibgħut.

Alla keċċa lil Adam u Eva mill-​Ġenna tal-​art. Kien bl-​għaraq taʼ ġbinhom u b’taħbit kbir li kellhom imantnu lilhom infushom billi jikkultivaw il-​ħamrija barra l-​ġnien tal-​Għeden. Imbagħad, Eva ħarġet tqila u wildet lil Kajjin, l-​ewwel iben t’Adam u Eva. Il-​koppja kellha wlied subien u bniet oħrajn, fosthom Abel u Set, l-​antenat taʼ Noè.

—Ibbażat fuq Ġenesi kapitli 3 sa 5; Rivelazzjoni 12:9.