L-​Għajn taʼ l-​Ajkla

MINN KITTIEB TAʼ STENBAĦ! FI SPANJA

L-​ISPANJOLI jiddeskrivu raġel b’vista qawwija u tajba bħala li għandu vista t’ajkla (vista de águila). Il-​Ġermaniżi għandhom espressjoni simili (Adlerauge). Mhux taʼ b’xejn li l-​vista tant qawwija taʼ l-​ajkla kienet fuq fomm ħafna nies matul is-​sekli. Il-​ktieb taʼ Ġob, miktub fuq tlett elef sena ilu, dwar l-​ajkla jgħid: ‘Fil-​bogħod għajnejha jħarsu.’—Ġob 39:​27, 29, Saydon.

Imma l-​ajkla fil-​fatt kemm tistaʼ tara fil-​bogħod? “Taħt kundizzjonijiet ideali, ajkla rjali (Aquila chrysaetos) [bl-Ingliż golden eagle], tistaʼ taqbad movimenti żgħar taʼ fenek minn iktar minn 2 kilometri ’l bogħod,” jispjega The Guinness Book of Animal Records. Oħrajn ikkalkulaw li l-​ajkla tistaʼ saħansitra tara iktar minn hekk!

Imma x’jagħti lill-​ajkla vista daqshekk qawwija? L-​ewwelnett, l-​ajkla rjali għandha żewġ għajnejn kbar li jokkupaw parti kbira minn rasha. Il-​ktieb Book of British Birds jinnota li fil-​każ taʼ l-​ajkla rjali, għajnejha “huma, fil-​fatt, kbar kemm jistaʼ jkun, mingħajr ma huma tant tqal li jfixklu t-​titjir.”

Iktar minn hekk, l-​għajnejn taʼ l-​ajkla għandhom ċelluli li jirċievu d-​dawl madwar ħames darbiet iktar milli għandu l-​bniedem​—xi 1,000,000 ċellula bħal konijiet għal kull millimetru kwadru meta mqabbel mal-​200,000 li għandna aħna. Kważi kull waħda minn dawn iċ-​ċelluli hija mqabbda maʼ newron. Bħala riżultat, in-​nerv ottiku taʼ l-​ajkla, li jġorr messaġġi mill-​għajn għall-​moħħ, għandu ammont doppju taʼ fibri milli għandu l-​bniedem. Mhux taʼ b’xejn li dawn il-​kreaturi għandhom il-​fakultà li jaraw il-​kuluri daqshekk tajjeb! Fl-​aħħarnett, it-​tajr tal-​priża, bħal għasafar oħrajn, għandu għajnejn armati b’lenti qawwija li kapaċi tbiddel l-​iffokar minn oġġetti pulzier ’il bogħod sa dawk f’distanza mbiegħda. Għajnejhom huma wisq aħjar minn tagħna f’dan ir-​rigward ukoll.

Il-​vista taʼ l-​ajkla hija unika matul id-​dawl tal-​ġurnata, imma bil-​lejl il-​kokka tgħaddiha. It-​tajr tal-​priża taʼ bil-​lejl għandu għajnejn b’ħafna ċelluli qishom vireg li huma sensittivi għad-​dawl u għandu wkoll lenti b’wiċċ kbir. Bħala riżultat, jistgħu jaraw 100 darba aħjar bil-​lejl milli nistgħu naraw aħna. Madankollu, f’dawk l-​okkażjonijiet rari, meta jkun hemm dlam ċappa, il-​kokka trid tiddependi biss fuq is-​smigħ tajjeb tagħha biex issib il-​priża.

Min ta lil dawn l-​għasafar attributi bħal dawn? Alla staqsa lil Ġob: “L-​ajkla b’ordni tiegħek li titlaʼ fl-​għoli?” Ovvjament, l-​ebda bniedem ma jistaʼ jieħu l-​kredtu għal din il-​meravilja tal-​ħolqien. Ġob innifsu bl-​umiltà ammetta: “Jien naf li inti [Jehovah] tistaʼ kollox.” (Ġob 39:27; 42:​1, 2) L-​għajn taʼ l-​ajkla hija biss xiehda oħra taʼ l-​għerf tal-​Ħallieq tagħna.

[Stampa f’paġna 24]

Ajkla rjali

[Stampa f’paġna 24]

Kokka bajda kbira