It-​“Tempju” u l-​“Prinċep” Illum

“Il-​prinċep imbagħad li jkun f’nofshom, jidħol meta jidħlu huma u joħroġ meta joħorġu huma.”—EŻEKJEL 46:10.

1, 2. Liema verità fundamentali tgħinna niżvelaw ħafna mit-​tifsira tal-​viżjoni t’Eżekjel dwar it-​tempju?

XI RABBINI tal-​qedem ma tantx kienu sodisfatti bil-​ktieb t’Eżekjel. Skond it-​Talmud, xi wħud minnhom saħansitra kkunsidraw li lil dan il-​ktieb iħalluh barra mil-​lista taʼ kotba kanoniċi taʼ l-​Iskrittura Mqaddsa. Huma ma setgħux isibu rkaptu tal-​viżjoni tat-​tempju u qabdu u ddikjaraw li din ħadd ma setaʼ jifhimha. Xi studjużi oħrajn tal-​Bibbja wkoll tħawdu b’din il-​viżjoni t’Eżekjel dwar it-​tempju. Xi ngħidu għalina?

² Minn mindu ġiet irrestawrata l-​qima pura, Jehovah bierek lin-​nies tiegħu b’ħafna leħħiet taʼ dehen spiritwali, inkluż id-​dixxerniment dwar x’inhu t-​tempju spiritwali t’Alla​—l-​arranġament bħal dak tat-​tempju taʼ Jehovah għall-​qima pura.a Din il-​verità fundamentali tgħinna niżvelaw ħafna mit-​tifsira tal-​viżjoni t’Eżekjel dwar it-​tempju. Ejja nikkunsidraw iktar mill-​qrib l-​erbaʼ aspetti taʼ din il-​viżjoni​—it-​tempju, is-​saċerdozju, il-​prinċep, u l-​art. Dawn x’ifissru llum?

It-​Tempju u Int

3. X’nitgħallmu mis-​saqaf għoli ħafna u t-​tinqix fuq il-​ħajt fid-​daħliet tat-​tempju?

³ Immaġina li qed induru dawra maʼ dan it-​tempju viżjonarju. Navviċinawh u nitilgħu sebaʼ tarġiet lejn wieħed mill-​bibien enormi. Fid-​daħla taʼ dan il-​bieb, inħarsu ’l fuq u nibqgħu skantati u mnixxfin. Is-​saqaf fuq rasna huwa għoli iktar minn 30 metru! B’hekk aħna mfakkrin li l-​livelli biex nidħlu fl-​arranġament għall-​qima taʼ Jehovah huma għoljin ferm. Xquq taʼ dawl li jidħlu mit-​twieqi jdawlu s-​siġar tal-​palm minquxin fuq il-​ħajt, li l-​Iskrittura tużahom biex tagħti stampa taʼ xi ħadd rett. (Salm 92:13 [Salm 92:12, NW]; [Eżekjel 40:14,16, 22 NW]) Dan il-​post sagru hu għal dawk li huma retti kemm moralment kif ukoll spiritwalment. Fi qbil maʼ dan, aħna rridu nibqgħu retti sabiex il-​qima tagħna tkun aċċettabbli għal Jehovah.—Salm 11:7.

4. Min ma jitħalliex jidħol fit-​tempju, u x’nitgħallmu minn dan?

⁴ Fuq kull naħa tal-​kuritur, hemm tlett ikmamar taʼ l-​għassiesa. Tgħid l-​għassiesa jħalluna nidħlu fit-​tempju? Jehovah jgħid lil Eżekjel li l-​ebda barrani “bla ħtin f’qalbu” ma jistaʼ jidħol. (Eżekjel 40:10; 44:9) Dan x’ifisser? Ifisser li Alla jaċċetta bħala adoraturi tiegħu lil dawk biss li jħobbu l-​liġijiet tiegħu u jgħixu fi qbil magħhom. (Ġeremija 4:4; Rumani 2:29) Hu jilqaʼ wħud bħal dawn fit-​tinda spiritwali tiegħu, id-​dar taʼ qima tiegħu. (Salm 15:1-5) Minn mindu ġiet irrestawrata l-​qima pura fl-​1919, l-​organizzazzjoni taʼ Jehovah fuq l-​art appoġġat il-​liġijiet morali tiegħu u ċċarathom b’mod progressiv. Dawk li minn jeddhom jirrifjutaw li jobdu ma jibqgħux jiġu milqugħin bħala mseħbin mal-​poplu tiegħu. Illum, din id-​drawwa bbażata fuq il-​Bibbja tat-​tkeċċija taʼ dawk li jagħmlu l-​ħażen u ma jindmux serviet biex il-​qima tagħna tinżamm nadifa u safja.—1 Korintin 5:13.

5. (a) Liema similaritajiet hemm bejn il-​viżjoni t’Eżekjel u l-​viżjoni taʼ Ġwanni mniżżla f’Apokalissi 7:9-15? (b) Fil-​viżjoni t’Eżekjel, it-​12-il tribù li qed iqimu fil-​bitħa taʼ barra taʼ min jagħtu stampa?

⁵ Il-​kuritur jiftaħ għal ġol-​bitħa taʼ barra, fejn in-​nies iqimu u jfaħħru lil Jehovah. Dan ifakkarna fil-​viżjoni taʼ l-​appostlu Ġwanni dwar il-​“kotra kbira” li qed iqimu lil Jehovah “lejl u nhar . . . fit-​tempju tiegħu.” Is-​siġar tal-​palm jinsabu fiż-​żewġ viżjonijiet. Fil-​viżjoni t’Eżekjel dawn iżejnu l-​ħitan tad-​daħla. F’dik taʼ Ġwanni l-​adoraturi għandhom friegħi tal-​palm f’idejhom, li jissimbolizzaw il-​ferħ tagħhom f’li jfaħħru lil Jehovah u f’li jagħtu merħba lil Ġesù bħala s-​Sultan tagħhom. (Apokalissi 7:9-15) Fil-​kuntest tal-​viżjoni t’Eżekjel, it-​12-il tribù taʼ Iżrael jagħtu stampa tan-​“nagħaġ oħra.” (Ġwann 10:16; qabbel Luqa 22:​28-​30.) Int ukoll wieħed minn dawk li jsibu l-​ferħ f’li jfaħħru lil Jehovah billi jipproklamaw is-​Saltna tiegħu?

6. X’kien l-​iskop tal-​kmamar taʼ l-​ikel fil-​bitħa taʼ barra, u lin-​nagħaġ oħrajn dwar liema privileġġ għandu mnejn ifakkarhom dan?

⁶ Hekk kif induru dawra mal-​bitħa taʼ barra, naraw it-​30 kamra taʼ l-​ikel fejn in-​nies jieħdu sehem mill-​offerti volontarji tagħhom. (Eżekjel 40:17) Illum, dawk min-​nagħaġ oħrajn ma joffrux annimali bħala sagrifiċċji, però ma jiġux b’idhom f’idhom lejn it-​tempju spiritwali. (Qabbel Eżodu 23:15.) L-​appostlu Pawlu kiteb: “B’Ġesù, mela, ejjew noffru f’kull ħin lil Alla sagrifiċċju taʼ tifħir, jiġifieri l-​kelma taʼ xufftejna li tistqarr ismu. Tinsewx tagħmlu l-​ġid lill-​oħrajn, u taqsmu bejnietkom dak li għandkom, għax b’sagrifiċċji bħal dawn jitgħaxxaq Alla.” (Lhud 13:15, 16; Hosegħa 14:3 [Hosegħa 14:2, NW]) Huwa privileġġ kbir li noffru sagrifiċċji bħal dawn lil Jehovah.—Proverbji 3:9, 27.

7. Il-​kejl tat-​tempju dwar liema ħaġa jaċċertana?

⁷ Eżekjel jibqaʼ jħares waqt li anġlu jkejjel dan it-​tempju viżjonarju. (Eżekjel 40:3) Bl-​istess mod, l-​appostlu Ġwanni ntqallu: “Qum, u ħu l-​qisien tat-​tempju taʼ Alla u taʼ l-​artal u taʼ dawk li qegħdin jagħtu qima fih.” (Apokalissi 11:1) X’ifisser dan il-​kejl? Fiż-​żewġ każi dan mid-​dehra serva bħala garanzija, sinjal li xejn ma jistaʼ jwaqqaf lil Jehovah milli jwettaq l-​iskopijiet tiegħu rigward il-​qima pura. L-​istess illum, aħna nistgħu nibqgħu ċerti li xejn​—lanqas saħansitra oppożizzjoni ħarxa minn gvernijiet setgħanin—​ma jistaʼ jwaqqaf ir-​restawr tal-​qima pura.

8. Min jidħol mill-​bibien għal ġol-​bitħa taʼ ġewwa, u dawn il-​bibien fiex ifakkruna?

⁸ Hekk kif naqsmu l-​bitħa taʼ barra, naraw li hemm tliet bibien li jagħtu għal ġol-​bitħa taʼ ġewwa; il-​bibien taʼ ġewwa jinsabu bi dritt il-​bibien taʼ barra u huma taʼ l-​istess daqs. (Eżekjel 40:6, 20, 23, 24, 27) Il-​qassisin biss jistgħu jidħlu fil-​bitħa taʼ ġewwa. Il-​bibien taʼ ġewwa jfakkruna li l-​midlukin b’mod speċjali jridu jgħixu skond il-​livelli u l-​liġijiet divini, imma l-​istess liġijiet u livelli jiggwidaw lill-​Kristjani veri kollha. Imma x’inhu x-​xogħol tal-​qassisin, u x’tifsira għandu llum?

Saċerdozju Leali

9, 10. Is-​“saċerdozju rjali” bħalma hu rrappreżentat mill-​klassi saċerdotali fil-​viżjoni t’Eżekjel, kif ipprovda istruzzjoni spiritwali?

⁹ Fiż-​żminijiet taʼ qabel il-​Kristjanità, il-​qassisin kienu jagħmlu xogħol iebes fit-​tempju. Il-​fatt li riedu joqtlu l-​annimali tas-​sagrifiċċju, joffruhom fuq l-​artal, u jservu lill-​qassisin sħabhom u lin-​nies kien jirrikjedi sforz fiżiku. Imma huma kellhom xogħol importanti ieħor. Jehovah kkmanda rigward il-​qassisin: “Għandhom juru lill-​poplu tiegħi kif jagħżel dak li hu sagru minn dak li hu profan, u jgħallmuhom jagħżlu bejn dak li hu mniġġes u dak li hu nadif.”—Eżekjel 44:23; Malakija 2:7.

¹⁰ Tapprezzah int ix-​xogħol iebes u s-​servizz umli li l-​midlukin bħala ġemgħa, is-​“saċerdozju rjali,” għamlu b’appoġġ għall-​qima pura? (1 Pietru 2:9) Bħal dawk il-​qassisin Levitiċi tal-​qedem, huma kienu u għadhom minn taʼ quddiem f’li jagħtu istruzzjoni spiritwali, billi jgħinu lin-​nies jifhmu dak li hu nadif u aċċettabbli f’għajnejn Alla u dak li m’huwiex. (Mattew 24:45) Istruzzjoni bħal din li ġejja minn pubblikazzjonijiet ibbażati fuq il-​Bibbja u mil-​laqgħat u l-​konvenzjonijiet Kristjani, għenet lil miljuni biex jirrikonċiljaw ruħhom m’Alla.—2 Korintin 5:20.

11. (a) Il-​viżjoni t’Eżekjel kif enfasizzat l-​importanza taʼ l-​indafa min-​naħa tal-​qassisin? (b) F’dawn l-​aħħar jiem, il-​midlukin kif tnaddfu f’sens spiritwali?

¹¹ Madankollu, il-​qassisin iridu jagħmlu iktar milli sempliċement jgħallmu lil oħrajn biex ikunu nodfa; iridu jkunu nodfa huma nfushom. B’hekk, Eżekjel ra bil-​quddiem proċess taʼ raffinar għas-​saċerdozju taʼ Iżrael. (Eżekjel 44:10-16) Bl-​istess mod, l-​istorja turi li fl-​1918, Jehovah għamilha taʼ “wieħed li jsaffi” fit-​tempju spiritwali tiegħu, billi eżamina l-​klassi midluka taʼ qassisin. (Malakija 3:1-5) Dawk li tqiesu bħala nodfa spiritwalment jew nidmu minn kull idolatrija taʼ qabel tħallew ikomplu fil-​privileġġ taʼ servizz fit-​tempju spiritwali tiegħu. Xorta waħda, bħal kwalunkwe bniedem ieħor, uħud midlukin individwali jistgħu ma jibqgħux nodfa​—spiritwalment jew moralment. (Eżekjel 44:22, 25-27) Huma kellhom jaħdmu iebes biex jibqgħu “bla tinġis . . . mid-​dinja.”—Ġakbu 1:27; qabbel Mark 7:20-23.

12. Għala għandna napprezzawh ix-​xogħol tal-​midlukin?

¹² Kull wieħed u waħda minna nistgħu nistaqsu, ‘Napprezzah jien l-​eżempju li stabbilew il-​midlukin matul dawn il-​ħafna snin taʼ servizz leali tagħhom? Nimitaha jien il-​fidi tagħhom?’ Dawk minn tal-​folla kbira jagħmlu tajjeb li jiftakru li mhux dejjem se jkollhom lill-​midlukin magħhom hawn fuq l-​art. Dwar il-​qassisin fil-​viżjoni t’Eżekjel, Jehovah qal: “Ma tingħatalhom ebda propjetà [taʼ art] f’Iżrael, jiena l-​propjetà tagħhom.” (Eżekjel 44:28) Bl-​istess mod, il-​midlukin m’għandhom ebda post taʼ dejjem fuq l-​art. Huma għandhom wirt fis-​sema, u dawk tal-​folla kbira jqisuh bħala privileġġ li jappoġġawhom u jinkuraġġuhom waqt li jkunu għadhom hawn fuq l-​art.—Mattew 25:34-40; 1 Pietru 1:3, 4.

Il-​Prinċep​—Min Hu?

13, 14. (a) Il-​prinċep għala bilfors irid ikun min-​nagħaġ oħrajn? (b) Il-​prinċep taʼ min jagħti stampa?

¹³ Issa tqum mistoqsija interessanti ferm. Allura, il-​prinċep lil min jirrappreżenta? Ladarba dan jissemma kemm bħala individwu u kemm bħala grupp, nistgħu nassumu li hu jirrappreżenta lil klassi taʼ bnedmin. (Eżekjel 44:3; 45:8, 9) Imma lil min? Żgur mhux lill-​midlukin. Fil-​viżjoni, dan jaħdem fil-​qrib mas-​saċerdozju, imma m’huwiex wieħed minnhom. Kuntrarju għall-​klassi taʼ qassisin, hu jingħata wirt fl-​art u b’hekk għandu futur hawn fuq l-​art u mhux fis-​sema. (Eżekjel 48:21) Barra minn hekk, Eżekjel 46:10 jgħid: “Il-​prinċep imbagħad li jkun f’nofshom, jidħol [fil-bitħa taʼ barra tat-​tempju] meta jidħlu huma [it-tribujiet li ma kinux qassisin] u joħroġ meta joħorġu huma.” Hu ma jidħolx fil-​bitħa taʼ ġewwa imma jqim fil-​bitħa taʼ barra, u jidħol u joħroġ mit-​tempju man-​nies. Dawn il-​fatturi jpoġġu b’mod deċiżiv lil din il-​klassi prospettiva tal-​prinċep fost il-​folla kbira taʼ nagħaġ oħrajn.

¹⁴ Jidher ċar li l-​prinċep għandu xi forma taʼ responsabbiltà fost in-​nies t’Alla. Fil-​bitħa taʼ barra, hu jpoġġi bil-​qegħda fuq il-​portiku tal-​Bieb tal-​Lvant. (Eżekjel 44:2, 3) Dan jindika pożizzjoni taʼ indokrar, simili għal dik taʼ l-​irġiel ixjeħ taʼ Iżrael, li kienu joqogħdu bil-​qegħda ħdejn bieb il-​belt u jagħmlu l-​ħaqq. (Rut 4:1-12; Proverbji 22:22) Min illum fost in-​nagħaġ oħrajn għandu l-​inkarigu taʼ indokrar? Anzjani b’tama għall-​art li nħatru mill-​ispirtu qaddis. (Atti 20:28) Għalhekk, il-​klassi tal-​prinċep issa tinsab fil-​proċess li tiġi mħejjija bil-​prospett li iktar tard taqdi fuq livell amministrattiv fid-​dinja l-​ġdida.

15. (a) Il-​viżjoni t’Eżekjel kif titfaʼ dawl fuq ir-​relazzjoni bejn l-​anzjani li huma mill-​folla kbira u l-​klassi saċerdotali midluka? (b) Liema tmexxija ħadu l-​anzjani midlukin fl-​organizzazzjoni t’Alla fuq l-​art?

¹⁵ Iżda, illum x’inhi r-​relazzjoni bejn il-​klassi midluka taʼ qassisin u dawn l-​irġiel ixjeħ li, bħala parti mill-​folla kbira, qegħdin issa jaqdu f’inkarigi taʼ indokrar? Il-​viżjoni t’Eżekjel tissuġġerixxi li l-​anzjani li huma membri tal-​folla kbira għandhom irwol inferjuri u t’appoġġ, waqt li l-​midlukin jieħdu t-​tmexxija spiritwali. Dan kif? Ftakar li l-​qassisin fil-​viżjoni ngħataw ir-​responsabbiltà li jistruwixxu lin-​nies f’affarijiet spiritwali. Lil dawn intqalilhom ukoll biex jaġixxu bħala mħallfin f’kawżi legali. Barra minn hekk, il-​Leviti ġew inkarigati biex ikunu “għases” fil-​bibien tat-​tempju. (Eżekjel 44:11, 23, 24) Jidher ċar li l-​prinċep kellu jissottometti ruħu bl-​umiltà kollha għas-​servizzi spiritwali u t-​tmexxija tal-​qassisin. Allura, huwa xieraq li fi żmienna l-​midlukin ħadu t-​tmexxija fil-​qima pura. Per eżempju, il-​membri tal-​Ġemgħa li Tiggverna tax-​Xhieda taʼ Jehovah ntgħażlu minn fosthom. Dawn l-​anzjani midlukin u leali ilhom iħarrġu lill-​klassi li qed tiżviluppa tal-​prinċep għal għexur taʼ snin, billi jippreparaw lill-​membri prospettivi taʼ din il-​klassi għall-​jum meta huma se jingħataw l-​awtorità sħiħa li huma dovuti fid-​dinja ġdida li ġejja t’Alla.

16. Skond Isaija 32:1, 2, kif iridu jaġixxu l-​anzjani kollha?

¹⁶ X’tip taʼ indokraturi huma dawn il-​membri prospettivi li qegħdin jantiċipaw li se jkollhom iktar responsabbiltajiet bħala l-​klassi tal-​prinċep? Il-​profezija li tinsab f’Isaija 32:1, 2 tgħid: “Araw, sultan għad isaltan bil-​ġustizzja, u prinċpijiet jaħkmu bis-​sewwa. U kull wieħed ikun bħal ilqugħ għar-​riħ, u kenn fit-​tempesta, bħal swieqi taʼ l-​ilma f’art niexfa, bħal dell taʼ blata kbira fuq art imħeddla.” Din il-​profezija qegħda titwettaq illum hekk kif l-​anzjani Kristjani​—mill-​midlukin u min-​nagħaġ oħrajn—​jaħdmu biex jipproteġu lill-​merħla minn ‘tempesti’ bħalma huma l-​persekuzzjoni u l-​iskuraġġiment.

17. Rgħajja Kristjani kif għandhom iqisu lilhom infushom, u l-​merħla kif għandha tqis lilhom?

¹⁷ Il-​kelmiet “prinċep” u “kap” (NW), li għandhom tifsira simili fl-​Ebrajk, m’humiex użati bħala titli bl-​intenzjoni li jeżaltaw lill-​bnedmin. Minflok, dawn jiddeskrivu r-​responsabbiltà li dawn l-​irġiel iġorru f’li jieħdu ħsieb in-​nagħaġ t’Alla. Jehovah jwissi b’mod iebes: “Issa biżżejjed, prinċpijiet taʼ Iżrael, warrbu l-​vjolenza u l-​moħqrija, u agħmlu l-​ħaqq u s-​sewwa.” (Eżekjel 45:9) Illum, l-​anzjani kollha jagħmlu tajjeb li jieħdu dan il-​parir bis-​serjetà. (1 Pietru 5:2, 3) Il-​merħla, mill-​banda l-​oħra, tirrikonoxxi li Ġesù pprovda rgħajja bħala “għotjiet fi rġiel.” (Efesin 4:8, NW) Il-​kwalifiki tagħhom huma mniżżlin fil-​Kelma mnebbħa t’Alla. (1 Timotju 3:1-7; Titu 1:5-9) Għalhekk, il-​Kristjani jsegwu l-​gwida taʼ l-​anzjani.—Lhud 13:7.

18. Liema huma xi ftit mir-​responsabbiltajiet tal-​klassi prospettiva tal-​prinċep issa, u x’se tkun ir-​responsabbiltà tagħha fil-​futur?

¹⁸ Fi żminijiet Bibliċi xi prinċpijiet kellhom ħafna awtorità, u oħrajn kellhom inqas. Illum, l-​anzjani mill-​folla kbira għandhom responsabbiltajiet li jvarjaw mhux ħażin. Xi wħud jaqdu f’kongregazzjoni waħda; oħrajn jaqdu f’ħafna kongregazzjonijiet bħala indokraturi li jivvjaġġaw; oħrajn jaqdu lil pajjiżi sħaħ bħala membri fil-​Kumitati tal-​Fergħat; oħrajn jgħinu direttament fid-​diversi kumitati tal-​Ġemgħa li Tiggverna. Fid-​dinja l-​ġdida, Ġesù se jaħtar “kapijiet fuq l-​art kollha” biex ikunu fuq quddiem fost l-​adoraturi taʼ Jehovah fuq l-​art. (Salm 45:17 [Salm 45:16, NW]) Bla dubju taʼ xejn, hu se jagħżel ħafna minn dawn minn fost l-​anzjani leali tal-​lum. Minħabba li dawn l-​irġiel qegħdin minn issa juru x’isarrfu, hu se jagħżel li jafda lil ħafna minnhom bi privileġġi saħansitra akbar fil-​futur meta jirrivela l-​irwol tal-​klassi tal-​prinċep fid-​dinja l-​ġdida.

L-​Art tal-​Poplu t’Alla llum

19. L-​art fil-​viżjoni t’Eżekjel x’tirrappreżenta?

¹⁹ Il-​viżjoni t’Eżekjel tagħti stampa wkoll taʼ l-​art irrestawrata taʼ Iżrael. Dan l-​aspett tal-​viżjoni x’jirrappreżenta? Profeziji taʼ restawr oħrajn bassru li l-​art, Iżrael, kellha tkun ġenna bħal Għeden. (Eżekjel 36:34, 35) Illum, aħna ngawdu “art” irrestawrata, u din ukoll f’ċertu sens qisha Għeden. B’mod simili, aħna taʼ spiss nitkellmu dwar il-​ġenna spiritwali tagħna. It-​Torri taʼ l-​Għassa ddefinixxa l-​“art” tagħna bħala l-​“qasam t’attività” tal-​poplu magħżul t’Alla.b Ikun fejn ikun, qaddej taʼ Jehovah jkun f’dik l-​art irrestawrata sakemm jibqaʼ jħabrek biex jappoġġa l-​qima vera billi jimxi fil-​passi taʼ Kristu Ġesù.—1 Pietru 2:21.

20. Liema prinċipju nistgħu nitgħallmu mill-​“biċċa art qaddisa” fil-​viżjoni t’Eżekjel, u kif nistgħu napplikawh dan il-​prinċipju?

²⁰ Xi ngħidu għall-​parti taʼ l-​art imsejħa l-​“biċċa art qaddisa”? Din kienet il-​kontribuzzjoni tal-​poplu t’Alla bħala appoġġ għas-​saċerdozju u għall-​belt. Bl-​istess mod, “il-​poplu kollu” kellu jikkontribwixxi biċċa art għall-​prinċep. Dan x’ifisser illum? M’għandniex xi ngħidu, dan ma jfissirx li l-​poplu t’Alla għandu jitgħabba bi klassi tal-​kleru li tirċievi salarju. (2 Tessalonikin 3:8) Pjuttost, l-​appoġġ mogħti lill-​anzjani huwa primarjament spiritwali. Dan jinkludi li nassistuhom fix-​xogħol li qed jitwettaq issa u li nuru spirtu taʼ kooperazzjoni u sottomissjoni. Madankollu, bħalma ġara fi żmien Eżekjel, din il-​kontribuzzjoni ssir “lil Jehovah,” u mhux lil xi bniedem kwalunkwe.—Eżekjel 45:1, 7, 16.

21. X’nistgħu nitgħallmu mit-​tqassim taʼ l-​art fil-​viżjoni t’Eżekjel?

²¹ M’humiex biss il-​prinċep u s-​saċerdozju li jiġu assenjati l-​postijiet f’din l-​art irrestawrata. Il-​mod kif titqassam l-​art juri li kull wieħed mit-​12-il tribù għandu wirt ċert. (Eżekjel 47:13, 22, 23) Għalhekk, dawk tal-​folla kbira mhux biss għandhom post fil-​ġenna spiritwali llum, imma wkoll se jirċievu biċċa art meta jirtu post fil-​qasam taʼ l-​art tas-​Saltna t’Alla.

22. (a) X’tirrappreżenta l-​belt fil-​viżjoni t’Eżekjel? (b) X’nistgħu nitgħallmu mill-​fatt li l-​belt għandha bibien fuq in-​naħat kollha?

²² Fl-​aħħarnett, il-​belt fil-​viżjoni x’tirrappreżenta? Din m’hijiex xi belt fis-​sema, għax din tinsab f’nofs l-​art “profana” (mhux qaddisa). (Eżekjel 48:15-17) Mela trid tkun xi ħaġa taʼ l-​art. Sewwa, x’inhi belt? Ma tagħtix din l-​idea taʼ nies miġburin flimkien bħala grupp u li qed jifformaw xi ħaġa strutturata u organizzata? Iva. Għaldaqstant, il-​belt tidher li tagħti stampa taʼ l-​amministrazzjoni fuq l-​art li tibbenefika lil dawk kollha li se jifformaw is-​soċjetà taʼ tjieba fuq l-​art. Din se topera bis-​sħiħ fl-​“art ġdida” li ġejja. (2 Pietru 3:13) Il-​bibien tal-​belt fuq in-​naħat kollha, wieħed għal kull tribù, juru sewwa kemm hija miftuħa. Illum, il-​poplu t’Alla m’huwiex taħt xi amministrazzjoni sigrieta u klandestina. Aħwa rġiel responsabbli jridu jkunu avviċinabbli; il-​prinċipji li jiggwidawhom kulħadd jafhom sew. Il-​fatt li nies minn kull tribù jikkultivaw l-​art li tipprovdi għall-​belt ifakkarna li n-​nagħaġ oħrajn jappoġġaw, saħansitra materjalment, l-​arranġamenti amministrattivi li saru għan-​nies t’Alla mad-​dinja kollha.—Eżekjel 48:19, 30-34.

23. X’se nikkunsidraw fl-​artiklu li jmiss?

²³ Xi ngħidu, iżda, għax-​xmara li tgelgel mis-​santwarju tat-​tempju? Dak li din tirrappreżenta llum u fil-​futur se jkun is-​suġġett tat-​tielet u l-​aħħar artiklu f’din is-​serje.

[Noti taʼ taħt]

Punti għal Reviżjoni

◻ It-​tempju fil-​viżjoni t’Eżekjel jagħti stampa taʼ liema ħaġa?

◻ Il-​qassisin li jaqdu fit-​tempju taʼ min jagħtu stampa?

◻ X’inhi l-​klassi tal-​prinċep, u x’inhuma xi ftit mir-​responsabbiltajiet tagħha?

◻ X’inhi l-​art fil-​viżjoni t’Eżekjel, u f’liema sens titqassam lit-​12-il tribù?

◻ Il-​belt taʼ liema ħaġa tagħti stampa?

[Dijagramma/Mappa f’paġna 15]

(Għall-formazzjoni sħiħa tat-​test, ara pubblikazzjoni)

Is-​sehem taʼ l-​art kif ngħata stampa tiegħu fil-​viżjoni t’Eżekjel

IT-​TNAX-IL TRIBÙ

Il-​Baħar il-​Kbir

Il-​Baħar tal-​Galilija

Ix-​Xmara Ġordan

Il-​Baħar il-​Mielaħ

DAN

ASER

NAFTALI

MANASSI

EFRAJM

RUBEN

ĠUDA

IL-​PRINĊEP

BENJAMIN

SIMGĦON

ISSAKAR

ŻEBULUN

GAD

[Dijagramma]

L-​ESTENSJONI TAL-​BIĊĊA ART QADDISA

A. “Jehovah Nnifsu Qiegħed Hemmhekk” (Jehovah​— Shammah); B. L-​art produttiva tal-​belt

Post il-​Leviti

It-​tempju taʼ Jehovah

Post il-​qassisin

B A B