Tidħlox fiż-​Żona taʼ Periklu!

IX-​XOGĦOL tal-​vulkanoloġi huwa li jagħmlu osservazzjonijiet u jiċċekkjaw l-​evidenza biex imbagħad iwissu meta vulkan ikun wasal biex jiżbroffa. (Meta żbroffat il-​Muntanja Fugen, il-​pulizija kellhom iżommu lin-​nies ’il barra miż-​żona taʼ periklu.) Bl-​istess mod, l-​istudenti tal-​Bibbja josservaw is-​sinjal taʼ “tmiem id-​dinja” u jagħmlu lil oħrajn konxji tal-​periklu li qed joqrob.—Mattew 24:3.

Fl-istess kapitlu Bibliku li jwissina li waslet katastrofi globali, nistgħu naqraw din id-​deskrizzjoni taʼ dak li jiġri qabel: “Iqum ġens kontra ġens u saltna kontra saltna, ikun hawn ġuħ kbir, u l-​art titheżheż f’ħafna bnadi. . . . Iqumu bosta profeti foloz u jqarrqu b’ħafna nies. Joktor il-​ħażen, u għalhekk l-​imħabba tibred f’ħafna. . . . Dan l-​Evanġelju tas-​Saltna jixxandar fid-​dinja kollha, biex il-​ġnus kollha jkollhom xhieda. Mbagħad jiġi t-​tmiem.”—Mattew 24:​7-14.

M’għandniex għalfejn inkunu analisti taʼ l-​aħbarijiet biex nifhmu li din il-​profezija qed titwettaq issa. Dan esperjenzajnieh b’mod speċjali mill-​1914 ’l hawn. Is-​seklu l-​ieħor ra żewġ gwerer dinjin, għadd taʼ gwerer ċivili, ġlied lokali, u konflitti razzjali u reliġjużi. Bħala riżultat taʼ dawn il-​gwerer, l-​umanità sofriet nuqqas taʼ ikel, flimkien maʼ nuqqasijiet oħrajn kaġunati minn diżastri naturali. It-​terremoti belgħu l-​ħajjiet taʼ ħafna nies. Feġġew ħafna kulti b’mexxejja dubjużi u segwaċi fanatiċi. Minħabba li ‘joktor il-​ħażen,’ in-​nies ma baqgħux juru mħabba, u li tkun ħabib mal-​ġirien tiegħek m’għadhiex iktar il-​ħaġa normali.

Aspett ieħor tas-​sinjal li qed jitwettaq mingħajr ebda dubju huwa x-​xogħol taʼ l-​ippridkar mad-​dinja kollha. Erġaʼ ħares lejn il-​qoxra taʼ barra taʼ din ir-​rivista, u tara l-​kliem “Jħabbar is-​Saltna taʼ Jehovah” bħala parti mit-​titlu. Pubblikat f’132 lingwa u b’ċirkulazzjoni taʼ iktar minn 22 miljun kopja, It-​Torri taʼ l-​Għassa huwa għodda ewlenija għal dawk li jippridkaw “dan l-​Evanġelju tas-​Saltna” maʼ l-​art abitata kollha. Din l-​aħbar tajba tinkludi l-​messaġġ li l-​Ħallieq taʼ l-​univers, Alla Jehovah, stabbilixxa s-​Saltna tas-​sema li se teqred lil din is-​sistema mill-​agħar t’affarijiet u se ġġib ġenna fuq l-​art. Tabilħaqq, issa nistgħu nosservaw is-​sinjal li Alla dalwaqt se jieħu azzjoni, u dan jindika li l-​ħajjiet tan-​nies f’din is-​sistema t’affarijiet huma fil-​periklu.—Qabbel it-​2 Timotju 3:​1-5; 2 Pietru 3:​3, 4; Apokalissi 6:​1-8. 

Il-​Jum taʼ Jehovah li Jqanqal il-​Biżaʼ

X’se jiġri meta ż-​żmien ikun xieraq għal Jehovah biex jesegwixxi l-​ġudizzju tiegħu? Ismaʼ d-​deskrizzjoni ħajja li jagħti hu stess taʼ dak li se jiġri mbagħad: “Fis-​sema u l-​art nuri sinjali, demm u nar u kolonni taʼ duħħan! Ix-​xemx tinbidel fi dlam, u l-​qamar f’demm, qabel ma jasal Jum il-​Mulej, kbir u tal-​biżaʼ!”—Ġoel 3:​3, 4 [2:​30, 31, NW].

Dak il-​jum, ferm iżjed tal-​biżaʼ u qerriedi minn kwalunkwe żbroff vulkaniku jew terremot lokali, qiegħed wara l-​bieb. Il-​profeta Sofonija jgħid: “Il-​Jum il-​kbir tal-​Mulej fil-​qrib! Fil-​qrib, u riesaq b’ħeffa li ma bħalha! . . . Fin-​nar imħeġġeġ taʼ qilltu tintemm l-​art kollha, għax qerda jagħmel, u tassew taʼ l-​għaġeb, minn kull min jgħammar fl-​art.” Għalkemm “la l-​fidda tagħhom lanqas dehebhom ma jkun jistaʼ jeħlishom f’jum il-​korla tal-​Mulej,” hemm mod kif tistaʼ ssalva f’dak il-​jum li jqanqal il-​biżaʼ.—Sofonija 1:​14-18.

Biex juri kif, Sofonija jgħid: “Qabel ma l-​korla mħeġġa tal-​Mulej tilħaqkom; qabel ma jum il-​korla tal-​Mulej jasal għal fuqkom. Fittxu l-​Mulej ilkoll, intom, l-​umli taʼ l-​art . . . fittxu l-​ġustizzja, fittxu l-​umiltà: biex forsi f’jum il-​korla tal-​Mulej ikollkom fejn tistkennu.” (Sofonija 2:​2, 3) Aħna nistgħu nsibu kenn billi ‘nfittxu l-​Mulej, infittxu l-​ġustizzja, u nfittxu l-​umiltà.’ Min qiegħed ifittex lil Jehovah llum?

Bla ebda dubju int torbot il-​kelma “Jehovah” max-​Xhieda taʼ Jehovah minħabba x-​xogħol tagħhom taʼ l-​ippridkar. Int għandek mnejn ħadt din ir-​rivista mingħand wieħed minnhom. Huma magħrufin bħala ċittadini morali li jgħixu ħajja retta. Huma jagħmlu ħilithom kollha biex jilbsu “l-​bniedem il-​ġdid,” u dan jinkludi li jikkultivaw l-​umiltà. (Kolossin 3:​8-10) Din, jammettu huma, tiġi bħala riżultat taʼ li tkun edukat mill-​organizzazzjoni viżibbli taʼ Jehovah, li madwar id-​dinja hija rappreżentata mill-​kongregazzjonijiet lokali tax-​Xhieda taʼ Jehovah. Iva, tistaʼ ssib kenn flimkien mas-​‘sħubija kollha kemm hi taʼ aħwa’ fost ix-​Xhieda taʼ Jehovah mad-​dinja kollha.—1 Pietru 5:​9, NW.

Sib Kenn Issa

Biex insibu kenn billi nfittxu ’l Jehovah, irridu nkunu l-​ħbieb tiegħu. X’jinvolvi dan? Il-​Bibbja twieġeb: “Ma tafux li l-​ħbiberija mad-​dinja hija l-​għadu taʼ Alla? Min mela jrid isir ħabib tad-​dinja huwa għadu taʼ Alla.” (Ġakbu 4:4) Biex inkunu ħbieb t’Alla, irridu neħilsu minn kull irbit emozzjonali li jistaʼ jkollna maʼ din id-​dinja preżenti mill-​agħar, karatterizzata minn attitudni ribelluża lejn Alla.

Il-Bibbja twissina: “Tħobbux id-​dinja u anqas dak li hemm fiha. Jekk xi ħadd iħobb id-​dinja, l-​imħabba tal-​Missier ma tgħammarx fih. Kull ma fiha d-​dinja, jiġifieri l-​ġibda tal-​ġisem u l-​ġibda taʼ l-​għajnejn u l-​kburija tal-​ħajja, dan m’huwiex ġej mill-​Missier imma mid-​dinja. U d-​dinja bil-​ġibdiet tagħha tgħaddi, iżda min jagħmel ir-​rieda taʼ Alla jibqaʼ għal dejjem.” (1 Ġwann 2:​15-17) Il-​biċċa l-​kbira tan-​nies illum huma motivati mix-​xewqat tal-​ġisem—aptit sesswali bla rażan, kilba rgħiba għall-​flus, u l-​użu abbużiv tal-​poter. Imma biex tkun fuq in-​naħa taʼ Jehovah, trid tegħleb dawn ix-​xewqat.—Kolossin 3:​5-8.

Int għandek mnejn li ġieli qrajtha din ir-​rivista, u forsi taqbel maʼ kif din tapplika l-​profeziji Bibliċi. Madankollu, għandek mnejn taħsibha darbtejn qabel ma tieħu l-​pass li jmiss, dak li tassoċja max-​Xhieda taʼ Jehovah. Iżda jekk għandna diżastru x’niffaċċjaw, huwa biżżejjed li sempliċement nisimgħu t-​twissija? Bħalma nistgħu naraw minn dak li ġara fl-​iżbroff tal-​Muntanja Fugen, irridu naġixxu fi qbil mat-​twissija. Ftakar, minn taʼ l-​inqas 15-il ġurnalista u fotografi tant ansjużi li jiksbu l-​ewwel informazzjoni tilfu ħajjithom. Fil-​fatt, wieħed fotografu miet b’sebgħu fuq il-​buttuna tal-​kamera tar-​ritratti tiegħu. Wieħed vulkanologu—li kien qal, “Jekk għandi mmut, irrid li nkun f’xifer taʼ vulkan”—tilef ħajtu sewwa sew bħalma kien xtaq. Huma lkoll kienu dedikati għax-​xogħol u l-​miri tagħhom. Madankollu, huma ħallsu b’ħajjithom—il-​prezz taʼ li ma tawx kas it-​twissija.

Ħafna llum jisimgħu l-​messaġġ dwar id-​deċiżjoni t’Alla li jeqred din is-​sistema mill-​agħar t’affarijiet u jifhmu, sa ċertu punt, il-​validità taʼ dik it-​twissija. ‘Għandha mnejn tiġi eventwalment,’ jistgħu jirraġunaw huma, ‘imma mhux illum.’ Huma b’mod konvenjenti għalihom iħallu l-​jum taʼ Jehovah għal iktar tard biex b’hekk ma jkollhomx x’ifixkilhom f’dak li f’għajnejhom jidher li hu l-​iktar importanti bħalissa.

Bàruk kellu problema simili. Bħala s-​segretarju tal-​profeta tal-​qedem Ġeremija, Bàruk wissa b’kuraġġ lill-​Iżraeliti dwar il-​kundanna li kienet riesqa fuq Ġerusalemm. Madankollu, darba minnhom hu ħassu għajjien fl-​inkarigu tiegħu. Għal dan, Jehovah kkoreġieh: “Jaqaw int qiegħed tfittex ħwejjeġ kbar? Tfittixhomx.” Sew jekk hi għana, prominenza, jew sigurtà materjali, Bàruk ma kellux ‘ifittex ħwejjeġ kbar’ għalih innifsu. Ħaġa waħda kellha tinteressah, li jagħmel ir-​rieda t’Alla biex jgħin lin-​nies jieħdu l-​waqfa fuq in-​naħa Tiegħu. Bħala riżultat, ħajtu kienet tkun “bħallikieku priża tal-​gwerra.” (Ġeremija 45:​1-5) Bl-​istess mod, minflok ma ‘nfittxu ħwejjeġ kbar’ għalina nfusna, għandna nfittxu lil Jehovah, u dan jistaʼ jwassalna biex insalvaw il-​ħajjiet tagħna stess.

Fuq il-​Muntanja Fugen, iktar minn 12-il pulizija u pompieri volontieri kienu fuq xogħol meta s-​sħaba vulkanika tbaqbaq laqtithom. Huma kienu qed jipprovaw jgħinu u jipproteġu lin-​nies li kienu fil-​periklu. Kienu bħal dawk l-​uħud li b’intenzjoni tajba jintefgħu b’ruħhom u b’ġisimhom biex jagħmlu din id-​dinja aħjar. Nobbli kemm huma nobbli l-​motivi tagħhom, “l-​imgħawweġ ma tistax tiddrittah.” (Koħèlet 1:15) Din is-​sistema mgħawġa t’affarijiet ma tistax tiġi drittata. Jagħmel sens li ssir “ħabib tad-​dinja” billi tipprova ssalva sistema dinjija li Alla hu determinat li jeliminaha?

Ladarba Tkun Ħrabt, Ibqaʼ ’l Bogħod

Li taħrab minn sistema li qegħda fil-​periklu hija ħaġa, imma li tibqaʼ fil-​ħarsien protettiv tas-​“sħubija kollha kemm hi taʼ l-​aħwa” hija ħaġa oħra. (1 Pietru 2:​17, NW) Ejja ma ninsewx il-​bdiewa li, wara li ġew evakwati, reġgħu lura biex jagħtu titwila lill-​għelieqi tagħhom viċin il-​Muntanja Fugen. Wisq probabbli, huma kellhom sebaʼ mitt sena biex jerġgħu lura għall-​ħajja “normali” li kellhom qabel. Imma tifhem li d-​deċiżjoni tagħhom biex imorru lura ma kinitx għaqlija. Għandu mnejn li din ma kinitx l-​ewwel darba li pprovaw jaqbżu l-​linja. Forsi rifsu ż-​żona taʼ periklu għal ftit ħin biss u ma ġara xejn. It-​tieni darba, setgħu baqgħu ftit iżjed, u xorta baqaʼ ma ġara xejn. X’aktarx li ma tantx damu biex jidraw jaqbżu l-​linja taʼ protezzjoni u rabbew il-​kuraġġ biex jitlajjaw fl-​inħawi taʼ periklu.

Ġesù Kristu rrefera għal sitwazzjoni simili li kellha sseħħ fi “tmiem id-​dinja.” Hu qal: “Għax kif fiż-​żmien taʼ qabel id-​dilluvju kienu jieklu u jixorbu, jiżżewġu u jżewwġu sa dakinhar li Noè daħal fl-​arka, u . . . [“ma tawx kas,” NW] sa ma wasal id-​dilluvju u ġarr lil kulħadd, hekk tkun il-​miġja taʼ Bin il-​bniedem.”—Mattew 24:​3, 38, 39.

Innota li Ġesù semma l-​ikel, ix-​xorb, u ż-​żwieġ. Mhux għax dawn l-​affarijiet huma ħżiena f’għajnejn Jehovah. Mela, x’kien hemm ħażin? In-​nies fi żmien Noè “ma tawx kas,” billi għexu ħajja ċentrata fuq ir-​rutina tagħhom tas-​soltu. Waqt xi emerġenza, wieħed ma jistax jgħix ħajja “normali.” Ladarba tkun ħrabt minn din id-​dinja kundannata, jew isseparajt ruħek minnha, trid tiġġieled ix-​xenqa li terġaʼ tmur lura biex tieħu vantaġġ minn kwalunkwe ħaġa li tistaʼ takkwista minnha. (1 Korintin 7:31) Għandek mnejn timraħ ’il barra miż-​żona spiritwali li hi bla periklu u terġaʼ lura mingħajr girfa bla ma ħadd jinduna b’xejn. Madankollu, x’aktarx li dan se jagħtik il-​kuraġġ biex terġaʼ tirritorna fid-​dinja għal darb’oħra, u tibqaʼ titlajja fiha daqsxejn iżjed. Hekk, malajr tistaʼ tiżviluppa l-​attitudni: “It-​tmiem mhux se jasal illum.”

Aħseb ftit, ukoll, dwar it-​tliet sewwieqa tal-​karozzini li tilfu ħajjithom jistennew il-​ġurnalisti u l-​fotografi meta s-​sħaba vulkanika kaxkret kulma sabet quddiemha. Xi wħud illum jistgħu jsegwu lil oħrajn li ażżardaw imorru lura fid-​dinja. Tkun xi tkun ir-​raġuni, li ċċedi għaż-​żegħil biex tirritorna f’żona perikoluża m’huwiex vallapena.

Il-vittmi kollha taʼ l-​iżbroff tal-​Muntanja Fugen kollha marru ’l hinn mil-​linja taʼ sigurtà u daħlu fiż-​żona taʼ periklu. Għalkemm stennew li l-​muntanja għad tiżbroffa xi darba, ħadd minnhom ma ħaseb li kien se jkun dak in-​nhar. Billi josservaw is-​sinjal tal-​konklużjoni taʼ din is-​sistema t’affarijiet, ħafna jistennew li jum Jehovah għad jiġi xi darba imma x’aktarx li mhux daqshekk malajr. Xi wħud saħansitra jħossu li dak in-​nhar ma jistaʼ qatt ikun “illum.” Attitudni bħal din hija tabilħaqq taʼ sogru.

“Jasal, tabilħaqq, jum il-​Mulej bħal ħalliel,” wissa l-​appostlu Pietru. Irridu nkunu għassa, ‘nistennew b’ħerqa kbira l-​miġja tal-​Jum taʼ Alla,’ nagħmlu l-​aħjar tagħna biex ‘isibna fis-​sliem, bla tebgħa u bla dnub.’ (2 Pietru 3:​10-14) Wara l-​qerda taʼ din is-​sistema t’affarijiet mill-​agħar, hemm tistenniena art magħmula ġenna taħt is-​Saltna t’Alla. Jalla għall-​ebda raġuni ma nitħajru nidħlu fiż-​żona taʼ periklu, ladarba dak in-​nhar li nirritornaw fid-​dinja jistaʼ jinzerta l-​jum taʼ Jehovah.

Sib kenn flimkien mal-​poplu taʼ Jehovah u ibqaʼ magħhom.

[Stampi f’paġna 7]

Sib kenn flimkien mal-​poplu taʼ Jehovah u ibqaʼ magħhom

[Sors taʼ l-​istampa f’paġna 4]

Iwasa/Sipa Press