Il-Barka taʼ Jehovah Tagħmel Għani

“Il-​barka ta ’ Jehovah—dik hi li tagħmel għani, u hu ma jżid ebda wġigħ magħha.”−PROVERBJI 10:22.

1-3. Fil-​waqt li ħafna huma kkonċernati dwar affarijiet materjali, liema fatt dwar il-​għana materjali għandu kulħadd jirrikonoxxi?

HAWN nies li qatt ma jieqfu jitkellmu dwar il-​flus—jew dwar kemm huma neqsin minnhom. Bi sfortuna għalihom, fi snin riċenti kellhom ħafna x’jiddiskutu. Fl-​1992 saħansitra l-​Punent affluwenti ġarrab riċessjoni, u esekuttivi kif ukoll ħaddiema taʼ kull qasam sabu ruħhom bla xogħol. Ħafna ddubitaw jekk għadx jerġgħu jaraw żmien taʼ prosperità stabbli.

² Huwa ħażin li nitħassbu dwar il-​benesseri materjali tagħna? Le, sa ċertu punt hija ħaġa naturali. Fl-​istess ħin, hemm verità bażika li rridu nirrikonoxxu dwar il-​għana. Fl-​aħħar mill-​aħħar, l-​affarijiet materjali kollha jiġu mingħand il-​Ħallieq. Huwa “l-​veru Alla, Jehovah, . . . Dak li qiegħed jifrex l-​art u dak li tipproduċi, Dak li qiegħed jagħti n-​nifs lin-​nies taʼ fuqha, u spirtu lil dawk li qegħdin jimxu fiha.”−Isaija 42:5.

³ Għalkemm Jehovah ma jaħtarx bil-​quddiem min se jkun għani u min se jkun fqir, ilkoll kemm aħna rridu nagħtu kont tal-​mod kif nużaw kwalunkwe sehem li għandna mill-​“art u dak li tipproduċi.” Jekk nużaw il-​għana tagħna biex niddominaw fuq oħrajn, Jehovah se jitlob kont minna. U kulmin jitjassar għar-​rikkezzi minflok għal Jehovah se jsib li “dak li qiegħed jafda fir-​rikkezzi tiegħu—hu nnifsu se jaqaʼ.” (Proverbji 11:28; Mattew 6:24; 1 Timotew 6:9) Prosperità materjali li mhix akkumpanjata minn qalb sottomessa lejn Jehovah hija fl-​aħħar mill-​aħħar mingħajr valur.—Ekkleżjasti 2:3-11, 18, 19; Luqa 16:9.

L-​Iktar Prosperità Importanti

4. Il-​prosperità spiritwali għala hija aħjar mill-​abbundanza materjali?

⁴ Minbarra prosperità materjali, il-​Bibbja ssemmi prosperità spiritwali. Din hi ċertament l-​aħjar xorta. (Mattew 6:19-21) Prosperità spiritwali tinvolvi relazzjoni sodisfaċenti maʼ Jehovah li tistaʼ tibqaʼ għall-​eternità. (Ekkleżjasti 7:12) Jerġaʼ, qaddejja t’Alla li huma għonja spiritwalment ma jitilfux minn barkiet materjali bnini. Fid-​dinja l-​ġdida, għana spiritwali se jkun marbut maʼ prosperità materjali. Uħud leali se jgawdu sigurtà materjali li ma tinkisibx b’kompetizzjoni ħarxa jew bl-​issagrifikar tas-​saħħa u l-​kuntentizza, kif inhu taʼ spiss il-​każ illum. (Salm 72:16; Proverbji 10:28; Isaija 25:6-8) Huma se jsibu li b’kull mod “il-​barka taʼ Jehovah . . . tagħmel għani, u hu ma jżid ebda wġigħ magħha.”−Proverbji 10:22.

5. Ġesù liema wegħda ta rigward affarijiet materjali?

⁵ Saħansitra llum dawk li jgħożżu l-​affarijiet spiritwali jħossu ċerta trankwillità fejn għandhom x’jaqsmu l-​affarijiet materjali. Veru, huma jaħdmu biex iħallsu l-​kontijiet u biex jitimgħu l-​familji tagħhom. Jew xi wħud jistgħu saħansitra jitilfu l-​impjieg tagħhom fi żminijiet taʼ riċessjoni. Imma ma jiddisprawx minħabba problemi bħal dawn. Minflok, huma jemmnu l-​wegħda taʼ Ġesù meta qal: “Qatt tkunu anzjużi u tgħidu, ‘X’se nieklu?’ jew, ‘X’se nixorbu?’ jew, ‘X’se nilbsu?’ . . . Għax Missierkom tas-​sema jaf li teħtieġu dawn l-​affarijiet kollha. Ibqgħu, allura, fittxu l-​ewwel is-​saltna u t-​tjieba tiegħu, u dawn l-​affarijiet l-​oħrajn kollha se jiżdidulkom.”−Mattew 6:31-33.

Għana Spiritwali Llum

6, 7. (a) Iddeskrivi xi aspetti tal-​prosperità spiritwali tal-​poplu t’Alla. (b) Liema profezija qiegħda titwettaq illum, u x’mistoqsijiet iqajjem dan?

⁶ Għaldaqstant, in-​nies taʼ Jehovah għażlu li jpoġġu s-​Saltna l-​ewwel fil-​ħajjiet tagħhom, u kemm qegħdin jiġu mberkin! Igawdu suċċess għani fix-​xogħol tagħhom li jagħmlu dixxipli. (Isaija 60:22) Qegħdin jiġu mgħallmin minn Jehovah, billi jgawdu nixxiegħa bla tmiem taʼ affarijiet spiritwali tajbin ipprovduti permezz tal-​“irsir fidil u diskret.” (Mattew 24:45-47; Isaija 54:13) Jerġaʼ, l-​ispirtu taʼ Jehovah jinsab fuqhom, billi jifformahom fi fratellanza internazzjonali pjaċevoli.—Salm 133:1; Mark 10:29, 30.

⁷ Din hi verament prosperità spiritwali, xi ħaġa li l-​flus ma jistgħux jixtruha. Hija twettieq notevoli tal-​wegħda taʼ Jehovah: “Ġibu l-​għexur kollha fil-​maħżen, biex jiġi li jkun hemm l-​ikel f’dari; u ttestjawni, jekk jogħġobkom, f’dan ir-​rigward,’ qal Jehovah tal-​armati, ‘jekk inix se niftħilkom il-​kanċelli tal-​għargħar tas-​smewwiet u attwalment inbattal fuqkom barka sakemm m’hemmx iktar bżonn.” (Malakija 3:10) Aħna llum rajna t-​twettieq taʼ din il-​wegħda. Jehovah, is-​Sors tal-​għana kollu, għala, iżda, jitlob lill-​qaddejja tiegħu biex iġibu l-​għaxar parti, jew id-​deċmi? Min jibbenefika mid-​deċmi? Biex twieġeb dawn il-​mistoqsijiet, ikkunsidra għala Jehovah tkellem dan il-​kliem permezz taʼ Malakija fil-​Ħames seklu Q.E.K.

Deċmi u Offerti

8. Skond il-​patt tal-​Liġi, il-​prosperità materjali taʼ Iżrael fuq liema ħaġa kienet tiddependi?

⁸ Fi żmien Malakija n-​nies t’Alla ma kellhomx prosperità. Għala le? F’parti kellu x’jaqsam maʼ offerti u deċmi. Lura f’dak iż-​żmien, Iżrael kien taħt il-​patt tal-​Liġi taʼ Mosè. Meta Jehovah għamel dak il-​patt, hu wiegħed li jekk Iżrael iżommu l-​parti tagħhom minnu, hu kien se jberikhom spiritwalment u materjalment. Fi kliem ieħor, il-​prosperità taʼ Iżrael kienet tiddependi fuq il-​fedeltà tagħhom.—Dewteronomju 28:1-19.

9. Fil-​jiem taʼ Iżrael tal-​qedem, Jehovah għala kien jirrikjedi minn Iżrael li jħallsu d-​deċmi u jġibu l-​offerti?

⁹ Parti mill-​obbligu taʼ Iżrael taħt il-​Liġi kien li jġibu offerti lit-​tempju u jħallsu d-​deċmi. Xi wħud mill-​offerti kienu jinħarqu kollha kemm huma fuq l-​artal taʼ Jehovah, fil-​waqt li oħrajn kienu jinqasmu bejn il-​qassisin u l-​uħud li jkunu qegħdin jippreżentaw is-​sagrifiċċju, b’porzjonijiet speċjali offruti lil Jehovah. (Levitiku 1:3-9; 7:1-15) Rigward id-​deċmi, Mosè qal lill-​Iżraeliti: “Kull għaxar parti mill-​art, miż-​żerriegħa tal-​art u tal-​frotta tas-​siġra, tappartjeni lil Jehovah. Hija xi ħaġa qaddisa għal Jehovah.” (Levitiku 27:30) Id-​deċmi kienu jingħataw lill-​ħaddiema Leviti fit-​tabernaklu u iktar tard fit-​tempju. Min-​naħa tagħhom, il-​Leviti li ma kinux qassisin kienu jagħtu l-​għaxar parti milli kienu jirċievu lill-​qassisin Aronniċi. (Numri 18:21-29) Jehovah għala kien jirrikjedi li Iżrael iħallsu d-​deċmi? L-​ewwel, biex huma setgħu juru b’mod li jidher l-​apprezzament tagħhom għat-​tjieba taʼ Jehovah. U t-​tieni, sabiex setgħu jikkontribwixxu għall-​manteniment tal-​Leviti, li mbagħad dawn setgħu jikkonċentraw fuq l-​obbligi tagħhom, inkluż it-​tagħlim tal-​Liġi. (2 Kronaki 17:7-9) B’dan il-​mod il-​qima vera kienet tiġi appoġġjata wkoll, u kulħadd kien jibbenefika.

10. X’ġara meta Iżrael naqsu li jġibu id-​deċmi u l-​offerti?

¹⁰ Għalkemm id-​deċmi u l-​offerti kienu iktar tard jintużaw mil-​Leviti, dawn kienu verament għotjiet lil Jehovah u għalhekk riedu jkunu taʼ kwalità tajba, denji għalih. (Levitiku 22:21-25) X’ġara meta l-​Iżraeliti naqsu li jġibu d-​deċmi jew meta kienu jġibu offerti inferjuri? Ma kienx hemm kastig preskritt mil-​Liġi, imma kien hemm il-​konsegwenzi. Jehovah kien iżomm lura l-​barka tiegħu, u l-​Leviti, miċħudin mill-​appoġġ materjali tagħhom, telqu d-​doveri tagħhom tat-​tempju sabiex imantnu lilhom infushom. B’hekk, Iżrael kollu kien ibati.

“Poġġu lil Qalbkom fuq il-​Mogħdijiet Tagħkom”

11, 12. (a) X’irriżulta meta Iżrael naqsu li jħarsu l-​Liġi? (b) Jehovah liema ħatra ta lil Iżrael meta ġabhom lura mill-​Babilonja?

¹¹ Matul il-​korsa tal-​istorja taʼ Iżrael, xi wħud kienu eżemplari f’li jipprovaw iħarsu l-​Liġi, inkluż il-​ħlas tad-​deċmi. (2 Kronaki 31:2-16) Bħala regola ġenerali, iżda, il-​ġens kien ittraskurat. Darba wara l-​oħra, huma kisru l-​patt maʼ Jehovah, sakemm hu fl-​aħħar ħalliehom jiġu kkonkwistati u, fis-​sena 607 Q.E.K., li jiġu ddeportati lejn il-​Babilonja.—2 Kronaki 36:15-21.

¹² Dik kienet dixxiplina ħarxa, imma wara 70 sena Jehovah irrestawra lill-​poplu tiegħu f’artu. Ħafna mill-​profeziji taʼ Ġenna f’Isaija kien se jkollhom it-​twettieq inizzjali tagħhom wara dak ir-​ritorn. (Isaija 35:1, 2; 52:1-9; 65:17-19) Madankollu, ir-​raġuni ewlenija għala Jehovah ġab lura lill-​poplu tiegħu kienet, mhux biex jibnu ġenna tal-​art, imma biex jibnu mill-​ġdid it-​tempju u jirrestawraw il-​qima vera. (Eżra 1:2, 3) Meta Iżrael kienu jobdu lil Jehovah, benefiċċji materjali kienu jsegwu, u l-​barka taʼ Jehovah kienet tagħmilhom għonja spiritwalment kif ukoll materjalment. Fi qbil maʼ dan, hekk kif waslu f’arthom fis-​sena 537 Q.E.K., il-​Lhud bnew artal f’Ġerusalemm u bdew xogħol fuq it-​tempju. Madankollu, iltaqgħu maʼ oppożizzjoni ħarxa u waqfu. (Eżra 4:1-4, 23) Bħala riżultat, Iżrael ma gawdewx il-​barka taʼ Jehovah.

13, 14. (a) X’kien ir-​riżultat meta Iżrael naqsu li jibnu mill-​ġdid it-​tempju? (b) Fl-​aħħar kif inbena mill-​ġdid it-​tempju, imma liema nuqqasijiet min-​naħa taʼ Iżrael huma rrapportati?

¹³ Fis-​sena 520 Q.E.K., Jehovah qajjem lill-​profeti Ħaggaj u Żakkarija biex iħeġġu lil Iżrael biex jerġgħu lura għax-​xogħol tal-​bini tat-​tempju. Ħaggaj wera li l-​ġens kien qed ibati tbatijiet materjali u assoċja dan man-​nuqqas taʼ żelu tagħhom għad-​dar taʼ Jehovah. Hu qal: “Dan hu dak li Jehovah tal-​armati qal, ‘Poġġu lil qalbkom fuq il-​mogħdijiet tagħkom. Intom żrajtu ħafna żerriegħa, imma hemm dħul taʼ naqra. Hemm ikel, imma mhux li wieħed jixbaʼ. Hemm xorb, imma mhux sal-​punt li wieħed jisker. Hemm ilbies taʼ ħwejjeġ, imma mhux li xi ħadd isir sħun; u dak li qiegħed jikri lilu nnifsu qiegħed jikri lilu nnifsu għal borża li għandha t-​toqob.’ Dan hu dak li Jehovah tal-​armati qal, ‘Poġġu lil qalbkom fuq il-​mogħdijiet tagħkom. Itilgħu fuq il-​muntanja, u tridu ġġibu l-​injam. U ibnu d-​dar, biex inkun nistaʼ nieħu gost biha u nistaʼ nkun igglorifikat.”—Ħaggaj 1:5-8.

¹⁴ Inkuraġġiti minn Ħaggaj u Żakkarija, l-​Iżraeliti poġġew qlubhom fuq il-​mogħdijiet tagħhom, u t-​tempju nbena. Xi 60 sena wara, iżda, Neħemija żar Ġerusalemm u sab li Iżrael kien għal darb’oħra sar negliġenti għal-​Liġi taʼ Jehovah. Hu kkorreġa dan. Imma fit-​tieni żjara, sab li l-​affarijiet kienu għal darb’oħra ddeterjoraw. Hu jirrapporta: “Irnexxieli nsib li l-​istess porzjonijiet tal-​Leviti ma kinux ġew mogħtijin lilhom, u b’hekk il-​Leviti u l-​għannejja li qegħdin jagħmlu x-​xogħol telqu jiġru lil hemm, kull wieħed lejn il-​għalqa tiegħu stess.” (Neħemija 13:10) Din il-​problema ġiet ikkorreġuta, u “Ġuda kollu, min-​naħa tagħhom, ġabu l-​għexur tal-​qamħ u tal-​inbid ġdid u taż-​żejt lejn l-​imħażen.”−Neħemija 13:12.

Jisirqu lil Jehovah

15, 16. Jehovah, permezz taʼ Malakija, għal liema nuqqasijiet ċanfar lil Iżrael?

¹⁵ Wisq probabbli, l-​ipprofetizzar taʼ Malakija kien f’dan l-​istess perijodu taʼ żmien ġenerali, u l-​profeta jgħidilna iżjed dwar in-​nuqqas taʼ fedeltà taʼ Iżrael. Hu jniżżel bil-​miktub il-​kliem taʼ Jehovah lil Iżrael: “Jekk jien missier, fejn hu l-​unur għalija? U jekk jien sid grandjuż, fejn hu l-​biżaʼ minni?’ qalilkom Jehovah tal-​armati, O qassisin li qegħdin tistmerru lil ismi.” X’kienet il-​problema? Jehovah jispjega: “Meta tippreżentaw annimal għami għall-​issagrifikar [tgħidu]: ‘M’hu xejn ħażin.’ U meta tippreżentaw annimal zopp jew wieħed marid [tgħidu]: ‘M’hu xejn ħażin.’”—Malakija 1:6-8.

¹⁶ B’dan il-​mod grafiku, Malakija juri li fil-​waqt li l-​Iżraeliti kienu qegħdin iġibu l-​offerti, il-​kwalità fqira taʼ dawn uriet nuqqas taʼ rispett grass. Malakija kiteb ukoll: “Minn jiem missirijietkom tal-​qedem intom tbigħedtu mir-​regolamenti tiegħi u ma ħaristuhomx. Erġgħu lura lejja, u jien se nerġaʼ lura lejkom,’ qal Jehovah tal-​armati.” L-​Iżraeliti ma kinux jafu speċifikament x’kellhom jagħmlu, u għalhekk staqsew: “B’liema mod se nerġgħu lura?” Jehovah wieġeb: “Se jisraq il-​bniedem tal-​art lil Alla? Imma intom qegħdin tisirqu lili.” Iżrael kif setaʼ jisraq lil Jehovah, is-​Sors taʼ kull għana? Jehovah wieġeb: “Fil-​għexur u fil-​kontribuzzjonijiet.” (Malakija 3:7, 8) Iva, billi naqsu li jġibu d-​deċmi u l-​offerti tagħhom, Iżrael kien qed jisraq lil Jehovah!

17. Id-​deċmi u l-​offerti liema għan qdew f’Iżrael, u Jehovah liema wegħda jagħmel rigward id-​deċmi?

¹⁷ Dan l-​isfond storiku juri l-​importanza tad-​deċmi u l-​offerti f’Iżrael. Kienu turija taʼ apprezzament min-​naħa tad-​donatur. U kienu jgħinu fl-​appoġġ tal-​qima vera b’mod materjali. B’hekk, Jehovah issokta jinkuraġġixxi lil Iżrael: “Ġibu l-​għexur kollha fil-​maħżen.” Billi wera x’kien se jiġri jekk jagħmlu dan, Jehovah wiegħed: “Se . . . nbattal fuqkom barka sakemm m’hemmx iktar bżonn.” (Malakija 3:10) Il-​barka taʼ Jehovah kienet se tagħmilhom għonja.

Iġġudikati mill-​“Veru Mulej”

18. (a) Jehovah dwar il-​miġja taʼ min iwissi? (b) Meta kien hemm miġja lejn it-​tempju, min kien involut, u x’kien ir-​riżultat għal Iżrael?

¹⁸ Jehovah permezz taʼ Malakija wissa wkoll li hu kien se jiġi biex jiġġudika lill-​poplu tiegħu. “Ħares! Qiegħed nibgħat lill-​messaġġier tiegħi, u jrid jiftaħ mogħdija quddiemi. U f’daqqa waħda se jiġi fit-​tempju Tiegħu l-​veru Mulej, li lilu intom qegħdin tfittxu, u l-​messaġġier tal-​patt li bih qegħdin titgħaxxqu. Ħares! Ċertament li se jiġi.” (Malakija 3:1) Meta seħħet il-​miġja mwiegħda lejn it-​tempju? F’​Mattew 11:10, Ġesù kkwota l-​profezija taʼ Malakija dwar messaġġier li kien se jipprepara t-​triq u applikaha għal Ġwanni l-​Għammied. (Malakija 4:5; Mattew 11:14) Mela fis-​sena 29 E.K., iż-​żmien għall-​ġudizzju kien wasal! Min kien it-​tieni messaġġier, il-​messaġġier tal-​patt li kien se jakkompanja lil Jehovah, “[i]l-veru Mulej,” lejn it-​tempju? Ġesù nnifsu, u f’żewġ okkażjonijiet hu ġie fit-​tempju f’Ġerusalemm u b’mod drammatiku naddfu, billi waddab ’il barra lis-​sarrafa tal-​flus diżonesti. (Mark 11:15-17; Ġwann 2:14-17) Rigward dan iż-​żmien taʼ ġudizzju tal-​ewwel seklu, Jehovah staqsa b’mod profetiku: “Min se joqgħod għall-​jum tal-​miġja tiegħu, u min se jkun dak li joqgħod wieqaf meta jidher hu?” (Malakija 3:2) Fil-​fatt, Iżrael ma qagħadx wieqaf. Huma ġew spezzjonati, instabu nieqsa, u fis-​sena 33 E.K., ġew imwarrbin għalkollox bħala l-​ġens magħżul taʼ Jehovah.—Mattew 23:37-39.

19. Fdal b’liema mod irritorna lejn Jehovah fl-​ewwel seklu, u liema barka rċevew?

¹⁹ Madankollu, Malakija kiteb ukoll: ‘Jehovah irid joqgħod bil-​qiegħda bħal raffinatur u wieħed li jnaddaf il-​fidda u jrid inaddaf lil ulied Levi; u jrid jiċċarahom bħad-​deheb u bħall-​fidda, u ċertament li se jsiru għal Jehovah poplu li qiegħed jippreżenta offerta tal-​għotja fit-​tjieba.’ (Malakija 3:3) Fi qbil maʼ dan, fil-​waqt li l-​biċċa l-​kbira li kienu jistqarru li jaqdu lil Jehovah fl-​ewwel seklu ġew imwarrbin għalkollox, xi wħud ġew imnaddfin u ġew għand Jehovah, billi offrew sagrifiċċji aċċettabbli. Min? Dawk li aċċettaw lil Ġesù, il-​messaġġier tal-​patt. F’Pentekoste tas-​sena 33 E.K., 120 minn dawn l-​uħud li aċċettaw kienu miġburin flimkien f’għorfa f’Ġerusalemm. Imsaħħin mill-​ispirtu qaddis, huma bdew jippreżentaw offerta tal-​għotja fit-​tjieba u malajr bdew jiżdiedu fil-​għadd. Ma damux ma nfirxu mal-​Imperu Ruman kollu. (Atti 2:41; 4:4; 5:14) B’hekk, fdal irritorna lejn Jehovah.—Malakija 3:7.

20. Meta Ġerusalemm u t-​tempju tagħha ġew meqrudin, Iżrael il-​ġdid t’Alla xi ġralu?

²⁰ Dan il-​fdal taʼ Iżrael, li sar jinkludi Ġentili mlaqqmin, bħal li kieku, fiz-​zokk tas-​siġra taʼ Iżrael, kien “Iżrael [ġdid] t’Alla,” ġens ifformat minn Kristjani midlukin bl-​ispirtu. (Galatin 6:16; Rumani 11:17) Fis-​sena 70 E.K., “jum . . . jaqbad bħall-​forn” ġie fuq Iżrael tal-​laħam meta Ġerusalemm u t-​tempju tagħha nqerdu mill-​armati Rumani. (Malakija 4:1; Luqa 19:41-44) Xi ġralu l-​Iżrael spiritwali t’Alla? Jehovah wera “mogħdrija lejhom, sewwa sew bħalma raġel juri mogħdrija lejn ibnu li qiegħed jaqdih.” (Malakija 3:17) Il-​kongregazzjoni Kristjana midluka tat kas tat-​twissija profetika taʼ Ġesù. (Mattew 24:15, 16) Huma baqgħu ħajjin, u l-​barka taʼ Jehovah baqgħu tagħmilhom għonja spiritwalment.

21. X’mistoqsijiet jibqgħu dwar Malakija 3:1 u 10?

²¹ X’ivvindikar għal Jehovah! Malakija 3:1 kif, iżda, qed jitwettaq illum? U Kristjan kif għandu jirreaġixxi għall-​inkuraġġiment f’​Malakija 3:10 biex iġib id-​deċmi kollha fil-​maħżen? Dan se jiġi diskuss fl-​artiklu li jmiss.

Tistaʼ Tispjega?

◻ Fl-​aħħar mill-​aħħar, min hu s-​Sors tal-​għana kollu?

◻ Il-​prosperità spiritwali għala hi aħjar mill-​għana materjali?

◻ Id-​deċmi u l-​offerti liema għan qdew f’Iżrael?

◻ Jehovah, “il-​veru Mulej,” meta ġie fit-​tempju biex jiġġudika lil Iżrael, u b’liema riżultat?

◻ Min irritorna lejn Jehovah wara li ġie fit-​tempju tiegħu fl-​ewwel seklu E.K.?