X’Tiftakar?
Ħadt gost taqra l-ħarġiet reċenti tat-Torri taʼ l-Għassa? Mela, ara jekk tistax twieġeb dawn il-mistoqsijiet li ġejjin:
• L-Iskrittura Griega Kristjana b’liema erbaʼ modi tuża l-kelma “kongregazzjoni”?
Is-sens primarju huwa l-grupp kollu taʼ Kristjani midlukin (xi testi jinkludu lil Kristu). Drabi oħra, il-frażi “l-kongregazzjoni t’Alla” tapplika għall-Kristjani kollha li jgħixu fi żmien partikulari. It-tielet sens japplika għall-Kristjani kollha f’parti ġeografika. Fl-aħħarnett, it-terminu jistaʼ japplika għal dawk li jifformaw kongregazzjoni lokali.—4/15, paġni 21-3.
• Alla meta se jieqaf isejjaħ lill-Kristjani individwali għat-tama fis-sema?
Il-Bibbja ma tagħtix tweġiba preċiża. Il-Kristjani bdew jissejħu fit-33 E.K. u komplew jissejħu fiż-żmien modern. Wara l-1935, ix-xogħol taʼ li nagħmlu dixxipli beda jiffoka prinċipalment fuq il-ġbir tal-folla l-kbira. Xi wħud li tgħammdu wara l-1935 kellhom xiehda mill-ispirtu qaddis li huma kellhom it-tama għas-sema, u għaldaqstant ma nistgħux inpoġġu data speċifika dwar meta se tintemm dik is-sejħa. Dawk li huma verament mill-midlukin m’għandhomx spirtu t’Alla iktar minn oħrajn, u lanqas ma jistennew xi trattament speċjali. Hi x’inhi t-tama tagħhom, il-Kristjani għandhom bżonn ikunu leali u jibqgħu jagħmlu r-rieda t’Alla.—5/1, paġni 30-1.
• Meta Ġeftaħ għamel il-wegħda tiegħu, kien lest li joffri lil bintu bħala sagrifiċċju tal-ħruq lil Alla?
Le. Ġeftaħ ried ifisser li kien se jiddedika lil dik il-persuna li ltaqgħet miegħu għas-servizz esklużiv t’Alla, provvediment tal-Liġi Mosajka. (1 Samwel 2:22) Sabiex twettaq il-wegħda, bint Ġeftaħ baqgħet taqdi fit-tabernaklu, sagrifiċċju kbir għax kien ifisser li qatt ma kienet se tiżżewweġ.—5/15, paġni 9-10.
• Liema rwol kellu l-kodiċi fil-Kristjanità tal-bidu?
Jidher li l-Kristjani kienu jużaw l-iktar ir-romblu, jew l-iskroll, għallinqas sa madwar l-aħħar taʼ l-ewwel seklu E.K. Matul is-seklu taʼ wara, kien hemm battalja bejn dawk li kienu jippromwovu l-kodiċi u dawk li kienu jippromwovu l-iskroll. L-esperti jemmnu li l-użu tal-kodiċi mill-Kristjani kellu rwol importanti f’li jiġi aċċettat kullimkien.—6/1, paġni 14-15.
• X’inhu l-Kalendarju taʼ Geżer?
Dan huwa tavla żgħira tal-ġebel tal-ġir li nstab fl-1908 fil-post fejn kien hemm il-belt taʼ Geżer. Ħafna jaħsbu li tifel taʼ l-iskola kiteb it-tavla bħala parti t’eżerċizzju. Fuq it-tavla hemm verżjoni simplifikata tas-sena agrikola, jew taċ-ċiklu, li jibda bix-xahar tal-ġbir li jikkorrispondi maʼ Settembru/Ottubru. Diversi prodotti tar-rabaʼ u attivitajiet agrikoli huma msemmijin ukoll.—6/15, paġna 8.
• Xi jfisser li wieħed jidneb kontra l-ispirtu qaddis?
Huwa possibbli li wieħed jidneb kontra l-ispirtu qaddis, dnub li ma jinħafirx. (Mattew 12:31) Alla jiddetermina jekk inkunux wettaqna dnub li ma jinħafirx jew le, u hu jistaʼ jneħħi l-ispirtu tiegħu minn fuqna. (Salm 51:13 [51:11, NW]) Jekk ninsabu mnikktin profondament minħabba xi dnub li nkunu wettaqna, x’aktarx li aħna verament indimna, u għalhekk ma dnibniex kontra l-ispirtu qaddis.—7/15, paġni 16-17.
• Minkejja li kien sar jaf lil David iktar qabel, is-Sultan Sawl għala staqsa bin min kien David? (1 Samwel 16:22; 17:58)
Sawl ma kienx biss interessat f’li jkun jaf x’jismu missier David. Wara li ra lil David bħala raġel taʼ fidi u kuraġġ li kien għadu kif għeleb lil Gulija, Sawl xtaq li jkun jaf x’tip taʼ raġel hu dak li kien rabba lil dan iż-żagħżugħ. Sawl setaʼ kellu f’moħħu li jżid lil Ġesse jew lil membri oħrajn mill-familja tiegħu fl-armata.—8/1, paġna 31.