Reliġjon Kristjana Waħda Vera—Realtà

ĠESÙ KRISTU stabbilixxa knisja, jew kongregazzjoni, waħda. Dik il-​kongregazzjoni kienet ġisem spiritwali, familja spiritwali, jiġifieri, il-​ġbir flimkien taʼ nies magħżulin mill-​ispirtu qaddis t’Alla​—kollha rikonoxxuti minn Alla sabiex ikunu ‘wliedu.’—Rumani 8:​16, 17; Galatin 3:26.

Ġesù għallem li Alla uża mod wieħed biss biex jidderieġi lin-​nies lejn il-​verità u l-​ħajja. Biex jagħti stampa taʼ dik il-​verità importanti, Ġesù qabbel il-​mogħdija għall-​ħajja taʼ dejjem maʼ triq. Hu qal: “Għaddu mill-​bieb id-​dejjaq. Għax wiesaʼ l-​bieb u spazjuża t-​triq li tieħu għat-​telfien, u ħafna huma li jgħaddu minnha. Imma kemm huwa dejjaq il-​bieb u dejqa t-​triq li tieħu għall-​ħajja, u ftit huma li jsibuha!”​—Mattew 7:​13, 14; Ġwanni 14:6; Atti 4:​11, 12.

Kongregazzjoni Magħquda

M’għandniex naħsbu dwar il-​kongregazzjoni taʼ l-​ewwel seklu bħala “soċjetà organizzata li kienet tinsab mad-​dinja kollha, universali, bħalma nfissru llum meta nitkellmu dwar il-​knisja Kattolika,” jgħid The New Dictionary of Theology. Għala le? Ikompli biex jgħid: “Għar-​raġuni sempliċi li soċjetà universali organizzata qatt m’eżistiet.”

Ħadd ma jistaʼ jiċħad il-​fatt li l-​kongregazzjoni Kristjana bikrija xejn ma kienet tixbah lis-​sistemi taʼ knejjes stabbiliti li naraw illum. Imma kienet organizzata. Kongregazzjonijiet individwali ma kinux jiffunzjonaw indipendenti minn xulxin. Kollha rrikonoxxew l-​awtorità tal-​ġemgħa li tiggverna f’Ġerusalemm. Dik il-​ġemgħa​—li kienet ifformata mill-​appostli u xi rġiel ixjeħ tal-​kongregazzjoni f’Ġerusalemm​—għenet biex tippreserva l-​għaqda tal-​kongregazzjoni bħala l-​“ġisem wieħed” taʼ Kristu.—Efesin 4:​4, 11-​16; Atti 15:​22-​31; 16:​4, 5.

X’sar minnha dik il-​kongregazzjoni waħda vera? Saret din il-​Knisja Kattolika setgħana? Żviluppat din fis-​sistema tal-​knisja Protestanta mifruda u maqsuma fi gruppi differenti li naraw illum? Jew ġara xi ħaġa oħra?

“Il-​Qamħ” u “s-​Sikrana”

Sabiex insibu t-​tweġibiet, ejja nikkunsidraw bir-​reqqa dak li qal Ġesù Kristu stess dwar x’kellu jsir. Forsi tiskanta meta ssir taf li Ġesù kien jistenna li l-​kongregazzjoni tiegħu kellha tisparixxi mix-​xena storika u li hu kien se jħalli din is-​sitwazzjoni taʼ niket tibqaʼ sejra għal sekli sħaħ.

Hu assoċja l-​kongregazzjoni tiegħu mas-​“Saltna tas-​Smewwiet,” billi qal: “Is-​Saltna tas-​Smewwiet tixbah lil wieħed raġel li żaraʼ żerriegħa tajba fl-​għalqa tiegħu. Iżda xħin in-​nies kienu reqdin, ġie l-​għadu tiegħu, żaraʼ s-​sikrana qalb il-​qamħ u telaq. Meta mbagħad il-​qamħ nibet u ħareġ is-​sbul, tfaċċat ukoll is-​sikrana. Resqu l-​qaddejja fuq sid l-​għalqa u qalulu, ‘Sinjur, int mhux żerriegħa tajba żrajt fl-​għalqa tiegħek? Mela dis-sikrana mnejn ġiet?’ Iżda hu qalilhom, ‘Dil-biċċa għamilhieli xi għadu tiegħi.’ ‘Tridx immorru niġbruha?’ qalulu l-​qaddejja. ‘Le,’ qalilhom, ‘għax intom u tiġbru s-​sikrana għandkom mnejn taqilgħu magħha l-​qamħ ukoll. Erħulhom jikbru t-​tnejn flimkien sal-​ħsad; meta mbagħad jasal il-​ħsad, ngħid lill-​ħassada: “Iġbru s-​sikrana l-​ewwel, u orbtuha qatta qatta għall-​ħruq, mbagħad qiegħdu l-​qamħ fil-​maħżen tiegħi.”’”—Mattew 13:​24-​30.

Ġesù spjega li hu kien “dak li jiżraʼ.” Iż-​“żerriegħa t-​tajba” ffigurat lid-​dixxipli ġenwini tiegħu. L-​“għadu” tiegħu kien Satana x-​Xitan. “Is-​sikrana” kienu Kristjani foloz li bil-​mod il-​mod saru parti mill-​kongregazzjoni Kristjana tal-​bidu. Hu qal li kien se jħalli “l-​qamħ” u “s-​sikrana” jikbru flimkien sakemm jasal “il-​ħsad,” li kien se jiġi “fi tmiem id-​dinja.” (Mattew 13:​37-​43) Dan kollu xi jfisser?

Il-​Kongregazzjoni Kristjana Tiġi Korrotta

Ftit wara li mietu l-​appostli, għalliema apostati minn ġol-​kongregazzjoni bdew jieħdu l-​kontroll. Huma tkellmu “dak li hu kontra s-​sewwa, bil-​ħsieb li jdawwru d-​dixxipli għal warajhom.” (Atti 20:​29, 30) B’riżultat taʼ dan, ħafna Kristjani ‘tbiegħdu mill-​fidi.’ Huma ‘ġġerrew wara l-​ħrejjef.’—1 Timotju 4:​1-3; 2 Timotju 4:​3, 4.

Sar-​rabaʼ seklu E.K., jgħid The New Dictionary of Theology, ‘il-​Kristjanità Kattolika kienet saret ir-​reliġjon uffiċjali taʼ l-​Imperu Ruman.’ Kien hemm “taħlita taʼ soċjetà ekkleżjastika u ċivili”​—taħlita tar-​reliġjon u l-​Istat li kienet kompletament kontra t-​twemmin tal-​Kristjani tal-​bidu. (Ġwanni 17:16; Ġakbu 4:4) L-​istess dizzjunarju jistqarr li maż-​żmien l-​istruttura u n-​natura kollha tal-​knisja, kif ukoll ħafna mit-​twemmin fundamentali tagħha, inbidlu b’mod drastiku “taħt l-​influwenza taʼ taħlita stramba u taʼ ħsara taʼ xempji mit-​T[estment] il-​Q[adim] u dawk neoplatoniċi.” Bħalma bassar Ġesù Kristu, id-​dixxipli ġenwini tiegħu sparixxew waqt li l-​Kristjani foloz iffjorixxew.

Is-semmiegħa taʼ Ġesù kienu jafu kemm kien diffiċli biex jiddistingwu bejn il-​qamħ ġenwin u l-​ħaxix ħażin, bħas-​sikrana bix-​xniexel, li matul l-​istaġun tat-​tkabbir tixbah ħafna l-​qamħ. Mela, Ġesù kien qed juri li għal xi żmien, kien se jkun diffiċli li tiddistingwi bejn Kristjani veri u dawk foloz. Dan ma jfissirx li l-​kongregazzjoni Kristjana ma baqgħetx teżisti, għax Ġesù wiegħed li kien se jkompli jiggwida lill-​ħutu spiritwali “dejjem, sa l-​aħħar taż-​żmien.” (Mattew 28:20) Ġesù qal li l-​qamħ kien se jkompli jikber. Minkejja dan, matul is-​sekli, Kristjani ġenwini​—individwalment jew fi gruppi​—mingħajr ebda dubju għamlu l-​aħjar tagħhom biex iżommu mat-​tagħlim taʼ Kristu. Imma ma kinux iktar miġburin f’organizzazzjoni jew ġemgħa viżibbli li tistaʼ tidentifikaha b’mod ċar. Żgur li xejn ma kienu jixbhu lis-​sistema reliġjuża viżibbli u apostata li matul l-​istorja ma ġabet xejn ħlief għajb u diżunur lill-​isem taʼ Ġesù Kristu.—2 Pietru 2:​1, 2.

“Il-​Bniedem taʼ Mingħajr Liġi”

L-​appostlu Pawlu bassar xi ħaġa oħra li kienet se tidentifika lil din is-​sistema reliġjuża falza. Hu kiteb: “Tħallu lil ħadd jisseduċikom b’xi manjiera, għaliex [il-jum taʼ Jehovah] mhux se jiġi jekk l-​ewwel ma tiġix l-​apostasija u jiġi rivelat il-​bniedem taʼ mingħajr liġi, bin il-​qerda.” (2 Tessalonikin 2:​2-4, NW) Dan “il-​bniedem taʼ mingħajr liġi” m’hu ħadd ħlief il-​klassi tal-​kleru li tgħolli lilha nfisha f’pożizzjoni biex taħkem fuq il-​kongregazzjoni “Kristjana.”a

L-​apostasija bdiet lura fi żmien l-​appostlu Pawlu. Malli mietu l-​appostli u spiċċat l-​influwenza tagħhom li kienet trażżan l-​apostasija, din bdiet tinfirex iktar. Tiġi identifikata, qal Pawlu, mill-​‘qawwa tax-​xitan, li jagħmel kull xorta taʼ mirakli u sinjali u għeġubijiet foloz, u jinqeda b’kull xorta taʼ qerq u ħażen.’ (2 Tessalonikin 2:​6-​12) Kemm tiddeskrivihom eżatt din l-​iskrittura l-​attivitajiet taʼ tant u tant mexxejja reliġjużi matul l-​istorja!

Biex jappoġġaw l-​istqarrija tagħhom li l-​Kattoliċiżmu Ruman huwa l-​uniku reliġjon vera, mexxejja Kattoliċi jgħidu li l-​isqfijiet tagħhom “ġejjin direttament mill-​appostli tal-​bidu permezz taʼ linja taʼ suċċessjoni li tmur lura sal-​bidu tal-​Kristjanità.” Fil-​fatt, din l-​istqarrija taʼ suċċessjoni appostolika m’għandha l-​ebda bażi storika jew Skritturali. M’hemm l-​ebda evidenza taʼ min joqgħod fuqha li s-​sistema tal-​knisja li żviluppat wara l-​mewt taʼ l-​appostli taʼ Ġesù kienet xi darba taħt id-​direzzjoni taʼ l-​ispirtu qaddis t’Alla.—Rumani 8:9; Galatin 5:​19-​21.

U xi ngħidu għall-​knejjes l-​oħra li ġew stabbiliti wara ’l hekk imsejħa Riforma? Bdew dawn isegwu mill-​ġdid ix-​xempju tal-​kongregazzjoni Kristjana bikrija? Irrestawraw dawn is-​safa tal-​kongregazzjoni Kristjana tal-​bidu? Huwa veru li wara r-​Riforma, il-​Bibbja saret disponibbli għal ħafna min-​nies komuni fil-​lingwa tagħhom. Iżda, l-​istorja turi li dawn il-​knejjes baqgħu jgħallmu duttrini foloz.b​—Mattew 15:​7-9.

Madankollu, innota dan. Żgur li Ġesù Kristu bassar li l-​kongregazzjoni waħda vera kienet se tiġġedded matul dak li hu sejjaħ il-​konklużjoni tas-​sistema dinjija. (Mattew 13:​30, 39) It-​twettiq tal-​profeziji Bibliċi juru li aħna issa qed ngħixu f’dak iż-​żmien. (Mattew 24:​3-​35) Minħabba f’hekk, kull wieħed minna jrid jistaqsi, ‘Fejn hi dik il-​knisja waħda vera?’ Din suppost li ssir iktar u iktar faċli biex tidentifikaha.

Forsi tħoss li inti diġà sibt dik il-​knisja, jew kongregazzjoni. Huwa importanti li tkun ċert. Għala? Għaliex bħal fl-​ewwel seklu, jistaʼ jkun hemm biss knisja waħda vera. Ħadt int il-​ħin biex taċċerta ruħek jekk il-​knisja tiegħek taqbilx max-​xempju li ħalliet il-​kongregazzjoni Kristjana taʼ l-​ewwel seklu u jekk hijiex qiegħda bil-​lealtà żżomm mat-​tagħlim taʼ Ġesù Kristu? Għala ma teżaminax dan issa? Ix-​Xhieda taʼ Jehovah huma lesti jgħinuk tagħmel eżatt hekk.​—Atti 17:11.

[Noti taʼ taħt]

[Stampi f’paġna 5]

It-​tixbiha taʼ Ġesù dwar il-​qamħ u s-​sikrana x’tgħallimna dwar il-​kongregazzjoni vera?

[Stampi f’paġna 7]

Il-​knisja tiegħek tirrifletti x-​xempju li ħallew il-​Kristjani taʼ l-​ewwel seklu fl-​ippridkar u l-​istudju?