Se Żżommha l-​Integrità Tiegħek?

KEMM mietu għasafar tal-​bejt il-​bieraħ? Ħadd ma jaf, u wisq probabbli ftit huma n-​nies li jimpurtahom—hemm wisq għasafar. Madankollu, Jehovah jimpurtah. Billi rrefera għal dawn l-​għasafar insinifikanti, Ġesù qal lid-​dixxipli tiegħu: “Anqas wieħed minnhom ma jaqaʼ fl-​art mingħajr ir-​rieda taʼ missierkom.” Hu kompla: “Xejn la tibżgħu; intom aqwa minn ħafna għasafar tal-​bejt.”—Mattew 10:​29, 31.

Iktar tard id-​dixxipli fehmu iktar biċ-​ċar kemm kien jistmahom Jehovah. Wieħed minnhom, l-​appostlu Ġwanni, kiteb: “B’dan dehret l-​imħabba taʼ Alla fina, għax Alla bagħat lil Ibnu l-​waħdieni fid-​dinja, biex ngħixu bih.” (1 Ġwann 4:9) Jehovah mhux biss jipprovdi l-​fidwa imma wkoll jaċċerta lil kull qaddej tiegħu li: “Jien m’iniex se nħallik, anqas nitilqek.”—Lhud 13:5.

Jidher ċar li l-​imħabba li għandu Jehovah lejn in-​nies tiegħu hija waħda soda. Madankollu, tqum il-​mistoqsija, ‘Aħna marbutin daqshekk maʼ Jehovah li qatt ma se nitilquh?’

L-​Isforzi taʼ Satana biex Ikissrilna l-​Integrità

Meta Jehovah ġibed l-​attenzjoni taʼ Satana lejn il-​mod taʼ kif Ġob kien qed jgħix ħajja taʼ integrità, Satana wieġeb: “Se jqimek Ġob jekk ma jikseb xejn minn dan?” (Ġob 1:​9, Today’s English Version) Hu insinwa li l-​lealtà tal-​bnedmin lejn Alla kienet tiddependi b’mod esklużiv minn ‘dak li jistgħu jiksbu minnha.’ Kieku dan kien minnu, l-​integrità taʼ kwalunkwe Kristjan setaʼ jsir kompromess minnha—bil-​patt li l-​offerta kienet taʼ tentazzjoni kbira.

Fil-każ taʼ Ġob, Satana lewwel allega li jekk Ġob jitlef dak kollu li kellu għal qalbu, il-​lealtà tiegħu lejn Alla kienet se tgħib. (Ġob 1:​10, 11) Meta dan l-​insult ma rnexxiex, Satana allega: “Bniedem jagħti kulma jkollu sabiex jibqaʼ ħaj.” (Ġob 2:​4, TEV) Għalkemm dak li qal Satana jistaʼ jkun veru għal xi wħud, Ġob irrifjuta li jikkomprometti l-​integrità tiegħu. Ir-​rekord storiku juri dan. (Ġob 27:​5; 42:​10-17) Għandek int lealtà simili? Jew se tħalli lil Satana jkissirlek l-​integrità? Aħseb dwarek innifsek waqt li neżaminaw xi veritajiet li jinvolvu lil kull Kristjan.

L-appostlu Pawlu kien jemmen li l-​lealtà Kristjana vera tistaʼ tkun qawwija ferm. Hu kiteb: “Jiena żgur li la l-​mewt u la l-​ħajja, . . . la ż-​żmien t’issa u la taʼ li ġej, . . . u ebda ħliqa oħra ma jistgħu qatt jifirduna mill-​imħabba taʼ Alla li dehret fi Kristu Ġesù Sidna.” (Rumani 8:​38, 39) Aħna jistaʼ jkollna l-​istess tip taʼ konvinzjoni jekk l-​imħabba li għandna lejn Jehovah hija qawwija. Imħabba bħal din hija rabta li ma tistax titkisser u li lanqas il-​mewt ma tistaʼ tirbaħha.

Jekk ikollna relazzjoni bħal din m’Alla, qatt m’aħna se nistaqsu, ‘Minn hawn u ftit snin oħra se nkun għadni naqdi lil Jehovah?’ Inċertezza bħal din kieku turi li l-​lealtà tagħna lejn Alla tiddependi minn dak li jistaʼ jiġrilna matul ħajjitna. L-​integrità vera ma tiġix effettwata minn ċirkustanzi esterni. Tiddependi mix-​xorta taʼ persuna li aħna minn ġewwa. (2 Korintin 4:​16-18) Jekk inħobbu lil Jehovah b’qalbna kollha, qatt m’aħna se niddiżappuntawh.—Mattew 22:37; 1 Korintin 13:8.

Madankollu, irridu niftakru li Satana qiegħed il-​ħin kollu jipprova jkissrilna l-​integrità. Hu jistaʼ jħajjarna naqgħu għall-​ġibdiet tal-​ġisem, iġagħalna nċedu għall-​pressjoni minn taʼ mparna, jew iġib fuqna xi għawġ li jistaʼ jġagħalna nitilqu mill-​verità. Id-​dinja mbiegħda minn Alla hija l-​alleata prinċipali taʼ Satana f’dan l-​attakk, għalkemm l-​imperfezzjonijiet tagħna jistgħu jagħmluhielu iktar faċli biex ikissrilna l-​integrità. (Rumani 7:​19, 20; 1 Ġwann 2:​16) Minkejja dan, aħna għandna diversi vantaġġi f’din it-​taqbida, l-​iktar wieħed il-​fatt li aħna nafu xi ħsibijiet għandu Satana.—2 Korintin 2:11.

X’inhuma l-​ħsibijiet taʼ Satana? Pawlu spjegahom fl-​ittra li kiteb lill-​Efesin bħala “tnassis,” jew atti makakki.a (Efesin 6:11) Satana jpoġġi ħsibijiet makakki fil-​mogħdija tagħna biex ikissrilna l-​integrità. Inħossuna grati ħafna li nistgħu nagħrfu dawn l-​atti makakki, ladarba l-​metodi tax-​Xitan huma mniżżlin għalina fil-​Kelma t’Alla. L-​isforzi taʼ Satana biex jipprova jkisser l-​integrità taʼ Ġesù u taʼ Ġob jagħtu eżempju taʼ xi modi kif hu jipprova jkissrilna l-​integrità Kristjana.

L-​Integrità taʼ Ġesù Ma Setgħetx Titkisser

Fil-​bidu tal-​ministeru taʼ Ġesù, Satana kellu l-​wiċċ tost jittanta lill-​Iben t’Alla billi sfidah biex ibiddel ġebla f’ħobż. Kemm hu makakk! Ġesù kien ilu ma jiekol għal 40 ġurnata, u għalhekk bla dubju taʼ xejn kellu ħafna ġuħ. (Luqa 4:​2, 3) Satana ssuġġerixxa li Ġesù kellu jissodisfa x-​xewqa naturali tiegħu immedjatament, xi ħaġa li kienet kontra r-​rieda taʼ Jehovah. Bl-​istess mod illum, il-​propaganda tad-​dinja tinkuraġġixxi lil dak li jkun biex jissodisfa x-​xewqat tiegħu minnufih, mingħajr ma joqgħod jaħseb dwar x’jistgħu jkunu l-​konsegwenzi. Il-​messaġġ hu, ‘Jixraq li tkun tiegħek issa,’ jew sempliċement, ‘Aqbad u agħmilha!’

Kieku Ġesù ssodisfa l-​ġuħ li kellu mingħajr ma qies il-​konsegwenzi, Satana kien jirnexxilu jġiegħel lil Ġesù jikkomprometti l-​integrità tiegħu. Ġesù kien iħares lejn l-​affarijiet b’ħarsa spiritwali, u hu wieġeb b’mod sod: “Hemm miktub li ‘l-​bniedem mhux bil-​ħobż biss jgħix.’”—Luqa 4:4; Mattew 4:4.

Imbagħad, Satana biddel it-​tattika tiegħu. Waqt li uża ħażin l-​Iskrittura, minfejn Ġesù kien qed jikkwota, ix-​Xitan inkuraġġixxa lil Ġesù biex jinxteħet għal isfel mill-​quċċata tat-​tempju. ‘Anġlu se jkollu jieħu ħsiebek sew,’ sostna Satana. Ġesù ma kellu l-​ebda ħsieb li jistaqsi għall-​protezzjoni mirakoluża minn Missieru sempliċement biex jiġbed l-​attenzjoni fuqu nnifsu. “‘Iġġarrabx lill-​Mulej, Alla tiegħek,’” qallu Ġesù.—Mattew 4:​5-7; Luqa 4:​9-12.

L-aħħar tattika li uża Satana kienet iktar diretta. Hu pprova jasal għal ftehim maʼ Ġesù billi offrielu d-​dinja kollha u l-​glorja tagħha biex jadurah. Prattikament, dan kien kulma kellu x’joffri Satana. Imma Ġesù kif setaʼ jadura lill-​għadu prinċipali taʼ Missieru? Xi ħaġa li lanqas biss għaddietlu minn moħħu! “‘Lill-​Mulej, Alla tiegħek, għandek tadura, u lilu biss taqdi,’” wieġeb Ġesù.—Mattew 4:​8-11; Luqa 4:​5-8.

Wara li dawk it-​tliet provi kienu fallew, Satana ‘telaq minn ħdejn [Ġesù] sa ma wasal il-​waqt.’ (Luqa 4:13) Dan jindika li Satana kien il-​ħin kollu għassa għal xi opportunità biex jgħaddi minn prova l-​integrità taʼ Ġesù. Ħin konvenjenti biex jagħmel dan ġie madwar sentejn u nofs wara meta Ġesù beda jipprepara lid-​dixxipli tiegħu għall-​mewt imminenti tiegħu. L-​appostlu Pietru qal: “Allaħares, Mulej! Ma jkun qatt li dan jgħaddi minn għalik!”—Mattew 16:​21, 22.

Setaʼ dan il-​parir b’intenzjoni tajba imma żbaljat jogħġob lil Ġesù ladarba kien ġej minn wieħed mid-​dixxipli tiegħu? Ġesù rrikonoxxa mill-​ewwel li dan il-​kliem kien jirrifletti x-​xewqat taʼ Satana, u mhux taʼ Jehovah. Kristu wieġeb b’mod sod: “Itlaq minn quddiemi, ja xitan! Int tfixkil għalija, għax m’intix tqis il-​ħwejjeġ taʼ Alla, imma qiegħed taħsibha taʼ bniedem li int!”—Mattew 16:23.

Minħabba l-​imħabba kostanti li Ġesù għandu lejn Jehovah, Satana ma kienx kapaċi jkisser l-​integrità taʼ Ġesù. Xejn minn dak li setaʼ joffri x-​Xitan, u l-​ebda prova, kienet kemm kienet ħarxa, ma setgħu jdgħajfu l-​lealtà li Ġesù kellu lejn Missieru tas-​sema. Meta ċ-​ċirkustanzi jagħmluhielna diffiċli li nżommu l-​integrità tagħna, se jkollna aħna l-​istess tip taʼ determinazzjoni? L-​eżempju taʼ Ġob se jgħinna biex nifhmu aħjar l-​isfidi li nistgħu niffaċċjaw.

Lealtà Meta Niffaċċjaw l-​Avversità

Bħalma induna Ġob, l-​avversità tistaʼ tiġi fuqna fi kwalunkwe ħin. Hu kien raġel miżżewweġ hieni b’għaxart itfal u kellu rutina spiritwali tajba. (Ġob 1:5) Imma bla ma kien jaf Ġob, l-​integrità tiegħu lejn Alla kienet saret kontroversja fil-​qorti tas-​sema, u Satana kien determinat li jkisser bi kwalunkwe mod l-​integrità taʼ Ġob.

Ġob malajr tilef il-​ġid materjali kollu li kellu. (Ġob 1:​14-17) Minkejja dan, l-​integrità taʼ Ġob irreżistietha l-​prova għax hu qatt ma kien ittama fil-​flus. Hu u jiftakar fiż-​żmien meta kien għani, Ġob qal: “Qatt għedt lid-​deheb: ‘Inti t-​tama tiegħi’? [Kieku] fraħt xi darba bil-​kotra taʼ ġidi, . . . [kien ikun] delitt . . . talli nkun ċħadt ’l Alla li jsaltan fl-​għoli.”—Ġob 31:​24, 25, 28.

Illum, huwa possibbli wkoll li f’daqqa waħda nitilfu dak kollu li għandna. Wieħed negozjant li hu Xhud taʼ Jehovah daħqu bih meta ħadulu somma enormi taʼ flus, u minħabba f’hekk, kważi falla. Hu jammetti b’mod sinċier: “Kważi tani attakk f’qalbi. Fil-​fatt, naħseb kien jagħtini wieħed kieku ma kinitx ir-​relazzjoni li għandi maʼ Jehovah. Minkejja dan, din l-​esperjenza ġagħlitni nirrealizza li l-​valuri spiritwali ma kinux l-​ewwel f’ħajti. L-​entużjażmu li kelli biex nagħmel ħafna flus tefaʼ fid-​dell l-​affarijiet l-​oħrajn kollha.” Minn dak inhar ’l hawn, dan ix-​Xhud naqqas għal minimu l-​attività tan-​negozju tiegħu, u hu jaqdi b’mod regulari bħala pijunier awżiljarju, billi jqattaʼ 50 siegħa jew iktar kull xahar fil-​ministeru Kristjan. Madankollu, problemi oħrajn jistgħu jkunu iktar qerrieda milli dak li jkun jitlef ġidu kollu.

Ġob bilkemm kienet għadha niżlitlu l-​aħbar li tilef il-​ġid kollu tiegħu meta waslitlu l-​kelma li kienu mitulu l-​għaxart itfal tiegħu. Hu baqaʼ jsostni: “Ikun imbierek isem il-​Mulej.” (Ġob 1:​18-21) Jekk f’daqqa waħda nitilfu diversi membri tal-​familja tagħna, se nibqgħu nżommuha l-​integrità tagħna? Francisco, indokratur Kristjan fi Spanja, tilef żewġt itfal f’inċident traġiku fuq xarabank. Hu sab il-​faraġ billi resaq iktar qrib taʼ Jehovah u żied l-​attività tiegħu fil-​ministeru Kristjan.

Anki wara x-​xokk li ħa meta tilef lit-​tfal tiegħu, l-​esperjenza ħarxa taʼ Ġob kien għad fadlilha biex tispiċċa. Satana laqtu b’marda orribbli taʼ wġigħ kbir. F’dak il-​mument, Ġob irċieva parir ħażin minn martu. “Isħet ’l Alla u mut!” ħeġġitu hi. Ġob ma tax kas il-​parir tagħha u “ma dinibx b’xufftejh.” (Ġob 2:​9, 10) L-​integrità tiegħu ma kinitx tiddependi mill-​appoġġ emozzjonali tal-​familja tiegħu, iżda mir-​relazzjoni persunali tiegħu maʼ Jehovah.

Flora, li żewġha u binha l-​kbir abbandunaw it-​triq Kristjana iktar minn għaxar snin ilu, tifhem dak li bilfors ħass Ġob. “Meta f’daqqa waħda titlef l-​appoġġ tal-​familja tiegħek, tistaʼ tgħaddi minn trawma,” tammetti hi. “Iżda kont naf li ma kontx se nsib il-​ferħ jekk ma nibqax fl-​organizzazzjoni taʼ Jehovah. Għalhekk, waqaft soda u poġġejt lil Jehovah fl-​ewwel post f’ħajti waqt li għamilt ħilti kollha biex inkompli nkun mara u omm tajba. Tlabt il-​ħin kollu, u Jehovah saħħaħni. Jien persuna ferħana għax, minkejja l-​oppożizzjoni determinata taʼ żewġi, tgħallimt niddependi kompletament fuq Jehovah.”

Pjan ieħor li Satana kien se juża biex ikisser l-​integrità taʼ Ġob kien jinvolvi t-​tlett iħbieb taʼ Ġob. (Ġob 2:​11-13) Kemm bilfors li kien taʼ niket meta bdew jikkritikawh! Kieku emmen l-​argumenti tagħhom, kien jitlef il-​fiduċja li kellu f’Alla Jehovah. Il-​parir skuraġġanti tagħhom setaʼ jkisser l-​ispirtu u l-​integrità tiegħu, u b’hekk il-​pjan taʼ Satana kien se jirnexxi.

Minflok, Ġob insista: “Sa ma mmut ma nwarrabx minni l-​integrità tiegħi!” (Ġob 27:​5, KŻ) Hu ma qalx, ‘Ma nħallikomx twarrbu minni l-​integrità tiegħi!’ Ġob kien jaf li l-​integrità tiegħu kienet tiddependi minnu u mill-​imħabba li kellu lejn Jehovah.

Manuvra Qadima biex Tinqabad Priża Ġdida

Satana għadu juża l-​parir żbaljat jew il-​kummenti bla ħsieb mingħand ħbiebna u sħabna Kristjani. Skuraġġiment li jiġi minn ġewwa l-​kongregazzjoni jistaʼ jdgħajfilna l-​morali iktar faċilment milli tistaʼ tagħmel il-​persekuzzjoni li tkun ġejja minn barra l-​kongregazzjoni. Anzjan Kristjan li kien esperjenza l-​gwerra waqt li kien suldat għamel kuntrast bejn il-​gwerra u l-​uġigħ li ħass minħabba kliem bla ħsieb u azzjonijiet mingħand sħabu Kristjani. Dwar dawn taʼ l-​aħħar, hu qal: “Hija l-​iktar ħaġa diffiċli li qatt esperjenzajt.”

Mill-banda l-​oħra, nistgħu nsiru tant skurmentati bl-​imperfezzjonijiet taʼ sħabna fit-​twemmin li ma nibqgħux inkellmu lil xi wħud minnhom jew saħansitra ma nibdewx immorru għal-​laqgħat Kristjani. Il-​fatt li nfarrġu lilna nfusna jistaʼ jidher li hu l-​iktar ħaġa importanti. Imma kemm hu taʼ swied il-​qalb li naraw sa mneħirna u nħallu l-​iktar ħaġa prezzjuża li għandna—ir-​relazzjoni tagħna maʼ Jehovah—tiddgħajjef b’dak li jistaʼ jagħmel jew jgħid ħaddieħor. Jekk inħallu dan jiġri, inkunu qegħdin naqgħu bħala priża taʼ Satana għal waħda mill-​manuvri qodma tiegħu.

Bi dritt, infittxu livelli għoljin fil-​kongregazzjoni Kristjana. Iżda jekk nistennew iżżejjed minn sħabna fit-​twemmin, li huma imperfetti, żgur li se noħorġu diżappuntati. B’kuntrast, Jehovah hu realistiku f’dak li jirrikjedi mill-​qaddejja tiegħu. Jekk nimitaw l-​eżempju tiegħu, se nkunu kapaċi nissaportu l-​imperfezzjonijiet tagħhom. (Efesin 4:​2, 32) L-​appostlu Pawlu ta dan il-​parir: “Jekk int irrabjat, tħallix ir-​rabja twasslek biex tagħmel dnub; tħallix inżul ix-​xemx isibek għadek irrabjat; tħallix fiex iqabbad difrejh ix-​xitan.”—Efesin 4:​26, 27, The New English Bible.

Bħalma turi b’mod ċar il-​Bibbja, Satana juża varjetà kbira taʼ attakki makakki bil-​ħsieb li jiskopri—jekk jistaʼ—il-​mod kif ikisser l-​integrità taʼ Kristjan. Xi ftit mill-​manuvri tiegħu huma sbieħ għall-​ġisem midneb, oħrajn huma sors taʼ tbatija. Minn din id-​diskussjoni, tistaʼ tara għala qatt m’għandek tinqabad fuq sieq waħda. Bl-​imħabba li għandek lejn Jehovah soda ġo qalbek, kun determinat li turi li x-​Xitan huwa giddieb u ferraħ lil qalb Jehovah. (Proverbji 27:11; Ġwann 8:44) Ftakar li l-​integrità vera taʼ Kristjan ma trid qatt tiġi f’kompromess, hi x’inhi l-​prova li tiġi fuqna.

[Nota taʼ taħt]