L-​Ispirtu tal-​Milied Matul is-​Sena Kollha?

“Glorja lil Alla fl-​ogħla postijiet tas-​smewwiet, u paċi fuq l-​art fost il-​bnedmin taʼ rieda tajba.”​—Luqa 2:​14.

MILJUNI taʼ nies huma familjari maʼ dan il-​kliem taʼ l-​anġli t’Alla li ħabbru t-​twelid taʼ Ġesù lir-​rgħajja li kienu qed jirgħu l-​imrieħel tagħhom bil-​lejl. Matul iż-​żmien li r-​reliġjonijiet jistqarru li kien twieled Ġesù, ħafna Kristjani taʼ l-​isem jagħmlu sforz speċjali biex itejbu l-​kondotta tagħhom. L-​attenzjoni li tingħata f’dan l-​istaġun lill-​ferħ, lill-​paċi, u lir-​rieda tajba—kwalitajiet imsemmijin fit-​tħabbira anġelika—spiss jirreferu għaliha bħala l-​ispirtu tal-​Milied.

Sentimenti pożittivi bħal dawn jiġbdu saħansitra lil dawk in-​nies li ma jiċċelebrawx il-​Milied bħala festa reliġjuża. Anki huma japprezzaw is-​sentimenti sbieħ li donnha tnissel din iċ-​ċelebrazzjoni. F’pajjiżi fejn il-​Milied iġib miegħu l-​vaganzi taʼ l-​iskola jew tax-​xogħol, il-​festa toffri lin-​nies l-​opportunità biex jistrieħu, iqattgħu ħin mal-​familja u l-​ħbieb, jew sempliċement biex jiddevertu. M’għandniex xi ngħidu, ħafna nies sinċieri jħarsu lejn il-​Milied prinċipalment bħala żmien biex jagħtu ġieħ lil Ġesù Kristu.

Hu x’inhu s-​sinifikat li jagħtu lill-​Milied, ħafna nies jammettu li s-​sentimenti pożittivi li ġġib magħha din il-​festa huma biss temporanji. In-​nies malajr jerġgħu lura għall-​kondotta normali tagħhom. Komponiment letterarju intitolat “L-​Ispirtu tal-​Milied,” pubblikat f’ittra mir-​Royal Bank of Canada, jgħid: ‘Bosta “Kristjani” jipprovaw jgħixu skond dan l-​isem għal ftit ġimgħat kull sena billi juru rieda tajba lejn sħabhom il-​bnedmin sa wara l-​Ewwel tas-​Sena, meta jerġgħu lura għall-​attitudni egoistika tagħhom u l-​indifferenza għall-​ġid taʼ bnedmin oħrajn.’ Kif kompliet din l-​istess ittra, dak li hu “bażikament ħażin” fl-​ispirtu tal-​Milied huwa li n-​nies m’għandhomx dan l-​ispirtu “matul is-​sena kollha.”

Jekk int taqbilx maʼ din l-​analisi jew le, din ċertament li tqajjem mistoqsijiet importanti. In-​nies qatt se jkunu kapaċi jkunu ġenerużi u jifhmu lil xulxin fuq bażi permanenti? Teżisti xi tama realistika li t-​tħabbira anġelika fil-​lejl tat-​twelid taʼ Ġesù se titwettaq? Jew it-​tama taʼ paċi vera m’hi xejn ħlief ħolma?