Kull Wieħed Jinsab taħt is-​Siġra tat-Tin Tiegħu

ID-​DELL huwa rari imma mfittex matul is-​sajf jaħraq fil-​pajjiżi tal-​Lvant Nofsani. Kull siġra li toffri rifuġju mir-​raġġi tax-​xemx hi mixtieqa, speċjalment meta tikber viċin id-​dar. Bil-​weraq kbir u wiesaʼ u z-​zkuk mifruxin tagħha, is-​siġra tat-​tin tipprovdi dell li hu aqwa minn kważi kwalunkwe siġra oħra f’dan ir-​reġjun.

Skond il-​ktieb Plants of the Bible, “jingħad li d-​dell [tas-siġra tat-​tin] huwa iktar frisk minn dak taʼ tinda.” Is-​siġar tat-​tin li kienu jikbru mad-​dawra taʼ xi għalqa tad-​dwieli f’Iżrael tal-​qedem kienu joffru post ideali fejn il-​ħaddiema taʼ l-​għalqa jistrieħu ftit.

Fi tmiem ġurnata twila u sħuna, il-​membri tal-​familja setgħu joqogħdu bil-​qiegħda taħt is-​siġra tat-​tin tagħhom u jgawdu s-​sħubija pjaċevoli taʼ xulxin. Iktar minn hekk, issiġra tat-​tin tippremja lil sidha b’abbundanza taʼ frott sustanzjuż. B’hekk, minn żmien is-​Sultan Salamun, li wieħed joqgħod bilqiegħda taħt is-​siġra tat-​tin tiegħu kien ifisser paċi, prosperità, u abbundanza.—1 Slaten 5:​4, 5 (1 Slaten 4:​24, 25, NW).

Sekli qabel, il-​profeta Mosè ddeskriva l-​Art Imwiegħda bħala ‘art tat-​tin.’ (Dewteronomju 8:8) It-​tnax-il spija pprovdew evidenza tal-​fertilità tagħha billi ġabu lura t-​tin u frott ieħor lura lejn il-​kamp taʼ Iżrael. (Numri 13:​21-23) Fis-​seklu 19, wieħed li vvjaġġa lejn l-​artijiet Bibliċi rrapporta li s-​siġar tat-​tin kienu l-​iktar siġar komuni f’dawn il-​postijiet. Mhux taʼ b’xejn li l-​iskritturi spiss isemmu t-​tin u s-​siġar tat-​tin!

Siġra li Tagħti l-​Frott Darbtejn fis-​Sena

Is-​siġra tat-​tin taqbad f’diversi tipi taʼ ħamrija, u l-​mod kif jinfirxu l-​għeruq jgħinha tissaporti s-​sjuf twal u nexfin tal-​Lvant Nofsani. Din is-​siġra mhix bħal siġar oħrajn għax tipprovdi ħsad taʼ tin bikri f’Ġunju u l-​ħsad prinċipali ġeneralment isir minn Awissu ’l quddiem. (Isaija 28:4) L-​Iżraelin kienu jieklu l-​ewwel ħsad bħala frott frisk. It-​tieni ħsad kienu jnixxfuh biex jużawh matul is-​sena. It-​tin niexef setaʼ jiġi pressat f’forma tonda, u kultant kienu jżidulu ftit lewż. Dan it-​tin pressat kien konvenjenti, sustanzjuż, u delizzjuż.

Il-mara diskreta Abigajl tat 200 ċappa tin imqadded lil David, żgur li għax ħasbet li dan kien ikel addattat għal nies li kienu qed jaħarbu. (1 Samwel 25:​18, 27) It-​tin pressat kellu wkoll valur mediku. Ġbara taʼ tin pressat ġiet applikata fuq nuffata li kienet qed toqtol lis-​Sultan Ħeżekija għalkemm il-​fejqan tiegħu li ġie wara kien minħabba intervent divin.a—2 Slaten 20:​4-7.

Fi żmien il-​qedem, it-​tin niexef kien apprezzat ħafna fir-​reġjun tal-​Mediterran. L-​istatista Cato xejjer tina quddiem is-​Senat Ruman biex jikkonvinċih jidħol għat-​tielet gwerra bejn Ruma u Kartaġni. L-​aqwa tin niexef f’Ruma kien minn Caria, fl-​Asja minuri. Minħabba f’hekk, carica sar l-​isem Latin għat-​tin niexef. L-​istess reġjun fit-​Turkija taʼ llum għadu jipproduċi tin niexef taʼ l-​aqwa kwalità.

Il-bdiewa Iżraelin spiss żergħu siġar tat-​tin fl-​għelieqi tad-​dwieli, imma huma kienu jqaċċtu s-​siġar li ma jagħmlux frott. Il-​ħamrija tajba kienet skarsa wisq biex tinħela fuq siġar li ma jagħmlux frott. Fit-​tixbiha taʼ Ġesù dwar siġra tat-​tin li m’għamlitx frott, il-​bidwi qal lil dak li kien jieħu ħsieb id-​dwieli: “Ara, ili tliet snin niġi nfittex il-​frott f’din is-​siġra tat-​tin, u qatt ma sibtilha. Mela aqlagħha, għax għalfejn se tibqaʼ tkidd l-​art?” (Luqa 13:​6, 7) Ladarba fi żmien Ġesù s-​siġar tal-​frott kienu jiġu ntaxxati, kull siġra li ma tagħmilx frott kienet spiża ekonomika li m’għandhomx x’jambuha.

It-tin kien importanti ħafna fid-​dieta taʼ l-​Iżraelin. Minħabba f’hekk, meta l-​ħsad tat-​tin kien imur ħażin—forsi minħabba xi ġudizzju kontrihom minn Jehovah—kien ikun qisu traġedja għalihom. (Ħosegħa 2:12; Għamos 4:9) Il-​profeta Ħabakkuk qal: “U mqar jekk ebda nwar ma trodd it-​tina, u xejn ma jagħtu d-​dwieli u l-​frott tas-​siġar taż-​żebbuġ iqarraq, u r-​rabaʼ xejn ma jibqaʼ jrodd għall-​ikel . . . jien xorta waħda nifraħ fil-​Mulej, nithenna f’Alla, is-​salvazzjoni tiegħi!”—Ħabakkuk 3:​17, 18.

Simbolu taʼ Ġens Bla Fidi

L-​Iskrittura kultant tuża t-​tin jew is-​siġar tat-​tin b’mod simboliku. Per eżempju, Ġeremija qabbel l-​eżiljati leali taʼ Ġuda maʼ qoffa tin tajjeb, tin bikri li kien jittiekel frisk. Madankollu, l-​eżiljati li kienu żleali ġew imqabblin maʼ tin ħażin, li ma setax jittiekel u kien ikollu jintrema.—Ġeremija 24:​2, 5, 8, 10.

Fit-​tixbiha tiegħu tas-​siġra tat-​tin li m’għamlitx frott, Ġesù wera l-​paċenzja t’Alla mal-​ġens Lhudi. Bħalma semmejna qabel, hu tkellem fuq ċertu bniedem li kellu siġra tat-​tin fl-​għalqa tad-​dwieli tiegħu. Is-​siġra m’għamlitx frott għal tliet snin sħaħ, u s-​sid kien se jqaċċatha. Imma dak li jieħu ħsieb id-​dwieli qallu: “Inti ħalliha, sinjur, għal din is-​sena, sa ma nagħżqilha madwarha u nagħtiha d-​demel. Id-​dieħla għandha mnejn tagħmel il-​frott; jekk le, aqlagħha.”—Luqa 13:​8, 9.

Meta Ġesù ta din it-​tixbiha, hu kien diġà ilu tliet snin jippriedka, jistinka biex jikkultiva l-​fidi fost il-​membri tal-​ġens Lhudi. Ġesù żied l-​attività tiegħu, “iffertilizza” s-​siġra tat-​tin simbolika—il-​ġens Lhudi—u taha l-​opportunità tipproduċi l-​frott. Madankollu, fil-​ġimgħa taʼ qabel ma miet Ġesù, deher biċ-​ċar li l-​ġens in ġenerali kien ċaħad lill-​Messija.—Mattew 23:​37, 38.

Għal darb’oħra, Ġesù uża s-​siġra tat-​tin biex jagħti tixbiha taʼ l-​istat spiritwali ħażin tal-​ġens. Meta kien qed jivvjaġġa minn Betanja lejn Ġerusalemm erbat ijiem qabel mewtu, hu ra siġra tat-​tin li kellha ħafna weraq imma ma kellha ebda frott. Ladarba t-​tin bikri kien joħroġ mal-​weraq—u kultant anki qabel ma jiżviluppa l-​weraq—in-​nuqqas taʼ frott fis-​siġra kien juri li ma tiswa għalxejn.—Mark 11:​13, 14.b

Bħal siġra li ma tagħmilx frott imma li kienet tidher b’saħħitha, id-​dehra tal-​ġens Lhudi kienet tqarraq b’dak li jkun. Imma l-​ġens ma kienx għamel frott li jogħġob lil Alla, u fl-​aħħar mill-​aħħar ċaħad lil Iben Jehovah stess. Ġesù seħet lis-​siġra li m’għamlitx frott, u l-​għada, id-​dixxipli nnotaw li kienet diġà nixfet. Din is-​siġra niexfa fissret sew il-​fatt li fil-​futur Alla kien se jiċħad lil-​Lhud bħala l-​poplu magħżul tiegħu.—Mark 11:​20, 21.

‘Tgħallmu mis-​Siġra tat-​Tin’

Ġesù uża s-​siġra tat-​tin anki biex jagħti lezzjoni importanti dwar il-​preżenza tiegħu. Hu qal: “Tgħallmu din il-​parabbola mis-​siġra tat-​tin. Meta l-​fergħa tirtab u tarmi l-​weraq, intom tintebħu li s-​sajf fil-​qrib. Hekk ukoll meta taraw dan kollu, kunu afu li hu fil-​qrib, fil-​bieb.” (Mattew 24:​32, 33) Il-​weraq aħdar ċar tas-​siġra tat-​tin jispikka u hu sinjal evidenti li ġej is-​sajf. Bl-​istess mod, il-​profezija famuża taʼ Ġesù mniżżla f’Mattew kapitlu 24, Mark kapitlu 13, u Luqa kapitlu 21 tagħti evidenza ċara tal-​preżenza tiegħu issa bħala l-​ħakkiem tas-​Saltna tas-​sema.—Luqa 21:​29-31.

Ladarba qegħdin ngħixu fi żmien bħal dan li hu tant kruċjali fl-​istorja, żgur li rridu nitgħallmu mis-​siġra tat-​tin. Jekk nagħmlu hekk u nibqgħu mqajmin spiritwalment, għandna t-​tama li nesperjenzaw it-​twettiq tal-​wegħda grandjuża: “Imma kull wieħed jinsab taħt id-​dielja tiegħu, u taħt is-​siġra tat-​tin tiegħu; u ma jkunx hemm min iwerwirhom, għax fomm il-​Mulej taʼ l-​eżerċti tkellem.”—Mikea 4:4.

[Noti taʼ taħt]