Folla Kbira t’Adoraturi Veri—Minfejn Ġew?

“Ħares! folla kbira, . . . mill-​ġnus u t-​tribujiet u l-​popli u l-​ilsna kollha, bil-​wieqfa quddiem it-​tron u quddiem il-​Ħaruf.”—RIVELAZZJONI 7:9.

1. Il-​viżjonijiet profetiċi f’Rivelazzjoni għala huma taʼ interess kbir għalina llum?

LEJN tmiem l-​ewwel seklu E.K., l-​appostlu Ġwanni ra viżjonijiet taʼ ġrajjiet meraviljużi konnessi maʼ l-​iskop taʼ Jehovah. Xi ftit mill-​affarijiet li ra fil-​viżjonijiet qegħdin jitwettqu issa stess. Oħrajn għandhom jitwettqu fil-​futur immedjat. Dawn kollha jduru madwar il-​kulminazzjoni drammatika taʼ l-​iskop grandjuż taʼ Jehovah biex iqaddes ismu quddiem il-​ħolqien kollu. (Eżekjel 38:23; Rivelazzjoni 4:11; 5:13) Barra minn hekk, dawk jinvolvu l-​prospetti taʼ ħajja taʼ kull wieħed minna. Dak kif inhuwa hekk?

2. (a) L-​appostlu Ġwanni x’ra fir-​rabaʼ viżjoni tiegħu? (b) Liema mistoqsijiet rigward din il-​viżjoni sejrin nikkunsidraw?

² Fir-​rabaʼ waħda mis-​serje taʼ viżjonijiet taʼ Rivelazzjoni, Ġwanni ra anġli jżommu lura rjieħ taʼ distruzzjoni sakemm “l-​irsiera t’Alla tagħna” jiġu ssiġillati fuq ġbinhom. Imbagħad ra żvilupp l-​iktar eċċitanti​—“folla kbira, li l-​ebda bniedem ma kellu l-​ħila jgħodd, mill-​ġnus u t-​tribujiet u l-​popli u l-​ilsna kollha,” magħqudin f’li jqimu lil Jehovah u jonoraw lil Ibnu. Dawn, intqal lil Ġwanni, kienu nies li kellhom joħorġu mit-​tribulazzjoni l-​kbira. (Rivelazzjoni 7:1-17) Min huma l-​uħud deskritti bħala “rsiera t’Alla tagħna”? U min se jifforma l-​“folla kbira” taʼ wħud li jibqgħu ħajjin wara t-​tribulazzjoni? Se tkun int wieħed minnhom?

Min Huma “L-​Irsiera T’Alla Tagħna”?

3. (a) Fi Ġwann 10:1-18, Ġesù kif xebbah ir-​relazzjoni tiegħu mas-​segwaċi tiegħu? (b) Ġesù x’għamel possibbli għan-​ngħaġ tiegħu permezz tal-​mewt taʼ sagrifiċċju tiegħu?

³ Madwar erbaʼ xhur qabel mewtu, Ġesù tkellem dwaru nnifsu bħala “r-​ragħaj mill-​aħjar” u s-​segwaċi tiegħu bħala “ngħaġ” li għalihom kien se jagħti ħajtu. Semma b’mod speċjali lin-​ngħaġ misjubin minnu ġewwa maqjel tan-​ngħaġ figurattiv u wara dan mogħtijin kura speċjali minnu. (Ġwann 10:1-18)a B’imħabba, Ġesù tassew ċeda lil ruħu għan-​nom tan-​ngħaġ tiegħu, billi pprovda l-​prezz tar-​rahan li kien meħtieġ sabiex ikunu jistgħu jinħelsu mid-​dnub u l-​mewt.

4. Min huma l-​ewwel uħud miġburin bħala ngħaġ fi qbil maʼ dak li Ġesù qal hawnhekk?

⁴ Qabel għamel dak, madankollu, Ġesù bħala r-​Ragħaj mill-​Aħjar personalment ġabar dixxipli. L-​ewwel uħud ġew introdotti lilu minn Ġwanni l-​Battista, il-​“purtinar” tat-​tixbieha taʼ Ġesù. Ġesù kien qed ifittex nies li jwieġbu għall-​opportunità li jsiru parti miż-​‘żerriegħa komposta t’Abraham.’ (Ġenesi 22:18; Galatin 3:16, 29) Ikkultiva fi qlubhom apprezzament għas-​Saltna tas-​smewwiet, u żgurahom li kien se jħejjilhom post fid-​dar taʼ Missieru tas-​sema. (Mattew 13:44-46; Ġwann 14:2, 3) B’mod xieraq qal: “Minn jiem Ġwanni l-​Battista s’issa s-​saltna tas-​smewwiet hija l-​mira li lejha jagħfsu l-​bnedmin, u dawk li qegħdin jagħfsu ’l quddiem qegħdin jaħtfuha.” (Mattew 11:12) Dawn li segwewh sabiex jiksbu dik il-​mira taw prova li kienu ġol-​maqjel tan-​ngħaġ li dwaru tkellem Ġesù.

5. (a) Min huma “l-​irsiera t’Alla tagħna” li jirreferi għalihom Rivelazzjoni 7:3-8? (b) X’juri li ħafna iżjed kellhom jingħaqdu fil-​qima maʼ l-​Iżraeliti spiritwali?

⁵ F’Rivelazzjoni 7:3-8, dawk li b’suċċess jagħfsu ’l quddiem lejn dik il-​mira tas-​sema huma rreferuti wkoll bħala “l-​irsiera t’Alla tagħna.” (Ara 1 Pietru 2:9, 16.) Il-​144,000 li jissemmew hemmhekk huma biss Lhud naturali? Dawk li qegħdin fil-​maqjel tan-​ngħaġ figurattiv tat-​tixbieha taʼ Ġesù huma biss Lhud? Żgur li le; huma membri taʼ l-​Iżrael spiritwali t’Alla, ilkoll kemm huma sħab maʼ Kristu fiż-​żerrriegħa spiritwali t’Abraham. (Galatin 3:28, 29; 6:16; Rivelazzjoni 14:1, 3) Iż-​żmien kellu eventwalment jiġi, m’għandniex xi ngħidu, meta l-​għadd iffissat kellu jimtela. Imbagħad x’kien se jiġri? Bħalma kienet bassret il-​Bibbja, oħrajn​—folla kbira minnhom—​kellhom jingħaqdu maʼ dawn l-​Iżraeliti spiritwali f’li jqimu lil Jehovah.—Żakkarija 8:23.

In-​“Ngħaġ Oħra”​—Huma Dawk Kristjani Ġentili?

6. Ġwann 10:16 jipponta lejn liema żvilupp?

⁶ Wara li semma maqjel tan-​ngħaġ wieħed fi Ġwann 10:7-15, Ġesù daħħal grupp ieħor fl-​istampa, billi qal: “Għandi ngħaġ oħra, li m’humiex taʼ dan il-​maqjel; dawk ukoll irrid inġib, u se jagħtu widen lil leħni, u se jsiru merħla waħda, ragħaj wieħed.” (Ġwann 10:16) Min huma dawk in-​“ngħaġ oħra”?

7, 8. (a) L-​idea li n-​ngħaġ oħra huma Kristjani Ġentili għala hija mibnija fuq konklużjoni żbaljata? (b) Liema fatti rigward l-​iskop t’Alla għall-​art għandhom ikunu relatati mal-​fehma tagħna dwar min huma n-​ngħaġ oħra?

⁷ Il-​kummentaturi tal-​Kristjaneżmu ġeneralment jassumu li dawn in-​ngħaġ oħra huma Kristjani Ġentili u li dawk fil-​maqjel tan-​ngħaġ li rreferejna għalih qabel huma Lhud, dawk li kienu taħt il-​patt tal-​Liġi, u li ż-​żewġ gruppi jmorru fis-​sema. Imma Ġesù kien imwieled Lhudi u kien grazzi għal twelidu taħt il-​patt tal-​Liġi. (Galatin 4:4) Iżjed minn hekk, dawk li jqisu lin-​ngħaġ oħra bħala Kristjani Ġentili li se jiġu ppremjati b’ħajja fis-​sema qegħdin jonqsu li jieħdu f’kunsiderazzjoni aspett importanti taʼ l-​iskop t’Alla. Meta Jehovah ħalaq lill-​ewwel bnedmin u poġġiehom fil-​ġnien t’Għeden, għamilha ċara li l-​iskop tiegħu kien li l-​art tkun ippopolata, li kollha kemm hi tkun ġenna, u li l-​bnedmin li jieħdu ħsiebha jgawdu ħajja għal dejjem​—bil-​kundizzjoni li jirrispettaw u jobdu lill-​Ħallieq tagħhom.—Ġenesi 1:26-28; 2:15-17; Isaija 45:18.

⁸ Meta Adam dineb, l-​iskop taʼ Jehovah ma nġiebx fix-​xejn. Alla b’imħabba għamel provvediment għal nisel Adam biex ikollhom l-​opportunità jgawdu dak li Adam naqas li japprezza. Jehovah bassar li kien se jqajjem ħellies, żerriegħa, li permezz tiegħu barkiet kienu se jintgħamlu disponibbli għall-​ġnus kollha. (Ġenesi 3:15; 22:18) Dik il-​wegħda ma kenitx tfisser li n-​nies tajbin kollha fuq l-​art kienu se jittieħdu fis-​sema. Ġesù għallem lis-​segwaċi tiegħu jitolbu: “Ħa tiġi saltnatek. Ħa tintgħamel ir-​rieda tiegħek, kif fis-​sema, ukoll fuq l-​art.” (Mattew 6:9, 10) Ftit qabel ma qal it-​tixbieha mniżżla fi Ġwann 10:1-16, Ġesù kien qal lid-​dixxipli tiegħu li kien biss lil “merħla ċkejkna” li Missieru kien approva li jagħti s-​Saltna tas-​sema. (Luqa 12:32, 33) Mela meta naqraw it-​tixbieha taʼ Ġesù dwaru nnifsu bħala r-​Ragħaj mill-​Aħjar li jċedi ruħu għan-​nom tan-​ngħaġ tiegħu, ikun żball li teskludi mill-​istampa l-​maġġoranza taʼ dawk li Ġesù jġib taħt il-​ħarsien taʼ mħabba tiegħu, l-​uħud li jsiru sudditi fuq l-​art tas-​Saltna tiegħu tas-​sema.—Ġwann 3:16.

9. Sa minn kmieni mis-​sena 1884, l-​Istudenti tal-​Bibbja x’fehmu li kienet l-​identità tan-​ngħaġ oħra?

⁹ Sa kmieni mis-​sena 1884, il-​Watch Tower identifika lin-​ngħaġ oħra bħala li huma nies li se jingħataw l-​opportunità li jgħixu fuq din l-​art taħt kundizzjonijiet li jwettqu l-​iskop oriġinali t’Alla. Dawk l-​Istudenti tal-​Bibbja bikrin irrealizzaw li xi wħud minn dawn in-​ngħaġ oħra se jkunu nies li għexu u mietu qabel il-​ministeru taʼ Ġesù fuq l-​art. Kien hemm, madankollu, xi dettalji li ma fehmux b’mod korrett. Per eżempju, ħasbu li l-​ġbir tan-​ngħaġ oħra kien se jseħħ wara li l-​midlukin kollha jkunu ħadu l-​premju tagħhom tas-​sema. Xorta waħda, irrealizzaw b’mod definit li n-​ngħaġ oħra ma kinux sempliċement Kristjani Ġentili. L-​opportunità biex issir wieħed min-​ngħaġ l-​oħra hija miftuħa kemm għal-​Lhud kif ukoll għall-​Ġentili, għal nies tal-​ġnus u r-​razez kollha.—Qabbel Atti 10:34, 35.

10. Sabiex inkunu dawk li Ġesù jqis tassew bħala n-​ngħaġ oħra tiegħu, x’irid ikun veru dwarna?

¹⁰ Biex tixirqilhom id-​deskrizzjoni mogħtija minn Ġesù, in-​ngħaġ oħra iridu jkunu nies li, minkejja l-​isfond razzjali jew etniku, jirrikonoxxu lil Ġesù Kristu bħala r-​Ragħaj mill-​Aħjar. Dak x’jinkludi? Iridu juru ruħhom ġwejdin u li lesti li jiġu ggwidati, liema kwalitajiet huma karatteristiċi tan-​ngħaġ. (Salm 37:11) Kif inhuwa veru dwar il-​merħla ċkejkna, iridu ‘jagħrfu leħen ir-​ragħaj mill-​aħjar’ u ma jħallux lilhom infushom jiġu żvijati minn oħrajn li jistgħu jfittxu li jinfluwenzawhom. (Ġwann 10:4; 2 Ġwann 9, 10) Iridu japprezzaw l-​importanza taʼ dak li għamel Ġesù f’li ċeda ruħu għan-​nom tan-​ngħaġ tiegħu u jeżerċitaw fidi sħiħa f’dak il-​provvediment. (Atti 4:12) Iridu “jagħtu widen” għal-​leħen tar-​Ragħaj mill-​Aħjar meta jħeġġiġhom biex jagħtu servizz sagru biss lil Jehovah, biex ifittxu l-​ewwel is-​Saltna, biex iżommu separati mid-​dinja, u biex juru mħabba li tissagrifika lilha nfisha għal xulxin. (Mattew 4:10; 6:31-33; Ġwann 15:12, 13, 19) Tapplika għalik id-​deskrizzjoni taʼ dawk li Ġesù jqishom bħala n-​ngħaġ oħra tiegħu? Tridha li tkun? X’relazzjoni prezzjuża ssir disponibbli għal dawk kollha li verament isiru ngħaġ oħra taʼ Ġesù!

Rispett Lejn Awtorità Tas-​Saltna

11. (a) Fis-​sinjal tal-​preżenza tiegħu, Ġesù x’qal dwar in-​ngħaġ u l-​mogħoż? (b) Min huma l-​aħwa li Ġesù jirreferi għalihom?

¹¹ Bosta xhur wara li ta t-​tixbieha t’hawn fuq, Ġesù kien mill-​ġdid f’Ġerusalemm. Meta kien bil-​qiegħda fuq il-​Muntanja taż-​Żebbuġ li kienet tħares fuq il-​medda tat-​tempju, ipprovda lid-​dixxipli b’dettalji tas-​‘sinjal tal-​preżenza tiegħu u tal-​konklużjoni tas-​sistema t’affarijiet.’ (Mattew 24:3) Għal darb’oħra tkellem dwar il-​ġbir tan-​ngħaġ. Fost affarijiet oħrajn, qal: “Meta Bin il-​bniedem jasal fil-​glorja tiegħu, u l-​anġli kollha miegħu, imbagħad se joqgħod bil-​qiegħda fuq it-​tron glorjuż tiegħu. U l-​ġnus kollha se jinġabru quddiemu, u se jifred lin-​nies wieħed mill-​ieħor, sewwa sew bħalma ragħaj jifred in-​ngħaġ mill-​mogħoż. U se jpoġġi lin-​ngħaġ fuq il-​leminija tiegħu, imma l-​mogħoż fuq ix-​xellug tiegħu.” F’din il-​parabbola, Ġesù wera li dawk li b’dan il-​mod jingħataw attenzjoni mis-​Sultan se jiġu ġġudikati fuq il-​bażi taʼ kif ittrattaw maʼ ‘ħutu.’ (Mattew 25:31-46) Min huma dawn ħutu? Huma Kristjani mnisslin bl-​ispirtu li huma għalhekk ‘ulied Alla.’ Ġesù hu l-​Iben imwieled l-​ewwel t’Alla. Għaldaqstant, huma ħut Kristu. Huma “l-​irsiera t’Alla tagħna” msemmijin f’Rivelazzjoni 7:3, l-​uħud magħżulin minn fost l-​umanità biex jieħdu sehem maʼ Kristu fis-​Saltna tiegħu tas-​sema.—Rumani 8:14-17.

12. Il-​mod kif in-​nies jittrattaw maʼ ħut Kristu għala huwa taʼ importanza kbira?

¹² Il-​mod kif bnedmin oħrajn jittrattaw maʼ dawn il-​werrieta tas-​Saltna huwa taʼ importanza vitali. Tħares lejhom int bħalma jagħmel Ġesù Kristu u bħalma jagħmel Jehovah? (Mattew 24:45-47; 2 Tessalonkin 2:13) L-​attitudni taʼ persuna lejn dawn l-​uħud midlukin tirrifletti l-​attitudni tagħha lejn Ġesù Kristu nnifsu u lejn Missieru, is-​Sovran Universali.—Mattew 10:40; 25:34-46.

13. L-​Istudenti tal-​Bibbja fl-​1884 sa liema punt fehmu l-​parabbola tan-​ngħaġ u l-​mogħoż?

¹³ Fil-​ħarġa tiegħu t’Awissu 1884, il-​Watch Tower b’mod korrett indika li n-​“ngħaġ” f’din il-​parabbola huma wħud li se jkollhom imqiegħed quddiemhom il-​prospett taʼ ħajja perfetta fuq l-​art. Kien mifhum ukoll li l-​parabbola jrid ikollha applikazzjoni meta Kristu jkun qiegħed jaħkem mit-​tron glorjuż tiegħu tas-​sema. Madankollu, f’dak iż-​żmien m’għarfux b’mod ċar meta kellu jibda x-​xogħol taʼ frid deskritt hemm u kemm kellu jdum.

14. Taħdita waqt konvenzjoni fl-​1923 kif għenet lill-​Istudenti tal-​Bibbja biex japprezzaw meta kellha titwettaq il-​parabbola profetika taʼ Ġesù?

¹⁴ Madankollu, fl-​1923, f’taħdita waqt konvenzjoni, J. F. Rutherford, li dak iż-​żmien kien president tal-​Watch Tower Society, iċċara ż-​żmien għat-​twettieq tal-​parabbola tan-​ngħaġ u l-​mogħoż. Għala? F’parti, għaliex il-​parabbola turi li ħut is-​Sultan​—għall-​anqas xi wħud minnhom—​se jkunu għadhom fuq l-​art. Fost il-​bnedmin, is-​segwaċi midlukin tiegħu biss jistgħu verament jissejħu ħutu. (Ebrej 2:10-12) Dawn m’humiex se jkunu fuq l-​art matul il-​Millennju, biex jipprovdu lin-​nies opportunità sabiex jagħmlulhom il-​ġid bil-​modi li ddeskriva Ġesù.—Rivelazzjoni 20:6.

15. (a) Liema żviluppi għenu lill-​Istudenti tal-​Bibbja biex jidentifikaw b’mod korrett lin-​ngħaġ tal-​parabbola taʼ Ġesù? (b) In-​ngħaġ kif taw evidenza taʼ l-​apprezzament tagħhom għas-​Saltna?

¹⁵ F’dik it-​taħdita fl-​1923, sar sforz biex jiġu identifikati dawk li għalihom tapplika d-​deskrizzjoni tal-​Mulej tan-​ngħaġ u tal-​mogħoż, imma affarijiet oħrajn kellhom bżonn jiġu mifhumin qabel is-​sinjifikat sħiħ tal-​parabbola setaʼ jkun ċar. Matul is-​snin taʼ wara, Jehovah b’mod progressiv ġibed dawn id-​dettalji importanti għall-​attenzjoni tal-​qaddejja tiegħu. Dawn inkludew li jifhmu b’mod ċar, fl-​1927, li “l-​irsir leali u diskret” hu l-​ġemgħa sħiħa taʼ Kristjani midlukin bl-​ispirtu fuq l-​art; ukoll li japprezzaw, fl-​1932, il-​ħtieġa li jidentifikaw lilhom infushom bla biżaʼ mal-qaddejja midlukin taʼ Jehovah, bħalma Ġonadab għamel maʼ Ġeħu. (Mattew 24:45; 2 Slaten 10:15) F’dak iż-​żmien, fuq il-​bażi taʼ Rivelazzjoni 22:17, dawn l-​uħud bħal ngħaġ kienu speċifikament inkuraġġiti biex jieħdu sehem f’li jieħdu l-​messaġġ tas-​Saltna għand oħrajn. L-​apprezzament tagħhom għas-​Saltna Messjanika kien se jqanqalhom mhux biss biex jestendu qalb tajba umanitarja lejn l-​uħud midlukin tal-​Mulej imma biex jiddedikaw il-​ħajjiet tagħhom lil Jehovah permezz taʼ Kristu u biex isiru mseħbin mill-​qrib maʼ l-​uħud midlukin tiegħu, billi jieħdu sehem b’mod żeluż fix-​xogħol li qegħdin jagħmlu. Qiegħed int tagħmlu dak? Lil dawk li jagħmluh, is-​Sultan se jgħid: “Ejjew, intom li ġejtu mberkin minn Missieri, irtu s-​saltna mħejjija għalikom mit-​tisjis tad-​dinja.” Quddiemhom se jkun hemm il-​prospett grandjuż taʼ ħajja taʼ dejjem f’perfezzjoni fil-​qasam taʼ l-​art tas-​Saltna.—Mattew 25:34, 46.

Il-​“Folla Kbira”​—Fejn Sejrin?

16. (a) L-​Istudenti tal-​Bibbja bikrin liema ideat żbaljati kellhom dwar l-​identità tal-​kotra l-​kbira, jew il-​folla l-​kbira, taʼ Rivelazzjoni 7:9? (b) Meta u fuq liema bażi ġiet ikkorreġuta l-​ħarsa tagħhom?

¹⁶ Għal xi żmien il-​qaddejja taʼ Jehovah kienu jemmnu li l-​kotra l-​kbira (jew, il-​folla l-​kbira) taʼ Rivelazzjoni 7:9, 10 kienet differenti min-​ngħaġ oħra taʼ Ġwann 10:16 u n-​ngħaġ taʼ Mattew 25:33. Minħabba li l-​Bibbja tgħid li qegħdin “bil-​wieqfa quddiem it-​tron,” kien maħsub li se jkunu fis-​sema, mhux fuq tronijiet, imexxu bħala werrieta sħab maʼ Kristu, imma f’post sekondarju quddiem it-​tron. Kienu meqjusin bħala Kristjani inqas leali, uħud li ma wrewx spirtu taʼ sagrifiċċju veru tagħhom infushom. Fl-​1935 dik il-​ħarsa ġiet ikkorreġuta.b Eżami taʼ Rivelazzjoni 7:9 fid-​dawl taʼ testi bħalma huma Mattew 25:31, 32 għamilha ċara li nies hawn fuq l-​art setgħu jkunu “quddiem it-​tron.” Ukoll ġie indikat li Alla m’għandux żewġ livelli taʼ fedeltà. Dawk kollha li għandhom l-​approvazzjoni tiegħu jridu jżommu integrità lejh.—Mattew 22:37, 38; Luqa 16:10.

17, 18. (a) Liema fattur qanqal iż-​żjieda kbira, mill-​1935 ’l hawn, fl-​għadd taʼ dawk li jħarsu ’l quddiem lejn ħajja eterna fuq l-​art? (b) Dawk tal-​folla l-​kbira f’liema xogħol vitali qegħdin jieħdu sehem b’mod żeluż?

¹⁷ Għal ħafna snin in-​nies taʼ Jehovah kienu tkellmu dwar il-​wegħdi t’Alla rigward l-​art. Minħabba dak li stennew li jseħħ lura fis-​snin għoxrin, ipproklamaw li “Miljuni Issa Ħajjin M’Huma Se Jmutu Qatt.” Imma ma kienx hemm miljuni li ħaddnu l-​provvedimenti t’Alla għall-​ħajja f’dak iż-​żmien. Fil-​maġġoranza taʼ dawk li aċċettaw il-​verità, l-​ispirtu qaddis iġġenera t-​tama taʼ ħajja fis-​sema. B’mod speċjali wara l-​1935, madankollu, bidla notevoli seħħet. Ma kienx għaliex il-​Watchtower kien injora t-​tama taʼ ħajja eterna fuq l-​art. Għal għaxriet taʼ snin il-​qaddejja taʼ Jehovah kienu tkellmu dwar dan u kienu fittxew lil dawk li tixirqilhom id-​deskrizzjoni tal-​Bibbja. Fiż-​żmien maħtur taʼ Jehovah, iżda, hu ħa ħsieb li dawn juru lilhom infushom.

¹⁸ Id-​dokumenti disponibbli juru li għal ħafna snin il-​biċċa l-​kbira minn dawk li attendew għall-​Mafkar ħadu mill-​emblemi. Imma sa 25 sena wara l-​1935, l-​attendenza fil-​Mafkar annwali tal-​mewt taʼ Kristu żdiedet b’mod drammatiku għal iktar minn mitt darba taʼ l-​għadd taʼ dawk li kienu qegħdin jieħdu mill-​emblemi. Min kienu dawn l-​oħrajn? Membri prospettivi tal-​folla l-​kbira. B’mod ċar, iż-​żmien taʼ Jehovah biex jiġborhom u biex iħejjihom għal salvazzjoni fit-​tribulazzjoni kbira li kienet quddiemhom kien wasal. Bħalma kien imbassar, ġew “mill-​ġnus u t-​tribujiet u l-​popli u l-​ilsna kollha.” (Rivelazzjoni 7:9) Qegħdin jieħdu sehem b’mod żeluż fix-​xogħol li bassar Ġesù meta qal: “Din l-​aħbar tajba tas-​saltna se tkun ippridkata fl-​art abitata kollha għal xiehda lill-​ġnus kollha; u mbagħad se jiġi t-​tmiem.”—Mattew 24:14. (w95 2/1)

[Noti taʼtaħt]

X’Inhuwa L-​Kumment Tiegħek?

◻ Il-​viżjoni f’Rivelazzjoni kapitlu 7 għala hija taʼ interess speċjali?

◻ In-​ngħaġ oħra taʼ Ġwann 10:16 għala m’humiex limitati għal Kristjani Ġentili?

◻ X’irid ikun veru dwar dawk li għalihom tapplika d-​deskrizzjoni Biblika tan-​ngħaġ oħra?

◻ Il-​parabbola tan-​ngħaġ u l-​mogħoż kif tenfasizza rispett lejn l-​awtorità tas-​Saltna?

◻Liema ħaġa turi meta kien wasal iż-​żmien taʼ Jehovah biex jiġbor il-​folla l-​kbira taʼ Rivelazzjoni 7:9?