Afda f’Jehovah—Dak Alla li Hu Reali

Qatt ħarist lejn is-​sema f’lejl mingħajr sħab u rajt mijiet taʼ kwiekeb? Kif taħseb li bdew jeżistu?

FIL-​ĦEMDA tal-​lejl, il-​kwiekeb donnhom bdew jgħidulu xi ħaġa lis-​Sultan David taʼ Iżrael tal-​qedem, tant li qanqluh biex jikteb: “Is-​smewwiet ixandru l-​glorja taʼ Alla, għemil idejh tħabbar il-​firxa tas-​sema.” (Salm 19:2 [19:1, NW]) Iva, il-​Ħallieq u mhux il-​ħolqien jixraqlu ‘li jilqaʼ l-​glorja u l-​ġieħ u s-​setgħa.’—Apokalissi 4:11; Rumani 1:25.

Hu “Alla [li] jibni kollox,” tgħid il-​Bibbja. (Lhud 3:4) Tabilħaqq, dak Alla veru, ‘li Jaħweh hu ismu, hu waħdu l-​Għoli fuq l-​art kollha.’ (Salm 83:19 [83:​18, NW]) U hu m’huwiex xi illużjoni—xi miraġġ. Ġesù Kristu qal dan dwar Missieru tas-​sema, Jehovah: “Dak li bagħatni hu reali.”—Ġwann 7:​28, NW.

Jehovah​—Dak li Jwettaq l-​Iskopijiet Tiegħu

L-​isem uniku t’Alla, Jehovah, jidher kważi 7,000 darba fl-​Iskrittura Ebrajka biss. Dak l-​istess isem juri kemm Hu reali. L-​isem t’Alla letteralment ifisser “Hu Jikkaġuna li Jsir.” Alla Jehovah b’hekk jiddeskrivi lilu nnifsu bħala Dak li Jwettaq l-​iskopijiet tiegħu. Meta Mosè staqsa lil Alla x’jismu, Jehovah żied dan dwar it-​tifsir taʼ ismu: “Jien se nuri li nkun dak li se nuri li nkun.” (Eżodu 3:​14, NW) It-​traduzzjoni taʼ Rotherham tistqarr ċar u tond: “Jien Se Nsir dak kollu li jogħġobni.” Jehovah juri li jkun, jew jagħżel li jsir, dak li jkun hemm bżonn biex iġiegħel l-​iskopijiet taʼ tjieba u l-​wegħdi tiegħu jsiru realtà. B’hekk, hu għandu ħafna titli impressjonanti, bħalma huma, Ħallieq, Missier, Mulej Sovran, Ragħaj, Mulej taʼ l-​eżerċti, Semmiegħ it-​talb, Imħallef, Mgħallem Grandjuż, Feddej.—Mħallfin 11:27; Salm 23:1; 65:3 (65:​2, NW); 73:28; 89:27 (89:​26, NW); Isaija 8:13; 30:20; 40:28; 41:14. 

Dak Alla veru biss għandu d-​dritt li jkollu l-​isem Jehovah, għax il-​bnedmin qatt ma jistgħu jkunu żguri li l-​pjanijiet tagħhom se jirnexxu. (Ġakbu 4:​13, 14) Jehovah biss jistaʼ jgħid: “Bħalma x-​xita u s-​silġ jinżlu mis-​smewwiet, u ma jerġgħux lura mnejn ġew bla ma jsaqqu l-​art, imma jġegħluha tnissel u tnibbet, u tagħti ż-​żerriegħa ’l min jiżraʼ u l-​ħobż ’il min jiekol, hekk jiġri minn kelmti: hija toħroġ minn fommi, u ma terġax lura vojta, imma tagħmel dak li jogħġob lili, u ttemm dak li nkun bgħattha tagħmel.”—Isaija 55:​10, 11.

Jehovah iwettaq l-​iskop tiegħu b’tant ċertezza li saħansitra dak li jistaʼ jidher mhux reali għall-​bnedmin, għalih jidher li huwa reali. Ħafna żmien wara l-​mewt t’Abraham, Iżakk, u Ġakobb, Ġesù semmiehom u qal: “Hu [Jehovah] m’huwiex Alla tal-​mejtin, iżda tal-​ħajjin, għax għalih [“huma lkoll ħajjin,” NW].” (Luqa 20:​37, 38) Dawn it-​tliet patrijarki leali kienu mejtin, imma l-​iskop t’Alla biex jirxoxtahom tant kien ċert li se jitwettaq li għalih kienu daqslikieku ħajjin. Bħalma ma kienx diffiċli għal Jehovah li joħloq l-​ewwel bniedem mit-​trab taʼ l-​art, daqshekk ieħor mhux se jkun diffiċli għalih li jerġaʼ jagħti l-​ħajja lil dawn il-​qaddejja leali tal-​qedem.—Ġenesi 2:7.

L-appostlu Pawlu jipprovdi eżempju ieħor tal-​fatt li Alla jġiegħel l-​iskopijiet tiegħu jitwettqu. Fl-​Iskrittura, Abraham jissejjaħ “missier taʼ kotra kbira taʼ ġnus.” (Rumani 4:​16, 17) Meta Abram kien għad ma kellux tfal, Jehovah biddillu ismu għal Abraham, li jfisser “Missier taʼ Folla [Kotra].” Jehovah ġiegħel li t-​tifsira taʼ dak l-​isem issir realtà billi b’miraklu ġedded il-​qawwiet prokreattivi tax-​xwejjaħ Abraham u taʼ martu, Sarah, li wkoll kienet imdaħħla sew fiż-​żmien.—Lhud 11:​11, 12.

Peress li Ġesù Kristu hu mogħni b’tant qawwa u awtorità, hu tkellem dwar realtajiet minn ħarsa ferm superjuri għal dik tal-​bnedmin. Għalkemm l-​għażiż ħabib tiegħu Lazzru kien miet, Ġesù qal lid-​dixxipli tiegħu: “Ħabibna Lazzru rieqed; iżda ħa mmur u nqajjmu.” (Ġwann 11:11) Ġesù għala tkellem dwar raġel mejjet bħala li kien sempliċement rieqed?

Meta Ġesù wasal Betanja, il-​belt fejn kien joqgħod Lazzru, hu mar ħdejn il-​qabar u talab li titneħħa l-​ġebla li kienet qed timblokka d-​daħla. Wara li talab b’leħen għoli, hu kkmanda: “Lazzru, oħroġ!” U waqt li għajnejn dawk kollha preżenti kienu ffissati fuq il-​qabar, “dak li kien mejjet ħareġ, b’idejh u riġlejh infaxxati u b’maktur maʼ wiċċu.” Ġesù mbagħad qalilhom: “Ħollulu l-​faxex u ħalluh imur.” (Ġwann 11:​43, 44) Ġesù rxoxta lil Lazzru—reġaʼ ta l-​ħajja lil bniedem li kien ilu mejjet erbat ijiem! Kristu ma kienx qed jgħawweġ il-​verità meta qal li ħabibu kien rieqed. Għal Jehovah u Ġesù, il-​mejjet Lazzru kien bħallikieku sempliċement rieqed. Iva, Ġesù u Missieru jikkonċernaw ruħhom f’affarijiet li huma reali biss.

Jehovah Jistaʼ Jbiddel it-​Tamiet Tagħna f’Realtajiet

X’kuntrast kbir hemm bejn l-​idoli qarrieqa u dak Alla veru! Dawk li jqimu l-​idoli jemmnu b’mod żbaljat li l-​oġġetti li jqimu għandhom poteri sovrumani. Minkejja d-​devozzjoni kollha li tingħatalhom, dawn l-​idoli qatt ma se jsiru kapaċi jagħmlu l-​mirakli. Mill-​banda l-​oħra, Alla Jehovah jistaʼ b’mod xieraq jirreferi għall-​qaddejja tiegħu li ilhom żmien twil mejtin bħala li huma ħajjin għax hu kapaċi jagħtihom il-​ħajja mill-​ġdid. “Il-​Mulej tassew hu Alla,” u hu qatt ma se jqarraq bil-​poplu tiegħu.—Ġeremija 10:10.

Kemm huwa taʼ faraġ li nkunu nafu li meta jasal il-​waqt taʼ Jehovah, il-​mejtin li jinsabu fil-​memorja tiegħu se jiġu rxoxtati—se jerġgħu jingħataw il-​ħajja! (Atti 24:15) Iva, l-​irxoxt jinvolvi restawr tal-​karatteristiċi tal-​ħajja taʼ l-​individwu. M’hijiex problema għall-​Ħallieq, li għandu għerf u qawwa infiniti, biex jiftakar il-​karatteristiċi tal-​mejtin u jirxoxtahom. (Ġob 12:13; Isaija 40:26) Ladarba Jehovah għandu mħabba bl-​abbundanza, hu se juża l-​memorja perfetta tiegħu sabiex iġib lill-​mejtin lura għall-​ħajja fuq art magħmula ġenna bil-​personalità li kellhom qabel ma mietu.—1 Ġwann 4:8.

Hekk kif joqrob tmiem id-​dinja taʼ Satana, il-​futur ċertament li jidher sabiħ għal dawk li qed jafdaw f’dak Alla veru. (Proverbji 2:​21, 22; Danjel 2:44; 1 Ġwann 5:19) Is-​salmista jaċċertana: “Ftit ieħor, u l-​ħażin ma jkunx aktar; għad tħares fejn kien u ma ssibux. Imma l-​ġwejdin għad jirtu l-​art, u bi sliem kotran jitgħaxxqu.” (Salm 37:​10, 11) Il-​kriminalità u l-​vjolenza se jkunu affarijiet taʼ l-​imgħoddi. Il-​ġustizzja se tittrijonfa, u mhux se jkun hemm iktar tbatijiet ekonomiċi. (Salm 37:6; 72:​12, 13; Isaija 65:​21-23) Se titneħħa kwalunkwe traċċa taʼ diskriminazzjoni soċjali, razzjali, tribwali, u etnika. (Atti 10:​34, 35) La l-​gwerer u lanqas l-​armamenti ma se jibqgħu iktar. (Salm 46:10 [46:​9, NW]) F’dak iż-​żmien “ħadd minn min jgħammar hemm ma jgħid: ‘Jien marid.’” (Isaija 33:24) Kulħadd se jkun mimli enerġija u jgawdi saħħa perfetta. (Apokalissi 21:​3, 4) Il-​Ġenna fuq l-​art dalwaqt se ssir realtà. Għax dan hu l-​iskop taʼ Jehovah!

Iva, it-​tamiet kollha li huma bbażati fuq il-​Bibbja dalwaqt se jitwettqu. Għala għandna nħallu lilna nfusna niġu mqarrqin bl-​affarijiet li d-​dinja qed tagħmilhom l-​idoli tagħha meta jistaʼ jkollna fiduċja sħiħa f’Jehovah? Hija r-​rieda tiegħu li “l-​bnedmin kollha jsalvaw u jaslu biex jagħrfu l-​verità.” (1 Timotju 2:​3, 4) Minflok ma naħlu l-​ħin u r-​riżorsi tagħna fl-​illużjonijiet, jew il-​miraġġi taʼ din is-​sistema t’affarijiet u l-​allat tagħha, ejja nikbru fl-​għarfien dwar Alla li hu reali u nafdaw fih b’qalbna kollha.—Proverbji 3:​1-6; Ġwann 17:3.

[Stampa f’paġna 6]

Għal Jehovah u Ġesù, Lazzru kien sempliċement rieqed

[Stampi f’paġna 7]

Il-​Ġenna fuq l-​art dalwaqt se ssir realtà