Agħmel Dikjarazzjoni Pubblika għas-​Salvazzjoni

“Kull min isejjaħ isem il-​Mulej [Jehovah] isalva.”—RUMANI 10:13.

1. Matul l-​istorja, liema twissijiet issemmgħu?

L-​ISTORJA tiddeskrivi diversi ‘jiem taʼ Jehovah.’ Id-​Dilluvju taʼ żmien Noè, il-​qerda taʼ Sodoma u Gomorra, u t-​tiġrif taʼ Ġerusalemm fis-​snin 607 Q.E.K. u 70 E.K. kienu jiem taʼ Jehovah kbar u li jqanqlu l-​biżaʼ. Kienu jiem li fihom dawk li rribellaw kontra Jehovah ħadu l-​ġudizzju li kien ħaqqhom. (Malakija 3:23 [Malakija 4:5, NW]; Luqa 21:22) F’dawk il-​jiem, ħafna għebu minħabba ħżunithom. Imma xi wħud baqgħu ħajjin. Jehovah ġiegħel li jinstemgħu twissijiet, billi avża lil uħud mill-​agħar bil-​katakliżmu imminenti u ta lil uħud b’qalb retta l-​opportunità li jsibu s-​salvazzjoni.

2, 3. (a) Liema twissija profetika ġiet ikkwotata f’Pentekoste? (b) Minn Pentekoste tas-​sena 33 E.K., x’kien meħtieġ biex wieħed isejjaħ isem Jehovah?

² Il-​qerda taʼ Ġerusalemm fis-​sena 70 E.K. hija eżempju li jispikka taʼ dan. Billi bassar dik il-​ġrajja kważi 900 sena minn qabel, il-​profeta Ġoel kiteb: “Fis-​sema u l-​art nuri sinjali, demm u nar u kolonni taʼ duħħan! Ix-​xemx tinbidel fi dlam, u l-​qamar f’demm, qabel ma jasal Jum il-​Mulej, kbir u tal-​biżaʼ!” Kif setaʼ xi ħadd jibqaʼ ħaj f’jum taʼ tkexkix bħal dan? Ġoel kiteb taħt ispirazzjoni: “Kull min isejjaħ isem il-​Mulej [Jehovah] jinħeles, għax fuq il-​muntanja Sijon ikun hemm is-​salvazzjoni, kif qal il-​Mulej, u f’Ġerusalemm jibqgħu xi wħud li l-​Mulej isejjaħ.”—Ġoel 3:3-5 [Ġoel 2:30-32, NW].

³ F’Pentekoste tas-​sena 33 E.K., l-​appostlu Pietru indirizza ġemgħa taʼ Lhud u proseliti f’Ġerusalemm u kkwota l-​profezija taʼ Ġoel, billi wera li s-​semmiegħa tiegħu setgħu jistennew twettiq fi żmienhom: “Jien nagħmel għeġubijiet fl-​għoli tas-​smewwiet[,] u sinjali isfel fl-​art: demm u nar u dħaħen kbar. Ix-​xemx tinbidel fi dlam, u l-​qamar f’demm[,] qabel ma jasal jum il-​Mulej, jum kbir u glorjuż. U jiġri li kull min isejjaħ isem il-​Mulej [Jehovah] ikun salv.” (Atti 2:16-21) Il-​folol li kienu qegħdin jisimgħu lil Pietru kienu kollha taħt il-​Liġi Mosajka, u għalhekk kienu jafuh isem Jehovah. Pietru spjega li, minn dak in-​nhar ’l hemm, li wieħed isejjaħ l-​isem taʼ Jehovah kien se jinvolvi xi ħaġa iżjed. B’mod speċjali, dan inkluda li wieħed jitgħammed f’isem Ġesù, il-​wieħed li nqatel u mbagħad ġie rxoxtat għal ħajja immortali fis-​sema.—Atti 2:37, 38.

4. Il-​Kristjani liema messaġġ iddikjaraw maʼ kullimkien?

⁴ Minn Pentekoste ’l quddiem, il-​Kristjani xerrdu l-​kelma dwar Ġesù rxoxtat. (1 Korintin 1:23) Huma għamlu magħruf il-​fatt li l-​bnedmin setgħu jiġu adottati bħala wlied spiritwali taʼ Alla Jehovah u jsiru parti mill-​“Iżrael [il-ġdid] taʼ Alla,” ġens spiritwali li kien se ‘jiddikjara maʼ kullimkien it-​tifħir taʼ Jehovah.’ (Galatin 6:16; 1 Pietru 2:9) Dawk li kienu se jibqgħu leali sal-​mewt kellhom jirtu ħajja immortali fis-​sema bħala werrieta sħab maʼ Ġesù fis-​Saltna tiegħu tas-​smewwiet. (Mattew 24:13; Rumani 8:15, 16; 1 Korintin 15:50-54) Iktar minn hekk, dawn il-​Kristjani kellhom jipproklamaw il-​miġja tal-​jum il-​kbir taʼ Jehovah, jum li jqanqal il-​biżaʼ. Kellhom iwissu lid-​dinja Lhudija li din kienet se tesperjenza tribulazzjoni li tisboq kull ħaġa li sa dak iż-​żmien kienet laqtet lil Ġerusalemm u lil dawk li kienu jistqarru li huma l-​poplu t’Alla. Madankollu, kien se jkun hemm min jibqaʼ ħaj. Min? Dawk li sejħu isem Jehovah.

Fl-​“Aħħar tad-​Dinja”

5. Liema twettiq tal-​profezija seħħ illum?

⁵ F’ħafna modi, il-​kundizzjonijiet taʼ dak iż-​żmien kienu stampa bil-​quddiem taʼ dak li naraw illum. Mill-​1914 ’l hawn, l-​umanità qiegħda tgħix f’perijodu taʼ żmien speċjali li l-​Bibbja tirreferi għalih bħala ż-​“żmien taʼ l-​aħħar,” “tmiem id-​dinja,” u “l-​aħħar tad-​dinja.” (Danjel 12:1, 4; Mattew 24:3-8; 2 Timotju 3:1-5, 13) Fis-​seklu tagħna, gwerer krudili, vjolenza bla rażan, u r-​rovina tas-​soċjetà u taʼ l-​ambjent ipprovdew twettiq rimarkevoli tal-​profezija tal-​Bibbja. Dawn huma kollha parti mis-​sinjal ipprofetizzat minn Ġesù, u jindikaw li l-​umanità dalwaqt se ġġarrab il-​jum finali taʼ Jehovah, jum deċiżiv u li jqanqal il-​biżaʼ. Dan jilħaq il-​quċċata tiegħu fil-​battalja taʼ Armageddon, il-​punt kruċjali taʼ “diqa kbira li mill-​bidu tad-​dinja sa issa għadu qatt ma kien hawn bħalha u anqas ikun hawn.”—Mattew 24:21; Apokalissi 16:16.

6. (a) Jehovah kif aġixxa u għadu jaġixxi biex isalva lill-​ġwejdin? (b) Fejn insibu l-​pariri taʼ Pawlu dwar kif nibqgħu ħajjin?

⁶ Hekk kif il-​jum taʼ ħerba joqrob dejjem iżjed, Jehovah qed jaġixxi għas-​salvazzjoni tal-​ġwejdin. Matul dan iż-​“żmien taʼ l-​aħħar,” hu ġabar l-​aħħar uħud mill-​Iżrael spiritwali t’Alla u mis-​snin tletin ’il quddiem ġibed l-​attenzjoni tal-​qaddejja tiegħu fuq l-​art lejn il-​ġbir taʼ “kotra kbira li ħadd ma jistaʼ jgħoddha, minn kull ġens u tribù, minn kull poplu u lsien.” Bħala grupp, dawn joħorġu ħajjin “mit-​taħbit il-​kbir.” (Apokalissi 7:9, 14) Imma kif jistaʼ kull individwu jaċċerta ruħu li se jibqaʼ ħaj? L-​appostlu Pawlu jwieġeb dik il-​mistoqsija. F’Rumani kapitlu 10, hu jagħti pariri mill-​aħjar għas-​sopravivenza​—pariri li kienu japplikaw fi żmienu u li japplikaw mill-​ġdid fi żmienna.

Talba Għas-​Salvazzjoni

7. (a) Liema tama hija identifikata f’Rumani 10:1, 2? (b) Jehovah għala jistaʼ issa jġiegħel li jixxandar “Evanġelju” iżjed mifrux?

⁷ Meta Pawlu kiteb il-​ktieb taʼ Rumani, Jehovah kien diġà warrab minnu lil Iżrael bħala ġens. Xorta waħda, l-​appostlu afferma: “Nixtieq tassew minn qalbi nitlob quddiem Alla li niesi jsalvaw.” It-​tama tiegħu kienet li individwi Lhud setgħu jiksbu għarfien eżatt tar-​rieda t’Alla, li jwassal biex huma jiġu salvati. (Rumani 10:1, 2) Iktar minn hekk, Jehovah kieku jixtieq is-​salvazzjoni għall-​bnedmin li jeżerċitaw fidi mad-​dinja kollha, bħalma hu indikat fi Ġwann 3:16: “Alla hekk ħabb lid-​dinja li ta lil Ibnu l-​waħdieni, biex kull min jemmen fih ma jintilifx, iżda jkollu l-​ħajja taʼ dejjem.” Is-​sagrifiċċju bħala rahan taʼ Ġesù fetaħ it-​triq għal dik is-​salvazzjoni grandjuża. Bħal fi żmien Noè u fi żminijiet oħrajn taʼ ġudizzju li ġew wara, Jehovah qed iġiegħel li jixxandar “l-​Evanġelju,” biex jindika t-​triq lejn is-​salvazzjoni.—Mark 13:10, 19, 20.

8. Wara l-​eżempju taʼ Pawlu, Kristjani veri lejn min jestendu rieda tajba llum, u kif?

⁸ B’turija tar-​rieda tajba tiegħu stess kemm lejn il-​Lhud u kemm lejn il-​Ġentili, Pawlu ppriedka f’kull opportunità. Kien “jipperswadi lil-​Lhud u l-​Griegi.” Hu qal lill-​anzjani taʼ Efesu: “Qatt ma bżajt nurikom dak li hu taʼ fejda għalikom u ngħallimkom kemm fil-​beraħ u kemm fid-​djar, u nwissi lil-​Lhud u lill-​Griegi li għandhom jindmu u jduru lejn Alla u jemmnu fil-​Mulej tagħna Ġesù.” (Atti 18:4; 20:20, 21) Bl-​istess mod, ix-​Xhieda taʼ Jehovah llum iħabirku fl-​ippridkar, mhux biss għal dawk li huma parti mill-​Kristjaneżmu imma għall-​popli kollha, anki “sa truf l-​art.”—Atti 1:8; 18:5.

Nistqarru l-​“Kelma tal-​Fidi”

9. (a) Rumani 10:8, 9 liema xorta taʼ fidi jinkuraġġixxi? (b) Meta u kif għandna nagħmlu dikjarazzjoni tal-​fidi tagħna?

⁹ Biex insalvaw neħtieġu fidi dejjiema. Waqt li kkwota minn Dewteronomju 30:​14, Pawlu ddikjara: “‘Il-​kelma qiegħda ħdejk, f’fommok u f’qalbek’; jiġifieri, il-​kelma tal-​fidi li aħna nxandru.” (Rumani 10:8) Hekk kif nippridkaw dik “il-​kelma tal-​fidi,” din issir iżjed u iżjed minquxa fil-​fond taʼ qalbna. Hekk ġralu Pawlu, u dak li jkompli jgħid jistaʼ jsaħħaħ id-​determinazzjoni tagħna biex inkunu bħalu f’li naqsmu dik il-​fidi m’oħrajn: “Jekk inti tistqarr b’fommok, ‘Ġesù hu l-​Mulej’, u temmen b’qalbek li Alla qajjmu mill-​imwiet, inti ssalva.” (Rumani 10:9) Din id-​dikjarazzjoni ma ssirx biss quddiem oħrajn meta nitgħammdu imma trid tkun dikjarazzjoni kontinwa, xiehda pubblika b’żelu dwar l-​aspetti grandjużi kollha tal-​verità. Din il-​verità tiffoka fuq l-​isem prezzjuż tal-​Mulej Sovran Jehovah; fuq is-​Sultan Messjaniku u l-​Feddej tagħna, Sidna Ġesù Kristu; u fuq il-​wegħdi meraviljużi tas-​Saltna.

10. Fi qbil maʼ Rumani 10:10, 11, kif għandna nittrattawha din “il-​kelma tal-​fidi”?

¹⁰ M’hemmx salvazzjoni għal min ma jaċċettax u ma japplikax din “il-​kelma tal-​fidi,” bħalma jissokta jgħid l-​appostlu: “Wieħed jemmen f’qalbu biex ikollu l-​ġustizzja u jistqarr b’xufftejh biex ikollu s-​salvazzjoni. L-​Iskrittura tgħid, ‘Kull min jemmen fih ma jintilifx.’” (Rumani 10:10, 11) Irridu niksbu għarfien eżatt dwar din “il-​kelma tal-​fidi” u nibqgħu nrawmuha fi qlubna biex b’hekk niġu mqanqlin nitkellmuha m’oħrajn. Ġesù nnifsu jfakkarna: “Jekk xi ħadd, minn dan in-​nisel żieni u midneb taʼ llum, għad jistħi minni u minn kliemi, Bin il-​bniedem ukoll għad jistħi minnu meta jiġi fil-​glorja taʼ Missieru flimkien maʼ l-​anġli mqaddsa.”—Mark 8:38.

11. L-​aħbar tajba kemm trid tiġi pproklamata b’mod estensiv, u għala?

¹¹ Bħalma kien imbassar mill-​profeta Danjel, f’dan iż-​żmien taʼ l-​aħħar, “il-​bnedmin bil-​għaqal” jidhru jiddu b’“dija bħal dik tas-​sema,” hekk kif ix-​xiehda dwar is-​Saltna tinfirex sa truf l-​art. Huma “wasslu ’l ħafna fis-​sewwa,” u l-​veru għarfien sar tassew abbundanti, għax Jehovah, iżjed ma jmur, iżjed qiegħed jitfaʼ dawl qawwi fuq il-​profeziji rigward dan iż-​żmien taʼ l-​aħħar. (Danjel 12:3, 4) Dan hu messaġġ taʼ salvazzjoni li huwa vitali għas-​sopravivenza taʼ dawk kollha li jħobbu l-​verità u t-​tjieba.

12. Rumani 10:12 kif inhu fi qbil mal-​kariga taʼ l-​anġlu deskritta f’Apokalissi 14:6?

¹² L-​appostlu Pawlu jissokta: “Ma hemmx għażla bejn Lhudi u Grieg; hu s-​Sid taʼ kulħadd u għani maʼ dawk kollha li jsejjħulu.” (Rumani 10:12) L-​“Evanġelju” jrid jiġi ppridkat illum fuq skala globali saħansitra akbar​—lill-​popli kollha, sa truf l-​art. L-​anġlu taʼ Apokalissi 14:6 jibqaʼ jittajjar f’nofs is-​sema, u jafdalna ‘l-​Evanġelju taʼ dejjem ħalli nxandruh lil kulmin jgħammar fuq l-​art, lil kull ġens, tribù, ilsien u poplu.’ Dan kif se jkun taʼ benefiċċju għal min jaġixxi?

Insejħu Isem Jehovah

13. (a) X’inhu t-​test tagħna għas-​sena 1998? (b) Dan it-​test tas-​sena għala huwa ferm addattat illum?

¹³ Waqt li jikkwota minn Ġoel 3:5 [Ġoel 2:32, NW], Pawlu jiddikjara: “Kull min isejjaħ isem il-​Mulej [Jehovah] isalva.” (Rumani 10:13) Kemm huwa xieraq li dak il-​kliem intgħażel bħala t-​test tas-​sena għax-​Xhieda taʼ Jehovah għall-​1998! Qatt qabel ma kien iktar importanti daqs illum li nimxu ’l quddiem b’fiduċja f’Jehovah, billi nagħmlu magħruf ’l ismu u l-​iskopijiet grandjużi li dan jirrappreżenta! Bħal fl-​ewwel seklu, hekk ukoll fl-​aħħar jiem tas-​sistema preżenti taʼ affarijiet korrotta, tinstemaʼ l-​għajta tidwi: “Salvaw lilkom infuskom minn dan in-​nisel ħażin.” (Atti 2:40) Hija stedina b’għajta qawwija għal dawk kollha li jibżgħu minn Alla minn madwar id-​dinja ħa jsejħu lil Jehovah biex jagħti s-​salvazzjoni lilhom u wkoll lil dawk li jisimgħu d-​dikjarazzjoni pubblika tagħhom taʼ l-​aħbar tajba.—1 Timotju 4:16.

14. Lil liema Blata rridu nsejħu għas-​salvazzjoni?

¹⁴ X’se jiġri meta l-​jum il-​kbir taʼ Jehovah jiżbroffa fuq din il-​pjaneta? Il-​biċċa l-​kbira m’humiex se jfittxu lil Jehovah biex isalvahom. Fil-​biċċa l-​kbira tagħhom il-​bnedmin se jissoktaw “jgħidu lill-​muntanji u lill-​blat: ‘Ordmuna u aħbuna minn wiċċ dak li hemm bilqiegħda fuq it-​tron u mill-​korla tal-​Ħaruf.’” (Apokalissi 6:15, 16) It-​tama tagħhom se tkun fl-​organizzazzjonijiet u fl-​istituzzjonijiet bħal muntanji taʼ din is-​sistema taʼ affarijiet. Kemm ikun bil-​wisq aħjar, iżda, li kieku jafdaw fl-​akbar Blata li teżisti, Alla Jehovah! (Dewteronomju 32:3, 4) Dwaru, is-​Sultan David qal: “Il-​Mulej blata tiegħi, fortizza u ħellies tiegħi.” Jehovah hu l-​“blata tas-​salvazzjoni tagħna.” (Salm 18:3 [Salm 18:2, NW]; Salm 95:1) Ismu huwa “torri qawwi,” l-​uniku “torri” b’saħħtu biżżejjed biex jipproteġina matul il-​kriżi li ġejja. (Proverbji 18:10) Għalhekk, huwa vitali li l-​akbar għadd possibbli taʼ nies mill-​kważi sitt biljun ruħ ħajjin illum jiġu mgħallmin isejħu isem Jehovah b’fedeltà u sinċerità.

15. Rumani 10:14 x’jindika rigward il-​fidi?

¹⁵ Bix-​xieraq, l-​appostlu Pawlu jissokta jistaqsi: “Imma kif jistgħu jsejjħu lil dak li ma jemmnux fih?” (Rumani 10:14) Hemm kotriet kbar taʼ nies li għad jistgħu jiġu megħjunin iħaddnu l-​“kelma tal-​fidi,” sabiex isejħu lil Jehovah għas-​salvazzjoni. Il-​fidi hija taʼ importanza vitali. Pawlu jistqarr f’ittra oħra: “Mingħajr il-​fidi ma jistax ikun li wieħed jogħġob lil Alla. Għax kull min jersaq lejn Alla jeħtieġlu jemmen li Alla jeżisti u li hu jagħti l-​ħlas xieraq lil dawk li jfittxuh.” (Lhud 11:6) Kif, iżda, se jpoġġu fidi f’Alla iktar miljuni taʼ nies? Fl-​ittra lir-​Rumani, Pawlu jistaqsi: “Kif jistgħu jemmnu f’dak li ma semgħux bih?” (Rumani 10:14) Jipprovdi Jehovah l-​mezz biex huma jisimgħu? Dażgur li jipprovdi! Agħti widen għal dak li jkompli jgħid Pawlu: “Kif jistgħu jisimgħu jekk ma jxandrulhomx?”

16. Fl-​arranġament divin, il-​predikaturi għala huma essenzjali?

¹⁶ Mill-​argument taʼ Pawlu huwa ċar daqs il-​kristall li hemm bżonn taʼ predikaturi. Ġesù indika li dan jibqaʼ japplika, matul iż-​żminijiet kollha “sa l-​aħħar taż-​żmien.” (Mattew 24:14; 28:18-20) L-​ippridkar huwa parti essenzjali mill-​arranġament divin biex in-​nies jiġu megħjunin isejħu isem Jehovah sabiex jinħelsu. Saħansitra fil-​Kristjaneżmu l-​maġġor parti tan-​nies ma jagħmlu xejn biex jonoraw l-​isem prezzjuż t’Alla. Ħafna nies iħawdu għalkollox lil Jehovah maʼ żewġ identitajiet oħrajn f’domma taʼ Trinità li ma tistax tiġi spjegata. Ukoll, ħafna jaqgħu fil-​kategorija msemmija f’Salm 14:1 u Salm 53:2 [Salm 53:1, NW]: “Jgħid l-​iblah f’qalbu: ‘M’hemmx Alla!’” Huma għandhom bżonn ikunu jafu li Jehovah hu dak Alla l-​ħaj, u jridu jifhmu dak kollu li ismu jirrappreżenta jekk iridu jinħelsu fit-​tribulazzjoni kbira li riesqa bil-​għaġla.

Ir-​‘Riġlejn Sbieħ’ taʼ Dawk li Jippridkaw

17. (a) Għala huwa xieraq li Pawlu jikkwota profezija taʼ restawr? (b) X’inhu involut f’li wieħed ikollu ‘riġlejn sbieħ’?

¹⁷ L-​appostlu Pawlu għandu mistoqsija vitali oħra: “Kif jistgħu jxandrulhom jekk ma jkunux mibgħuta? Bħalma hemm miktub: ‘Kemm huma sbieħ riġlejn dawk li jħabbru l-​ġid.’” (Rumani 10:15) Pawlu hawnhekk jikkwota Isaija 52:7, li huwa parti minn profezija taʼ restawr li ilha tapplika mill-​1919 ’l hawn. Illum, għal darb’oħra, Jehovah qiegħed jibgħat ‘lil min iħabbar il-​bxara, lil min ixandar is-​sliem, lil min iħabbar ir-​riżq, lil min ixandar is-​salvazzjoni.’ B’ubbidjenza, “l-​għassiesa” midlukin t’Alla u l-​imseħbin tagħhom ikomplu jgħajtu bil-​ferħ. (Isaija 52:7, 8) Riġlejn dawk li jħabbru s-​salvazzjoni llum jistgħu jgħejjew, u jimtlew bit-​trab ukoll, waqt li jimxu minn dar għal dar, imma kemm jixgħel wiċċhom bil-​ferħ! Jafu li huma mqabbdin minn Jehovah sabiex jipproklamaw l-​aħbar tajba taʼ paċi u biex ifarrġu lill-​uħud imnikktin, billi jgħinuhom isejħu isem Jehovah bil-​għan li jiġu salvati.

18. Rumani 10:16-18 x’jgħid rigward ir-​riżultat finali li jseħħ meta tiġi msemmaʼ l-​aħbar tajba?

¹⁸ Kemm jekk in-​nies ‘jemmnu l-​kelma li semgħu’ u kemm jekk jagħżlu li ma jobduhiex, kliem Pawlu huwa veru: “Imma ngħid jien, jaqaw ma semgħux? Żgur li semgħu. L-​Iskrittura tgħid: ‘Leħinhom xtered maʼ l-​art kollha, u l-​kelma tagħhom laħqet truf id-​dinja.’” (Rumani 10:16-18) Sewwa sew bħalma “s-​smewwiet ixandru l-​glorja taʼ Alla,” kif jidher mix-​xogħlijiet tiegħu taʼ ħolqien, hekk ukoll ix-​Xhieda tiegħu fuq l-​art iridu jniedu ‘s-​sena tal-​grazzja tal-​Mulej, u jum il-​vendetta t’Alla u jfarrġu lill-​imnikktin.’—Salm 19:1-4; Isaija 61:2.

19. X’se jkun ir-​riżultat għal dawk li ‘jsejħu isem Jehovah’ illum?

¹⁹ Il-​jum il-​kbir u li jkexkex taʼ Jehovah qed joqrob iktar u iktar. “Ah, x’jum dan! Għax fil-​qrib jum il-​Mulej, jasal bħal riefnu mingħand Xaddaj.” (Ġoel 1:15; 3:4 [Ġoel 2:31, NW]) It-​talba tagħna hija li iktar kotriet taʼ nies iwieġbu b’urġenza għall-​aħbar tajba, billi jinġemgħu lejn l-​organizzazzjoni taʼ Jehovah. (Isaija 60:8; Ħabakkuk 2:3) Ftakar li jiem oħrajn taʼ Jehovah rriżultaw f’rovina għall-​uħud mill-​agħar​—fi żmien Noè, fi żmien Lot, u fi żmien Iżrael u Ġuda apostati. Aħna qegħdin issa fix-​xifer taʼ l-​akbar waħda mit-​tribulazzjonijiet, meta r-​riefnu tempestuż taʼ Jehovah se jiknes il-​ħażen minn fuq wiċċ din il-​pjaneta, billi jħejji t-​triq għal ġenna taʼ paċi eterna. Se tkun int wieħed li “[j]sejjaħ isem il-​Mulej [Jehovah]” b’fedeltà? Jekk inhu hekk, ithenna bil-​ferħ! Għandek il-​wegħda t’Alla stess li int se ssalva.—Rumani 10:13.

Kif Twieġeb Int?

◻ Liema affarijiet ġodda ġew ipproklamati wara Pentekoste tas-​sena 33 E.K.?

◻ Il-​Kristjani kif għandhom joqogħdu attenti għall-​“kelma tal-​fidi”?

◻ X’ifisser li ‘ssejjaħ isem Jehovah’?

◻ Messaġġiera tas-​Saltna f’liema sens għandhom ‘riġlejn sbieħ’?

[Stampi f’paġna 13]

In-​nies t’Alla qed jiddikjaraw l-​eċċellenzi tiegħu f’Puerto Rico, fis-​Senegal, fil-​Perù, f’Papua New Guinea​—iva, madwar il-​globu kollu