Taqtgħux Qalbkom fit-​Tiġrija għall-​Ħajja!

“Ħa niġru bis-​sabar il-​ġirja li għandna quddiemna.”—LHUD 12:1, Karm Żammit.

1, 2. Liema ġrajjiet eċċitanti qanqlu lill-​qaddejja taʼ Jehovah matul dawn l-​aħħar jiem?

AĦNA qed ngħixu fi żminijiet eċċitanti u diffiċli ferm. Fl-​1914, iktar minn 80 sena ilu, Ġesù ġie mqiegħed fuq it-​tron bħala s-​Sultan tas-​Saltna tas-​sema t’Alla. Beda “jum il-​Mulej” u miegħu ż-​“żmien taʼ l-​aħħar” taʼ din is-​sistema t’affarijiet. (Apokalissi 1:10; Danjel 12:9) Minn dakinhar ’l hawn it-​tiġrija tal-​Kristjan għall-​ħajja bdiet tkun iktar urġenti. Il-​qaddejja t’Alla tħabtu b’mod vigoruż biex iżommu l-​pass mal-​karru ċelestjali taʼ Jehovah, l-​organizzazzjoni tiegħu tas-​sema, li għaddej bla waqfien biex iwettaq l-​iskopijiet taʼ Jehovah.—Eżekjel 1:4-28; 1 Korintin 9:24.

² Sabu ferħ in-​nies t’Alla hekk kif qegħdin ‘jiġru fit-​tiġrija’ lejn il-​ħajja taʼ dejjem? Iva, dażgur li sabu! Huma ħassewhom eċċitati ferm f’li jaraw il-​ġbir tal-​fdal taʼ ħut Ġesù, u jħossuhom ferħanin meta jirrealizzaw li l-​issiġillar finali tal-​fdal tal-​144,000 qorob biex jintemm. (Apokalissi 7:3, 4) Iktar minn hekk, huma jinsabu eċċitati li qed jindunaw li s-​Sultan maħtur taʼ Jehovah daħħal il-​minġel biex jaħsad “il-​ħsad taʼ l-​art.” (Apokalissi 14:15, 16) U xi ħsad hu dan! (Mattew 9:37) S’issa, iktar minn ħames miljun ruħ ġew miġburin​—“kotra kbira li ħadd ma jistaʼ jgħoddha, minn kull ġens u tribù, minn kull poplu u lsien.” (Apokalissi 7:9) Ħadd ma jistaʼ jgħid kemm se tkun kbira finalment dik il-​folla, ladarba l-​ebda bniedem ma jistaʼ jgħoddha.

3. Minkejja liema ostakli rridu aħna dejjem nipprovaw nikkultivaw spirtu ferrieħi?

³ Veru li Satana jipprova jfixkilna jew iġagħalna nbattu hekk kif inkunu għaddejjin b’veloċità fit-​tiġrija. (Apokalissi 12:17) U ma kienx faċli li wieħed jibqaʼ jiġri matul il-​gwerer, il-​ġuħ, il-​pesti, u t-​tbatijiet l-​oħrajn kollha li jimmarkaw iż-​żmien tat-​tmiem. (Mattew 24:3-9; Luqa 21:11; 2 Timotju 3:1-5) Xorta waħda, qlubna jimtlew bil-​ferħ hekk kif tmiem it-​tiġrija riesaq dejjem iktar qrib. Aħna nistinkaw biex nirriflettu l-​ispirtu li Pawlu ħeġġeġ lil sħabu l-​Kristjani taʼ żmienu biex ikollhom: “Ifirħu dejjem fil-​Mulej: nerġaʼ ngħidilkom, ifirħu.”—Filippin 4:4.

4. Liema xorta taʼ spirtu kien muri mill-​Kristjani Filippin?

⁴ M’hemm l-​ebda dubju li l-​Kristjani li lilhom Pawlu kien qed jindirizza dawk il-​kelmiet kienu qegħdin isibu ferħ fil-​fidi tagħhom, għax Pawlu qalilhom: “[“Komplu,” “NW”] ifirħu fil-​Mulej!” (Filippin 3:1) Il-​Filippin kienu kongregazzjoni ġeneruża, li jafu jħobbu, u li qdew b’żelu u entużjażmu. (Filippin 1:3-5; 4:10, 14-20) Imma mhux il-​Kristjani taʼ l-​ewwel seklu kollha kellhom dak l-​ispirtu. Per eżempju, xi wħud mill-​Kristjani Lhud li lilhom Pawlu kiteb il-​ktieb taʼ Lhud kienu qed jikkaġunaw tħassib.

“Nagħtu Ħafna Aktar Kas”

5. (a) Il-​Kristjani Ebrej liema spirtu kellhom meta ġiet ifformata l-​ewwel kongregazzjoni Kristjana? (b) Iddeskrivi l-​ispirtu li kellhom xi Kristjani Ebrej madwar is-​sena 60 E.K.

⁵ L-​ewwel kongregazzjoni Kristjana fl-​istorja tad-​dinja kienet magħmula minn Lhud naturali u proseliti u din ġiet stabbilita fis-​sena 33 E.K. Liema xorta taʼ spirtu kellha din? Ikun biżżejjed li wieħed jaqra l-​kapitli tal-​bidu tal-​ktieb t’Atti biex jinduna bl-​entużjażmu u l-​ferħ tagħha, saħansitra waqt il-​persekuzzjoni. (Atti 2:44-47; 4:32-34; 5:41; 6:7) Hekk kif għaddew għaxriet taʼ snin, madankollu, l-​affarijiet inbiddlu, u ħafna Kristjani Lhud b’mod evidenti bdew ibattu fit-​tiġrija għall-​ħajja. Xogħol wieħed taʼ referenza jgħid dan dwar is-​sitwazzjoni li eżistiet madwar is-​sena 60 E.K.: “Kundizzjoni taʼ traskuraġni u għejja, taʼ stennijiet mhux imwettqin, taʼ tamiet posposti, taʼ falliment qarrieq u nuqqas taʼ fiduċja fil-​ħajja taʼ kuljum. Kienu Kristjani imma ftit li xejn kellhom apprezzament għall-​glorja tas-​sejħa tagħhom.” Kif setgħu Kristjani midlukin jaslu f’dan l-​istat? Li nikkunsidraw partijiet mill-​ittra taʼ Pawlu lil-​Lhud (miktuba madwar is-​sena 61 E.K.) se jgħinna nwieġbu din il-​mistoqsija. Li nikkunsidraw dan se jgħinna lkoll illum biex nevitaw li nispiċċaw fi stat spiritwali dgħajjef simili.

6. X’inhuma xi differenzi bejn il-​qima taħt il-​Liġi taʼ Mosè u l-​qima bbażata fuq il-​fidi f’Ġesù Kristu?

⁶ Il-​Kristjani Ebrej kienu ġejjin mill-​Ġudaiżmu, sistema li sostniet li tobdi l-​Liġi li Jehovah ta permezz taʼ Mosè. Dik il-​Liġi milli jidher baqgħet togħġob lil ħafna Kristjani Lhud, forsi minħabba li għal bosta sekli kienet l-​uniku mezz taʼ komunikazzjoni maʼ Jehovah, u kienet sistema impressjonanti taʼ qima, b’saċerdozju, sagrifiċċji regulari, u tempju f’Ġerusalemm famuż mad-​dinja kollha. Il-​Kristjanità hija differenti. Din titlob vista spiritwali differenti, bħal dik li kellu Mosè, li “ħares ’il quddiem lejn il-​ħlas [fil-futur]” u “żamm iebes, daqs kemm kieku kien qiegħed jara lil Alla li ma jidhirx.” (Lhud 11:26, 27) Ħafna Kristjani Lhud evidentement kienu neqsin minn vista spiritwali bħal din. Huma kienu qegħdin izappu minflok ma jiġru bi skop quddiemhom.

7. Is-​sistema li ħriġna minna kif tistaʼ teffettwa l-​mod taʼ kif aħna niġru fit-​tiġrija għall-​ħajja?

⁷ Hemm xi sitwazzjoni simili llum? Sewwa, l-​affarijiet m’humiex eżattament l-​istess. Xorta waħda, il-​Kristjani qed joħorġu minn sistema t’affarijiet li tant tħobb tiftaħar. Id-​dinja toffri opportunitajiet eċċitanti, imma fl-​istess ħin, tpoġġi pressjonijiet kbar fuq in-​nies. Barra minn hekk, ħafna minna ngħixu f’pajjiżi fejn attitudni taʼ xettiċiżmu hija komuni u fejn in-​nies iqisu l-​affarijiet b’attitudni egoista u taʼ jien l-​ewwel. Jekk inħallu lilna nfusna niġu influwenzati minn sistema bħal din, ‘l-​għajnejn taʼ qalbna’ jistgħu faċilment jiġu mdallmin. (Efesin 1:18) Kif nistgħu niġru sewwa fit-​tiġrija għall-​ħajja jekk m’għadniex nafu preċiż fejn sejrin?

8. X’inhuma xi modi li fihom il-​Kristjanità hija superjuri għall-​qima taħt il-​Liġi?

⁸ Sabiex iqanqal lill-​Kristjani Lhud, Pawlu fakkarhom dwar is-​superjorità li s-​sistema Kristjana għandha fuq il-​Liġi Mosajka. Huwa minnu li meta l-​ġens taʼ Iżrael naturali kien il-​poplu taʼ Jehovah taħt il-​Liġi, Jehovah kellimhom permezz taʼ profeti mnebbħin. Imma, skond Pawlu, illum jitkellem “permezz taʼ Ibnu, li hu għamlu werriet taʼ kollox, u li bih ukoll għamel il-​ħolqien.” (Lhud 1:2) Barra minn hekk, Ġesù hu akbar minn ‘sħabu,’ is-​slaten kollha mil-​linja taʼ David. Hu saħansitra ogħla mill-​anġli.—Lhud 1:5, 6, 9.

9. Aħna, bħall-​Kristjani Lhud taʼ żmien Pawlu, għala għandna bżonn nagħtu “ħafna aktar kas” għal dak li jgħid Jehovah?

⁹ Għalhekk, Pawlu ta parir lill-​Kristjani Lhud: “Għandna nagħtu ħafna aktar kas taʼ dak li smajna, li ma mmorrux nitbiegħdu ’l barra mit-​triq.” (Lhud 2:1) Għalkemm li jitgħallmu dwar il-​Kristu kienet barka taʼ l-​għaġeb, ħafna iktar kien meħtieġ. Kellhom bżonn joqogħdu attenti ferm għall-​Kelma t’Alla biex jikkumbattu l-​influwenza tad-​dinja Lhudija taʼ madwarhom. Aħna wkoll għandna bżonn “nagħtu ħafna aktar kas” taʼ dak li Jehovah jgħid minħabba l-​propaganda kostanti li aħna niġu esposti għaliha minħabba d-​dinja. Dan ifisser li niżviluppaw drawwiet tajbin taʼ studju u nżommu skeda tajba taʼ qari mill-​Bibbja. Bħalma jgħid Pawlu iktar tard fl-​ittra tiegħu lil-​Lhud, dan ifisser ukoll attendenza regulari għal-​laqgħat u li nxandru l-​fidi tagħna lil oħrajn. (Lhud 10:23-25) Attività bħal din se tgħinna nibqgħu mqajmin spiritwalment sabiex it-​tama glorjuża tagħna ma tiċċajparx. Jekk nimlew moħħna bil-​ħsibijiet taʼ Jehovah, m’aħniex se niġu megħlubin jew żbilanċjati minn xi ħaġa, hi x’inhi, li din id-​dinja tistaʼ tagħmlilna.—Salm 1:1-3; Proverbji 3:1-6.

“Agħmlu l-​Qalb lil Xulxin”

10. (a) X’jistaʼ jiġrilu dak li ma jagħtix ħafna iktar kas għall-​Kelma taʼ Jehovah? (b) Kif nistgħu aħna nkomplu ‘nagħmlu l-​qalb lil xulxin’?

¹⁰ Jekk ma noqogħdux attenti ferm għall-​affarijiet spiritwali, il-​wegħdi t’Alla għandhom mnejn jibdew jidhru mhux reali. Dan ġara saħansitra fl-​ewwel seklu meta l-​kongregazzjonijiet kienu magħmulin biss minn Kristjani midlukin u xi wħud mill-​appostli kienu għadhom ħajjin. Pawlu wissa lil-​Lhud: “Ħuti, araw li f’ebda wieħed minnkom ma jkun hemm qalb imħassra bin-​nuqqas taʼ twemmin li jwassal għall-​firda minn Alla l-​ħaj. Imma agħmlu l-​qalb lil xulxin kull jum, sakemm inkunu għadna nistgħu ngħidu ‘illum’, biex ħadd minnkom ma jiġġarraf mid-​dnub u jwebbes qalbu.” (Lhud 3:12, 13) L-​espressjoni taʼ Pawlu “araw li” tenfasizza l-​bżonn li noqogħdu attenti. Hemm periklu kbir! Nuqqas taʼ fidi​—id-​“dnub”—​għandu mnejn jiżviluppa f’qalbna, u nistgħu nitbiegħdu minn Alla minflok ma nersqu eqreb lejh. (Ġakbu 4:8) Pawlu jfakkarna biex ‘nagħmlu l-​qalb lil xulxin’. Għandna bżonn il-​kordjalità tas-​sħubija taʼ l-​aħwa. “Min irid jinfired mill-​oħrajn jara x’jaqlaʼ, u għal kull xejn jiġġieled.” (Proverbji 18:1) Il-​bżonn għal sħubija bħal din tqanqal lill-​Kristjani llum biex ikunu regulari f’li jattendu l-​laqgħat tal-​kongregazzjoni, l-​assembleat, u l-​konvenzjonijiet.

11, 12. Għala m’għandniex inkunu sodisfatti b’li sempliċement inkunu nafu duttrini Kristjani bażiċi?

¹¹ Iktar tard fl-​ittra tiegħu, Pawlu jkompli jagħti dan il-​parir imprezzabbli: “Għalkemm issa jmisskom sirtu mgħallmin [“għalliema,” KŻ], għadkom teħtieġu ’l min jgħallimkom mill-​ġdid l-​ewwel elementi tal-​kelma taʼ Alla; ġejtu fil-​bżonn li tieħdu l-​ħalib, u mhux ikel sħiħ. . . . L-​ikel sħiħ hu tal-​kbar, taʼ dawk li biż-​żmien huma mdorrija jagħżlu bejn it-​tajjeb u l-​ħażin.” (Lhud 5:12-14) Evidentement, xi Kristjani Lhud kienu naqsu li jimxu ’l quddiem fil-​fehma. Kienu ħaduha bil-​lajma biex jaċċettaw id-​dawl li dejjem jiżdied rigward il-​Liġi u ċ-​ċirkonċiżjoni. (Atti 15:27-29; Galatin 2:11-14; 6:12, 13) Xi wħud għandhom mnejn kienu għadhom jgħożżu prattiċi tradizzjonali bħalma huma s-​Sibtijiet u l-​Jum solenni annwali tat-​Tpattija.—Kolossin 2:16, 17; Lhud 9:1-14.

¹² Għaldaqstant, Pawlu jgħid: “Ħallina mill-​ewwel elementi tat-​tagħlim taʼ Kristu, u nimxu ’l quddiem lejn dak li hu aktar perfett.” (Lhud 6:1) Ġerrej f’maratona, li joqgħod b’sebaʼ għajnejn għad-​dieta tiegħu, huwa kapaċi iktar jissaporti t-​tellieqa twila u taʼ qtigħ il-​qalb. Bl-​istess mod, Kristjan li joqgħod attent ferm għan-​nutriment spiritwali​—billi ma jillimitax lilu nnifsu għall-​‘ewwel elementi bażiċi tat-​tagħlim’—​se jkun iktar kapaċi jibqaʼ fuq il-​korsa u jispiċċaha. (Qabbel 2 Timotju 4:7.) Dan ifisser li jiżviluppa interess fil-​“wisaʼ u t-​tul, l-​għoli u l-​fond” tal-​verità, biex b’hekk jipprogressa lejn il-​maturità.—Efesin 3:18.

“Tassew li Teħtieġu s-​Sabar”

13. Il-​Kristjani Ebrej kif urewha l-​fidi tagħhom fil-​passat?

¹³ Fil-​perijodu li ġie immedjatament wara Pentekoste tas-​sena 33 E.K., il-​Kristjani Lhud ħadu waqfa soda minkejja oppożizzjoni ħarxa. (Atti 8:1) Forsi Pawlu kellu dan f’moħħu meta kiteb: “Ftakru f’dawk l-​ewwel jiem: lanqas biss ilħaqtu ddawwaltu bit-​tagħlim, li ma ġarrabtux bis-​sabar taqbida ħarxa.” (Lhud 10:32) Sabar leali bħal dan wera l-​imħabba tagħhom lejn Alla u b’dan ħassewhom liberi li jitkellmu miegħu. (1 Ġwann 4:17) Pawlu ħeġġiġhom biex ma jitilfux din il-​libertà minħabba nuqqas taʼ fidi. Hu jħeġġiġhom: “Tassew li teħtieġu s-​sabar biex tagħmlu r-​rieda taʼ Alla u tiksbu dak li hu wiegħed. Għax ‘ftit ieħor, ftit ħafna, u dak li għandu jiġi ma jdumx ma jiġi.’”—Lhud 10:35-37.

14. Liema fatti għandhom jgħinuna biex nissaportu saħansitra wara ħafna snin li nkunu ilna naqdu lil Jehovah?

¹⁴ Xi ngħidu għalina llum? Il-​biċċa l-​kbira minna konna żelużi meta sirna nafu għall-​ewwel darba l-​verità Kristjana. Għad għandna dak iż-​żelu? Jew ‘ħallejna dik l-​imħabba li konna wrejna fil-​bidu’? (Apokalissi 2:4) Bridna xi naqra, forsi konna xi daqsxejn iddiżappuntati jew iddejjaqna nistennew Armageddon? Ieqaf ftit, iżda, u ikkunsidra. Il-​verità m’hijiex inqas taʼ l-​għaġeb milli kienet qabel. Ġesù għadu s-​Sultan tagħna tas-​sema. Aħna għadna nittamaw għall-​ħajja taʼ dejjem f’art magħmula ġenna, u għad għandna r-​relazzjoni tagħna maʼ Jehovah. U qatt tinsa li: “Dak li għandu jiġi ma jdumx ma jiġi.”

15. Il-​Kristjani kif issaportew persekuzzjoni ħarxa bħalma għamel Ġesù?

¹⁵ Għaldaqstant, il-​kliem taʼ Pawlu ddokumentat f’Lhud 12:1, 2, (KŻ) huwa verament xieraq: “Ħa nwarrbu kull tagħbija, u d-​dnub li tant malajr ifixkilna, u ħa niġru bis-​sabar il-​ġirja li għandna quddiemna. Billi nħarsu lejn Ġesù, li hu l-​bidu u t-​tmiem tal-​fidi tagħna, u li għall-​ferħ imqiegħed quddiemu sofra s-​salib [“zokk tat-​tortura,” NW], bla ma qies xejn il-​għajb, u qagħad fil-​lemin tat-​tron taʼ Alla.” Hemm ħafna affarijiet li l-​qaddejja taʼ Alla ssaportew f’dawn l-​aħħar jiem. Bħal Ġesù, li kien leali sa ma miet mewta agonizzanti, xi wħud minn ħutna rġiel u nisa ssaportew fedelment l-​eħrex persekuzzjoni​—ħabsijiet, tortura, stupru, saħansitra l-​mewt. (1 Pietru 2:21) Ma titqanqalx qalbna bl-​imħabba lejhom meta nikkunsidraw l-​integrità tagħhom?

16, 17. (a) Il-​biċċa l-​kbira tal-​Kristjani liema sfidi fuq il-​fidi tagħhom isaqqfu wiċċhom magħhom? (b) Liema affarijiet li jekk niftakruhom se jgħinuna nkomplu niġru t-​tiġrija għall-​ħajja?

¹⁶ Il-​kliem li Pawlu kompla jgħid, madankollu, japplika għall-​biċċa l-​kbira tan-​nies: “Sa issa fil-​ġlieda tagħkom kontra d-​dnub, għad ma żammejtux hekk iebes li wasaltu biex xerridtu demmkom.” (Lhud 12:4) Minkejja dan, f’din is-​sistema t-​triq tal-​verità m’hi faċli għal ħadd minna. Xi wħud jiġu skuraġġiti minn ‘oppożizzjoni mill-​midinbin’ fuq il-​post tax-​xogħol jew fl-​iskola, billi jissaportu meta jwaqqgħuhom għaċ-​ċajt jew jirreżistu l-​pressjoni tad-​dnub. (Lhud 12:3) Tentazzjoni kbira mermret id-​determinazzjoni taʼ xi wħud f’li jżommu l-​livelli għoljin t’Alla. (Lhud 13:4, 5) L-​apostati effettwaw il-​bilanċ spiritwali taʼ xi wħud li jagħtu widen għall-​propaganda velenuża tagħhom. (Lhud 13:9) Xi oħrajn tilfu l-​ferħ minħabba problemi taʼ personalità. L-​enfasi żejda fuq id-​divertiment u l-​attivitajiet taʼ vaganzi dgħajfet lil xi Kristjani. U l-​biċċa l-​kbira jħossuhom taħt pressjoni minħabba l-​problemi taʼ li jgħixu f’din is-​sistema t’affarijiet.

¹⁷ Veru, ebda waħda minn dawn is-​sitwazzjonijiet ma ‘wasslet biex wieħed ixerred demmu.’ U ftit minn dawn jistgħu jkunu r-​riżultat taʼ deċiżjonijiet li nkunu għamilna aħna stess. Imma dawn kollha huma taʼ sfida għall-​fidi tagħna. Huwa minħabba f’hekk li għandna nżommu għajnejna fuq l-​eżempju eċċellenti taʼ Ġesù f’dak li huwa sabar. Jalla qatt ma ninsew kemm hija taʼ l-​għaġeb it-​tama li għandna. Jalla qatt ma nitilfu l-​konvinzjoni tagħna li Jehovah “jagħti l-​ħlas xieraq lil dawk li jfittxuh.” (Lhud 11:6) Imbagħad, se jkollna s-​saħħa spiritwali biex inkomplu niġru fit-​tiġrija għall-​ħajja.

Aħna Nistgħu Nissaportu

18, 19. Liema ġrajjiet storiċi jissuġġerixxu li l-​Kristjani Ebrej f’Ġerusalemm taw kas il-​parir imnebbaħ taʼ Pawlu?

¹⁸ Il-​Kristjani Lhud kif irreaġixxew għall-​ittra taʼ Pawlu? Xi sitt snin wara li nkitbet l-​ittra lil-​Lhud, il-​Ġudea kienet daħlet fi gwerra. Fis-​sena 66 E.K., l-​armata Rumana assedjat lil Ġerusalemm, u wettqet il-​kliem taʼ Ġesù: “Meta mbagħad taraw lil Ġerusalemm magħluqa minn kullimkien bl-​eżerċti, tkunu tafu li l-​qerda tagħha tkun waslet.” (Luqa 21:20) Madankollu, għall-​benefiċċju taʼ xi Kristjani li kellhom ikunu f’Ġerusalemm f’dak iż-​żmien, Ġesù qal: “Ħa jaħarbu mbagħad lejn il-​muntanji dawk li jkunu fil-​Lhudija u jitbiegħdu minnha dawk li jkunu ġo nofsha, u ma jerġgħux lura fiha dawk li jkunu fir-​rabaʼ.” (Luqa 21:21) Għaldaqstant, il-​gwerra kontra Ruma serviet taʼ prova: Kienu l-​Kristjani Lhud se jabbandunaw lil Ġerusalemm, iċ-​ċentru tal-​qima Lhudija u l-​post fejn kien hemm it-​tempju glorjuż?

¹⁹ F’daqqa waħda, u bla ma ħadd jaf għalfejn, ir-​Rumani rtiraw. X’aktarx li l-​Lhud reliġjużi qiesu dan bħala prova li Alla kien qed jipproteġi l-​belt qaddisa tagħhom. Xi ngħidu għall-​Kristjani? L-​istorja turi li huma ħarbu. Imbagħad, fis-​sena 70 E.K., ir-​Rumani ġew lura u qerdu totalment lil Ġerusalemm b’telf taʼ ħajja li jkexkxek. “Jum il-​Mulej” imbassar minn Ġoel kien wasal fuq Ġerusalemm. Imma l-​Kristjani leali ma kinux għadhom hemmhekk. Huma ‘nħelsu.’—Ġoel 3:3-5 [Ġoel 2:30-32, NW]; Atti 2:16-21.

20. Billi nafu li “Jum il-​Mulej” il-​kbir huwa qrib, b’liema modi għandu dan iqanqalna?

²⁰ Illum, nafu li “Jum il-​Mulej” kbir ieħor dalwaqt se jeffettwa lil din is-​sistema t’affarijiet kollha kemm hi. (Ġoel 4:12-14 [Ġoel 3:12-14, NW]) Ma nafux meta se jiġi dak il-​jum. Imma l-​Kelma t’Alla taċċertana li żgur se jiġi! Jehovah jgħid li mhux se jittardja. (Ħabakkuk 2:3; 2 Pietru 3:9, 10) Għaldaqstant, ejjew “nagħtu ħafna aktar kas taʼ dak li smajna.” Nevitaw nuqqas taʼ fidi, ‘id-​dnub li tant ifixkilna malajr.’ Inkunu ddeterminati biex nissaportu sakemm ikun hemm bżonn. Niftakru li l-​organizzazzjoni ċelestjali taʼ Jehovah bħal karru għadha għaddejja. Se twettaq l-​iskop tagħha. Għalhekk jalla lkoll kemm aħna nkomplu niġru u ma naqtgħux qalbna fit-​tiġrija għall-​ħajja!

Tiftakar?

◻ Billi nagħtu kas taʼ liema twissija li Pawlu ta lill-​Filippin se jgħinna nissaportu fit-​tiġrija għall-​ħajja?

◻ X’se jgħinna nikkumbattu t-​tendenza li din id-​dinja għandha biex taljenana?

◻ Kif nistgħu ngħinu lil xulxin biex nissaportu fit-​tiġrija?

◻ X’inhuma xi affarijiet li jistgħu jġagħlu lil Kristjan ibatti?

◻ L-​eżempju taʼ Ġesù kif jistaʼ jgħinna nissaportu?

[Stampa f’paġni 18, 19]

Il-​Kristjani, bħall-​ġerrejja, ma jridu jħallu xejn jaljenahom

[Stampa f’paġna 21]

Xejn ma jistaʼ jżomm lill-​karru l-​kbir ċelestjali taʼ Jehovah milli jwettaq l-​iskop tiegħu