Kun Lest li Ċċedi, Kun Bilanċjat

“Ibqaʼ fakkarhom biex ikunu . . . raġunevoli [“lesti li jċedu,” “NW,” ntt.].”—TITU 3:1, 2.

1, 2. Xi tgħid l-​Iskrittura dwar li nkunu raġunevoli u lesti li nċedu, u dan għala huwa xieraq?

ĠEĦOVA, Missierna tas-​sema kollu mħabba, għandu għerf bla tarf. Ladarba aħna l-​ħolqien tiegħu, inħarsu lejh biex jiggwidana f’ħajjitna. Salm 48:15 [48:14, NW] Id-​dixxiplu Kristjan Ġakbu jgħidilna li “l-​għerf li ġej minn fuq hu l-​ewwelnett safi, imbagħad iġib il-​paċi, hu raġunevoli [“lest li jċedi,” NW, ntt.], lest li jobdi, mimli ħniena u frott tajjeb, ma jagħmilx distinzjonijiet parzjali, mhux ipokrita.”—Ġak. 3:17.

² “Ħa jkun jaf kulħadd kemm intom raġunevoli [“lesti li ċċedu,” Kingdom Interlinear],” iħeġġeġ l-​appostlu Pawlu.a (Flp. 4:5) Kristu Ġesù hu l-​Mulej u l-​Kap tal-​kongregazzjoni Kristjana. (Efes. 5:23) Kemm hu importanti li lkoll kemm aħna naġixxu b’mod raġunevoli u nkunu lesti li nċedu, billi noqogħdu kompletament għad-​direzzjoni taʼ Kristu u ma ninsistux għal dak li hu tagħna fir-​relazzjonijiet maʼ bnedmin oħrajn!

3, 4. (a) Agħti eżempju taʼ kif nibbenefikaw meta nkunu lesti li nċedu. (b) X’se nikkunsidraw?

³ Meta nkunu lesti li nċedu b’mod bilanċjat, aħna se nibbenefikaw. Sabiex nagħtu eżempju: Wara li fil-​Britannja nkixef pjan t’attakk terroristiku, il-​biċċa l-​kbira mill-​passiġġieri taʼ l-​ajru kienu lesti li jimxu mar-​regolamenti u ma jtellgħux magħhom fuq l-​ajruplan affarijiet li qabel setgħu jiħduhom magħhom. Meta nkunu qed insuqu xi vettura, nagħrfu l-​ħtieġa li nċedu lil sewwieqa oħrajn, bħal per eżempju, meta nkunu qed induru maʼ xi roundabout, sabiex b’hekk ma jinħoloqx periklu u t-​traffiku jibqaʼ għaddej mingħajr problemi.

⁴ Għal ħafna minna, m’huwiex faċli li nkunu raġunevoli u lesti li nċedu. Bħala għajnuna, ejja nikkunsidraw tliet aspetti taʼ li nkunu raġunevoli, jiġifieri, il-​motiv tagħna, l-​attitudni tagħna lejn l-​awtorità, u safejn għandna nċedu.

Għala Għandna Nkunu Lesti li Nċedu?

5. Skond il-​Liġi Mosajka, x’setaʼ jġiegħel lill-​ilsir jagħżel li jibqaʼ maʼ sidu?

⁵ Eżempju meħud miż-​żminijiet taʼ qabel il-​Kristjanità joħroġ il-​motiv xieraq għala għandna nkunu lesti li nċedu. Skond il-​Liġi Mosajka, l-​Ebrej li kienu saru lsiera kellhom jingħataw il-​libertà tagħhom wara li jkunu ilhom jaqdu sebaʼ snin jew inkella fis-​sena tal-​Ġublew, jiddependi liema sena minnhom kienet tiġi l-​ewwel. Imma l-​ilsir setaʼ jagħżel li jibqaʼ lsir. (Aqra Eżodu 21:5, 6.) X’setaʼ jġiegħel lill-​ilsir jagħmel dan? L-​imħabba kienet tqanqal lill-​ilsir biex jibqaʼ f’din is-​sitwazzjoni, fl-​awtorità tas-​sid ħanin tiegħu.

6. L-​imħabba x’għandha x’taqsam maʼ li nkunu lesti li nċedu?

⁶ B’mod simili, l-​imħabba tagħna għal Ġeħova tqanqalna biex niddedikawlu ħajjitna u mbagħad ngħixu fi qbil mad-​dedikazzjoni tagħna. (Rum. 14:7, 8) “L-​imħabba t’Alla tfisser dan: li nosservaw il-​kmandamenti tiegħu; u madankollu l-​kmandamenti tiegħu m’humiex tqal,” kiteb l-​appostlu Ġwanni. (1 Ġw. 5:3) Din l-​imħabba ma tfittixx l-​interessi tagħha. (1 Kor. 13:4, 5) Fir-​relazzjonijiet tagħna maʼ bnedmin oħrajn, l-​imħabba għall-​proxxmu timmotivana biex inkunu lesti li nċedu u npoġġu lil oħrajn qabilna. Minflok ma nħallu l-​egoiżmu jirbaħna, aħna nikkunsidraw l-​interessi tagħhom qabel tagħna.—Flp. 2:2, 3.

7. Fil-​ministeru, kif nistgħu nuru li aħna raġunevoli u lesti li nċedu?

⁷ La kliemna u lanqas l-​għemejjel tagħna m’għandhom ifixklu lil ħaddieħor. (Efes. 4:29) Tabilħaqq, l-​imħabba ġġegħelna nevitaw li nagħmlu xi ħaġa li tistaʼ ttellef lil dawk li ġejjin minn ambjenti jew kulturi differenti milli jkomplu jagħmlu progress u jaqdu lil Ġeħova. Dan taʼ spiss jitlob minna li nkunu raġunevoli u lesti li nċedu. Per eżempju, aħwa nisa missjunarji li huma mdorrijin jagħmlu l-​makeup u jilbsu t-​tights trasparenti ma jinsistux li jagħmlu dan f’lokalitajiet fejn nisa li jużaw dawn l-​affarijiet huma meqjusin immorali, u b’hekk jistgħu jfixklu lil ħaddieħor.—1 Kor. 10:31-33.

8. L-​imħabba għal Alla kif tistaʼ tgħinna nġibu ruħna bħala “l-​iżgħar”?

⁸ L-​imħabba tagħna għal Ġeħova tgħinna nwarrbu l-​kburija. Wara li fost id-​dixxipli nqalaʼ l-​argument dwar min kien l-​akbar fosthom, Ġesù ħa tifel u poġġieh f’nofshom. Hu spjega: “Kulmin jilqaʼ lil dan it-​tifel f’ismi, jilqaʼ lili wkoll, u kulmin jilqaʼ lili, jilqaʼ wkoll lil dak li bagħatni. Għax min iġib ruħu bħal wieħed mill-​iżgħar fostkom ilkoll, dan ikun il-​kbir.” (Lq. 9:48; Mk. 9:36) Għal kull wieħed u waħda minna jistaʼ jkun verament taʼ sfida li nġibu ruħna bħala “l-​iżgħar.” L-​imperfezzjoni li writna kif ukoll it-​tendenza għall-​kburija jistgħu jimmotivawna biex infittxu l-​prominenza, imma l-​umiltà tgħinna nkunu raġunevoli u lesti li nċedu.—Rum. 12:10.

9. Sabiex inkunu raġunevoli u lesti li nċedu, xi rridu nirrikonoxxu?

⁹ Sabiex inkunu raġunevoli u lesti li nċedu, irridu nirrikonoxxu l-​awtorità taʼ dawk li ġew maħturin minn Alla. Il-​Kristjani veri kollha jagħrfu l-​prinċipju importanti taʼ l-​istat taʼ kap. L-​appostlu Pawlu wera dan biċ-​ċar lill-​Korintin: “Irridkom tkunu tafu li l-​kap taʼ kull raġel hu l-​Kristu; u l-​kap tal-​mara hu r-​raġel; u l-​kap tal-​Kristu hu Alla.”—1 Kor. 11:3.

10. X’juri l-​fatt li noqogħdu kompletament għall-​awtorità taʼ Ġeħova?

¹⁰ Meta nċedu, jew noqogħdu kompletament, għall-​awtorità t’Alla nkunu qed nuru t-​tama u l-​fiduċja li għandna fih bħala Missier li jħobbna. Hu jaf tajjeb xi jkun qed jiġri u jistaʼ jippremjana kif jixraq. Ikun t’għajnuna li nżommu dan il-​fatt f’moħħna meta oħrajn ma jittrattawniex bir-​rispett jew jirrabjaw u jitmasħnu magħna. Pawlu kiteb: “Jekk inhu possibbli, sakemm jiddependi minnkom, żommu l-​paċi mal-​bnedmin kollha.” Pawlu enfasizza dan il-​parir permezz taʼ din id-​direzzjoni: “Tivvendikawx ruħkom, imma agħmlu l-​wisaʼ għall-​korla; għax hu miktub: ‘Il-​vendetta tiegħi; jien inħallas, jgħid Ġeħova.’”—Rum. 12:18, 19.

11. Kif nistgħu nuru li aħna qegħdin taħt Kristu bħala l-​kap tagħna?

¹¹ Xi ħaġa oħra li għandna nirrispettaw fil-​kongregazzjoni Kristjana hija l-​awtorità taʼ dawk maħturin minn Alla. Rivelazzjoni kapitlu 1 jagħtina stampa taʼ Kristu Ġesù qed iżomm il-​“kwiekeb” tal-​kongregazzjoni f’idu l-​leminija. (Riv. 1:16, 20) F’sens ġenerali, dawn il-​“kwiekeb” jirrappreżentaw il-​ġemgħat t’anzjani, jew indokraturi, fil-​kongregazzjonijiet. Dawn l-​indokraturi maħturin joqogħdu kompletament għat-​tmexxija taʼ Kristu u jimitaw il-​mod ħanin tiegħu taʼ kif jaġixxi m’oħrajn. Kull persuna fil-​kongregazzjoni tissottometti ruħha għall-​arranġament li għamel Ġesù għall-​“ilsir leali u għaqli” biex jipprovdi l-​ikel spiritwali fil-​ħin xieraq. (Mt. 24:45-47) Illum, il-​fatt li aħna lesti li nistudjaw u napplikaw din l-​informazzjoni juri li aħna personalment irridu noqogħdu taħt Kristu bħala l-​kap tagħna, u dan jikkontribwixxi għall-​paċi u l-​unità.—Rum. 14:13, 19.

Inċedu—Sa Liema Punt?

12. Għala hemm limitu dwar kemm irridu nċedu?

¹² Madankollu, li nċedu ma jfissirx li aħna se nikkompromettu l-​fidi jew il-​prinċipji divini li nħaddnu. Liema pożizzjoni ħadu l-​Kristjani tal-​bidu meta l-​mexxejja reliġjużi ordnawlhom biex ma jibqgħux jgħallmu fuq il-​bażi taʼ isem Ġesù? Pietru u d-​dixxipli l-​oħrajn wieġbu bi qlubija: “Jeħtieġ li aħna nobdu lil Alla bħala ħakkiem iktar milli lill-​bnedmin.” (Atti 4:18-20; 5:28, 29) Għaldaqstant, illum, jekk l-​awtoritajiet governattivi jipprovaw iwaqqfuna bil-​forza milli nippridkaw l-​aħbar tajba, aħna ma niqfux—minkejja li forsi jkollna naġġustaw il-​metodi li nużaw ħalli b’hekk nittrattaw is-​sitwazzjoni bit-​tattika. Jekk ikun hemm restrizzjonijiet fil-​ministeru minn dar għal dar, nistgħu nfittxu modi oħrajn kif nikkuntattjaw lin-​nies u nkomplu nobdu l-​inkarigu li tana Alla. Bl-​istess mod, meta “l-​awtoritajiet superjuri” ma jħalluniex nagħmlu l-​laqgħat tagħna, aħna niltaqgħu b’mod diskret fi gruppi żgħar.—Rum. 13:1; Ebr. 10:24, 25.

13. Ġesù x’qal dwar il-​fatt li noqogħdu għal dawk li għandhom l-​awtorità?

¹³ Fil-​Priedka tiegħu taʼ fuq il-​Muntanja, Ġesù wera l-​bżonn taʼ li wieħed joqgħod għall-​awtorità: “Jekk xi ħadd ikun irid itellgħek il-​qorti biex jiħodlok il-​libsa, agħtih ukoll il-​mantar; u jekk xi ħadd fl-​awtorità jġagħlek timxi miegħu kilometru, mur miegħu tnejn.” (Mt. 5:40, 41)b Iżjed minn hekk, l-​interess tagħna fl-​oħrajn kif ukoll ix-​xewqa li ngħinuhom iqanqluna biex nagħmlu magħhom iktar milli hu mistenni minna.—1 Kor. 13:5; Titu 3:1, 2.

14. Għala m’għandna qatt inċedu għall-​apostasija?

¹⁴ Minkejja dan, ix-​xewqa tagħna li nċedu m’għandha qatt twassalna biex nagħmlu xi kompromess maʼ l-​apostati. Il-​pożizzjoni soda u ċara tagħna f’dan ir-​rigward hi meħtieġa biex jinżammu l-​purità tal-​verità u l-​għaqda fil-​kongregazzjoni. Dwar “l-​aħwa foloz,” Pawlu kiteb: “Lil dawn ma ċedejnilhomx u ma qgħadniex sottomessi lejhom, le, lanqas għal mument wieħed, sabiex il-​verità taʼ l-​aħbar tajba tibqaʼ għandkom.” (Gal. 2:4, 5) Jekk f’xi każ rari tinqalaʼ l-​apostasija, il-​Kristjani devoti għandhom jibqgħu sodi għal dak li hu sewwa.

L-​Indokraturi Jridu Jkunu Lesti Li Jċedu

15. L-​indokraturi Kristjani b’liema mod jistgħu jkunu raġunevoli u lesti li jċedu meta jiltaqgħu flimkien?

¹⁵ Waħda mill-​kwalifiki li jeħtieġu dawk li jinħatru bħala indokraturi hija li jkunu raġunevoli, jew lesti li jċedu. Pawlu kiteb: “L-​indokratur għandu jkun . . . raġunevoli [“lest li jċedi,” NW, ntt.].” (1 Tim. 3:2, 3) Dan hu vitali b’mod speċjali meta l-​irġiel maħturin jiltaqgħu flimkien biex jiddiskutu affarijiet tal-​kongregazzjoni. Qabel ma tittieħed xi deċiżjoni, kull wieħed preżenti jkun liberu li jesprimi lilu nnifsu b’mod ċar, għalkemm m’hemmx bżonn li kull anzjan jgħid xi ħaġa. Matul id-​diskussjoni, wieħed jistaʼ jbiddel il-​ħarsa tiegħu hekk kif jismaʼ lill-​oħrajn jiġbdu l-​attenzjoni lejn il-​prinċipji Skritturali li jkunu japplikaw. Minflok ma joqgħod jirreżisti l-​opinjoni taʼ ħaddieħor biex jinsisti fuq tiegħu, l-​anzjan matur ikun lest li jċedi. Fil-​bidu tad-​diskussjoni, għandu mnejn ikun hemm opinjonijiet differenti, imma l-​meditazzjoni u t-​talb jippromwovu l-​għaqda fost anzjani modesti li jkunu lesti li jċedu.—1 Kor. 1:10; Aqra Efesin 4:1-3.

16. Liema attitudni għandu juri indokratur Kristjan?

¹⁶ F’kulma jagħmel, anzjan Kristjan għandu jistinka biex jappoġġa l-​ordni teokratiku. Din l-​attitudni għandha tintwera anki meta jindokra l-​merħla tiegħu, u għandha tgħinu juri konsiderazzjoni u ġentilezza m’oħrajn. “Irgħu l-​merħla t’Alla li hemm fil-​ħarsien tagħkom,” kiteb Pietru, “mhux bilfors, imma minn jeddkom; mhux għall-​imħabba tal-​qligħ diżonest, imma bil-​ħerqa.”—1 Pt. 5:2.

17. Kull membru tal-​kongregazzjoni kif jistaʼ jkun raġunevoli u lest li jċedi meta jittratta m’oħrajn?

¹⁷ Il-​membri mdaħħlin fiż-​żmien tal-​kongregazzjoni japprezzaw l-​għajnuna imprezzabbli li jagħtuhom dawk li huma iżgħar minnhom fl-​età u jittrattawhom b’dinjità. Mill-​banda l-​oħra, iż-​żgħażagħ jirrispettaw lil dawk akbar minnhom li għandhom ħafna snin t’esperjenza fis-​servizz taʼ Ġeħova. (1 Tim. 5:1, 2) L-​anzjani Kristjani jfittxu rġiel kwalifikati sabiex ikunu jistgħu jaqsmu magħhom ċerti responsabbiltajiet, u jħarrġuhom biex jgħinu fl-​indokrar tal-​merħla t’Alla. (2 Tim. 2:1, 2) Kull Kristjan individwali għandu japprezza l-​parir imnebbaħ taʼ Pawlu: “Kunu ubbidjenti lejn dawk li qed imexxu fostkom u kunu sottomessi lejhom [“lesti li ċċedulhom,” NW, ntt.], għax huma qed jgħassulkom ruħkom bħala dawk li għad iridu jagħtu kont; sabiex dan jagħmluh bil-​ferħ u mhux bit-​tnehid, għax inkella jkun taʼ ħsara għalikom.”—Ebr. 13:17.

Inkunu Lesti li Nċedu Bħala Membri tal-​Familja

18. Għala huwa xieraq li fil-​familja nkunu raġunevoli u lesti li nċedu?

¹⁸ Il-​membri tal-​familja wkoll jeħtieġu li jkunu raġunevoli u lesti li jċedu. (Aqra Kolossin 3:18-21.) Il-​Bibbja tindika l-​irwol speċifiku li għandu kull membru tal-​familja Kristjana. Il-​missier hu l-​kap taʼ martu kif ukoll il-​wieħed responsabbli għall-​gwida tat-​tfal. Il-​mara trid tirrikonoxxi l-​awtorità taʼ żewġha, u t-​tfal iridu jagħmlu ħilithom biex ikunu ubbidjenti, xi ħaġa li togħġob ħafna lill-​Mulej. Kull membru tal-​familja jistaʼ jippromwovi l-​unità u l-​paċi fil-​familja billi jkun raġunevoli u lest li jċedi b’mod xieraq u bilanċjat. Il-​Bibbja fiha xi eżempji li jgħinuna nifhmu dan il-​punt.

19, 20. (a) Agħmel kuntrast bejn l-​eżempju t’Għeli u dak taʼ Ġeħova dwar kif inċedu. (b) Liema lezzjonijiet jistgħu jitgħallmu l-​ġenituri minn dawn l-​eżempji?

¹⁹ Meta Samwel kien daqsxejn taʼ tifel, Għeli kien jaqdi bħala l-​qassis il-​kbir f’Iżrael. Madankollu, it-​tfal t’Għeli, Ħofni u Fineħas, kienu “nies mill-​agħar” li “ma kinux iqisu lill-​Mulej.” Għeli semaʼ affarijiet ħżiena dwarhom, inkluż il-​fatt li kienu qed jiżnu man-​nisa li kienu jaqdu fid-​daħla tat-​tinda tal-​laqgħa. Kif irreaġixxa? Għeli qalilhom li jekk kienu qed jidinbu kontra Ġeħova, ma kien hemm ħadd li setaʼ jitlob għalihom. Imma hu naqas li jwiddibhom u jiddixxiplinahom. Għaldaqstant, ulied Għeli komplew fil-​ħażen tagħhom. Fl-​aħħar, Ġeħova ddetermina b’mod ġust li kien jistħoqqilhom il-​piena tal-​mewt. Meta semaʼ l-​aħbar li kienu mietu, Għeli miet ukoll. X’riżultat tal-​biki! Jidher ċar li l-​fatt li Għeli ċeda għall-​għemejjel ħżiena tagħhom billi ħalliehom ikomplu jwettquhom la kien sewwa u lanqas xieraq.—1 Sam. 2:12-17, 22-25, 34, 35; 4:17, 18.

²⁰ B’kuntrast maʼ dan, ikkunsidra l-​mod kif Alla ttratta maʼ l-​ulied anġeliċi tiegħu. Il-​profeta Mikajja kellu viżjoni taʼ l-​għaġeb dwar laqgħa li Ġeħova kellu maʼ l-​anġli Tiegħu. Ġeħova staqsiehom min minnhom kien kapaċi jqarraq bis-​Sultan Aħab taʼ Iżrael sabiex jikkaġuna l-​mewt taʼ dan is-​sultan mill-​agħar. Ġeħova semaʼ s-​suġġerimenti li għamlu diversi wlied spirti. Imbagħad kien hemm anġlu li qal li kien jaf x’għandu jagħmel biex iqarraq b’Aħab. Ġeħova staqsieh x’kien se jagħmel. Sodisfatt, Ġeħova inkariga lill-​anġlu biex iwettaq il-​pjan tiegħu. (1 Slat. 22:19-23) Jekk napplikaw dan ir-​rakkont għall-​bnedmin, ma jistgħux il-​membri tal-​familja jitgħallmu lezzjoni minnu dwar kif ikunu raġunevoli u lesti li jċedu? Raġel Kristjan li jkun miżżewweġ u jkollu t-​tfal għandu jikkunsidra l-​ideat u s-​suġġerimenti taʼ martu u wliedu. Mill-​banda l-​oħra, in-​nisa u t-​tfal għandhom jagħrfu li jekk huma esprimew xi opinjoni jew preferenza, għandu mnejn ikun meħtieġ li jċedu għad-​direzzjoni tal-​wieħed awtorizzat mill-​Iskrittura biex jiddeċiedi.

21. X’se jiġi kunsidrat fl-​artiklu li jmiss?

²¹ Kemm aħna grati għat-​tfakkiriet mimlijin għerf u mħabba li jagħtina Ġeħova biex inkunu raġunevoli u lesti li nċedu! (Salm 119:99) Fl-​artiklu li jmiss se nikkunsidraw kif il-​fatt li nkunu lesti li nċedu b’mod bilanċjat se jgħinna nsibu l-​ferħ fiż-​żwieġ.

[Noti taʼ taħt]

Int Kif Twieġeb?

• Liema riżultati tajbin jistaʼ jkollna meta nkunu lesti li nċedu?

• L-​indokraturi kif jistgħu jkunu raġunevoli u lesti li jċedu?

• Għala huwa xieraq li nkunu raġunevoli u lesti li nċedu fil-​familja?

[Stampa f’paġna 4]

L-​anzjani jimitaw il-​mod ħanin kif Kristu jittratta m’oħrajn

[Stampa f’paġna 6]

Meta l-​anzjani tal-​kongregazzjoni jiltaqgħu flimkien, il-​fatt li jimmeditaw u jitolbu kif ukoll ikunu lesti li jċedu jgħinhom jippromwovu l-​unità