Ibqaʼ ‘Agħmel it-Tajjeb’
1 Int għamilt xi ħaġa tajba meta sirt qaddej t’Alla Jehovah. Issa, madankollu, l-isfida f’dawn iż-żminijiet ibsin hija li tkompli ‘tagħmel it-tajjeb.’ (Gal. 6:9, Saydon) Għalkemm dan jirrikjedi sforz verament kbir, tistaʼ tirnexxi. Kif?
2 Żviluppa l-Attitudni Mentali taʼ Ġesù: Bħal Ġesù, int tistaʼ tissaporti l-provi jekk tibqaʼ ffokat fuq it-tama tas-Saltna. (Lhud 12:2, 3, Saydon) Ibqaʼ ċert li Jehovah jħobbok u jridek tirnexxi. (2 Pt. 3:9) Poġġi l-fiduċja kollha tiegħek fih, peress li taf fiċ-ċert li hu se jgħinek. (1 Kor. 10:13) Kompli itlob bla waqfien, billi titlob lil Jehovah biex jgħinek tissaporti. (Rum. 12:12) Ifraħ minħabba li taf li s-sabar tiegħek żgur se jġibek f’qagħda approvata f’għajnejn Alla. (Rum. 5:3-5, NW) Il-fedeltà tiegħek f’li tikkultiva “l-istess attitudni mentali li kellu Kristu Ġesù” se ġġiblek sodisfazzjon persunali u se tferraħ qalb Jehovah.—Rum. 15:5, NW; Prov. 27:11.
3 Ibqaʼ Agħmel it-Tajjeb: Ħu vantaġġ sħiħ mill-provvedimenti li Jehovah ħejja għall-poplu tiegħu sabiex jgħinhom ikomplu jagħmlu t-tajjeb. Żomm rutina persunali tajba tal-qari tal-Kelma t’Alla u l-istudju tal-pubblikazzjonijiet ibbażati fuq il-Bibbja provduti mill-klassi taʼ l-ilsir leali u diskret. Tonqosx milli tipprepara, tattendi, u tieħu sehem fil-laqgħat kollha tal-kongregazzjoni. Qabel u wara l-laqgħat Kristjani, issieħeb mill-qrib maʼ l-aħwa spiritwali tiegħek. Poġġi miri realistiċi fil-ministeru tiegħek sabiex tagħti sehem sħiħ fis-servizz taʼ l-għalqa u ttejjeb l-abbiltà tiegħek f’li tippreżenta l-aħbar tajba lil oħrajn.
4 B’dan il-mod int tkun tistaʼ tibqaʼ tagħmel it-tajjeb u fl-istess ħin tikseb ferħ kbir. Dwar dan il-fatt, wieħed ħu mill-Italja qal: “Meta jasal fil-għaxija, u jien niġi lura d-dar wara ġurnata fis-servizz taʼ Jehovah, jien inħossni għajjien, huwa veru. Imma nkun ferħan, u niżżi ħajr lil Jehovah talli tani ferħ li ħadd ma jistaʼ jiħodhuli.” Għaldaqstant, ibqaʼ agħmel it-tajjeb, u int ukoll se tikseb ferħ kbir.