Il-Qaddejja t’Alla—Poplu Organizzat u Hieni

“Hieni huwa l-​poplu li Alla tiegħu hu Jehovah!”—SALM 144:15.

1, 2. (a) Jehovah għala għandu d-​dritt li jistabbilixxi livelli għall-​qaddejja tiegħu? (b) Liema huma tnejn mill-​karatteristiċi taʼ Jehovah li aħna għandna b’mod speċjali nkunu rridu nimitaw?

JEHOVAH hu s-​Sovran Universali, dak Alla li jistaʼ kollox, il-​Ħallieq. (Ġenesi 1:1; Salm 100:3) Bħala tali, hu bi dritt jistabbilixxi l-​livelli taʼ mġiba għall-​qaddejja tiegħu, billi jaf x’inhuwa l-​aħjar għalihom. (Salm 143:8) U hu l-​Eżemplar Ewlieni tagħhom li l-​kwalitajiet tiegħu huma jeħtieġu li jimitaw. “Siru imitaturi t’Alla, bħala tfal maħbubin,” kiteb wieħed appostlu.—Efesin 5:1.

² Karatteristika t’Alla li neħtieġu nimitaw għandha x’taqsam maʼ organizzazzjoni. Hu ‘mhux Alla tad-​diżordni.’ (1 Korintin 14:33) Meta nosservaw bir-​reqqa dak li Alla ħalaq, niġu mġegħlin li nikkonkludu li hu l-​iktar Persunaġġ organizzat fl-​univers. Madankollu, karatteristika oħra t’Alla li hu jrid lill-​qaddejja tiegħu li jimitaw hija l-​hena tiegħu, għax hu “dak Alla hieni.” (1 Timotew 1:11) B’hekk, l-​abbiltà organizzazzjonali tiegħu hija bbilanċjata bl-​hena. Waħda m’hijiex magħmula suprema għall-​ħsara taʼ l-​oħra.

3. Is-​smewwiet kollhom kwiekeb kif juru l-​abbiltà t’Alla li jorganizza?

³ Dak kollu li Jehovah għamel, mill-​akbar sa l-​iċken, jagħti evidenza li hu Alla taʼ organizzazzjoni. Ikkunsidra, per eżempju, l-​univers viżibbli. Fih eluf taʼ biljuni taʼ kwiekeb. Imma dawn m’humiex imxerrdin ’l hawn u ’l hinn bl-​addoċċ. L-​astrofiżiku George Greenstein josserva li hemm “mudell fl-​organizzazzjoni tal-​kwiekeb.” Huma organizzati fi gruppi msejħin galassi, li wħud minnhom fihom mijiet taʼ biljuni taʼ kwiekeb. U huwa kkalkolat li hemm biljuni taʼ galassi! Il-​galassi wkoll huma organizzati, għadd minnhom (minn ftit għal ħafna eluf) huma ggruppjati flimkien f’għanqud taʼ galassi. U għenieqed taʼ galassi huma maħsubin li huma organizzati f’saħansitra gruppi akbar imsejħin superclusters.—Salm 19:1; Isaija 40:25, 26.

4, 5. Agħti eżempji taʼ organizzazzjoni fost affarijiet ħajjin fuq l-​art.

⁴ L-​organizzazzjoni superba tal-​ħolqien t’Alla tidher kullimkien, mhux biss fis-​smewwiet viżibbli imma wkoll fuq l-​art, bil-​mirjadi taʼ affarijiet ħajjin li fiha. Rigward dan kollu, Paul Davies, professur tal-​fiżika, kiteb li osservaturi jibqgħu “mgħaġġbin” bil-​“maestà u organizzazzjoni komplessa tad-​dinja fiżika.”—Salm 104:24.

⁵ Ikkunsidra xi ftit eżempji taʼ l-​“organizzazzjoni komplessa” li tinsab f’affarijiet ħajjin. In-​newrokirurgu Joseph Evans qal dwar il-​moħħ uman u s-​sinsla tad-​dahar: “Ir-​realtà taʼ ordni kbira hi kważi straordinarja.” Dwar iċ-​ċellola mikroskopika ħajja, il-​bakterjoloġista H. J. Shaughnessy stqarr: “Il-​komplessità u l-​ordni sabiħa tad-​dinja mikrobijoloġika tant hija mibnija b’mod taʼ l-​għaġeb li tidher li hija parti minn sistema mwaqqfa b’mod divin.” U l-​bijoloġist molekulari Michael Denton qal dwar il-​kodiċi ġenetiku (DNA) ġewwa ċellola: “Tant huwa effiċjenti li l-​informazzjoni kollha . . . neċessarja biex tispeċifika d-​disinn taʼ l-​ispeċi kollha taʼ l-​organiżmi li qatt eżistew fuq il-​pjaneta . . . tistaʼ tinżamm f’kuċċarina u xorta jibqaʼ l-​wisaʼ għall-​informazzjoni kollha f’kull ktieb li qatt inkiteb.”—Ara Salm 139:16.

6, 7. Liema organizzazzjoni hija murija fost ħlejjaq spirti, u huma kif jesprimu apprezzament lejn il-​Ħallieq tagħhom?

⁶ Jehovah mhux biss jorganizza l-​ħolqien materjali tiegħu imma jorganizza wkoll il-​ħolqien spirti tiegħu fis-​sema. Danjel 7:10 jinformana li anġli sa’ l-​għadd taʼ ‘għaxart elef għal għaxart elef baqgħu weqfin eżatt quddiem Jehovah.’ Mitt miljun ħlejjaq spirti setgħanin f’attendenza, kull wieħed assenjat għax-​xogħol xieraq tiegħu! Jisboq l-​immaġinazzjoni li taħseb dwar il-​kapaċità li tirrikjedi biex torganizza għadd enormi bħal dak. B’mod xieraq, il-​Bibbja tistqarr: “Bierku lil Jehovah, O intom l-​anġli tiegħu, setgħanin fil-​qawwa, li qegħdin twettqu l-​kelma tiegħu, billi tagħtu widen lil leħen il-​kelma tiegħu. Bierku lil Jehovah, intom l-​armati [anġeliċi] kollha tiegħu, intom il-​ministri tiegħu, li qegħdin tagħmlu r-​rieda tiegħu.”—Salm 103:20, 21; Rivelazzjoni 5:11.

⁷ Kemm huma organizzati u effiċjenti b’mod manjifiku x-​xogħlijiet tal-​Ħallieq! M’huwiex sorprendenti li ħlejjaq spirti setgħanin fil-​qasam tas-​sema jiddikjaraw b’mod li jnebbaħ biżaʼ u b’sottomissjoni: “Int jistħoqqlok, Jehovah, saħansitra Alla tagħna, li tirċievi l-​glorja u l-​unur u l-​qawwa, għaliex int ħlaqt l-​affarijiet kollha, u minħabba fir-​rieda tiegħek eżistew u kienu maħluqin.”—Rivelazzjoni 4:11.

8. Liema eżempji juru li Jehovah jorganizza lill-​qaddejja tiegħu fuq l-​art?

⁸ Jehovah jorganizza wkoll lill-​qaddejja tiegħu fuq l-​art. Meta ġab id-​Dilluvju taʼ żmien Noè fl-​2370 Q.E.K., Noè u sebgħa oħrajn salvaw mill-​Għarqa bħala organizzazzjoni taʼ familja. Fl-​Eżodu taʼ l-​1513 Q.E.K., Jehovah ħareġ għadd taʼ miljuni mill-​poplu tiegħu ’l barra mill-​jasar Eġizzjan u tahom kodiċi ddettaljat taʼ liġijiet biex jorganizzaw l-​affarijiet taʼ kuljum u l-​qima tagħhom. U iktar tard, fl-​Art Imwiegħda, għaxriet taʼ eluf minnhom kienu organizzati għal servizz speċjali fit-​tempju. (1 Kronaki 23:4, 5) Fl-​ewwel seklu, kongregazzjonijiet Kristjani kienu organizzati taħt direzzjoni divina: “Hu ta xi wħud bħala appostli, xi wħud bħala profeti, xi wħud bħala evanġelizzaturi, xi wħud bħala ragħajja u għalliema, bil-​ħsieb li l-​qaddisin jiġu aġġustati mill-​ġdid, għal xogħol ministerjali.”—Efesin 4:11, 12.

Qaddejja Taż-​Żmien Modern Ukoll Organizzati

9, 10. Jehovah kif organizza lin-​nies tiegħu fi żmienna?

⁹ B’mod simili, Jehovah organizza lill-​qaddejja tiegħu taż-​żmien modern biex ikunu jistgħu b’mod effettiv jagħmlu x-​xogħol tiegħu għal żmienna​—jippridkaw l-​aħbar tajba tas-​Saltna tiegħu qabel itemm lil din is-​sistema taʼ affarijiet preżenti u taʼ mingħajr Alla. (Mattew 24:14) Ikkunsidra x’inhuwa involut f’dan ix-​xogħol globali u kemm hija importanti organizzazzjoni tajba. Miljuni taʼ rġiel, nisa, u tfal qegħdin jiġu mħarrġin biex jgħallmu veritajiet tal-​Bibbja lil oħrajn. Biex jgħinu f’dan it-​taħriġ, kwantitajiet kbar taʼ Bibbji u pubblikazzjonijiet ibbażati fuq il-​Bibbja jiġu stampati. Iva, kull ħarġa taʼ It-​Torri Taʼ L-​Għassa issa għandha stampar taʼ iktar minn 16-il miljun f’118-il lingwa, u l-​Awake! madwar 13-il miljun fi 73 lingwa. Kważi l-​ħarġiet kollha huma stampati b’mod simultanju biex prattikament il-​qaddejja kollha taʼ Jehovah jieħdu l-​istess informazzjoni fl-​istess ħin.

¹⁰ Jerġaʼ, iktar minn 73,000 kongregazzjoni tax-​Xhieda taʼ Jehovah mad-​dinja kollha huma organizzati biex jiltaqgħu regolarment għal struzzjoni Biblika. (Ebrej 10:24, 25) Hemm ukoll eluf taʼ laqgħat akbar—circuit assemblies u konvenzjonijiet distrettwali—​kull sena. Hemm il-​bini ġdid jew imtejjeb fuq skala globali taʼ Swali tas-​Saltna, Swali taʼ l-​Assembleat, djar Betel, u faċilitajiet għall-​istampar taʼ letteratura Biblika. Hemm skejjel għat-​taħriġ avanzat taʼ għalliema tal-​Bibbja, bħalma huma l-​Watchtower Bible School of Gilead għall-​missjunarji u l-​Pioneer Service School, ikkonduċuti f’artijiet madwar il-​globu.

11. Liema benefiċċju futur se jiġi milli nitgħallmu organizzazzjoni tajba issa?

¹¹ Jehovah kemm organizza lill-​poplu tiegħu fuq l-​art b’mod tajjeb biex ‘iwettqu l-​ministeru tagħhom bis-​sħiħ,’ mgħejjunin mill-​anġli li jimministraw tiegħu! (2 Timotew 4:5; Ebrej 1:13, 14; Rivelazzjoni 14:6) Billi jistruwixxi lill-​qaddejja tiegħu fil-​mogħdijiet taʼ organizzazzjoni tajba issa, Alla qed iwettaq xi ħaġa oħra. Il-​qaddejja tiegħu qegħdin jiġu mħejjijin tajjeb sabiex meta jsalvaw fit-​tmiem taʼ din is-​sistema taʼ affarijiet, huma diġà jkunu organizzati biex jibdew il-​ħajja fid-​dinja ġdida. Imbagħad, b’mod organizzat taħt id-​direzzjoni taʼ Jehovah, jibdew jibnu l-​Ġenna globali. Huma jkunu wkoll imħejjijin tajjeb biex jgħallmu l-​ħtiġijiet iddettaljati t’Alla għall-​ħajja lil biljuni taʼ nies li se jiġu rxoxtati mill-​mewt.—Isaija 11:9; 54:13; Atti 24:15; Rivelazzjoni 20:12, 13.

Organizzati u Madankollu Henjin

12, 13. Għala nistgħu ngħidu li Jehovah jrid lin-​nies tiegħu jkunu henjin?

¹² Fil-​waqt li Jehovah hu ħaddiem straordinarju u organizzatur superb, hu mhux indifferenti, riġidu, jew mekkaniku. Minflok, hu Persunaġġ hieni u kordjali ħafna li hu kkonċernat dwar l-​hena tagħna. “Hu jimpurtah minnkom,” jiddikjara 1 Pietru 5:7. Nistgħu naraw kemm jimpurtah u kemm jixtieq li l-​qaddejja tiegħu jkunu henjin minn dak li hu għamel għall-​bnedmin. Per eżempju, meta Alla ħalaq lir-​raġel u l-​mara perfetti, poġġiehom f’ġenna taʼ pjaċir. (Ġenesi 1:26-31; 2:8, 9) Tahom dak kollu li kienu jeħtieġu biex jagħmilhom henjin b’mod suprem. Imma huma tilfuh kollu minħabba l-​irvell. Bħala riżultat taʼ dnubhom, aħna writna imperfezzjoni u mewt.—Rumani 3:23; 5:12.

¹³ Għalkemm imperfetti issa, aħna l-​bnedmin xorta nistgħu nsibu l-​hena f’dak li Alla għamel. Hemm ħafna affarijiet li jġibulna tgawdija​—muntanji maestużi; għadajjar, xmajjar, oċeani u xtajtiet sbieħ; fjuri kkuluriti u jfuħu u ħxejjex oħrajn f’varjetà bla tmiem; abbundanza taʼ ikel bnin; inżul ix-​xemx spettakulari li qatt ma nixbgħu minnhom; is-​smewwiet mimlijin kwiekeb li nieħdu gost nikkontemplawhom bil-​lejl; il-​ħolqien taʼ l-​annimali bil-​varjetà vasta tiegħu u biż-​żgħar tagħhom li tant jiġbduk bil-​mutetti tagħhom; mużika li tnebbaħ; xogħol interessanti u utli; ħbieb tajbin. Jidher ċar li Dak li rranġa dawn l-​affarijiet hu individwu hieni li jieħu pjaċir jagħmel lill-​oħrajn henjin.

14. Jehovah liema bilanċ jitlob minna f’li nimitawh?

¹⁴ B’hekk, is-​sempliċi effiċjenza organizzata m’hijiex dak li Jehovah irid. Hu jrid ukoll lill-​qaddejja tiegħu jkunu henjin, l-​istess bħalma hu hieni hu. Ma jridhomx jorganizzaw l-​affarijiet b’mod fanatiku bi ħsara għall-​hena tagħhom. Il-​qaddejja t’Alla jridu jibbilanċjaw kapaċitajiet organizzazzjonali maʼ l-​hena, bħalma jagħmel hu, għax fejn hemm l-​ispirtu qaddis setgħan tiegħu, hemm il-​ferħ. Tabilħaqq, Galatin 5:22 juri li t-​tieni frotta taʼ l-​ispirtu qaddis t’Alla li jopera fuq il-​poplu tiegħu hija l-​“ferħ.”

L-​Imħabba Tiġġenera L-​Hena

15. L-​imħabba għala hija tant importanti għall-​hena tagħna?

¹⁵ Hu taʼ interess kbir li tinnota li l-​Bibbja tistqarr: “Alla hu mħabba.” (1 Ġwann 4:8, 16) Qatt ma tgħid: “Alla hu organizzazzjoni.” L-​imħabba hija l-​kwalità ewlenija t’Alla, u trid tiġi imitata mill-​qaddejja tiegħu. Huwa għalhekk li l-​ewwel frotta taʼ l-​ispirtu t’Alla mniżżla f’​Galatin 5:22 hija l-​“imħabba,” bil-​“ferħ” warajha. L-​imħabba tiġġenera l-​ferħ. Meta nimitaw l-​imħabba taʼ Jehovah fil-​kuntatti tagħna maʼ oħrajn, l-​hena ssegwi, għax nies li jħobbu huma nies henjin.

16. Ġesù kif wera l-​importanza taʼ l-​imħabba?

¹⁶ L-​importanza taʼ li wieħed jimita mħabba bħal t’Alla hija magħmula prominenti fit-​tagħlim taʼ Ġesù. Hu qal: “Sewwa sew bħalma l-​Missier għallem lili jien nitkellem dawn l-​affarijiet.” (Ġwann 8:28) X’kien, b’mod speċjali, mgħallem Ġesù li hu, minn naħa tiegħu, għallem lill-​oħrajn? Kien li l-​akbar żewġ kmandamenti huma li tħobb lil Alla u li tħobb lill-​proxxmu. (Mattew 22:36-39) Ġesù eżemplifika din l-​imħabba. Hu qal: “Jien inħobb lill-​Missier,” billi ta prova taʼ dan billi għamel ir-​rieda t’Alla sal-​mewt. U wera l-​imħabba tiegħu għan-​nies billi miet għalihom. L-​appostlu Pawlu qal lill-​Kristjani f’Efesu: ‘Kristu ħabbkom u ta lilu nnifsu għalikom.’ (Ġwann 14:31; Efesin 5:2) B’hekk, Ġesù qal lis-​segwaċi tiegħu: “Dan huwa l-​kmandament tiegħi, li intom tħobbu lil xulxin sewwa sew bħalma ħabbejtkom jien.”—Ġwann 15:12, 13.

17. Pawlu kif wera illi li nesprimu mħabba lejn oħrajn huwa vitali?

¹⁷ Pawlu esprima kemm hija vitali din l-​imħabba bħal t’Alla billi qal: “Jekk nitkellem bl-​ilsna taʼ bnedmin u taʼ anġli imma m’għandix imħabba, jien sirt ħoss taʼ biċċa ram jew ċimblu jfaqqaʼ. U jekk għandi l-​għotja taʼ l-​ipprofetizzar u jien midħla tas-​sigrieti sagri kollha u l-​għarfien kollu, u jekk għandi l-​fidi kollha biex inċaqlaq il-​muntanji minn posthom, imma m’għandix imħabba, ma jiena xejn. U jekk nagħti ġidi kollu biex nitmaʼ lil oħrajn, u jekk nagħti ġismi, biex inkun nistaʼ niftaħar, imma m’għandix imħabba, m’għandi ebda profitt affattu. . . . Jibqgħu l-​fidi, it-​tama, l-​imħabba, dawn it-​tlieta; imma l-​akbar waħda minn dawn hija l-​imħabba.”—1 Korintin 13:1-3, 13.

18. X’nistgħu nistennew mingħand Jehovah li jżid maʼ l-​hena tagħna?

¹⁸ Meta nimitaw l-​imħabba taʼ Jehovah, nistgħu nkunu fiduċjużi mill-​imħabba tiegħu lejna, saħansitra meta nagħmlu xi żbalji, għax hu “Alla mimli ħniena u grazzjuż, bil-​mod biex jirrabja u abbundanti fil-​qalb tajba bl-​imħabba u fil-​verità.” (Eżodu 34:6) Jekk nindmu sinċerament meta nagħmlu xi żbalji, Alla ma jibqax jitlob kont tagħhom imma b’imħabba jaħfrilna. (Salm 103:1-3) Iva, “Jehovah hu teneru ferm fl-​affezzjoni u mimli ħniena.” (Ġakbu 5:11) Li nafu dan jikkontribwixxi għall-​hena tagħna.

Hena Relattiva Issa

19, 20. (a) Hena totali għala mhix possibbli issa? (b) Il-​Bibbja kif turi li jistaʼ jkollna hena relattiva f’dan iż-​żmien?

¹⁹ Madankollu, huwa possibbli li nkunu henjin illum, ladarba qegħdin ngħixu fl-​aħħar jiem taʼ did-dinja taħt Satana mimlija kriminalità, vjolenti, u immorali, fejn il-​mard u l-​mewt jiffaċċjawna? M’għandniex xi ngħidu, ma nistgħux issa nistennew il-​grad taʼ hena li se jeżisti fid-​dinja ġdida t’Alla, bħalma tbassar il-​Kelma tiegħu: “Hawn jien qiegħed noħloq smewwiet ġodda u art ġdida; u l-​affarijiet taʼ qabel m’humiex se jitfakkru, lanqas ma se jidħlu fil-​qalb. Imma eżaltaw, u kunu mimlijin ferħ għal dejjem f’dak li qiegħed noħloq.”—Isaija 65:17, 18.

²⁰ Dak li l-​qaddejja t’Alla jistgħu jkollhom issa huwa hena relattiva għaliex jafu r-​rieda tiegħu u għandhom għarfien eżatt tal-​barkiet meraviljużi li dalwaqt jiġu fid-​dinja ġdida tiegħu bħal ġenna. (Ġwann 17:3; Rivelazzjoni 21:4) Huwa għalhekk li l-​Bibbja tistaʼ tgħid: “O Jehovah taʼ l-​armati, hieni hu l-​bniedem li qiegħed jafda fik,” “hieni hu kulmin qiegħed jibżaʼ minn Jehovah, li qiegħed jimxi fil-​mogħdijiet tiegħu,” “henjin huma l-​kalmi, ladarba se jirtu l-​art.” (Salm 84:12; 128:1; Mattew 5:5) B’hekk, minkejja ċ-​ċirkostanzi diffiċli tal-​preżent li rridu nissieltu magħhom, jistaʼ jkollna ammont sostanzjali taʼ hena. Saħansitra meta jiġrulna affarijiet ħżiena, ma nsewdux qalbna bħalma jagħmlu dawk li ma jafux lil Jehovah u li m’għandhomx it-​tama taʼ ħajja eterna.—1 Tessalonkin 4:13.

21. Li jagħtu minnhom infushom kif jikkontribwixxi għall-​hena tal-​qaddejja taʼ Jehovah?

²¹ L-​hena tiġi wkoll għand il-​qaddejja taʼ Jehovah għaliex jiddedikaw ħin, enerġija, u riżorsi f’li jgħallmu veritajiet tal-​Bibbja lill-​oħrajn, b’mod speċjali nies li ‘jitniegħdu u jibku minħabba l-​affarijiet mistmerra kollha’ mwettqin fid-​dinja taʼ Satana. (Eżekjel 9:4) Il-​Bibbja tgħid: “Hieni hu kulmin qiegħed jaġixxi b’konsiderazzjoni lejn il-​baxx; f’jum il-​gwaj Jehovah se jipprovdi ħarba għalih. Jehovah innifsu se jgħassu u jżommu ħaj. Hu se jkun ippronunzjat hieni fl-​art.” (Salm 41:1, 2) Kif qal Ġesù, “hemm iktar hena f’li tagħti milli hemm f’li tirċievi.”​—Atti 20:35.

22. (a) Rigward l-​hena, agħmel kuntrast bejn il-​qaddejja taʼ Jehovah u dawk li ma jaqduhx. (b) Għal liema raġuni speċjali għandna nistennew li nkunu henjin?

²² Mela waqt li l-​qaddejja t’Alla ma jistgħux jistennew hena suprema f’dan iż-​żmien preżenti, jistgħu jiksbu l-​hena li ma titgawdiex minn dawk li ma jaqdux lil Alla. Jehovah jiddikjara: “Ħares! Il-​qaddejja tiegħi stess se jgħajtu bil-​ferħ minħabba l-​kundizzjoni tajba tal-​qalb, imma intom infuskom se tagħmlu agħjat minħabba l-​uġigħ tal-​qalb u se twaħwħu minħabba l-​waqgħa nfisha taʼ l-​ispirtu.” (Isaija 65:14) Ukoll, dawk li jaqdu lil Alla għandhom raġuni speċjali ħafna biex ikunu henjin issa—għandhom l-​ispirtu qaddis tiegħu li “Alla ta lil dawk li qegħdin jobdu lilu bħala ħakkiem.” (Atti 5:32) U ftakar, fejn hemm l-​ispirtu t’Alla, hemm l-​hena.—Galatin 5:22.

23. X’se nikkunsidraw fl-​istudju li jmiss tagħna?

²³ Fl-​organizzazzjoni tal-​qaddejja t’Alla llum, parti importanti tintlagħab mill-​“irġiel ixjeħ,” l-​anzjani, li jieħdu t-​tmexxija fil-​kongregazzjonijiet, billi jikkontribwixxu għall-​hena tan-​nies taʼ Jehovah. (Titus 1:5) Dawn l-​uħud kif għandhom iħarsu lejn ir-​responsabbiltajiet tagħhom u r-​relazzjoni tagħhom maʼ ħuthom irġiel u nisa? L-​artiklu li jmiss tagħna se jiddiskuti dan. (w94 10/1)

Kif Twieġeb Int?

◻ Il-​ħolqien kif jixhed li Jehovah hu organizzat?

◻ Jehovah kif organizza lill-​qaddejja tiegħu fil-​passat u fil-​preżent?

◻ Jehovah liema bilanċ irid minna?

◻ Kemm hija importanti l-​imħabba għall-​hena tagħna?

◻ Liema xorta taʼ hena nistgħu nistennew fi żmienna?

[Sors taʼ l-​Istampa f’paġna 22]

Fuq: Bil-​kortesija taʼ ROE/Anglo-Australian Observatory, ritratt minn David Malin