Il-​Kristjani Veri Kollha Jridu Jkunu Evanġelizzaturi

“Agħmel ix-​xogħol taʼ evanġelizzatur [jew, missjunarju]”.—2 TIMOTEW 4:5, nota taʼ taħt.

1. X’kienet l-​aħbar tajba li ġiet ippridkata minn evanġelizzaturi fl-​ewwel seklu?

XI jfisser illum li tkun evanġelizzatur? Int wieħed minnhom? Il-​kelma “evanġelizzatur” tiġi mill-​kelma Griega eu․ag․geli․stesʹ, li tfisser “predikatur tal-​aħbar tajba.” Mit-​twaqqif tal-​kongregazzjoni Kristjana fis-​sena 33 E.K., l-​aħbar tajba Kristjana enfasizzat il-​mezz taʼ salvazzjoni t’Alla u pproklamat li Ġesù Kristu kellu jerġaʼ jiġi lura fi żmien iktar tard biex jibda l-​ħakma tas-​Saltna tiegħu fuq l-​umanità.—Mattew 25:31, 32; 2 Timotew 4:1; Ebrej 10:12, 13.

2. (a) Il-​kontenut tal-​aħbar tajba kif sar iżjed għani fi żmienna? (b) Liema obbligu jaqaʼ fuq il-​Kristjani veri kollha llum?

² Mill-​1914 ’il quddiem, l-​evidenza bdiet tiżdied li s-​sinjal li Ġesù kien ta rigward il-​miġja lura u l-​preżenza inviżibbli tiegħu kien qed jitwettaq. (Mattew 24:3-13, 33) Għal darb’oħra, l-​aħbar tajba setgħet tinkludi l-​espressjoni “s-​saltna t’Alla hija qrib.” (Luqa 21:7, 31; Mark 1:14, 15) Tabilħaqq, kien wasal iż-​żmien biex il-​profezija taʼ Ġesù mniżżla f’Mattew 24:14 iġ-ġarrab twettieq grandjuż: “Din l-​aħbar tajba tas-​saltna se tkun ippridkata fl-​art abitata kollha għal xiehda lill-​ġnus kollha; u mbagħad se jiġi t-​tmiem.” Għalhekk, l-​evanġelizzar issa jinkludi li tiġi annunzjata b’mod żeluż is-​Saltna stabbilita t’Alla u l-​barkiet li dalwaqt iġġib lill-​umanità ubbidjenti. Il-​Kristjani kollha huma kkmandati li jagħmlu dan ix-​xogħol u li ‘jagħmlu dixxipli.’—Mattew 28:19, 20; Rivelazzjoni 22:17.

3. (a) Liema tifsir ieħor għandha l-​kelma “evanġelizzatur”? (Ara Insight on the Scriptures, Volum 1, paġna 770, kolonna 2, paragrafu 2.) (b) Dan x’mistoqsijiet iqajjem?

³ Minbarra l-​ippridkar tal-​aħbar tajba inġenerali, il-​Bibbja tuża t-​terminu “evanġelizzatur” f’sens speċjali rigward dawk li jitilqu mit-​territorju taʼ pajjiżhom biex jippridkaw l-​aħbar tajba f’reġjuni li qatt ma sar xogħol fihom. Fl-​ewwel seklu, kien hemm ħafna evanġelizzaturi missjunarji, bħal Filippu, Pawlu, Barnabas, Silas, u Timotew. (Atti 21:8; Efesin 4:11) Imma xi ngħidu dwar iż-​żmien speċjali tagħna mill-​1914 ’il hawn? Illum in-​nies taʼ Jehovah għamlu lilhom infushom disponibbli bħala evanġelizzaturi lokali kif ukoll missjunarji?

Progress mill-​1919 ’il Hawn

4, 5. X’kienu l-​prospetti għax-​xogħol tal-​evanġelizzar ftit wara l-​1914?

⁴ Meta l-​Ewwel Gwerra Dinjija resqet lejn it-​tmiem tagħha fl-​1918, il-​qaddejja t’Alla ġarrbu oppożizzjoni iżjed qawwija kemm mill-​apostati kif ukoll mill-​kleru tal-​Kristjaneżmu u mill-​alleati politiċi tagħhom. Fil-​fatt, l-​evanġelizzar Kristjan ġenwin kważi waqaf għal kollox f’Ġunju tal-​1918 meta uffiċjali ewlenin tal-​Watch Tower Society fl-​Istati Uniti ġew issentenzjati għal 20 sena ħabs taħt akkużi foloz. Kien irnexxielhom il-​għedewwa t’Alla f’li jtemmu l-​ippridkar tal-​aħbar tajba?

⁵ Bla mistenni, f’Marzu tal-​1919 l-​uffiċjali tas-​Soċjeta ġew illiberati u iktar tard inħelsu mill-​akkużi foloz li kienu tefgħuhom il-​ħabs. Bil-​libertà li sabu mill-​ġdid, dawn il-​Kristjani midlukin irrealizzaw li kien għad hemm ħafna xogħol xi jsir qabel ma jinġabru għall-​premju tagħhom tas-​sema bħala werrieta sħab fis-​Saltna t’Alla.—Rumani 8:17; 2 Timotew 2:12; 4:18.

6. Ix-​xogħol tal-​evanġelizzar kif ipprogressa bejn l-​1919 u l-​1939?

⁶ Lura fl-​1919 kien hemm inqas minn 4,000 li rrapportaw li ħadu sehem fit-​tixrid tal-​aħbar tajba. Matul il-​għoxrin sena taʼ wara, għadd mhux ħazin taʼ rġiel offrew lilhom infushom bħala evanġelizzaturi missjunarji, u xi wħud intbagħtu lejn pajjiżi tal-​Afrika, tal-​Asja, u tal-​Ewropa. Sal-​1939, wara 20 sena taʼ ppridkar tas-​Saltna, ix-​Xhieda taʼ Jehovah kienu żdiedu għal iktar minn 73,000. Din iż-​żjieda notevoli, li saret minkejja wisq persekuzzjoni, kienet simili għal dak li seħh fis-​snin bikrin tal-​kongregazzjoni Kristjana.—Atti 6:7; 8:4, 14-17; 11:19-21.

7. Fis-​snin 47 E.K. u l-​1939, liema sitwazzjoni simili eżistiet rigward ix-​xogħol taʼ evanġelizzar Kristjan?

⁷ Madankollu, il-​maġġoranza tax-​Xhieda taʼ Jehovah f’dak iż-​żmien kienu kkonċentrati f’pajjiżi Protestanti li jitkellmu bl-​Ingliż. Fil-​fatt, ’il fuq minn 75 fil-​mija tat-​73,000 proklamatur tas-​Saltna kienu mill-​Awstralja, mill-​Ingilterra, mill-​Kanada, minn New Zealand, u mill-​Istati Uniti. Bħalma kien il-​każ madwar is-​sena 47 E.K., kien hemm bżonn xi ħaġa biex tinkuraġġixxi lil evanġelizzaturi biex jagħtu iżjed attenzjoni lejn il-​pajjiżi tal-​art fejn kien sar inqas xogħol.

8. Sas-​sena 1992, l-​Iskola taʼ Gilead x’kienet wettqet?

⁸ Ir-​restrizzjonijiet u l-​persekuzzjonijiet taʼ żmien il-​gwerra ma setgħux iwaqqfu lill-​ispirtu qaddis u setgħani taʼ Jehovah milli jqanqal lill-​qaddejja tiegħu biex jippreparaw għal espansjoni akbar. Fl-​1943, waqt li t-​Tieni Gwerra Dinjija kienet fl-​aqwa tagħha, l-​organizzazzjoni t’Alla tat bidu għall-​Watchtower Bible School of Gilead bil-​ħsieb li xxerred l-​aħbar tajba b’mod iżjed mifrux. Sa Marzu tal-​1992, din l-​iskola kienet bagħtet 6,517-il missjunarju lejn 171 pajjiż differenti. Jerġaʼ, ġew imħarrġin irġiel biex jieħdu ħsieb tal-​fergħat tal-​Watch Tower Society f’artijiet barranin. Sas-​sena 1992, mis-​97 koordinatur tal-​Kumitat tal-​Fergħat, 75 kienu mħarrġin f’Gilead.

9. Liema programmi taʼ taħriġ kellhom parti fil-​progress tal-​evanġelizzar u x-​xogħol taʼ trawwim taʼ dixxipli?

⁹ Minbarra l-​Iskola taʼ Gilead, programmi oħrajn taʼ taħriġ għammru lill-​poplu taʼ Jehovah biex jespandu u jtejbu x-​xogħol taʼ evanġelizzar tagħhom. Per eżempju, l-​Iskola tal-​Ministeru Teokratiku topera fil-​kongregazzjonijiet tax-​Xhieda taʼ Jehovah mal-​art kollha. Dan l-​arranġament, flimkien mal-​Laqgħa tas-​Servizz taʼ kull ġimgħa, ħarreġ lil miljuni taʼ pubblikaturi tas-​Saltna biex ikunu effettivi fil-​ministeru pubbliku. Hemm ukoll l-​Iskola tal-​Ministeru tas-​Saltna, li tipprovdi taħriġ taʼ valur lil anzjani u qaddejja ministerjali sabiex dawn ikunu jistgħu jieħdu ħsieb aħjar tal-​kongregazzjonijiet li dejjem qegħdin jikbru. L-​Iskola tas-​Servizz taʼ Pijunier għenet lil ħafna evanġelizzaturi full time biex isiru iktar effettivi fl-​attività tagħhom tal-​ippridkar. Iktar riċenti, l-​Iskola tat-​Taħriġ Ministerjali ħadmet f’pajjiżi differenti biex tgħin lil anzjani u qaddejja ministerjali mhux miżżewġin biex isiru Timotewijiet taż-​żmien modern.

10. X’kien ir-​riżultat tat-​taħriġ eċċellenti kollu pprovdut permezz tal-​organizzazzjoni t’Alla? (Inkludi l-​informazzjoni fil-​kaxxa.)

¹⁰ X’kien ir-​riżultat taʼ dan it-​taħriġ kollu? Fl-​1991, ix-​Xhieda taʼ Jehovah kienu laħqu quċċata taʼ iktar minn erbaʼ miljuni xandara tas-​Saltna attivi f’212-il pajjiż. Madankollu, kuntrarju għas-​sitwazzjoni li kienet teżisti fl-​1939, ’il fuq minn 70 fil-​mija minn dawn huma minn pajjiżi Kattoliċi, Ortodossi, mhux Kristjani, jew artijiet oħrajn, fejn l-​Ingliż m’huwiex il-​lingwa predominanti.—Ara l-​kaxxa “Espansjoni mill-​1939 ’il Hawn.”

Għala Nkiseb Suċċess

11. L-​appostlu Pawlu lil min attribwixxa s-​suċċess tiegħu bħala ministru?

¹¹ Ix-​Xhieda taʼ Jehovah ma jiħdux il-​kredtu għal din l-​espansjoni. Minflok, huma jqisu xogħolhom bil-​mod kif għamel l-​appostlu Pawlu, bħalma spjega fl-​ittra tiegħu lill-​Korintin. “X’inhu, allura, Apollos? Iva, x’inhu Pawlu? Ministri li permezz tagħhom sirtu temmnu, saħansitra skond ma l-​Mulej ta lil kull wieħed. Jien ħawwilt, Apollos saqqa, imma Alla baqaʼ jkabbarha; sabiex la hu xi ħaġa dak li jħawwel lanqas hu dak li jsaqqi, imma Alla li jagħmilha tikber. Għax aħna ħaddiema sħab t’Alla. Intom il-​għalqa t’Alla li qiegħda tiġi kkultivata, il-​bini t’Alla.”−1 Korintin 3:5-7, 9.

12. (a) Il-​Kelma t’Alla liema rwol għandha fl-​evanġelizzar Kristjan taʼ suċċess? (b) Min ġie maħtur bħala Kap tal-​kongregazzjoni Kristjana u liema huwa mod importanti biex nuru s-​sottomissjoni tagħna lejh bħala kap?

¹² M’hemmx dubju li t-​tkabbir fenomenali li ġarrbu x-​Xhieda taʼ Jehovah hu dovut għall-​barka t’Alla. Huwa x-​xogħol t’Alla. Billi jirrealizzaw dan il-​fatt, huma jkomplu japplikaw lilhom infushom fl-​istudju regulari tal-​Kelma t’Alla. Huma jibbażaw fuq il-​Bibbja kulma jgħallmu fix-​xogħol tagħhom taʼ evanġelizzar. (1 Korintin 4:6; 2 Timotew 3:16) Muftieħ ieħor għas-​suċċess tagħhom fl-​evanġelizzar huwa li huma jirrikonoxxu bis-​sħiħ lil Dak il-​Wieħed li Alla ħatar bħala l-​Kap tal-​kongregazzjoni, il-​Mulej Ġesù Kristu. (Efesin 5:23) Kristjani fl-​ewwel seklu wrew dan billi kkoperaw maʼ dawk li Ġesù ħatar bħala appostli. Dawn l-​irġiel, flimkien maʼ anzjani oħrajn tal-​kongregazzjoni taʼ Ġerusalemm, kienu jifformaw il-​ġemgħa li tiggverna Kristjana tal-​ewwel seklu. Mis-​sema l-​Mulej Ġesù Kristu uża lil dan il-​grupp taʼ Kristjani maturi biex jissetiljaw kwistjonijiet u jagħtu direzzjoni lix-​xogħol taʼ evanġelizzar. Il-​koperazzjoni żeluża taʼ Pawlu maʼ dan l-​arranġament divin irriżultat f’żjidiet fil-​kongregazzjonijiet li kien iżur. (Atti 16:4, 5; Galatin 2:9) Bl-​istess mod illum, billi jżommu sod mal-​Kelma t’Alla u b’mod żeluż jikkoperaw mad-​direzzjoni li tiġi mill-​Ġemgħa li Tiggverna, evanġelizzaturi Kristjani huma assigurati minn suċċess fil-​ministeru tagħhom.—Titus 1:9; Ebrej 13:17.

Nikkunsidraw lil Oħrajn bħala Superjuri

13, 14. (a) L-​appostlu Pawlu liema parir ta kif insibu f’​Filippin 2:1-4? (b) Għala huwa importanti li niftakru dan il-​parir meta nieħdu sehem fix-​xogħol taʼ evanġelizzar?

¹³ L-​appostlu Pawlu wera mħabba ġenwina lejn dawk li jfittxu l-​verità u ma kellux attitudni superjuri jew razzista. B’hekk, hu setaʼ jagħti parir lil nies li jemmnu bħalu biex ‘jikkunsidraw li l-​oħrajn huma superjuri.’—Filippin 2:1-4.

¹⁴ Bl-​istess mod, evanġelizzaturi Kristjani veri llum ma jurux attitudni superjuri meta jittrattaw maʼ nies taʼ razez u sfondi differenti. Wieħed mix-​Xhieda taʼ Jehovah mill-​Istati Uniti, mibgħut biex jaħdem bħala missjunarju fl-​Afrika, igħid: “Jiena naf li m’aħniex superjuri. Forsi aħna għandna iżjed flus u dik li tissejjaħ edukazzjoni formali, imma huma [in-nies lokali] għandhom kwalitajiet li jisbqu lil tagħna.”

15. Dawk li jiġu mibgħutin biex jaħdmu f’artijiet barranin kif jistgħu juru rispett ġenwin lejn dixxipli prospettivi?

¹⁵ Ċertament, billi nuru rispett ġenwin lejn dawk li magħhom naqsmu l-​aħbar tajba, se nagħmluha eħfef għalihom li jaċċettaw il-​messaġġ tal-​Bibbja. Igħin ukoll meta evanġelizzatur missjunarju juri li hu kuntent li jgħix fost in-​nies li ntbagħat biex igħin. Missjunarju li rnexxa u li qattaʼ dawn l-​aħħar 38 sena fl-​Afrika jispjega: “Jien inħoss fil-​fond ġewwa fija li din hi dari, u li dawk fil-​kongregazzjoni fejn intbgħatt huma ħuti rġiel u nisa. Kull meta rritornajt lejn il-​Kanada bi btala, ma nħossnix verament li qiegħed id-​dar. Meta tasal l-​aħħar ġimgħa fil-​Kanada, ikolli ġenn biex immur lura. Dejjem inħossni hekk. Jien ingħid lill-​istudenti tiegħi tal-​Bibbja u lil ħuti kemm jien kuntent li erġajt gejt lura, u huma japprezzaw li jien irrid inkun magħhom.”−1 Tessalonkin 2:8.

16, 17. (a) Ħafna missjunarji u evanġelizzaturi lokali liema sfida aċċettaw sabiex ikunu iktar effettivi fil-​ministeru tagħhom? (b) Waħda missjunarja x’esperjenza kellha minħabba li tkellmet bil-​lingwa lokali?

¹⁶ Meta jsibu xi komunità kbira taʼ lingwa barranija fit-​territorji lokali tagħhom, xi wħud għamlu l-​isforz biex jitgħallmu l-​lingwa, billi b’dan juru li huma jqisu lill-​oħrajn li huma superjuri. “Fl-​Afrika t’Isfel,” josserva wieħed missjunarju, “xi drabi hemm sentiment taʼ sfiduċja bejn nies taʼ sfond Afrikan u nies taʼ sfond Ewropew. Imma l-​fatt li aħna nitkellmu bil-​lingwa lokali malajr iwarrab lil dan is-​sentiment.” Li nitkellmu l-​lingwa taʼ dawk li magħhom naqsmu l-​aħbar tajba hija taʼ għajnuna kbira f’li nilħqu l-​qalb tagħhom. Dan jirrikjedi xogħol iebes u persistenza umli. Missjunarju f’pajjiż Asjatiku jispjega: “Li tibqaʼ tlaqlaq waqt li kontinwament jidħku bik minħabba l-​iżballji tiegħek jistaʼ jkun taʼ prova. Jistaʼ jidher eħfef li ċċedi.” Madankollu, imħabba għal Alla u għall-​proxxmu għenet lil dan il-​missjunarju biex jippersevera.—Mark 12:30, 31.

¹⁷ M’għandniex xi ngħidu, in-​nies jitqanqlu meta stranġier jipprova jaqsam l-​aħbar tajba bil-​lingwa tagħhom. Xi drabi jirriżulta f’barkiet mhux mistennijin. Waħda missjunarja fil-​pajjiż Afrikan taʼ Lesotho kienet qiegħda titkellem bil-​lingwa Lesotho maʼ mara oħra, li kienet taħdem f’ħanut tat-​tapizzerija. Ministru tal-​gvern minn pajjiż Afrikan ieħor kien qed idur fil-​ħanut u semagħhom jitkellmu. Hu resaq lejhom u faħħarha taʼ dan, u hi wieġbitu bil-​lingwa tiegħu stess. “Għaliex ma tiġix [f’pajjiżi] u taħdem fost niesna, ladarba int taf ukoll bis-​Swahili?” staqsieha. Bit-​tattika, il-​missjunarja wieġbet: “Dik tkun xi ħaġa sabiħa. Imma jiena waħda mix-​Xhieda taʼ Jehovah, u fil-​preżent ix-​xogħol tagħna huwa pprojbit f’pajjiżek.” “Jekk jogħgbok,” wieġeb hu, “taħsibx li aħna lkoll nopponu lix-​xogħol tagħkom. Ħafna minna huma favur ix-​Xhieda taʼ Jehovah. Forsi xi darba għad tkunu tistgħu tgħallmu bil-​libertà fost niesna.” Xi ftit taż-​żmien wara, il-​missjunarja ħadet ferħa kbira meta saret taf li x-​Xhieda taʼ Jehovah ingħataw il-​libertà tal-​qima f’dak l-​istess pajjiż.

Lesti li Nċedu Drittijiet

18, 19. (a) Pawlu b’liema mod importanti rsista biex jimita lis-​Sid tiegħu, Ġesù Kristu? (b) Irrakkonta esperjenza (dik tal-​paragrafu jew waħda persunali) biex turi l-​importanza taʼ li tevita kwalunkwe ħaġa li tistaʼ tfixkel lil dawk li magħhom naqsmu l-​aħbar tajba.

¹⁸ Meta l-​appostlu Pawlu kiteb: “Siru imitaturi tiegħi, saħansitra bħalma jien taʼ Kristu,” kien għadu kif iddiskuta dwar il-​bżonn li nevitaw li nfixklu lil oħrajn, billi qal: “Kemm jekk qegħdin tieklu jew tixorbu jew tagħmlu xi ħaġa oħra, agħmlu kollox għall-​glorja t’Alla. Ibqgħu ma ssirux kaġuni għal gambetta lil Lhud kif ukoll lil Griegi u lill-​kongregazzjoni t’Alla, saħansitra bħalma jien qiegħed nogħġob lin-​nies kollha f’kollox, mhux billi nfittex il-​vantaġġ tiegħi stess imma dak tal-​ħafna, sabiex jistgħu jiġu salvati.”−1 Korintin 10:31-33; 11:1.

¹⁹ Evanġelizzaturi bħal Pawlu, li lesti li jagħmlu sagrifiċċji fl-​interessi taʼ dawk li lilhom jippridkawlhom, jaħsdu ħafna barkiet. Per eżempju, f’pajjiż Afrikan, koppja missjunarja marru f’lukanda lokali għall-​ikel biex jiċċelebraw l-​anniversarju taż-​żwieġ tagħhom. Għall-​ewwel kienu bi ħsiebhom jordnaw l-​inbid mal-​ikla, ladarba l-​użu moderat tax-​xorb alkoħoliku mhux ikkundannat fil-​Bibbja. (Salm 104:15) Imma mbagħad din il-​koppja ddeċidew li ma jagħmlux hekk li ma jmorrux joffendu lin-​nies tal-​post. “Xi żmien wara,” jiftakar ir-​raġel, “iltqajna maʼ raġel li kien kok f’dik il-​lukanda, u bdejna studju tal-​Bibbja miegħu. Ħafna wara qalilna: ‘Tiftakru meta ġejtu fil-​lukanda biex tieklu? Aħna kollha konna wara l-​bieb tal-​kċina nosservawkom. Għax ara, il-​missjunarji tal-​knisja qalulna li nagħmlu ħażin jekk nixorbu. Iżda, meta huma jiġu fil-​lukanda, huma jordnaw inbid kemm jifilħu. Aħna għalhekk iddeċidejna li jekk intom tordnaw ix-​xorb, ma konniex se nisimgħukom meta tiġu tippridkawlna.’” Illum, dak il-​kok u xi oħrajn li kienu jaħdmu f’dik il-​lukanda huma Xhieda mgħammdin.

Għad Baqaʼ Ħafna xi Jsir

20. Għala huwa vitali li nissaportu bħala evanġelizzaturi żelużi, u ħafna xi privileġġ taʼ ferħ qegħdin jaħtfu?

²⁰ Hekk kif it-​tmiem taʼ din is-​sistema mill-​agħar joqrob bil-​għagla, ħafna għadhom jixxennqu biex jisimgħu l-​aħbar tajba, u huwa iżjed urġenti minn qatt qabel li kull Kristjan jissaporti bħala evanġelizzatur leali. (Mattew 24:13) Tistaʼ int tespandi sehmek f’dan ix-​xogħol billi ssir evanġelizzatur f’sens speċjali bħal Filippu, Pawlu, Barnabas, Silas, u Timotew? Ħafna qegħdin jagħmlu xi ħaġa simili billi jsiru pijunieri u jagħmlu lilhom infushom disponibbli biex jaqdu f’postijiet fejn hemm bżonn akbar.

21. B’liema mod “bieb kbir li jwassal għal attività” nfetaħ għan-​nies taʼ Jehovah?

²¹ Dan l-​aħħar, oqsma vasti għall-​evanġelizzar infetħu f’pajjiżi tal-​Afrika, tal-​Asja, u tal-​Ewropa tal-​Lvant, fejn ix-​xogħol tax-​Xhieda taʼ Jehovah qabel kien restritt. Bħalma kien il-​każ mal-​appostlu Pawlu, “bieb kbir li jwassal għal attività ġie miftuħ” għan-​nies taʼ Jehovah. (1 Korintin 16:9) Per eżempju, evanġelizzaturi missjunarji li dan l-​aħħar waslu fil-​pajjiż Afrikan taʼ Mozambique ma jistgħux ilaħħqu mal-​għadd taʼ nies li jridu studji tal-​Bibbja. Kemm nistgħu nkunu ferħanin li x-​xogħol tax-​Xhieda taʼ Jehovah sar legali f’dik l-​art mill-​11 taʼ Frar, 1991, ’il hawn!

22. Kemm jekk it-​territorju lokali tagħna jinħadem tajjeb u kemm jekk le, x’għandna lkoll inkunu determinati li nagħmlu?

²² F’artijiet fejn minn dejjem kellna l-​libertà tal-​qima, ħutna wkoll qegħdin igawdu żjidiet kontinwi. Iva, kulfejn ingħixu, għad hemm ‘ħafna x’nagħmlu fix-​xogħol tal-​Mulej.’ (1 Korintin 15:58) Billi dan huwa l-​każ, ejjew inkomplu nagħmlu użu għaqli miż-​żmien li baqaʼ hekk kif kull wieħed ‘jagħmel ix-​xogħol taʼ evanġelizzatur, billi nwettqu bis-​sħiħ il-​ministeru tagħna.’—2 Timotew 4:5; Efesin 5:15, 16.

Tistaʼ Tispjega?

◻ X’inhu evanġelizzatur?

◻ Il-​kontenut tal-​aħbar tajba kif sar iżjed għani wara l-​1914?

◻ Ix-​xogħol tal-​evanġelizzar kif ipprogressa mill-​1919 ’il hawn?

◻ Liema fatturi ewlenin ikkontribwew għas-​suċċess tax-​xogħol tal-​evanġelizzar?

[Kaxxa f’paġna 13]

Espansjoni mill-​1939 ’il hawn

Ikkunsidra eżempji minn tliet kontinenti fejn intbagħtu missjunarji mħarrġin f’Gilead. Lura fl-​1939 kien hemm biss 636 xandara tos-Saltna li baghtu r-​rapport mill-​Afrika tal-​Punent. Sas-​sena 1991 dan il-​għadd kien żdied għal iktar minn 200,000 fi 12-il pajjiż tal-​Afrika tal-​Punent. Il-​missjunarji kkontribwew ukoll għal żjidiet fenomenali f’pajjiżi tal-​Amerka t’Isfel. Wieħed hu l-​Brażil li żdied minn 114-il xandâr tas-​Saltna fl-​l939 għal 335,039 f’April 1992. Tkabbir simili segwa l-​wasla tal-​missjunarji f’pajjiżi tal-​Asja. Matul it-​Tieni Gwerra Dinjija il-​għadd żgħir taʼ Xhieda taʼ Jehovah fil-​Ġappun kienu ppersegwitati bl-​aħrax, u x-​xogħol tagħhom ġie mwaqqaf. Imbagħad, fl-​1949, 13-il missjunarju waslu biex igħinu ħa jorganizzaw ix-​xogħol mill-​ġdid. F’dik is-​sena taʼ servizz inqas minn għaxar pubblikaturi lokali bagħtu r-​rapport tas-​servizz tal-​għalqa għall-​Ġappun kollu, fil-​waqt li f’April 1992 it-​total grandjuż taʼ pubblikaturi laħaq 167,370.

[Kaxxa f’paġna 15]

Il-​Kristjaneżmu u l-​Problema tal-​Lingwa

Xi wħud mill-​missjunarji tal-​Kristjaneżmu għamlu sforz ħerqan biex jitgħallmu lingwa barranija, imma ħafna stennew lin-​nies lokali li jitkellmu l-​lingwa Ewropea tagħhom. Kif jispjega Geoffrey Moorhouse fil-​ktieb tiegħu The Missionaries:

“L-​inkwiet kien li l-​akkwist taʼ lingwa lokali kien meqjus taʼ spiss bħala xejn iżied għajr mezz taʼ traduzzjoni tal-​lskrittura. Komparattivament ftit li xejn sar sforz, minn individwi jew mis-​soċjetajiet li jimpjegawhom, biex jiżżguraw li missjunarju setaʼ jitkellem maʼ bniedem tal-​post bil-​lingwa tiegħu stess bil-​mod fluwenti li waħdu jistaʼ jpproduċi fehma profonda bejn żewġ bnedmin umani. Kull missjunarju kien jitgħallem xi żweġ kelmiet lil hemm u ’l hawn mill-​vokabularju lokali . . . Mill-​bqija, il-​komunikazzjoni kienet ġeneralment issir bl-​intonar assurd u tal-​biżaʼ tal-​hekk imsejjaħ pidgin English, bil-​pretensjoni impliċita tiegħu li l-​abitant Afrikan irid jissottometti lilu nnifsu lejn ir-​regoli tal-​viżitatur Ingliż. L-​agħar ħaġa kienet li din kienet jerġaʼ manifestazzjoni oħra taʼ superjorità razzjali.

Fl-​1922 l-​Iskola tal-​Istudji Orjentali u Afrikani f’Londra ppubblikat rapport fuq, il-​problema tal-​lingwa. “Aħna tal-​opinjoni,” qal ir-​rapport, “li l-​livell medju taʼ abbiltà miksuba mill-​missjunarji fil-​lingwa tal-​post. . . huwa baxx b’mod dispjaċevoli u saħansitra b’mod perikoluż.”

Missjunarji tal-​Watch Tower Society minn dejjem qiesu t-​agħlim tal-​lingwa lokali bħala obbligu, li jgħin biex jispjega s-​suċċess tagħhom fil-​qasam missjunarju.