Il-​Milied—Għala daqshekk Popolari fil-​Ġappun

IT-​TWEMMIN fil-​Father Christmas huwa kbir ħafna fost it-​tfal tal-​Ġappun li hi art Buddista-Xintoista. Fl-​1989, it-​tfal Ġappuniżi kitbu 160,000 ittra u indirizzawhom lid-​Dinja taʼ Santa Klaws fl-​Iżvezja. L-​ebda pajjiż ieħor ma bagħat daqshekk ittri. Huma kitbu ittri bit-​tama li jaqtgħu x-​xewqat taʼ qalbhom, kemm jekk b’ġugarell taʼ Graphic Computer li jiswa mat-​18,000 yen ($136, Amerikan) u kemm jekk b’xi portable video game li tiswa mat-​12,500 yen ($95, Amerikan).

Għat-tfajliet Ġappuniżi, li jkollhom date Lejlet il-​Milied ikun ifisser xi ħaġa speċjali. “Skond stħarriġ dwar nisa żgħażagħ,” tgħid il-​Mainichi Daily News, “38 fil-​mija qalu li għamlu pjanijiet għal Lejlet il-​Milied minn xahar qabel.” Il-​ġuvintur għandhom mottivi ulterjuri f’li jkunu jridu li jkunu mat-​tfajliet tagħhom Lejlet il-​Milied. “Idea tajba tkun li titlob flimkien bil-​kwiet mat-​tfajla tiegħek,” issuġġeriet rivista tal-​ġuvintur. “Agħmel hekk f’post in voga. Ir-​relazzjoni tagħkom malajr se ssir iktar intima.”

Irġiel miżżewġin Ġappuniżi wkoll jittamaw li jqanqlu xi poter maġiku bit-​tradizzjoni tal-​Milied taʼ li jixtru “kejk imżejjen” fi triqthom lura mix-​xogħol għad-​dar. Billi jagħmlu l-​parti taʼ Santa Klaws dawn jipprovaw jikkumpensaw talli kienu ttraskuraw lill-​familja matul il-​bqija tas-​sena.

Tabilħaqq, il-​Milied rabba l-​għeruq fost il-​Ġappuniżi li m’humiex Kristjani. Fil-​fatt, 78 fil-​mija taʼ dawk li sar stħarriġ dwarhom permezz taʼ katina taʼ supermarkets qalu li huma jagħmlu xi ħaġa speċjali għall-​Milied. Ir-​rata hija tal-​għaġeb meta 1 fil-​mija biss mill-​popolazzjoni jsostnu li jemmnu fil-​Kristjanità. Waqt li jistqarru li huma Buddisti jew Xintoisti, huma jħossuhom komdi mhux ħażin li jgawdu din il-​vaganza “Kristjana.” Fl-​almanakk tagħha, flimkien maʼ festi Ġappuniżi, il-​famuża Shinto Ise Shrine issemmi lill-​25 taʼ Diċembru bħala “għeluq snin Kristu.” Xeni taʼ wħud li m’humiex Kristjani mhedijin f’li jixxalaw matul il-​Milied, madankollu, iqajjem il-​mistoqsija:

Iċ-​Ċelebrazzjoni taʼ Min Hu l-​Milied?

Il-​Webster’s Ninth New Collegiate Dictionary jagħti definizzjoni tal-​Milied bħala “festa Kristjana fil-​25 taʼ Diċembru . . . li tikkommemora t-​twelid taʼ Kristu.” Ġie meqjus bħala żmien għall-​“Kristjani” biex “jingħaqdu fis-​sentimenti tagħhom taʼ ferħ f’jum għeluq snin Kristu.”

Dawk li jiċċelebraw il-​Milied purament bħala festa reliġjuża forsi jsibu li dawk li qalbuha f’festa sekulari bid-​divertiment u l-​għoti tar-​rigali huma tedjanti u li saħansitra qegħdin jidgħu. “Fil-​Ġappun għandna l-​aqwa f’dak li hu kummerċjaliżmu grass: l-​ebda Kristu,” kiteb Amerikan li jgħix fil-​Ġappun. “F’għajnejn dawk tal-​Punent,” kiteb ieħor dwar il-​Milied Ġappuniż, “m’huwiex id-​dundjan [li ma tantx issibu fis-​swieq Ġappuniżi] li hu nieqes, imma l-​iktar ingredjent essenzjali, l-​ispirtu.”

X’inhu, allura, l-​ispirtu tal-​Milied? Huwa l-​atmosfera taʼ xi servizz fil-​knisja bil-​għanjiet, il-​ġulbiena, u x-​xemgħat, li ħafna jużawhom fl-​uniku pellegrinaġġ annwali lejn il-​knisja? Jew huwa l-​imħabba, il-​burdata tajba, u l-​għoti tar-​rigali li jqanqal lil ħafna biex ikunu ġenerużi? Huwa t-​trankwillità li taħkem fuq il-​front tal-​battalja waqt li s-​suldati josservaw xi ftit jiem taʼ “paċi fuq l-​art”?

Ħaġa tal-​iskantament, l-​ispirtu tal-​Milied taʼ spiss jonqos li jġib paċi saħansitra fil-​familja. Skond stħarriġ fl-​Ingilterra fl-​1987, ġie stmat li ‘gwerra ċivili’ kellha tibda f’70 fil-​mija tad-​djar Britanniċi matul il-​Milied dik is-​sena. Ġlied fuq il-​flus ikun il-​kaġun prinċipali. Li jixorbu żżejjed u li ma jwettqux dmirhom fil-​familja wkoll iwassal għall-​ġlied.

“Min jaf jekk aħniex nimmissjaw xi ħaġa dwar il-​vera tifsira tal-​Milied,” kiteb wieħed mill-​Punent li jgħix fil-​Ġappun u li żar lil daru matul l-​istaġun tal-​Milied dan l-​aħħar.” Kull 25 taʼ Diċembru, jien inħoss l-​istess nostalġija biex nerġaʼ lura lejn kif konna nagħmlu l-​Milied dari—iċ-​ċerimonja pagana li kienet tiċċelebra l-​iqsar jum tax-​xitwa billi jiġu adorati s-​siġar u festi taʼ tbaħrid. Xorta għad għandna t-​tiżjin pagan—il-​mistletoe, il-​holly, is-​siġar taċ-​ċipress u affarijiet bħal dawn— imma b’xi mod il-​Milied qatt ma kien l-​istess mindu ġie misruq mill-​Kristjani u mdawwar f’festa reliġjuża.”

Bla dubju, il-​Milied huwa festa pagana. Il-​Kristjani tal-​bidu ma kinux jiċċelebrawh “għaliex huma kkunsidraw iċ-​ċelebrazzjoni tat-​twelid taʼ kwalunkwe bniedem bħala drawwa pagana,” tgħid The World Book Encyclopedia. Il-​festi pagani tas-​Saturnalia u tas-​Sena l-​Ġdida huma s-​sors tax-​xalar u tat-​tpartit taʼ rigali.

Jekk il-​Milied huwa essenzjalment pagan, il-​Kristjani ġenwini jridu jistaqsu l-​mistoqsija, Huwa l-​Milied għall-​Kristjani? Ejjew naraw xi tgħid il-​Bibbja dwar iċ-​ċelebrazzjoni taʼ għeluq snin Kristu.