Il-​Ħarsa Tal-​bibbja

Għadhom Rilevanti l-​Partijiet Kollha tal-​Bibbja?

“Il-​Bibbja ftit li xejn fiha valur prattiku għall-​bniedem modern, ħlief li jkollu ftit għarfien biex b’suċċess jagħmel xi tisliba jew biex iwieġeb mistoqsijiet fuq xi programm televiżiv.”

“Referenzi bibliċi għall-​ġenealoġiji tal-​familja, il-​verġinità, u l-​biżaʼ minn Alla kienu ideat kulturali rilevanti fi żminijiet bibliċi, imma ma tantx huma rilevanti fis-​Seklu Wieħed u Għoxrin.”

“Il-​Bibbja kienet antikwata anki qabel ma ġiet stampata l-​ewwel darba.”

DAWN il-​kummenti ttieħdu reċentement minn sit tal-​Internet li ddiskuta s-​suġġett “Hija l-​Bibbja antikwata u irrilevanti?” Int kif tħossok dwar dawn l-​opinjonijiet? Taqbel magħhom?

Avolja forsi ma taqbilx maʼ dawk li jiċħdu l-​Bibbja għalkollox, forsi xorta taħseb dwar jekk kulma hemm fil-​Bibbja hux rilevanti. Wara kollox, il-​Bibbji li jintużaw fil-​biċċa l-​kbira mill-​knejjes huma maqsumin f’dawk li spiss jissejħu t-​Testment il-​Qadim u t-​Testment il-​Ġdid, u b’hekk jagħtu l-​impressjoni li iktar minn 75 fil-​mija mill-​Bibbja hu qadim, antikwat.

Ħadd m’għadu joffri s-​sagrifiċċji tal-​annimali deskritti fil-​Liġi Mosajka. Allura, dawk id-​dettalji kollha rigward is-​sagrifiċċji fil-​ktieb tal-​Levitiku għala ġew preservati? (Levitiku 1:1–7:38) U xi ngħidu għall-​kapitli tal-​ftuħ tal-​1 Kronaki, li jikkonsistu kważi għalkollox minn listi ġenealoġiċi? (1 Kronaki 1:1–9:44) Jekk ħadd li jgħix illum ma jistaʼ jsib lil xi ħadd li jiġi direttament mid-​dixxendenza tiegħu minn dawk imsemmijin f’dawk il-​kapitli, x’jiswew dawn il-​listi?

Ejja ngħidu li taqtaʼ tuffieħa minn siġra tat-​tuffieħ. Ladarba jkollok it-​tuffieħa, hija s-​siġra li pproduċietha irrilevanti? Mhux jekk trid iktar frott! B’xi modi l-​Bibbja hi bħal din is-​siġra tat-​tuffieħ. Ċerti partijiet tal-​Bibbja, bħas-​Salmi jew il-​Prietka taʼ fuq il-​Muntanja, forsi jidhru li huma aċċessibbli faċilment u speċjalment attraenti. Filwaqt li għandna mnejn ngħożżu dawk il-​partijiet—bħalma forsi ngħożżu l-​frotta favorita tagħna—għandna nwarrbu l-​kumplament? Il-​Bibbja nfisha x’tgħid dwar din il-​kwistjoni?

Madwar is-​sena 65 E.K., l-​appostlu Pawlu kiteb it-​tieni ittra tiegħu lil Timotju, billi fakkru: “Minn mindu kont tarbija ilek taf il-​kitba qaddisa, li tistaʼ tagħmlek għaref għas-​salvazzjoni permezz tal-​fidi fi Kristu Ġesù.” Pawlu mbagħad qal: “L-​Iskrittura kollha hi mnebbħa minn Alla u tiswa biex tgħallem, twiddeb, tikkoreġi, tiddixxiplina fis-​sewwa.” (2 Timotju 3:15, 16) Meta Pawlu kiteb li “l-​Iskrittura kollha hi mnebbħa minn Alla u tiswa,” kien qed jitkellem biss dwar it-​Testment il-​Ġdid?

Innota r-​referenza taʼ Pawlu għall-​fatt li Timotju kien jaf “il-​kitba qaddisa” minn mindu kien “tarbija.” Jekk, bħalma jemmnu xi wħud, Timotju kellu fuq it-​30 sena fiż-​żmien meta nkitbet din l-​ittra, mela kien tarbija madwar iż-​żmien li miet Ġesù. Dan kien qabel ma nkiteb kwalunkwe porzjon tat-​Testment il-​Ġdid, jew l-​Iskrittura Griega. Omm Timotju kienet Lhudija, u għalhekk il-​kitba qaddisa li kienet għallmitu meta kien tfajjel bilfors li kienet it-​Testment il-​Qadim, jew l-​Iskrittura Ebrajka. (Atti 16:1) Ir-​referenza taʼ Pawlu għall-​“Iskrittura kollha” bla dubju inkludiet it-​Testment il-​Qadim kollu kemm hu, li fih ir-​regolamenti dwar is-​sagrifiċċji u l-​ġenealoġiji.

Iktar minn 1,900 sena wara, aħna għadna nibbenefikaw minn dawk il-​porzjonijiet tal-​Bibbja b’diversi modi. L-​ewwel, aħna kieku lanqas biss għandna l-​Bibbja kieku Alla ma ħax ħsieb li tinkiteb u tiġi preservata minn poplu magħżul minnu. (Rumani 3:1, 2) F’Israel tal-​qedem, il-​Liġi Mosajka ma kinitx biss xi ħaġa sagra li kellha tiġi preservata għall-​ġenerazzjonijiet tal-​futur, imma kienet, fil-​fatt, il-​kostituzzjoni taʼ dak il-​ġens. Dettalji fil-​Liġi li llum għandhom mnejn jidhru mhux bżonjużi għalina kienu vitali biex Israel tal-​qedem jibqaʼ ħaj u jirnexxi. Iżjed minn hekk, ir-​rekords ġenealoġiċi fil-​Bibbja kienu neċessarji biex jiġi identifikat il-​Messija, li ġie mbassar li kien se jkun dixxendent dirett tas-​Sultan David.—2 Samwel 7:12, 13; Luqa 1:32; 3:23-​31.

Għalkemm il-​Kristjani mhumiex taħt il-​Liġi Mosajka, għandhom bżonn jeżerċitaw il-​fidi fil-​Messija mbassar, Ġesù Kristu. Il-​ġenealoġiji tal-​qedem preservati fil-​Bibbja jagħtu prova li Ġesù kien tabilħaqq “bin David” imwiegħed. U dettalji dwar is-​sagrifiċċji jkabbru l-​apprezzament tagħna għas-​sagrifiċċju ħafna iktar importanti li għamel Ġesù, u jibnu l-​fidi tagħna fil-​valur tiegħu.—Ebrej 9:11, 12.

Lill-​kongregazzjoni Kristjana tal-​ewwel seklu f’Ruma, Pawlu kitbilha: “Kulma nkiteb minn qabel inkiteb għall-​istruzzjoni tagħna, biex permezz tas-​sabar tagħna u permezz tal-​faraġ mill-​Iskrittura jkollna t-​tama.” (Rumani 15:4) Dan il-​vers ifakkarna li l-​Bibbja nkitbet għall-​benefiċċju tagħna imma mhux għall-​benefiċċju tagħna biss. Għal iktar minn 3,500 sena, il-​kliem imnebbaħ tagħha dderieġa, istruwixxa, u kkoreġa lill-​poplu t’Alla—fix-​xagħri tas-​Sinaj, fl-​Art Imwiegħda, fl-​eżilju Babiloniż, fl-​Imperu Ruman, u issa madwar id-​dinja. Ebda ktieb ieħor ma jistaʼ bi dritt jagħmel stqarrija bħal din. Bħall-​għeruq taʼ siġra tat-​tuffieħ, il-​valur taʼ ċerti partijiet tal-​Bibbja forsi jkun diffiċli biex tarah għall-​ewwel. Jistaʼ jkun hemm bżonn taʼ ftit tħaffir biex jinkixef dan il-​valur, imma l-​isforz se jiġi premjat bil-​kbir!

QATT ĦSIBT DWAR DAN?

● Timotju kemm kien ilu jaf “il-​kitba qaddisa”?​—2 Timotju 3:15.

● Liema partijiet tal-​Bibbja huma mnebbħin u jiswew?​—2 Timotju 3:16.

● Kif nistgħu nibbenefikaw minn “kulma nkiteb minn qabel”?​—Rumani 15:4.

[Stampi f’paġna 11]

Id-​dettalji fil-​Bibbja jkabbru l-​apprezzament tagħna għas-​sagrifiċċju li għamel Ġesù