“Ejjew Għandi, . . . U Jiena Nserraħkom”

Laqgħat li Jħajru għall-​Imħabba u għall-​Għemil Tajjeb

MINN Toronto sa Tokyo, minn Moska sa Montevideo—diversi drabi kull ġimgħa, miljuni taʼ Xhieda taʼ Jehovah u l-​ħbieb tagħhom imorru bi ħġarhom lejn il-​postijiet tagħhom taʼ qima. Dawn l-​individwi jinkludu rġiel taʼ familja li jaħdmu iebes u li jkunu għajjenin wara ġurnata twila taʼ xogħol; nisa u ommijiet biżlin flimkien maʼ wliedhom żgħar; żgħażagħ kollhom enerġija li jkunu qattgħu ġurnata l-​iskola; xi wħud imdaħħlin fiż-​żmien li forsi ma tantx jifilħu jimxu minħabba l-​uġigħ li jkollhom; romol u orfni kuraġġużi; u wħud dipressi li għandhom bżonn il-​faraġ.

Dawn ix-​Xhieda taʼ Jehovah jużaw ħafna mezzi tat-​trasport—minn ferroviji tal-​passiġġieri li jiġru ħafna sa ħmir, minn ferroviji taʼ taħt l-​art ippakkjati sa trakkijiet. Xi wħud iridu jgħaddu minn ġo xmajjar mimlijin bil-​kukkudrilli, filwaqt li oħrajn iridu jħabbtu wiċċhom mal-​ġenn tat-​traffiku tal-​bliet kbar. Għala jagħmlu daqshekk sforzi dawn in-​nies?

L-​ewwelnett, għax li jattendu u jipparteċipaw fil-​laqgħat Kristjani huwa mod importanti kif iqimu lil Alla Jehovah. (Lhud 13:15) L-​appostlu Pawlu rrefera għal raġuni oħra meta kiteb: “Naraw kif nistgħu nħajjru lil xulxin għall-​imħabba u għall-​għemil tajjeb. Ma ninqatgħux mil-​laqgħat tagħna flimkien, . . . agħmlu l-​qalb lil xulxin; u dan wisq aktar għandkom tagħmluh, aktar ma taraw li qiegħed joqrob il-​Jum.” (Lhud 10:​24, 25, korsiv tagħna.) Hawnhekk, Pawlu kien qed iħoss l-​istess sentimenti tas-​salmista David, li għanna: “Fraħt meta qaluli: ‘Sejrin f’dar il-​Mulej!’”​—Salm 122:1.

Għala jifirħu l-​Kristjani meta jkunu preżenti fil-​laqgħat tagħhom? Għax dawk li jattendu ma jkunux qed josservaw biss. Minflok, il-​laqgħat jagħtuhom l-​opportunitajiet li jsiru jafu lil xulxin. B’mod speċjali, dawn il-​laqgħat jipprovdu okkażjonijiet biex ilkoll jagħtu, u mhux jirċievu biss, biex iħajru lil xulxin ħalli juru mħabba u jwettqu għemejjel tajbin. Dan jgħin biex il-​laqgħat ikunu okkażjonijiet li jibnu. Iktar minn hekk, il-​laqgħat Kristjani huma mod wieħed fejn Ġesù jwettaq il-​wegħda tiegħu: “Ejjew għandi, . . . u jiena nserraħkom.”—Mattew 11:28.

Menqa taʼ Faraġ u Għajnuna

Ix-​Xhieda taʼ Jehovah għandhom raġunijiet validi biex iqisu l-​laqgħat tagħhom bħala taʼ serħan. L-​ewwelnett, fil-​laqgħat jiġi servut l-​ikel spiritwali fil-​ħin u fil-​waqt mill-​ilsir leali u diskret. (Mattew 24:45) Il-​laqgħat għandhom ukoll parti importanti biex lill-​qaddejja taʼ Jehovah jagħmluhom għalliema tal-​Kelma t’Alla tas-​sengħa u żelużi. Iżjed minn hekk, fis-​Sala tas-​Saltna, wieħed jistaʼ jsib grupp taʼ ħbieb li jafu jħobbu, li jimpurtahom, u li jagħtu kas, li dejjem lesti u disposti li jgħinu u jfarrġu lil oħrajn fi żmien taʼ niket.—2 Korintin 7:​5-7.

Din kienet l-​esperjenza taʼ Phillis, armla li tilfet lil żewġha meta t-​tfal tagħha kellhom waħda ħames snin u l-​oħra tmien snin. Hi tiddeskrivi l-​effett taʼ serħan li l-​laqgħat Kristjani kellhom fuqha u fuq uliedha żgħar b’dan il-​mod: “Kont inħoss faraġ kbir meta mmur is-​Sala tas-​Saltna għax l-​aħwa dejjem urew li jħobbuni u li jimpurtahom minni. Dan għamluh b’sempliċi tgħanniqa, ħsieb Skritturali, jew għafsa taʼ l-​id. Kien il-​post li dejjem xtaqt inkun fih.”—1 Tessalonikin 5:14.

Wara li Marie għamlet operazzjoni kbira, it-​tabib tagħha qalilha li kienet se ddum mill-​inqas sitt ġimgħat biex tfiq. Matul l-​ewwel ġimgħat tagħha meta kienet qed tirkupra, Marie ma setgħetx tattendi għal-​laqgħat. It-​tabib tagħha induna li ma kinitx ferriħija daqs qabel. Meta rrealizza li ma kinitx qed tattendi għal-​laqgħat, hu inkuraġġieha biex tmur. Marie wiġbitu li żewġha, li ma kienx taʼ l-​istess reliġjon, ma kienx se jħalliha tmur għal-​laqgħat għax kien jibżaʼ li jiġrilha xi ħaġa. Għalhekk, it-​tabib kiteb riċetta uffiċjali li fiha kien qed “jordna” lil Marie biex tmur is-​Sala tas-​Saltna għall-​inkuraġġiment u s-​sħubija li tibni. Marie tikkonkludi: “Wara li attendejt l-​ewwel laqgħa, ħassejtni tant aħjar. Bdejt niekol, irqadt il-​lejl kollu, ma kellix għalfejn nieħu pilloli għall-​uġigħ taʼ spiss, u kont qed nerġaʼ nitbissem!”—Proverbji 16:24.

L-​atmosfera kollha mħabba li jkun hemm fil-​laqgħat Kristjani jinnotawha wkoll dawk taʼ barra. Studenta universitarja għażlet li tosserva lix-​Xhieda taʼ Jehovah sabiex tikteb artiklu għall-​kors tagħha taʼ l-​etnoloġija (studju dwar id-​differenzi bejn ir-​razez). Rigward l-​atmosfera fil-​laqgħat, fl-​artiklu tagħha kitbet: “Il-​merħba mill-​qalb li tawni . . . [kienet] tassew impressjonanti. . . . Il-​ġentilezza tax-​Xhieda taʼ Jehovah kienet kwalità li tassew tispikka u din inħoss hi l-​iktar parti sinifikanti f’dan l-​ambjent.”—1 Korintin 14:25.

F’din id-​dinja mimlija inkwiet, il-​kongregazzjoni Kristjana hija menqa spiritwali. Hija post taʼ paċi u mħabba. Meta tkun preżenti fil-​laqgħat, int tistaʼ tesperjenza personalment il-​verità tal-​kliem tas-​salmista: “Kemm hi ħaġa sabiħa u ħelwa, li l-​aħwa jgħammru flimkien [“ħaġa waħda,” KŻ]!”—Salm 133:1.

[Kaxxa/Stampa f’paġna 25]

JISSODISFAW BŻONN SPEĊJALI

Kif jistgħu dawk li huma neqsin mis-​smigħ jibbenefikaw mil-​laqgħat Kristjani? Madwar id-​dinja, ix-​Xhieda taʼ Jehovah qed jifformaw kongregazzjonijiet tal-​lingwa bis-​sinjali. Matul dawn l-​aħħar 13-il sena, fl-​Istati Uniti ġew ifformati 27 kongregazzjoni tal-​lingwa bis-​sinjali kif ukoll 43 grupp tal-​lingwa bis-​sinjali. F’minn taʼ l-​inqas 40 pajjiż ieħor, issa hemm madwar 140 kongregazzjoni tal-​lingwa bis-​sinjali. Ġew preparati xi pubblikazzjonijiet Kristjani fuq vidjos bi 13-il lingwa bis-​sinjali.

Il-​kongregazzjoni Kristjana toffri lit-​torox l-​opportunità li jfaħħru lil Jehovah. Odile, li kienet tgħix fi Franza u li qabel kienet Kattolika, tinsab grata ferm li rċiviet edukazzjoni mill-​Bibbja fil-​laqgħat Kristjani. Hi kienet issofri minn mumenti taʼ dipressjoni qawwija u ġieli ħasbet li tikkommetti suwiċidju. “Erġajt ksibt saħħti u l-​ferħ li ngħix,” tgħid hi. “Imma fuq kollox, sibt il-​verità. Issa għandi skop f’ħajti.”