Wieġeb għall-Wegħdi t’Alla Billi Teżerċita l-Fidi

“Hu [Alla Jehovah] tana b’xejn il-​wegħdi prezzjużi u grandjużi ferm.”—2 PIETRU 1:4.

1. X’igħinna biex neżerċitaw fidi vera?

JEHOVAH iridna neżerċitaw fidi fil-​wegħdi tiegħu. Madankollu, “il-​fidi mhix pussess tan-​nies kollha.” (2 Tessalonkin 3:2) Din il-​kwalità hija frotta tal-​ispirtu qaddis, jew forza attiva, t’Alla. (Galatin 5:​22, 23) Għaldaqstant, dawk biss li huma mmexxijin mill-​ispirtu taʼ Jehovah jistgħu jeżerċitaw fidi.

2. L-​appostlu Pawlu kif jiddefinixxi l-​“fidi”?

² Imma x’inhi l-​fidi? L-​appostlu Pawlu jsejħilha “t-​turija evidenti taʼ realtajiet għalkemm ma jintlemħux.” L-​evidenza taʼ dawn ir-​realtajiet li ma jidhrux tant hi qawwija li l-​fidi hi mkejla magħha. Il-​fidi jintqal li hi wkoll “l-​istennija assigurata taʼ affarijiet ittamati” għaliex dawk li jippossjedu din il-​kwalità għandhom garanzija li dak kollu li wiegħed Alla Jehovah tant hu ċert illi hu bħal li kieku mwettaq.—Ebrej 11:1.

Il-​Fidi u l-​Wegħdi taʼ Jehovah

3. Kristjani midlukin x’se jġarrbu jekk jeżerċitaw fidi?

³ Biex nogħġbu lil Jehovah, irridu neżerċitaw fidi fil-​wegħdi tiegħu. L-​appostlu Pietru wera dan fit-​tieni ittra mnebbħa tiegħu, miktuba madwar is-​sena 64 E.K. Hu indika li jekk il-​Kristjani midlukin sħabu jeżerċitaw fidi, kienu se jaraw it-​twettieq tal-​“wegħdi prezzjużi u grandjużi ferm” t’Alla. Bħala riżultat, kienu se ‘jsiru mxerkin fin-​natura divina’ bħala werrieta sħab maʼ Ġesù Kristu fis-​Saltna tas-​sema. Bil-​fidi u bil-​għajnuna t’Alla Jehovah, kienu ħelsu milli jkunu fil-​jasar għad-​drawwiet u l-​prattiċi korrotti taʼ din id-​dinja. (2 Pietru 1:2-4) U aħseb ftit! Dawk li jeżerċitaw fidi vera jgawdu l-​istess libertà imprezzabbli llum.

4. Liema kwalitajiet għandna nipprovdu lill-​fidi tagħna?

⁴ Fidi fil-​wegħdi taʼ Jehovah u gratitudni għal-​libertà li tana Alla għandhom iqanqluna biex nagħmlu ħilitna kollha biex insiru Kristjani eżemplari. Pietru qal: “Billi tikkontribwixxu bi tweġiba l-​isforz ħerqan kollu tagħkom, ipprovdu lill-​fidi tagħkom virtù, lill-​virtù tagħkom għarfien, lill-​għarfien tagħkom kontroll fuqkom infuskom, lill-​kontroll tagħkom fuqkom infuskom sabar, lis-​sabar tagħkom devozzjoni lejn Alla, lid-​devozzjoni tagħkom lejn Alla affezzjoni tal-​aħwa, lill-​affezzjoni tagħkom tal-​aħwa mħabba.” (2 Pietru 1:​5-7) Pietru b’hekk jagħtina lista li nagħmlu tajjeb li niftakruha bl-​amment. Ejjew nagħtu daqqa t’għajn mill-​qrib lejn dawn il-​kwalitajiet.

Elementi Vitali tal-​Fidi

5, 6. X’inhi l-​virtù, u kif nistgħu nipprovduha lill-​fidi tagħna?

⁵ Pietru qal li l-​virtù, il-​għarfien, il-​kontroll fuqna nfusna, is-​sabar, id-​devozzjoni lejn Alla, l-​affezzjoni tal-​aħwa, u l-​imħabba jridu jiġu pprovduti lil xulxin u lill-​fidi tagħna. Irridu naħdmu iebes biex nagħmlu dawn il-​kwalitajiet elementi vitali tal-​fidi tagħna. Per eżempju, il-​virtù m’hijiex kwalità li nistgħu nuru mingħajr ma jkollna fidi. Il-​lessikografu W. E. Vine jindika li fit-​2 Pietru 1:​5, “il-​virtù hija imponuta bħala kwalità essenzjali fl-​eżerċizzju tal-​fidi.” Kull waħda mill-​kwalitajiet l-​oħrajn li semma Pietru għandha tkun ukoll element tal-​fidi tagħna.

⁶ L-​ewwel, irridu nipprovdu virtù lill-​fidi tagħna. Li tkun virtuż ifisser li tagħmel dak li hu tajjeb fil-​ħarsa t’Alla. Għall-​kelma Griega hawn tradotta “virtù,” xi verżjonijiet jużaw “tjubija.” (New International Version; The Jerusalem Bible; Today’s English Version) Il-​virtù tqanqalna biex nevitaw li nagħmlu l-​ħażin jew id-​deni lil bnedmin sħabna. (Salm 97:10) Tinkuraġġixxi wkoll azzjoni kuraġġuża f’li nagħmlu t-​tajjeb għall-​benefiċċju spiritwali, fiżiku, u emozzjonali taʼ oħrajn.

7. Għala għandna nipprovdu l-​għarfien mal-​fidi tagħna u l-​virtù?

⁷ Pietru għala jħeġġiġna biex nipprovdu għarfien mal-​fidi tagħna u l-​virtù? Sewwa, hekk kif niffaċċjaw sfidi ġodda għall-​fidi tagħna, għandna bżonn għarfien jekk irridu niddistingwu t-​tajjeb mill-​ħażin. (Ebrej 5:14) Permezz taʼ studju tal-​Bibbja u esperjenza fl-​applikar tal-​Kelma t’Alla u fl-​eżerċitar taʼ għerf prattiku fil-​ħajja taʼ kuljum, aħna nkabbru l-​għarfien tagħna. Imbagħad, dan igħinna biex inżommu l-​fidi tagħna u nkomplu nagħmlu dak li hu virtuż meta nkunu taħt prova.—Proverbji 2:​6-8; Ġakbu 1:​5-8.

8. X’inhu l-​kontroll fuqna nfusna, u kif inhu marbut mas-​sabar?

⁸ Biex igħinna niffaċċjaw il-​provi bil-​fidi, irridu nipprovdu mal-​għarfien tagħna l-​kontroll fuqna nfusna. Il-​kelma Griega għal “kontroll fuqkom infuskom” tindika l-​abbiltà li jkollna qabda tajba fuqna nfusna. Din il-​frotta tal-​ispirtu t’Alla tgħinna nuru rażna fil-​ħsieb, fil-​kliem, u fil-​kondotta. Billi nippersistu f’li neżerċitaw kontroll fuqna nfusna, nipprovdu miegħu s-​sabar. It-​terminu Grieg għal “sabar” jissinjifika sodizza kuraġġuża, mhux li tirrassenja ruħek bi swied il-​qalb għal tbatija li ma tistax taħrab minnha. Kien għall-​ferħ li tqiegħed quddiemu li Ġesù ssaporta z-​zokk tat-​tortura. (Ebrej 12:2) Saħħa li tingħata mingħand Alla msieħba mas-​sabar twieżen il-​fidi tagħna u tgħinna nifirħu fit-​tribulazzjoni, nirreżistu t-​tentazzjoni, u nevitaw li nagħmlu kompromess meta niġu ppersegwitati.​—Filippin 4:13.

9. (a) X’inhi d-​devozzjoni lejn Alla? (b) Għala għandna nipprovdu l-​affezzjoni tal-​aħwa mad-​devozzjoni tagħna lejn Alla? (ċ) Kif nistgħu nipprovdu l-​imħabba mal-​affezzjoni tagħna tal-​aħwa?

⁹ Mas-​sabar tagħna rridu nipprovdu d-​devozzjoni lejn Alla—reverenza, qima, u servizz lil Jehovah. Il-​fidi tagħna tikber hekk kif nipprattikaw id-​devozzjoni lejn Alla u naraw kif Jehovah jittratta mal-​poplu tiegħu. Madankollu, biex nuru mħabba lejn Alla, għandna bżonn affezzjoni tal-​aħwa. Wara kollox, “dak li ma jħobbx lil ħuh, li ra, ma jistax ikun qiegħed iħobb lil Alla, li ma rax.” (1 Ġwann 4:20) Qlubna għandhom iqanqluna biex nuru affezzjoni vera lejn qaddejja oħrajn taʼ Jehovah u biex nieħdu interess fihom kontinwament. (Ġakbu 2:​14-17) Imma għala jintqalilna biex nipprovdu mħabba mal-​affezzjoni tagħna tal-​aħwa? Jidher ċar li Pietru ried ifisser li għandna nuru mħabba għall-​bnedmin kollha, mhux biss għal ħutna. Din l-​imħabba tintwera b’mod speċjali billi nippridkaw l-​aħbar tajba u ngħinu lin-​nies spiritwalment.—Mattew 24:14; 28:​19, 20.

Effetti Kuntrastanti

10. (a) Kif se naġixxu jekk il-​virtù, il-​għarfien, il-​kontroll fuqna nfusna, is-​sabar, id-​devozzjoni lejn Alla, l-​affezzjoni tal-​aħwa, u l-​imħabba jiġu pprovduti mal-​fidi tagħna? (b) X’jiġri jekk wieħed li jgħid li hu Kristjan ikun nieqes minn dawn il-​kwalitajiet?

¹⁰ Jekk nipprovdu l-​virtù, il-​għarfien, il-​kontroll fuqna nfusna, is-​sabar, id-​devozzjoni lejn Alla, l-​affezzjoni tal-​aħwa, u l-​imħabba lill-​fidi tagħna, aħna se naħsbu, se nitkellmu, u se naġixxu b’modi approvati minn Alla. Mill-​banda l-​oħra, jekk wieħed li jistqarr li hu Kristjan jonqos li juri dawn il-​kwalitajiet, hu jsir għama spiritwalment. Hu ‘jagħlaq għajnejh għad-​dawl’ mingħand Alla u jinsa li hu ġie mnaddaf minn dnubiet tal-​passat. (2 Pietru 1:​8-10; 2:​20-22) Ejjew qatt ma nonqsu b’dak il-​mod u b’hekk nitilfu l-​fidi fil-​wegħdi t’Alla.

11. X’nistgħu nistennew b’mod xieraq minn uħud leali midlukin?

¹¹ Kristjani midlukin leali għandhom fidi fil-​wegħdi taʼ Jehovah u jistinkaw biex jagħmlu s-​sejħa u l-​għażla tagħhom minnu ċerti. Minkejja xi ostakoli fil-​mogħdija tagħhom, nistgħu nistennew minnhom li juru kwalitajiet taʼ tjieba. Għal uħud midlukin leali ‘hemm ipprovdut b’mod għani d-​dħul fis-​saltna taʼ dejjem taʼ Ġesù Kristu’ permezz tal-​irxoxt tagħhom għall-​ħajja fl-​ispirtu fis-​sema.—2 Pietru 1:11.

12. Kif għandna nifhmu l-​kliem tat-​2 Pietru 1:​12-15?

¹² Pietru rrealizza li hu kien dalwaqt se jmut, u kien jistenna li jirċievi rxoxt għall-​ħajja fis-​sema meta jasal il-​waqt. Imma dment li hu kien ħaj f’“dan it-​tabernaklu”—il-​ġisem uman tiegħu—​hu pprova jibni fidi fi kredenti sħabu u jqajjimhom billi jfakkarhom dwar l-​affarijiet meħtieġa għall-​favur divin. Wara t-​tluq tiegħu fil-​mewt, l-​aħwa spiritwali taʼ Pietru setgħu jwieżnu l-​fidi tagħhom billi jerġgħu jiftakru kliemu.—2 Pietru 1:​12-15.

Fidi fil-​Kelma Profetika

13. Alla kif ipprovda xiehda li ssaħħaħ il-​fidi dwar il-​miġja taʼ Kristu?

¹³ Alla nnifsu ta xiehda li ssaħħaħ il-​fidi dwar iċ-​ċertezza tal-​miġja taʼ Ġesù “b’qawwa u glorja kbira.” (Mattew 24:30; 2 Pietru 1:​16-18) Neqsin mill-​evidenza, qassisin pagani rrakkontaw ħrejjef foloz dwar l-​allat tagħhom, fil-​waqt li Pietru, Ġakbu, u Ġwanni kienu xhieda li raw b’għajnejhom stess il-​kobor taʼ Kristu fit-​trasfigurazzjoni. (Mattew 17:​1-5) Huma rawh igglorifikat u semgħu l-​ħoss taʼ leħen Alla stess jirrikonoxxi lil Ġesù bħala Ibnu l-​maħbub. Dak ir-​rikonoxximent u d-​dehra brillanti li Kristu ngħata dak in-​nhar kienu għoti taʼ unur u glorja lilu. Minħabba din ir-​rivelazzjoni divina, Pietru sejjaħ il-​post, wisq probabbli xi fergħa taʼ Ħermon, “il-​muntanja qaddisa.”—Qabbel Eżodu 3:​4, 5.

14. Il-​fidi tagħna kif għandha tiġi effettwata mit-​trasfigurazzjoni taʼ Ġesù?

¹⁴ It-​trasfigurazzjoni taʼ Ġesù kif għandha teffettwa l-​fidi tagħna? Pietru qal: “Għaldaqstant għandna l-​kelma profetika magħmula iktar fiż-​żgur; u intom qegħdin tagħmlu sew li tagħtu kasha bħal li kieku għal musbieħ li qiegħed jiddi f’post mudlam, sakemm iżernaq il-​jum u kewkba taʼ bin-​nhar titlaʼ, fi qlubkom.” (2 Pietru 1:19) “[I]l-kelma profetika” milli jidher kienet tinkludi mhux biss il-​profeziji tal-​Iskrittura Ebrajka dwar il-​Messija imma wkoll l-​istqarrija taʼ Ġesù li hu kellu jiġi “b’qawwa u glorja kbira.” Il-​kelma kif kienet “magħmula iktar fiż-​żgur” bit-​trasfigurazzjoni? Dik il-​ġrajja vverifikat il-​kelma profetika dwar il-​miġja glorjuża taʼ Kristu b’qawwa tas-​Saltna.

15. X’inhu involut f’li tagħti kas il-​kelma profetika?

¹⁵ Biex insaħħu l-​fidi tagħna, irridu noqogħdu attenti għall-​kelma profetika. Dan jinvolvi li nistudjaw dik il-​kelma, niddiskutuha fil-​laqgħat Kristjani, u napplikaw il-​parir tagħha. (Ġakbu 1:​22-27) Irridu nħalluha tkun “musbieħ li qiegħed jiddi f’post mudlam,” billi ddawwal lil qlubna. (Efesin 1:18) Imbagħad biss se tiggwidana sakemm il-​“kewkba taʼ bin-​nhar,” jew, “[i]l-kewkba tiddi taʼ fil-​għodu,” Ġesù Kristu, jirrivela lilu nnifsu fil-​glorja. (Rivelazzjoni 22:16) Dik ir-​rivelazzjoni se tfisser qerda għal uħud bla fidi u barkiet għal dawk li jeżerċitaw il-​fidi.​—2 Tessalonkin 1:​6-10.

16. Għala jistaʼ jkollna fidi li l-​wegħdi profetiċi kollha fil-​Kelma t’Alla se jitwettqu?

¹⁶ Il-​profeti t’Alla ma kinux sempliċement irġiel li jilħqilhom li għamlu tbassiriet għaqlin, għax Pietru qal: “Ebda profezija tal-​Iskrittura ma toħroġ minn xi interpretazzjoni privata. Għax il-​profezija f’ebda żmien ma nġiebet bir-​rieda tal-​bniedem, imma bnedmin tkellmu minn Alla waqt li kienu mqanqlin mill-​ispirtu qaddis.” (2 Pietru 1:​20, 21) Per eżempju, David qal: “L-​ispirtu taʼ Jehovah kien li tkellem permezz tiegħi.” (2 Samwel 23:​1, 2) U Pawlu kiteb: “L-​Iskrittura kollha hija mnebbħa minn Alla.” (2 Timotew 3:16) Ladarba l-​profeti t’Alla kienu mnebbħin permezz tal-​ispirtu tiegħu, aħna nistgħu jkollna fidi li l-​wegħdi kollha fil-​Kelma tiegħu se jitwettqu.

Kellhom Fidi fil-​Wegħdi t’Alla

17. Liema wegħda kienet il-​bażi tal-​fidi taʼ Abel?

¹⁷ Il-​wegħdi taʼ Jehovah kienu bażi għall-​fidi tas-​“sħaba kbira” taʼ xhieda tiegħu taʼ qabel Kristu. (Ebrej 11:​1–12:1) Per eżempju, Abel kellu fidi fil-​wegħda t’Alla dwar “żerriegħa” li kellha tbenġel “lis-​serpent” fir-​ras. Kien hemm prova taʼ twettieq tas-​sentenza t’Alla fuq il-​ġenituri taʼ Abel. ’Il barra minn Għeden, Adam u l-​familja tiegħu kielu ħobż fil-​għaraq taʼ wiċċhom għaliex l-​art misħuta kienet tipproduċi xewk u għollieq. Wisq probabbli Abel innota li Eva kienet tixxennaq għal żewġha u ra li Adam kien jiddominaha. Ċertament li hi tkellmet dwar l-​uġigħ tat-​tqala tagħha. U d-​daħla tal-​ġnien taʼ Għeden kienet imħarsa minn kerubini u x-​xafra taqbad taʼ sejf. (Ġenesi 3:​14-19, 24) Dan kollu fforma “turija evidenti” li kienet tiżżgura lil Abel li l-​ħelsien kien se jiġi permezz taż-​Żerriegħa mwiegħed. Billi aġixxa bil-​fidi, Abel offra lil Alla sagrifiċċju li wera li kien jiswa iktar minn dak taʼ Kajjin.—Ebrej 11:​1, 4.

18, 19. Abraham u Sara b’liema modi eżerċitaw fidi?

¹⁸ Il-​patrijarki Abraham, Iżakk, u Ġakobb ukoll kellhom fidi fil-​wegħdi taʼ Jehovah. Abraham eżerċita fidi fil-​wegħda t’Alla li l-​familji kollha tal-​art se jbierku lilhom infushom permezz tiegħu u li ż-​żerriegħa tiegħu kien se jingħata art. (Ġenesi 12:​1-9; 15:​18-21) Ibnu Iżakk u neputih Ġakobb kienu “werrieta miegħu tal-​istess wegħda.” Bil-​fidi Abraham “għammar bħala barrani fl-​art tal-​wegħda” u stenna “l-​belt li għandha sisien veri,” is-​Saltna t’Alla tas-​sema li taħtha hu se jiġi rxoxtat għall-​ħajja fuq l-​art. (Ebrej 11:​8-10) Għandek int fidi simili?

¹⁹ Sara, mart Abraham, kellha madwar 90 sena u kienet ilha sew li qabżet l-​età li setgħet ikollha t-​tfal meta hi eżerċitat fidi fil-​wegħda t’Alla u ngħatat qawwa “biex tikkonċepixxi żerriegħa” u twelled lil Iżakk. B’hekk, minn Abraham li kellu 100 sena, “kważi mejjet” rigward ir-​riproduzzjoni, eventwalment “kienu mweldin tfal sewwa sew bħall-​kwiekeb fis-​sema fil-​kotra.”—Ebrej 11:​11, 12; Ġenesi 17:​15-17; 18:11; 21:​1-7.

20. Għalkemm il-​patrijarki ma rawx it-​twettieq sħiħ tal-​wegħdi t’Alla lilhom, huma x’għamlu?

²⁰ Il-​patrijarki leali mietu mingħajr ma raw il-​twettieq sħiħ tal-​wegħdi t’Alla għalihom. Madankollu, “huma raw [l-affarijiet imwegħdin] fil-​bogħod u tawhom merħba u ddikjaraw pubblikament li huma kienu stranġieri u residenti temporanji fl-​art.” Għaddew ġenerazzjonijiet sħaħ qabel ma l-​Art Imwiegħda saret il-​pussess taʼ nisel Abraham. Matul ħajjithom kollha, madankollu, il-​patrijarki li kellhom il-​biżaʼ t’Alla eżerċitaw fidi fil-​wegħdi taʼ Jehovah. Peress li huma qatt ma tilfu l-​fidi, dalwaqt se jiġu rxoxtati għall-​ħajja fil-​qasam tal-​art tal-​“belt” li Alla lesta għalihom, is-​Saltna Messjanika. (Ebrej 11:​13-16) B’mod simili, il-​fidi tistaʼ żżommna leali lejn Jehovah saħansitra jekk ma narawx it-​twettieq immedjat tal-​wegħdi tal-​għaġeb kollha tiegħu. Il-​fidi tagħna se tqanqalna wkoll biex nobdu lil Alla, saħansitra bħalma għamel Abraham. U bħalma għadda wirt spiritwali lil nislu, hekk ukoll aħna nistgħu ngħinu lil uliedna biex jeżerċitaw fidi fil-​wegħdi prezzjużi taʼ Jehovah.—Ebrej 11:​17-21.

Il-​Fidi Vitali għall-​Kristjani

21. Biex inkunu aċċettabbli għal Alla llum, x’irridu ninkludu fl-​eżerċitar tagħna tal-​fidi?

²¹ Hemm, m’għandniex xi ngħidu, iżjed fil-​fidi milli li jkollok fiduċja fit-​twettieq tal-​wegħdi taʼ Jehovah. Matul l-​istorja umana kollha, kien neċessarju li neżerċitaw fidi f’Alla b’diversi modi jekk irridu ngawdu l-​approvazzjoni tiegħu. Pawlu indika li “mingħajr fidi hu impossibbli li togħġob [lil Alla Jehovah] sewwa, għax dak li jersaq lejn Alla jrid jemmen li hu u li jsir dak li jħallas lil dawk li qegħdin ifittxuh bil-​ħeġġa.” (Ebrej 11:​6) Biex ikun aċċettabbli għal Jehovah illum, wieħed irid jeżerċita fidi f’Ġesù Kristu u fis-​sagrifiċċju taʼ rahan li Alla pprovda permezz tiegħu. (Rumani 5:8; Galatin 2:​15, 16) Kien bħalma qal Ġesù nnifsu: “Alla tant ħabb lid-​dinja [tal-bnedmin] li ta l-​Iben uniġenitu tiegħu, sabiex kulmin qiegħed jeżerċita fidi fih jistaʼ ma jinqeridx imma jkollu l-​ħajja taʼ dejjem. Dak li jeżerċita fidi fl-​Iben għandu l-​ħajja taʼ dejjem; dak li ma jobdix lill-​Iben mhux se jaraha l-​ħajja, imma l-​korla t’Alla tibqaʼ fuqu.”—Ġwann 3:​16, 36.

22. Is-​Saltna Messjanika se ġġib it-​twettieq taʼ liema wegħda?

²² Ġesù għandu rwol vitali fit-​twettieq tal-​wegħdi t’Alla dwar is-​Saltna li għaliha jitolbu l-​Kristjani. (Isaija 9:​6, 7; Danjel 7:​13, 14; Mattew 6:​9, 10) Kif wera Pietru, it-​trasfigurazzjoni vverifikat il-​kelma profetika dwar il-​miġja taʼ Ġesù f’qawwa u glorja tas-​Saltna. Is-​Saltna Messjanika se ġġib it-​twettieq taʼ wegħda oħra t’Alla, għax Pietru kiteb: “Hemm smewwiet ġodda u art ġdida li aħna qegħdin nistennew skond il-​wegħda tiegħu, u f’dawn it-​tjieba għandha tgħammar.” (2 Pietru 3:13) Profezija simili twettqet meta l-​eżiljati Lhud fil-​Babilonja ġew irrestawrati f’arthom fis-​sena 537 Q.E.K. taħt gvern b’Żerubbabel bħala gvernatur u Ġożwè bħala qassis il-​kbir. (Isaija 65:17) Imma Pietru pponta lejn żmien fil-​futur meta “smewwiet ġodda”​—is-​Saltna Messjanika tas-​sema—​se jaħkmu fuq “art ġdida,” soċjetà umana taʼ tjieba li tkun tgħix fuq dan il-​globu.—Qabbel Salm 96:1.

23. Liema mistoqsijiet dwar il-​virtù se niddiskutu darb’oħra?

²³ Bħala qaddejja leali taʼ Jehovah u segwaċi taʼ Ibnu l-​maħbub, Ġesù Kristu, aħna nixxennqu għad-​dinja ġdida mwiegħda t’Alla. Aħna nafu li hija qrib, u għandna fidi li l-​wegħdi prezzjużi kollha taʼ Jehovah se jitwettqu. Biex nimxu b’mod aċċettabbli quddiem Alla tagħna, irridu nsaħħu l-​fidi tagħna billi nipprovdulha l-​virtù, il-​għarfien, il-​kontroll fuqna nfusna, is-​sabar, id-​devozzjoni lejn Alla, l-​affezzjoni tal-​aħwa, u l-​imħabba.a F’dan il-​punt, nistgħu nistaqsu, Kif nistgħu nuru l-​virtù? U li nkunu virtużi kif jistaʼ jibbenefika lilna u lil oħrajn, b’mod speċjali lil sħabna Kristjani, li wieġbu għall-​wegħdi t’Alla billi eżerċitaw il-​fidi?

[Nota taʼ taħt]

X’Inhuma t-​Tweġibiet Tiegħek?

◻ Il-​“fidi” kif tistaʼ tiġi definita?

◻ Skond it-​2 Pietru 1:​5-7, liema kwalitajiet għandhom jiġu pprovduti mal-​fidi tagħna?

◻ It-​trasfigurazzjoni taʼ Ġesù liema effett għandha jkollha fuq il-​fidi tagħna?

◻ Liema eżempji taʼ fidi kienu pprovduti minn Abel, Abraham, Sara, u oħrajn taʼ żminijiet bikrin?