Għandek Int Titgħammed?

KWAŻI miljun ruħ ġew imgħammdin mix-​Xhieda taʼ Jehovah f’dawn l-​aħħar tliet snin. Dan iwassal għal bejn wieħed u ieħor 824 kull ġurnata, jew 4 persuni mgħammdin kull 7 minuti. Hija din sempliċi kopja tal-​fervur reliġjuż tas-​sekli 15 u 16?

Le, dawn l-​individwi ma ġewx imgħammdin bil-​forza, bħala parti minn konverżjoni tal-​massa, jew bħala riżultat taʼ xi appell emozzjonali minn xi oratur reliġjuż. Ġew imgħammdin għaliex Ġesù Kristu, is-​Sid u l-​Mexxej tal-​Kristjani, ikkmanda li jsir hekk. Huma segwew il-​passi u l-​proċeduri li Ġesù semma u li ġew ipprattikati mill-​appostli li hu nnifsu kien għażel u ħarreġ.

Wara l-​irxoxt taʼ Ġesù u qabel it-​tlugħ tiegħu lejn is-​sema, hu ta lis-​segwaċi tiegħu dan l-​inkarigu bħala tislima tal-​aħħar: “Morru għalhekk u agħmlu dixxipli min-​nies tal-​ġnus kollha, billi tgħammduhom fl-​isem tal-​Missier u tal-​Iben u tal-​ispirtu qaddis, billi tgħallmuhom josservaw l-​affarijiet kollha li kkmandajtkom. U, ħares! jiena magħkom il-​jiem kollha sal-​konklużjoni tas-​sistema taʼ affarijiet.” (Mattew 28:19, 20) Minn dak in-​nhar ’il hawn, din kienet l-​unika magħmudija tal-​ilma li kellha l-​approvazzjoni t’Alla.

Fi qbil maʼ dan, il-​Bibbja tgħidilna li s-​segwaċi tal-​bidu taʼ Kristu saru “xhieda [taʼ Ġesù] kemm f’Ġerusalemm u kemm fil-​Ġudea kollha u fis-​Samarija u sal-​iktar parti ’l bogħod tal-​art.” (Atti 1:8) Kif kien bassar Ġesù, ix-​xogħol tal-​ippridkar u tat-​tagħlim tagħhom kellu jirriżulta fil-​magħmudija taʼ wħud kredenti li kellhom ukoll ikunu segwaċi taʼ Kristu.

L-ewwel eżempju mniżżel bil-​miktub taʼ dan seħħ f’Ġerusalemm nhar Pentekoste tas-​sena 33 E.K. F’dak iż-​żmien l-​appostlu Pietru “qam bil-​wieqfa mal-​ħdax” u kellem lill-​kotra miġbura dwar Ġesù l-​Messija. Ir-​rakkont igħidilna li d-​diskors tiegħu ‘laqathom f’qalbhom,’ u staqsew x’kellhom jagħmlu. “Indmu, u ħalli kull wieħed minnkom jitgħammed fl-​isem taʼ Ġesù Kristu għall-​maħfra taʼ dnubietkom,” qal Pietru. Ir-​riżultat kien li “dawk li ħaddnu l-​kelma tiegħu bil-​qalb tgħammdu, u f’dak il-​jum żdiedu madwar tlett elef ruħ.” (Atti 2:14-41) Rakkonti oħra jikkonfermaw li l-​magħmudija tad-​dixxipli kienet preċeduta milli huma jisimgħu l-​messaġġ Kristjan, jemmnu l-​aħbar tajba, u jindmu.—Atti 8:12, 13, 34-38; 10:34-48; 16:30-34; 18:5, 8; 19:1-5.

B’Liema Manjiera?

Imma dawn id-​dixxipli l-​ġodda kif kienu se jiġu mgħammdin fl-​ilma? Kienu se jiġu mbexxin bl-​ilma, jintefgħalhom l-​ilma fuq rashom, jew jiġu mgħaddsin kompletament? Ir-​rakkont tal-​Bibbja x’juri? Ladarba Ġesù ħallielna mudell ‘biex insegwu l-​passi tiegħu mill-​qrib,’ hu b’liema manjiera ġie mgħammed?—1 Pietru 2:21.

Il-Bibbja turi li Ġesù ġie mgħammed fil-​Ġordan, xmara mdaqqsa. Wara li ġie mgħammed, hu “telaʼ ’l barra mill-​ilma.” (Mark 1:10; Mattew 3:​13, 16) Mela Ġesù attwalment kien ġie mgħaddas fix-​Xmara Ġordan. Hu ġie mgħammed minn Ġwanni, li, billi fittex post xieraq biex iwettaq il-​magħmudijiet, għażel lok fil-​Wied tal-​Ġordan ħdejn Salim “għaliex kien hemm kwantità kbira taʼ ilma hemmhekk.” (Ġwann 3:23) Il-​fatt li t-​tgħaddis għalkollox taħt l-​ilma kien il-​livell kif kienet tiġi pprattikata l-​magħmudija fost is-​segwaċi taʼ Ġesù jiġi muri mill-​kliem tal-​ewnuku Etjopjan. Billi wieġeb għat-​tagħlim taʼ Filippu, hu esklama: “Ħares! Medda taʼ ilma; x’iżommni milli nitgħammed?” Imbagħad ninnotaw li “t-​tnejn niżlu ġewwa l-​ilma” u wara dan “telgħu ’l barra mill-​ilma.”—Atti 8:36-39.

Tipponta l-​istorja sekulari wkoll lejn l-​ipprattikar tal-​magħmudija permezz tat-​tgħaddis fost il-​Kristjani? Tabilħaqq li hekk tagħmel. U huwa interessanti li tinnota li ħafna vaski tal-​magħmudijiet adattati għat-​tgħaddis għadhom jeżistu f’għadd taʼ artijiet. “L-​evidenza arkeoloġika tagħti xiehda abbundanti li t-​tgħaddis kien il-​mod komuni li bih saret il-​magħmudija matul l-​ewwel għaxar sekli jew sas-​seklu erbatax,” igħid il-​ġurnal Ministry. Hu jżid: “Fost ir-​rovini taʼ strutturi Kristjani bikrin, kif ukoll fil-​knejjes l-​antiki li għadhom jintużaw, l-​istorja tal-​magħmudija Kristjana tistaʼ tinstab traċċi tagħha. Tpinġijiet f’katakombijiet u knejjes, xogħlijiet taʼ mużajk fl-​art, fuq il-​ħitan, u s-​soqfa, skulturi, u tpinġijiet f’manuskritti antiki tat-​Testment il-​Ġdid iżidu dettalji maʼ din l-​istorja. Dan hu miżjud mal-​evidenza misjuba fil-​kitbiet tas-​santi padri tal-​knisja li t-​tgħaddis kien il-​mod bikri kif il-​knisja kienet tagħmel il-​magħmudija.”

Tammetti in-​New Catholic Encyclopedia: “Huwa evidenti li l-​Magħmudija fil-​Knisja bikrija kienet bit-​tgħaddis.” Mhux taʼ b’xejn, allura, li nsibu f’gazzetti titli bħal dawn: “Il-​Kattoliċi Jġibu Lura l-​Magħmudija bit-​Tgħaddis” (The Edmonton Journal, tal-​Kanada, tal-​24 taʼ Settembru, 1983), “Il-​Magħmudija bit-​Tgħaddis Tingħoġob mal-​Kattoliċi t’Hawnhekk.” (St. Louis Post-Dispatch, tas-​7 t’April, 1985), “Ħafna Kattoliċi Jagħżlu l-​Magħmudija bit-​Tgħaddis” (The New York Times, tal-​25 taʼ Marzu, 1989), u “Magħmudijiet bit-​Tgħaddis Qed Igawdu Rinaxximent” (The Houston Chronicle, tal-​24 t’Awissu, 1991).

Għal Liema Skop?

Ġesù għala ried li d-​dixxipli tiegħu jiġu mgħammdin? Sewwa, dan kien simbolu xieraq tad-​dedikazzjoni b’qalbhom kollha lejn Alla. L-​“aħbar tajba” kellha tiġi ppridkata mal-​art kollha, u riedu jiġu magħmulin dixxipli min-​“nies tal-​ġnus kollha.” (Mattew 24:14; 28:19) Dan kien ifisser li Alla ma baqax jittratta esklussivament mal-​ġens Lhudi, magħmul min-​nies li kienu ddedikati lilu mit-​twelid. Kornelju u l-​familja tiegħu kienu l-​ewwel Ġentili, jew uħud li ma kinux Lhud, li aċċettaw il-​verità dwar Ġesù Kristu u tgħammdu.

Li ġew imniżżlin taħt l-​ilma wera li dawk li kienu qed jitgħammdu mietu għall-​korsa taʼ ħajja li kienet iċċentrata madwarhom stess. Li jintrefgħu mill-​ilma ssimbolizza li huma kienu issa ħajjin biex jagħmlu r-​rieda t’Alla u kienu qed jagħmluha l-​ewwel ħaġa f’ħajjithom, bħalma għamel Ġesù. (Mattew 16:24) Il-​fatt li ġew imgħammdin “fl-​isem tal-​Missier u tal-​Iben u tal-​ispirtu qaddis” kien jindika li huma tgħallmu u aċċettaw il-​verità dwar kull wieħed minn dawn u għarfu x’inhuma. (Mattew 28:19; qabbel Atti 13:48.) Il-​magħmudija kienet sempliċement l-​ewwel pass taʼ ubbidjenza lejn Alla u sottomissjoni lejn ir-​rieda tiegħu.

L-Iskrittura ma tappoġġjax il-​ħarsa reliġjuża popolari li l-​magħmudija hija sagrament, jiġifieri, ċerimonja reliġjuża li tagħti xi mertu—grazzja, qdusija, jew benefiċċju spiritwali—lil min jitgħammed. Per eżempju, l-​editt papali tal-​Papa Ewġenju IV ikkwotat fl-​artiklu taʼ qabel kompla jgħid dwar il-​magħmudija: “L-​effett taʼ dan is-​sagrament huwa l-​maħfra tad-​dnubiet kollha, oriġinali u attwali; bl-​istess mod tal-​kastig kollu li hu dovut minħabba d-​dnub. Bħala konsegwenza, l-​ebda sodisfazzjon għad-​dnubiet taʼ qabel ma hu mitlub minn dawk li jitgħammdu; u jekk imutu qabel ma jikkommettu xi dnub, jitilgħu immedjatament lejn is-​saltna tas-​sema u l-​viżjoni t’Alla.”

Madankollu, Ġesù ġie mgħammed għalkemm “ma kkommetta ebda dnub.” (1 Pietru 2:22) Barra minn hekk, skond l-​Iskrittura, il-​maħfra tad-​dnubiet tiġi biss permezz tas-​sagrifiċċju bħala rahan taʼ Ġesù Kristu. Ananija ħeġġeġ lil Sawlu taʼ Tarsu: ‘Qum, tgħammed u aħsel dnubietek lil hinn billi ssejjaħ lil isem [Ġesù].’ (Atti 22:12-16) Iva, salvazzjoni hija possibbli biss permezz tad-​demm imxerred taʼ Ġesù u billi wieħed ‘isejjaħ lil ismu’ bil-​fidi.—Ebrej 9:22; 1 Ġwann 1:7.

Xi ngħidu, allura, dwar il-​kelmiet taʼ Pietru fl-​1 Pietru 3:21? Hemmhekk igħid: “Dik li tikkorrispondi maʼ dan qiegħda issa wkoll issalva lilkom, jiġifieri, il-​magħmudija, (mhux it-​tneħħija tal-​ħmieġ tal-​laħam, imma t-​talba magħmula lil Alla għal kuxjenza tajba,) permezz tal-​irxoxt taʼ Ġesù Kristu.” Pietru kien qiegħed iqabbel il-​magħmudija mal-​esperjenza taʼ Noè li għadda mill-​ilmijiet tad-​Dulluvju. (Vers 20) Noè, billi wera fidi sħiħa f’Alla, bena l-​arka għall-​ippriservar tal-​familja tiegħu. (Ebrej 11:7) Bl-​istess mod, billi jeżerċitaw fidi f’Alla Jehovah u fil-​provvediment tiegħu għas-​salvazzjoni permezz taʼ Kristu Ġesù, in-​nies illum jistgħu jiġu salvati minn din id-​dinja mill-​agħar preżenti. Huma jridu wkoll jaġixxu skond dik il-​fidi. Billi jindmu mid-​dnubiet, billi jduru lura minn korsa ħażina, u billi jagħmlu dedikazzjoni bla riserva lil Alla Jehovah fit-​talb, tintgħamel talba lil Alla għal kuxjenza tajba. Imma huwa fuq il-​bażi tas-​sagrifiċċju taʼ Ġesù, u l-​irxoxt li permezz tiegħu ppreżenta l-​valur taʼ dak is-​sagrifiċċju lil Alla fis-​sema, li d-​dnubiet huma maħfurin u s-​salvazzjoni hija possibbli.—1 Pietru 3:22.

Inti x’Se Tagħmel?

Inti xi wieħed jew waħda li ilek tassoċja max-​Xhieda taʼ Jehovah għal xi żmien? Forsi diġà għamilt it-​tibdiliet neċessarji f’ħajtek fi qbil mal-​prinċipji tal-​Bibbja imma għadek ma ħadtx il-​passi tad-​dedikazzjoni u l-​magħmudija. Int forsi tixtieq tagħmel ir-​rieda t’Alla, iżda jistaʼ jkun li tibżaʼ li l-​magħmudija se tobbligak. Għaldaqstant, forsi tippreferi li tevita responsabbiltà bħal din u l-​fatt li tkun trid tagħti rendikont bħal dan għal xi żmien. Kważi 11.5 miljun ruħ attendew iċ-​ċelebrazzjoni tal-​Ikla taʼ fil-​Għaxija tal-​Mulej is-​sena l-​oħra. Madankollu, il-​quċċata fin-​numru taʼ dawk li ħadu sehem fix-​xogħol tal-​ippridkar tal-​aħbar tajba matul is-​sena kien inqas minn 4.5 miljun. Dan ifisser li madwar sebaʼ miljun ruħ qegħdin juru xi ftit apprezzament għall-​verità t’Alla, għalkemm m’humiex Xhieda mgħammdin taʼ Jehovah. M’għandniex xi ngħidu, xi wħud minn dawn huma tfal żgħar u nies li għadhom kif bdew juru interess. Imma xi wħud minn dawk li qegħdin jieħdu sehem fix-​xogħol tal-​ippridkar għadhom ukoll m’humiex imgħammdin. Hemm ħafna nies li ħadu għarfien eżatt tal-​Bibbja imma għadhom ma bbenefikawx għalkollox mill-​provvediment t’Alla għas-​salvazzjoni billi jiġu mgħammdin.

Punt importanti li għandek tiftakar hu li l-​għarfien taʼ dak li Alla jinħtieġ minnek hu li jwasslek li trid tagħti rendikont. “Jekk wieħed jaf kif jagħmel dak li hu sewwa u madankollu ma jagħmlux, huwa dnub għalih,” igħid Ġakbu 4:17. Eżekjel 33:​7-9 juri li wieħed li jintqalulu l-​kmandamenti u l-​istruzzjonijiet t’Alla huwa responsabbli biex iwettaqhom. Mela l-​mistoqsija hi jekk wieħed għandux imħabba sinċiera għal Alla u xewqa reali biex jogħġbu. Wieħed li verament għandu mħabba bħal din u jrid relazzjoni speċjali maʼ Alla Jehovah ma jżommx lura milli jiddedika ħajtu mingħajr riżerva lilu. Il-​magħmudija hija biss simbolu minn barra taʼ dik id-​dedikazzjoni. Hija pass neċessarju lejn is-​salvazzjoni. Dawk li ġenwinament jemmnu jitgħammdu.​—Atti 8:12.

Il-prospetti grandjużi li Alla jestendi għal individwi leali u ddedikati fid-​dinja l-​ġdida li ġejja jegħlbu bil-​wisq lil kwalunkwe vantaġġ temporanju li din is-​sistema taʼ affarijiet qadima u mill-​agħar tistaʼ tidher li toffri. Il-​biżaʼ minn bnedmin sħabna tisparixxi meta nikkunsidraw id-​driegħ setgħan t’Alla. (1 Korintin 10:22; 1 Pietru 5:​6, 7) Verament, dan huwa l-​waqt li tistaqsi lilek innifsek, bħalma staqsa l-​ewnuku Etjopjan lil Filippu: “X’iżommni milli nitgħammed?”

[Stampa f’paġna 7]

Bħall-​ewnuku Etjopjan, tistaqsi int lilek innifsek: “X’iżommni milli nitgħammed?”