Issottometti Ruħek Lealment għall-​Awtorità Divina

“Il-​Mulej hu l-​imħallef tagħna; il-​Mulej il-​leġislatur tagħna.Il-Mulej is-​sultan tagħna.”—Isaija 33:22.

1. Liema fatturi għamlu lill-​Iżrael tal-​qedem uniku fost il-​ġnus?

FIS-​SENA 1513 Q.E.K., beda jeżisti l-​ġens taʼ Iżrael. F’dak iż-​żmien, dan la kellu belt kapitali, la art li setgħet tissejjaħ tiegħu, u lanqas sultan viżibbli. Is-​sudditi tiegħu qabel kienu lsiera. Madankollu, dan il-​ġens il-​ġdid jerġaʼ kien uniku b’mod ieħor. Alla Jehovah kien l-​Imħallef, il-​Leġislatur, u s-​Sultan inviżibbli tiegħu. (Eżodu 19:​5, 6; Isaija 33:22) L-​ebda ġens ieħor ma setaʼ jgħid l-​istess dwaru nnifsu!

2. Liema mistoqsija tqum rigward il-​mod kif Iżrael kien organizzat, u t-​tweġiba għala hija importanti għalina?

² Ladarba Jehovah hu Alla t’ordni, kif ukoll Alla tas-​sliem, nistgħu nistennew li kwalunkwe ġens taħt il-​ħakma tiegħu kien se jkun organizzat tajjeb. (1 Korintin 14:33) Dan żgur li kien minnu fil-​każ taʼ Iżrael. Imma kif setgħet organizzazzjoni viżibbli fuq l-​art titmexxa minn Alla inviżibbli? Ikun tajjeb li nikkunsidraw kif Jehovah mexxa lil dak il-​ġens tal-​qedem, waqt li ninnotaw partikolarment kif il-​mod li bih ittratta maʼ Iżrael jenfasizza l-​importanza taʼ li nissottomettu ruħna lealment għall-​awtorità divina.

Kif Kien Jitmexxa Iżrael tal-​Qedem

3. Liema arranġamenti prattiċi għamel Jehovah biex jipprovdi gwida għall-​poplu tiegħu?

³ Għalkemm Jehovah kien is-​Sultan inviżibbli taʼ Iżrael, hu ħatar irġiel leali bħala r-​rappreżentanti viżibbli tiegħu. Kien hemm prinċpijiet, kapijiet taʼ djar paterni, u rġiel ixjeħ biex jaqdu lin-​nies bħala mħallfin u wħud li jagħtu l-​pariri. (Eżodu 18:​25, 26; Dewteronomju 1:​15) Madankollu, m’għandniex nikkonkludu li mingħajr gwida divina dawn l-​irġiel responsabbli setgħu b’xi mod jiġġudikaw l-​affarijiet b’dehen u fehma li ma kien fihom l-​ebda nuqqas. Huma ma kinux perfetti, u ma setgħux jaqraw il-​qlub taʼ l-​aduraturi sħabhom. Xorta waħda, l-​imħallfin li kellhom il-​biżaʼ t’Alla setgħu jagħtu lill-​kredenti sħabhom pariri li kienu siewja għax kienu bbażati fuq il-​Liġi taʼ Jehovah.—Dewteronomju 19:15; Salm 119:​97-​100.

4. L-​imħallfin leali taʼ Iżrael liema tendenzi kienu ħerqanin li jevitaw, u għala?

⁴ Madankollu, biex tkun imħallef kien hemm bżonn iżjed milli tkun taf il-​Liġi. Bħala nies imperfetti, l-​irġiel ixjeħ kellhom joqogħdu għassa biex irażżnu kwalunkwe tendenzi mħassrin li kellhom huma stess—bħall-​egoiżmu, il-​parzjalità, u r-​regħba—li setgħu jgħawġu l-​ġudizzju tagħhom. Mosè qalilhom: “Tħarsux lejn l-​uċuħ meta tagħmlu l-​ħaqq, isimgħu ż-​żgħir u l-​kbir l-​istess. Tibżgħu minn ħadd, għax il-​ħaqq f’idejn Alla.” Iva, l-​imħallfin taʼ Iżrael kienu qed jiġġudikaw għal Alla. Xi privileġġ onorabbli u straordinarju kien dan!—Korsiv tagħna; Dewteronomju 1:​16, 17.

5. Minbarra li ħatar lill-​imħallfin, liema arranġamenti oħra għamel Jehovah biex jieħu ħsieb lin-​nies tiegħu?

⁵ Jehovah għamel arranġamenti oħra biex jieħu ħsieb il-​bżonnijiet spiritwali tan-​nies tiegħu. Saħansitra qabel ma waslu fl-​Art Imwiegħda, hu kkmandahom jibnu t-​tabernaklu li kien iċ-​ċentru tal-​qima vera. Hu waqqaf ukoll saċerdozju biex jgħallem il-​Liġi, joffri s-​sagrifiċċji taʼ l-​annimali, u jaħraq l-​inċens taʼ fil-​għodu u fil-​għaxija. Alla qiegħed lil Aron, li kien akbar minn ħuh Mosè fl-​età, bħala l-​ewwel qassis il-​kbir taʼ Iżrael u ħatar lil ulied Aron biex jgħinu lil missierhom fid-​dmirijiet tiegħu.—Eżodu 28:1; Numri 3:​10; 2 Kronaki 13:​10, 11.

6, 7. (a) X’kienet ir-​relazzjoni bejn il-​qassisin u l-​Leviti li ma kinux qassisin? (b) X’tagħlima nistgħu nieħdu mill-​fatt li l-​Leviti kienu jagħmlu varjetà taʼ xogħlijiet? (Kolossin 3:​23)

⁶ Kienet biċċa xogħol verament kbira għall-​qassisin biex jieħdu ħsieb il-​bżonnijiet spiritwali taʼ diversi miljuni taʼ nies, u dawn kienu ftit fl-​għadd. Għalhekk sar arranġament biex jingħataw għajnuna minn membri oħrajn tat-​tribù taʼ Levi. Jehovah qal lil Mosè: “Int tagħti l-​Leviti lil Aron u lil uliedu: tagħtihomlu minn fost ulied Iżrael għalkollox.”​—Numri 3:​9, 39.

⁷ Il-​Leviti kienu organizzati tajjeb. Huma kienu maqsumin skond it-​tliet familji—il-​Gersunin, il-​Keħatin, u l-​Merarin—li kull waħda minn dawn ngħatat inkarigu biex tagħmel ċertu xogħol. (Numri 3:​14-​17, 23-​37) Ċerti inkarigi forsi kienu jidhru iktar importanti minn oħrajn, imma kollha kienu essenzjali. Minħabba t-​tip taʼ xogħol tagħhom, il-​Leviti Keħatin kienu jaħdmu viċin ħafna taʼ l-​arka sagra tal-​patt u t-​tagħmir tat-​tabernaklu. Madankollu, kull Levita, sew jekk kien mill-​Keħatin u sew jekk le, gawda privileġġi meraviljużi. (Numri 1:​51, 53) B’sogħba, xi wħud m’apprezzawx il-​privileġġi li kellhom. Minflok ma ssottomettew ruħhom għall-​awtorità divina, dawn tilfu s-​sodisfazzjon fix-​xogħol tagħhom u ċedew għall-​kburija, l-​ambizzjoni, u l-​għira. Ċertu Levita jismu Koraħ kien wieħed minnhom.

“Issa Qegħdin Tfittxu Wkoll is-​Saċerdozju?”

8. (a) Min kien Koraħ? (b) X’setaʼ ġagħal lil Koraħ jibda jqis lill-​qassisin purament minn ħarsa umana?

⁸ Koraħ ma kienx il-​kap tad-​dar paterna taʼ Levi, u lanqas ma kien il-​kap tal-​familji tal-​Keħatin. (Numri 3:​30, 32) Minkejja dan, kien prinċep rispettat f’Iżrael. Minħabba d-​dmirijiet tiegħu, Koraħ għandu mnejn kien jagħmilha ħafna maʼ Aron u wliedu. (Numri 4:​18, 19) Billi kien jara l-​imperfezzjonijiet taʼ dawn l-​irġiel b’għajnejh stess, Koraħ forsi rraġuna: ‘Dawn il-​qassisin huma vera imperfetti, imma lili jippretenduni li noqgħod għalihom! M’ilux wisq Aron għamel għoġol tad-​deheb. Il-​qima taʼ dan l-​għoġol waqqgħet lill-​poplu tagħna fl-​idolatrija. Issa Aron, ħu Mosè, qed jaqdi bħala l-​qassis il-​kbir! Xi preferenzi! U xi ngħidu għal ulied Aron, Nadab u Abiħu? Dawn tant urew diżrispett għall-​privileġġi tagħhom taʼ servizz li Jehovah kellu jagħtihom il-​mewt!’a (Eżodu 32:​1-5; Levitiku 10:​1, 2) Kien x’kien ir-​raġunar taʼ Koraħ, jidher ċar li hu beda jqis is-​saċerdozju minn ħarsa umana. Dan wassal għar-​ribelljoni tiegħu kontra Mosè u Aron, u fl-​aħħar mill-​aħħar, kontra Jehovah.​—1 Samwel 15:23; Ġakbu 1:​14, 15.

9, 10. Koraħ u sħabu r-​ribelli liema akkuża għamlu kontra Mosè, u għala messhom kienu jafu li ma kellhomx jagħmlu hekk?

⁹ Billi kien raġel influwenti, ma kienx diffiċli għal Koraħ biex jiġbed għal warajh lil uħud oħrajn li kellhom l-​istess attitudni tiegħu. Hu, flimkien maʼ Datan u Abiram, sab 250 oħra li kienu taʼ l-​istess fehma—ilkoll prinċpijiet tal-​ġemgħa. Kollha flimkien resqu fuq Mosè u Aron u qalu: “Il-​ġemgħa kollha huma kkonsagrati u f’nofshom hemm il-​Mulej. Għaliex togħlew fuq il-​ġemgħa tal-​Mulej?”—Numri 16:​1-3.

¹⁰ Ir-​ribelli messhom kienu jafu li ma kellhomx jisfidaw l-​awtorità taʼ Mosè. Ma kienx ilu wisq li Aron u Mirjam għamlu preċiż hekk. Fil-​fatt, huma saħansitra kienu użaw l-​istess raġunar taʼ Koraħ! Skond Numri 12:​1, 2, huma staqsew: “Jaqaw il-​Mulej lil Mosè biss kellem? Ma kellimx lilna wkoll?” Jehovah kien qed jismaʼ. Hu kkmanda lil Mosè, ’l Aron, u ’l Mirjam biex jinġabru fid-​daħla tat-​tinda tal-​laqgħa sabiex Hu jkun jistaʼ jindikalhom lil min kien għażel bħala mexxej. Imbagħad, Jehovah qalilhom ċar u tond: “Jekk xi ħadd minnkom ikun profeta, Jiena l-​Mulej nidhirlu f’viżjoni, u nkellmu fil-​ħolm. Mhux hekk maʼ Mosè l-​qaddej tiegħi, il-​bniedem li fdajtlu dari.” Wara dan, Jehovah laqat temporanjament lil Mirjam bil-​ġdiem.​—Numri 12:​4-7, 10.

11. Mosè kif ittratta s-​sitwazzjoni li kienet tinvolvi lil Koraħ?

¹¹ Koraħ u dawk li appoġġawh żgur li kienu jafu b’dik il-​ġrajja. Ma kien hemm l-​ebda skuża għar-​ribelljoni tagħhom. Xorta waħda, Mosè pprova jirraġuna magħhom bil-​paċenzja kollha. Hu ħeġġiġhom biex juru iżjed apprezzament lejn il-​privileġġi tagħhom, billi qalilhom: “Forsi kienet xi ħaġa żgħira għalikom li Alla taʼ Iżrael għażilkom mill-​ġemgħa taʼ Iżrael, biex iressaqkom lejh?” Le, ma kinitx “xi ħaġa żgħira”! Il-​Leviti diġà kellhom ħafna. X’setgħu jixtiequ iżjed? Il-​kliem li kompla jgħid Mosè kixef ir-​raġunar taʼ qalbhom: “Issa qegħdin tfittxu wkoll is-​saċerdozju?”b (Numri 12:3; 16:​9, 10) Iżda, Jehovah kif irreaġixxa għal din ir-​ribelljoni kontra l-​awtorità divina?

L-​Imħallef taʼ Iżrael Jintervieni

12. Minn xiex kienet tiddependi r-​relazzjoni tajba taʼ Iżrael m’Alla?

¹² Meta Jehovah ta l-​Liġi lil Iżrael, hu qal lin-​nies li jekk jobdu, kienu se jsiru “ġens qaddis” u li l-​ġens setaʼ jibqaʼ qaddis sakemm kien se jaċċetta l-​arranġament taʼ Jehovah. (Eżodu 19:​5, 6) Issa, li r-​ribelljoni kienet ħarġet fil-​beraħ, kien wasal iż-​żmien biex jintervieni l-​Imħallef u l-​Leġislatur taʼ Iżrael! Mosè qal lil Koraħ: “Int u l-​klikka tiegħek, ejjew għada quddiem il-​Mulej maʼ Aron. Ħudu ċensier, wieħed kull wieħed, poġġu l-​inċens, u ressqu quddiem il-​Mulej il-​mitejn u ħamsin ċensier, wieħed wieħed, int u Aron, kulħadd biċ-​ċensier tiegħu.”—Numri 16:​16, 17.

13. (a) Għala kienet prużunzjoni min-​naħa tar-​ribelli li joffru l-​inċens quddiem Jehovah? (b) Jehovah kif ittratta mar-​ribelli?

¹³ Skond il-​Liġi t’Alla, il-​qassisin biss setgħu joffru l-​inċens. L-​idea waħedha taʼ qassis mhux Levita li joffri l-​inċens quddiem Jehovah ukoll suppost li kellha ġġib lil dawk ir-​ribelli f’sensihom. (Eżodu 30:7; Numri 4:​16) Iżda mhux hekk ġara fil-​każ taʼ Koraħ u sħabu! L-​għada Koraħ “ġabar il-​ġemgħa kollha fi dħul it-​tinda tal-​laqgħa” kontra Mosè u Aron. Ir-​rakkont jgħidilna: “Il-​Mulej kellem lil Mosè u ’l Aron, u qalilhom: ‘Warrbu minn nofs din il-​ġemgħa, ħa neqridhom ilkoll f’salt wieħed.’” Imma Mosè u Aron talbu bil-​ħrara biex in-​nies ma jinqerdux. Jehovah aċċetta t-​talbiet tagħhom. Inkwantu għal Koraħ u l-​ġemgħa tiegħu, “ħareġ nar mingħand il-​Mulej u qered il-​mitejn u ħamsin raġel li kienu offrew l-​inċens.”​—Numri 16:​19-​22, 35.c

14. Jehovah għala ħa azzjoni qawwija kontra lġemgħa taʼ Iżrael?

¹⁴ Ħaġa taʼ l-​iskantament, l-​Iżraelin li raw kif Jehovah ittratta mar-​ribelli xorta kienu għadhom ma ħaduhiex it-​tagħlima. “L-​għada l-​ġemgħa kollha taʼ wlied Iżrael bdew igemgmu kontra Mosè u Aron u jgħidu: ‘Intom qtiltu l-​poplu tal-​Mulej.’” L-​Iżraelin kienu qed iżommu mar-​ribelli! Finalment, il-​paċenzja taʼ Jehovah spiċċat. Ħadd—lanqas Mosè jew Aron—ma setaʼ jidħol għan-​nies issa. Jehovah laqat l-​uħud diżubbidjenti bi flaġell, “u ġara li l-​mejtin b’dan il-​flaġell laħqu l-​erbatax-il elf u sebaʼ mija, minbarra dawk li kienu mietu qabel minħabba Koraħ.”—Numri 17:​6-14 (16:​41-49, NW).

15. (a) L-Iżraelin għal liema raġunijiet suppost kellhom jaċċettaw it-​tmexxija taʼ Mosè u Aron bla ma joqogħdu jaħsbuha darbtejn? (b) X’għallmek dan ir-​rakkont dwar Jehovah?

¹⁵ Dawk in-​nies kollha ma kellhomx għalfejn jitilfu ħajjithom. Li kieku biss qagħdu jirraġunaw ftit! Setgħu staqsew lilhom infushom mistoqsijiet bħal: ‘Min deher quddiem il-​Fargħun b’riskju għal ħajjithom? Min insista li l-​Iżraelin jinħelsu? Min biss ġie mistieden jitlaʼ fuq il-​muntanja tal-​Ħoreb wara l-​ħelsien taʼ Iżrael biex jitkellem wiċċ imbwiċċ maʼ l-​anġlu t’Alla?’ Bla dubju, il-​ħajja straordinarja taʼ Mosè u Aron uriet biċ-​ċar il-​lealtà tagħhom lejn Jehovah u l-​imħabba tagħhom għall-​poplu. (Eżodu 10:28; 19:24; 24:​12-​15) Jehovah xejn ma ħa pjaċir joqtol lir-​ribelli. Iżda meta sar evidenti li n-​nies kienu se jippersistu fir-​ribelljoni tagħhom, hu ħa azzjoni deċiżiva. (Eżekjel 33:11) Dan kollu fih sinifikat kbir għalina llum. Għala?

Nidentifikaw il-​Mezz taʼ Komunikazzjoni Llum

16. (a) Liema evidenza suppost ikkonvinċiet lil-​Lhud taʼ l-​ewwel seklu li Ġesù kien ir-​rappreżentant taʼ Jehovah? (b) Jehovah għala bidlu s-​saċerdozju tal-​Leviti, u maʼ xiex?

¹⁶ Illum, hemm “ġens” ġdid li Jehovah huwa l-​Imħallef, il-​Leġislatur, u s-​Sultan inviżibbli tiegħu. (Mattew 21:43) Dak il-​“ġens” beda jeżisti fl-​ewwel seklu E.K. Sa dak iż-​żmien, flok it-​tabernaklu taʼ żmien Mosè kien hemm tempju sabiħ f’Ġerusalemm, fejn kienu għadhom jaqdu l-​Leviti. (Luqa 1:​5, 8, 9) Madankollu, fis-​sena 29 E.K., beda jeżisti tempju ieħor, wieħed spiritwali, b’Ġesù Kristu bħala l-​Qassis il-​Kbir. (Lhud 9:​9, 11) Għal darb’oħra reġgħet qamet il-​kwistjoni dwar l-​awtorità divina. Jehovah lil min kien se juża biex imexxi lil dan il-​“ġens” il-​ġdid? Ġesù wera li kellu lealtà assoluta lejn Alla. Hu kien iħobb lin-​nies. Barra minn hekk, wettaq ħafna sinjali taʼ l-​għaġeb. Madankollu, bħall-​antenati stinati tagħhom, il-​maġġuranza tal-​Leviti rrifjutaw li jaċċettaw lil Ġesù. (Mattew 26:​63-​68; Atti 4:​5, 6, 18; 5:​17) Finalment, Jehovah bidel is-​saċerdozju tal-​Leviti maʼ wieħed differenti ħafna—saċerdozju rjali. Dak is-​saċerdozju rjali għadu jiffunzjona sa llum.

17. (a) Illum liema grupp jifforma s-​saċerdozju rjali? (b) Jehovah kif juża s-​saċerdozju rjali?

¹⁷ Illum, min jifforma dan is-​saċerdozju rjali? L-​appostlu Pietru jwieġeb din il-​mistoqsija fl-​ewwel ittra mnebbħa tiegħu. Pietru kiteb lill-​membri midlukin tal-​ġisem taʼ Kristu: “Intom ġens maħtur, saċerdozju rjali, nazzjon qaddis, poplu li Alla kiseb għalih, biex ixxandru t-​tifħir taʼ dak li sejjħilkom mid-​dlam għad-​dawl tiegħu taʼ l-​għaġeb.” (1 Pietru 2:9) Minn dan il-​kliem jidher ċar li, bħala grupp, l-​uħud midlukin li jsegwu l-​passi taʼ Ġesù jifformaw dan is-​“saċerdozju rjali,” li Pietru sejjaħlu wkoll “nazzjon qaddis.” Dawn huma l-​mezz taʼ komunikazzjoni li Jehovah juża biex jipprovdi lin-​nies tiegħu istruzzjoni u direzzjoni spiritwali.​—Mattew 24:​45-​47.

18. Liema konnessjoni hemm bejn l-​anzjani maħturin u s-​saċerdozju rjali?

¹⁸ Sabiex jirrappreżentaw is-​saċerdozju rjali hemm l-​anzjani maħturin, li jaqdu f’pożizzjonijiet taʼ responsabbiltà f’kongregazzjonijiet tan-​nies taʼ Jehovah madwar id-​dinja. Dawn l-​irġiel jixirqilhom li nirrispettawhom u nappoġġawhom b’qalbna kollha, sew jekk huma mill-​midlukin u sew jekk le. Għala? Għax, permezz taʼ l-​ispirtu qaddis tiegħu, Jehovah ħatar lill-​anzjani fil-​pożizzjonijiet tagħhom. (Lhud 13:​7, 17) Dan kif?

19. L-​anzjani b’liema mod huma maħturin mill-​ispirtu qaddis?

¹⁹ Dawn l-​anzjani jilħqu l-​ħtiġijiet imniżżlin fil-​Kelma t’Alla, li hija l-​prodott taʼ l-​ispirtu t’Alla. (1 Timotju 3:​1-7; Titu 1:​5-9) Għaldaqstant, jistaʼ jingħad li huma jinħatru mill-​ispirtu qaddis. (Atti 20:28) L-​irġiel ixjeħ, jew l-​anzjani, iridu jkunu midħla sew tal-​Kelma t’Alla. Bħall-​Imħallef Suprem li ħatarhom, l-​anzjani wkoll iridu jobogħdu l-​iċken ħjiel taʼ parzjalità fil-​ġudizzju.​—Dewteronomju 10:​17, 18.

20. X’tapprezza dwar l-​anzjani li tant jaħdmu iebes?

²⁰ Minflok ma nisfidaw l-​awtorità tagħhom, aħna tassew napprezzaw l-​anzjani tagħna li tant jaħdmu iebes. Is-​servizz leali tagħhom, taʼ spiss tul ħafna u ħafna snin, iqanqal il-​fiduċja tagħna. Huma fedelment jippreparaw għal-​laqgħat tal-​kongregazzjoni u jikkonduċuhom, jaħdmu spalla maʼ spalla magħna fl-​ippridkar taʼ “l-​Evanġelju tas-​Saltna,” u jagħtuna pariri Skritturali meta jkollna bżonn. (Mattew 24:14; Lhud 10:​23, 25; 1 Pietru 5:2) Dawn iżuruna meta nkunu morda u jfarrġuna meta nkunu mnikktin. Huma jappoġġaw l-​interessi tas-​Saltna lealment u mingħajr egoiżmu. L-​ispirtu taʼ Jehovah qiegħed fuqhom; huma għandhom l-​approvazzjoni tiegħu.​—Galatin 5:​22, 23.

21. L-​anzjani taʼ xiex għandhom ikunu konxji, u għala?

²¹ M’għandniex xi ngħidu, l-​anzjani m’humiex perfetti. Billi huma konxji tal-​limitazzjonijiet tagħhom, huma ma jipprovawx jagħmluha taʼ sidien fuq il-​merħla, “il-​wirt t’Alla.” Minflok, iqisu lilhom infushom bħala ħaddiema sħab għall-​ferħ taʼ ħuthom. (1 Pietru 5:​3, Karm Żammit; 2 Korintin 1:​24) Anzjani umlin u ħabrieka jħobbu lil Jehovah, u jafu li iktar ma jimitawh mill-​qrib, iktar se jagħmlu ġid fil-​kongregazzjoni. B’dan f’moħħhom, huma kontinwament jistinkaw biex jikkultivaw kwalitajiet divini bħall-​imħabba, il-​mogħdrija, u l-​paċenzja.

22. Ir-​reviżjoni tar-​rakkont taʼ Koraħ kif saħħitlek il-​fidi tiegħek fl-​organizzazzjoni viżibbli taʼ Jehovah?

²² Kemm aħna ferħanin li għandna lil Jehovah bħala l-​Ħakkiem inviżibbli tagħna, lil Ġesù Kristu bħala l-​Qassis il-​Kbir tagħna, membri tas-​saċerdozju rjali midluk bħala l-​għalliema tagħna, u anzjani Kristjani leali bħala wħud li jagħtuna l-​pariri! Għalkemm l-​ebda organizzazzjoni mmexxija mill-​bnedmin ma tistaʼ tkun perfetta, hija l-​għaxqa tagħna li nistgħu naqdu lil Alla flimkien maʼ sħabna leali fit-​twemmin, li jissottomettu ruħhom bil-​ferħ għall-​awtorità divina!

[Noti taʼ taħt]

X’Tgħallimt?

• Jehovah liema arranġamenti taʼ mħabba għamel biex jieħu ħsieb l-​Iżraelin?

• Għala ma kien hemm l-​ebda skuża għar-​ribelljoni taʼ Koraħ kontra Mosè u Aron?

• X’nistgħu nitgħallmu mill-​mod kif Jehovah ittratta mar-​ribelli?

• Kif nistgħu nuru li napprezzaw l-​arranġamenti taʼ Jehovah illum?

[Stampa f’paġna 9]

Tqis int kwalunkwe inkarigu fis-​servizz taʼ Jehovah bħala privileġġ?

[Stampa f’paġna 10]

“Għaliex togħlew fuq il-​ġemgħa tal-​Mulej?”

[Stampa f’paġna 13]

L-​anzjani maħturin jirrappreżentaw is-​saċerdozju rjali