Kapitlu 13

Folla Kbira Quddiem it-​Tron taʼ Jehovah

1. (a) Qabel ma jew il-​qaddejja t’Alla taʼ qabel Kristu jew il-​144,000 jirċievu l-​premju tagħhom, x’iridu jesperjenzaw? (b) Imma x’se jkun possibbli għal folla kbira li jkunu ħajjin meta tfaqqaʼ t-​“tribulazzjoni l-​kbira”?

GĦALKEMM qaddejja leali t’Alla minn Abel sa Ġwanni l-​Għammied poġġew it-​twettiq tar-​rieda t’Alla l-​ewwel f’ħajjiethom, ilkoll kemm huma kellhom imutu u jistennew irxoxt. Il-​144,000 li se jkunu maʼ Kristu fis-​Saltna tiegħu tas-​sema wkoll iridu jmutu qabel ma jistgħu jirċievu l-​premju tagħhom. F’kuntrast maʼ dan, l-​appostlu Ġwanni ġie muri f’viżjoni li se jkun hemm folla kbira li attwalment kellhom jibqgħu ħajjin wara t-​“tribulazzjoni l-​kbira” u, mingħajr ma jmutu, ikollhom il-​prospett li jgħixu għal dejjem.​—Riv. 7:​9-17.

NIDENTIFIKAW IL-​“FOLLA KBIRA”

2. X’wassal għal fehma ċara dwar l-​identità tal-​“folla kbira” taʼ Rivelazzjoni 7:9?

² Għal sekli sħaħ l-​identità taʼ din il-​“folla kbira” ma kenitx mifhuma. Imma l-​fehma progressiva taʼ profeziji relatati ppreparat it-​triq. Fl-​1923 sar magħruf li n-​“ngħaġ” tal-​parabbola taʼ Ġesù f’​Mattew 25:​31-46 u n-​“ngħaġ oħrajn” li għalihom irrefera fi Ġwann 10:16 kienu persuni li qegħdin jgħixu issa u li kien se jkollhom l-​opportunità li jgħammru għal dejjem hawnhekk fuq l-​art. Fl-​1931 l-​uħud deskritti f’​Eżekjel 9:​1-11 bħala li huma mmarkati fuq ġbinhom mir-​raġel bil-​klamar tas-​segretarju kienu identifikati man-​“ngħaġ” taʼ Mattew kapitlu 25. Imbagħad, fl-​1935, il-​“kotra kbira,” jew “folla kbira,” taʼ Rivelazzjoni 7:​9-17 intweriet li kienet l-​istess bħan-​“ngħaġ” tal-​parabbola taʼ Ġesù dwar in-​ngħaġ u l-​mogħoż. Għalkemm lura fl-​1923 ġie rrealizzat li xi ftit individwi bħal ngħaġ bħal dawn kienu diġà bdew juru lilhom infushom, ma kienx qabel l-​1935 li l-​għadd tagħhom beda jiżdied bil-​ħeffa. Illum hemm litteralment miljuni li qegħdin ifittxu li jkunu identifikati bħala parti minn dik il-​“folla kbira” tan-​“ngħaġ oħrajn” iffavorita b’mod divin.

3. Li huma “bil-​wieqfa quddiem it-​tron” għala ma jfissirx li huma klassi tas-​sema?

³ Dawk tal-​“folla kbira” huma distinti mill-​144,000 membru taʼ Iżrael spiritwali, li jirreferi għalihom iktar kmieni l-​istess kapitlu taʼ Rivelazzjoni. Fil-​viżjoni tiegħu Ġwanni ma rax lil din il-​“folla kbira” bħala li kienet fis-​sema. Li jkunu “bil-​wieqfa quddiem it-​tron” (bil-Grieg: e·noʹpi·on tou throʹnou, “fid-​dehra tat-​tron”) t’Alla ma jirrikjedix li huma jkunu fis-​sema. Il-​pożizzjoni tagħhom hija sempliċement “fid-​dehra” t’Alla, li jgħidilna li mis-​sema hu jilmaħ ulied il-​bnedmin. (Riv. 7:9; Salm 11:4; qabbel Salm 100:​1, 2, ukoll Luqa 1:​74, 75 u Atti 10:​33, Kingdom Interlinear.) Bl-​istess mod, m’huwiex neċessarju għall-​“ġnus kollha” li jkunu fis-​sema biex ikunu quddiem it-​tron taʼ Kristu (litteralment, “quddiemu”), bħalma huwa deskritt f’​Mattew 25:​31, 32. Il-​fatt li l-​“folla kbira, li l-​ebda bniedem ma kellu l-​ħila jgħodd,” m’hijiex klassi tas-​sema jintwera billi jsir paragun maʼ Rivelazzjoni 7:​4-8 u 14:​1-4, fejn huwa rrivelat in-​numru speċifiku taʼ dawk li ttieħdu mill-​art biex ikunu fis-​sema.

4. (a) X’inhi t-​“tribulazzjoni l-​kbira” li huma se jibqgħu ħajjin warajha? (b) Bħalma huwa mistqarr f’​Rivelazzjoni 7:​11, 12, min josserva l-​“folla kbira” u jieħu sehem magħhom fil-​qima?

⁴ F’li jidentifika l-​“folla kbira,” Ġwanni jikteb: “Dawn huma dawk li joħorġu mit-​tribulazzjoni l-​kbira.” Dik li se joħorġu ħajjin minnha se tkun, tabilħaqq, l-​akbar tribulazzjoni li qatt ġiet imġarrba fuq l-​art. (Riv. 7:​13, 14; Matt. 24:21) Dawk li jibqgħu ħajjin wara dak il-​jum taʼ Jehovah li jqanqal il-​biżaʼ ma se jkollhom ebda dubju dwar min hu responsabbli għall-​ħelsien tagħhom. Meta b’ringrazzjament jattribwixxu s-​salvazzjoni tagħhom lil Alla u lill-​Ħaruf, imbagħad, bħalma Ġwanni ra fil-​viżjoni, il-​ħlejjaq leali kollha fis-​sema se jgħaqqdu l-​ilħna tagħhom magħhom fil-​qima taʼ l-​uniku Alla veru, billi jgħidu: “Amen! Il-​barka u l-​glorja u l-​għerf u r-​radd il-​ħajr u l-​unur u l-​qawwa u s-​saħħa jkunu lil Alla tagħna għal dejjem taʼ dejjem. Amen.”​—Riv. 7:​11, 12.

ITTESTJATI INKWANTU GĦAL JEKK HUMIEX DENJI LI JIBQGĦU ĦAJJIN

5. (a) Kif nistgħu niddeterminaw x’inhu meħtieġ sabiex inkunu parti mill-​“folla kbira” li se tiġi ppreservata? (b) Billi twieġeb il-​mistqosijiet fl-​aħħar taʼ dan il-​paragrafu, spjega x’inhu meħtieġ biex tibqaʼ ħaj wara t-​“tribulazzjoni l-​kbira.”

⁵ L-​ippreservar tal-​“folla kbira” jseħħ f’armonija mal-​livelli taʼ tjieba taʼ Jehovah stess. Indikazzjonijiet ċari dwar il-​karatteristiċi identifikanti taʼ dawk li se jkunu meħlusin huma inklużi fir-​referenzi profetiċi tal-​Bibbja għalihom. B’hekk huwa possibbli għal dawk li jħobbu t-​tjieba li jaġixxu issa bit-​tir li jibqgħu ħajjin. Aħna diġà rreferejna għall-​iskritturi li ġejjin. Imma issa analizzahom bir-​reqqa, bil-​għajnuna taʼ testi ċċitati addizzjonali, u ikkunsidra xi trid tagħmel int sabiex tiffittja f’dawn id-​deskrizzjonijiet profetiċi.

“Ngħaġ oħrajn” li hemm referenza għalihom fi Ġwann 10:16

X’ifisser li persuna tassew tagħti widen għal-​leħen taʼ Ġesù? (Ġwn. 10:27; Matt. 9:9; Ef. 4:​17-24)

Kif nistgħu aħna nuru li nirrikonoxxu lil Kristu bħala r-​“ragħaj wieħed” tagħna? (Matt. 23:​10, 11)

“Ngħaġ” fit-​tixbieha taʼ Ġesù dwar in-​ngħaġ u l-​mogħoż (Matt. 25:31-46)

Min huma l-​“aħwa” taʼ Kristu li lilhom dawn se jkunu għamlu l-​ġid? (Eb. 2:​10, 11; 3:1)

Taħt liema ċirkostanzi diffiċli huma msejħin biex jidentifikaw lilhom infushom maʼ ħut Kristu fuq l-​art? U f’liema xogħol jagħtu assistenza leali? (Riv. 12:​12, 17; Matt. 24:14; 28:​19, 20)

Persuni mmarkati biex jibqgħu ħajjin mir-​raġel bil-​klamar tas-​segretarju (Eżek. 9:​1-11)

Huma kif juru li m’humiex f’armonija maʼ l-​affarijiet moqżieża li saru f’Ġerusalemm antitipika, jew il-​Kristjaneżmu? (Riv. 18:​4, 5)

X’inhu inkluż fil-​“marka” li tagħmilhom differenti minn dawk li huma taparsi Kristjani u tpoġġihom f’pożizzjoni li jiġu ppreservati? (1 Piet. 3:21; Matt. 7:​21-27; Ġwn. 13:35)

6. Id-​deskrizzjoni li jagħti Ġwanni tal-​“folla kbira” kif tgħinna nifhmu għala ġew ippreservati?

⁶ Id-​deskrizzjoni tal-​“folla kbira” bħalma tinstab f’Rivelazzjoni 7:9-15 iżżid iktar dettalji importanti. F’li tgħidilna kif dawk tal-​“folla kbira” jidhru wara t-​“tribulazzjoni l-​kbira,” l-​Iskrittura wkoll tiġbed l-​attenzjoni lejn fatturi li wassluhom għal li jiġu ppreservati.

7. X’għamlu huma qabel it-​“tribulazzjoni l-​kbira,” u dan kif inhu indikat?

⁷ Għalkemm jiġu mill-​ġnus, mit-​tribujiet, mill-​popli u mill-​ilsna kollha, jintwerew li huma magħqudin “bil-​wieqfa quddiem it-​tron,” billi jagħtu r-​rikonoxximent lil Jehovah, il-​Wieħed bil-​qiegħda fuq it-​tron, bħala s-​Sovran Universali. Taw prova bil-​mod taʼ ħajja tagħhom li huma wħud leali li jappoġġjaw lill-​istat taʼ ħakkiem tiegħu. Il-​fatt li “ħaslu lbieshom u għamluhom bojod fid-​demm tal-​Ħaruf” jindika li rrikonoxxew li jeħtieġu l-​mertu, li jpatti għad-​dnubiet, tas-​sagrifiċċju taʼ Ġesù bħala l-​Ħaruf t’Alla. (Ġwn. 1:29; 1 Ġwn. 2:2) Bil-​fidi ddedikaw lilhom infushom lil Alla fuq il-​bażi taʼ dak is-​sagrifiċċju, issimbolizzaw dan permezz tat-​tgħaddis fl-​ilma u issa jgawdu waqfa nadifa quddiem Alla, bħalma tingħata stampa tagħhom permezz taʼ l-​ilbiesi bojod tagħhom. Ma żammewx lura milli pubblikament jagħmlu magħrufa l-​fidi tagħhom fl-​Iben t’Alla. (Matt. 10:​32, 33) Konsistenti maʼ dan kollu, jintwerew bħala li huma fit-​tempju, jew dar universali taʼ qima, t’Alla bħala adoraturi li jagħtu lil Alla “servizz sagru lejl u nhar.” B’hekk huma stabbilew isem bħala wħud leali li jappoġġjaw il-​vera qima u bħala proklamaturi tas-​Saltna tiegħu.​—Isa. 2:​2, 3.

8. Biex din l-​informazzjoni tibbenefikana, x’irridu nagħmlu?

⁸ Id-​dettalji taʼ dawn l-​istampi profetiċi jiffittjawk? Hemm xi modi fejn għandek bżonn iġġib ħajtek b’mod iktar sħiħ fi qbil maʼ dak deskritt hawnhekk? Jekk inhu hekk, issa huwa ż-​żmien li tagħmel hekk!

NGĦIXU F’ĠENNA SPIRITWALI

9. Ġwanni kif jiddeskrivi barkiet spiritwali gawduti mill-​“folla kbira” saħansitra issa?

⁹ Int wieħed li tittama li tibqaʼ ħaj bħala parti mill-​“folla kbira”? Jekk ikkonformajt mal-​mogħdijiet taʼ tjieba taʼ Jehovah, allura mingħajr ebda dubju diġà qiegħed tibda tgawdi l-​kundizzjonijiet imwegħdin li b’mod addattat ġew imsejħin ġenna spiritwali. L-​appostlu Ġwanni ntqallu: “Ma se jkollhom qatt ġuħ iktar lanqas għatx iktar, lanqas se tħabbat fuqhom ix-​xemx jew xi sħana taħraq, għaliex il-​Ħaruf, li qiegħed f’nofs it-​tron, se jirgħahom, u se jiggwidahom lejn nixxigħat taʼ ilmijiet taʼ ħajja. U Alla se jimsaħ kull demgħa minn għajnejhom.” (Riv. 7:​16, 17) Dan kif ta prova li huwa veru fil-​każ tiegħek?

10. (a) F’sens spiritwali kif inhu veru li l-​“folla kbira” “ma se jkollhom qatt ġuħ iktar lanqas għatx iktar”? (b) Esperjenzajtu int dan?

¹⁰ Qabel ma ġejt taħt l-​indokrar taʼ mħabba tar-​Ragħaj Mill-​Aħjar, Ġesù Kristu, kont int bil-​ġuħ u bil-​għatx għat-​tjieba? (Qabbel Mattew 5:6.) Jekk inhu hekk, dik li int kont imlebleb għaliha kienet ħaġa li Jehovah biss permezz taʼ Ibnu setaʼ jipprovdi. Meta tgħallimt dwar il-​mogħdijiet taʼ tjieba taʼ Jehovah​—l-​iskop tiegħu li jeqred lil uħud mill-​agħar, u madankollu l-​qalb tajba mhix mistħoqqa tiegħu f’li jagħmel possibbli s-​salvazzjoni għan-​nisel taʼ Adam—​imbagħad, bla dubju, għall-​ewwel darba f’ħajtek int verament ħassejtek kuntent. Ikel u xorb spiritwali mill-​Kelma t’Alla, servut permezz taʼ l-​Organizzazzjoni, komplew iġibulek sodisfazzjon. (Isa. 65:​13, 14) U jekk iddedikajt lilek innifsek lil Alla permezz taʼ Kristu issa għandek skop reali fil-​ħajja. (Qabbel Ġwann 4:​32-34.) Quddiemek hemm il-​prospett mimli ferħ taʼ ħajja eterna fuq art magħmula Ġenna, għaliex il-​Ħaruf “se jiggwidahom [lill-“folla kbira”] lejn nixxigħat taʼ ilmijiet taʼ ħajja.”

11. (a) B’liema mod huwa veru li ‘la x-​xemx u lanqas ebda sħana taħraq ma tħabbat fuqhom iktar’? (b) Kemm huwa importanti dak għalik?

¹¹ Bħala “ngħaġ” li jafdaw, dawk tal-​“folla kbira” huma wkoll protetti u ggwidati ’l bogħod mill-​periklu mir-​Ragħaj Mill-​Aħjar. Dak huwa għala, b’mod figurattiv, ‘la x-​xemx u lanqas ebda sħana taħraq ma tħabbat fuqhom iktar.’ Dan ma jfissirx li, bħala wieħed mill-​“folla kbira,” m’int se ssofri ebda persekuzzjoni mid-​dinja. Minflok, dan jissinjifika li int issalvagwardjat mis-​sħana taħraq tad-​dispjaċir t’Alla stess. U meta jitfaʼ xita taʼ qerda divina fuq l-​uħud mill-​agħar, din m’hijiex se ġġibek f’rovina. Din ir-​relazzjoni ffavorita tistaʼ tkompli għal dejjem.​—Eżek. 38:​22, 23; qabbel Salm 11:​6; 85:​3, 4.

12. Id-​dmugħ kif ġie mimsuħ minn għajnejk saħansitra issa?

¹² X’raġunijiet taʼ l-​għaġeb għal ferħ huma tiegħek jekk int verament wieħed minn dik il-​“folla kbira”! Għandek it-​tama meraviljuża li tara l-​uħud mill-​agħar imneħħijin kompletament u mbagħad li jkollok moħħok u ġismek stess attwalment meħlusin mill-​effetti kollha tad-​dnub. Imma saħansitra issa n-​niket imġarrab min-​nies minħabba li huma fl-​għama rigward Alla ma jinkwetakx. Qed tibda ssir taf il-​ferħ li jappartjeni biss lil dak il-​poplu li Alla tiegħu hu Jehovah. (Salm 144:15b) B’dan il-​mod diġà qiegħed tibda tesperjenza t-​twettiq tal-​wegħda: “Alla se jimsaħ kull demgħa minn għajnejhom.”

13. X’se jżid mal-​ferħiet tal-​ġenna spiritwali hekk kif ir-​renju t’elf sena taʼ Kristu jipprogressa?

¹³ Saħansitra bħalma l-​“folla kbira” se jibqgħu ħajjin wara t-​tmiem taʼ din is-​sistema t’affarijiet, hekk ukoll se tagħmel il-​ġenna spiritwali. Jekk int wieħed minnhom, allura se tkompli tgawdi festa spiritwali t’affarijiet imsemmnin waqt li r-​renju t’elf sena taʼ Kristu jimxi ’l quddiem. L-​għarfien tiegħek dwar Alla nnifsu se jsir iktar profond hekk kif tara l-​iskop tiegħu li ma jfallix isir realtà glorjuża. Il-​ferħ tiegħek se jissebbaħ waqt li int tieħu sehem f’li tilqaʼ lura kotra li dejjem tikber mill-​imwiet biex ikunu magħqudin miegħek fil-​qima vera. U l-​barkiet fiżiċi li mbagħad se jkunu pprovduti se jkunu prezzjużi b’mod speċjali għall-​qaddejja leali kollha t’Alla ladarba dawn jintgħarfu li huma espressjonijiet taʼ l-​imħabba taʼ Jehovah innifsu.​—Isa. 25:​6-9; Ġak. 1:17.

Diskussjoni Bħala Reviżjoni

● Il-​Bibbja tassoċja l-​“folla kbira” maʼ liema ġrajja straordinarja, u kif?

● Jekk tassew irridu nkunu inklużi f’dik il-​“folla kbira” ffavorita b’mod divin, x’irridu nagħmlu issa?

● Kemm huma importanti għalik il-​barkiet tal-​ġenna spiritwali?