Kapitlu 14

‘Nagħmel Patt Magħkom Għal Saltna’

1. F’dik il-​lejla taʼ qabel il-​mewt taʼ Ġesù liema prospett poġġa hu quddiem l-​appostli tiegħu?

KIEN fil-​lejl qabel ma Ġesù ġie mogħti l-​mewt li hu qal lill-​appostli leali tiegħu: ‘F’dar Missieri hemm bosta għamajjar. Jien sejjer fi triqti biex inħejji post għalikom, biex fejn qiegħed jien intom ukoll tistgħu tkunu.’ Hu kompla jgħidilhom: “Jien nagħmel patt magħkom, sewwa sew bħalma Missieri għamel patt miegħi, għal Saltna.” (Ġwn. 14:​2, 3; Luqa 22:29) Xi prospett meraviljuż poġġa quddiemhom!

2. Kemm se jkun hemm li jieħdu sehem maʼ Ġesù fis-​Saltna tiegħu tas-​sema?

² Madankollu, Ġesù ma riedx ifisser li l-​appostli biss kellhom jaħkmu miegħu fis-​Saltna tiegħu tas-​sema. Iktar tard ġie mgħarraf li 144,000 mifdijin mill-​art kien se jkollhom dak il-​privileġġ grandjuż. (Riv. 5:​9, 10; 14:​1, 4) Hemm uħud illum li qegħdin jistinkaw biex jakkwistawh?

JINĠABRU L-​WERRIETA TAS-​SALTNA

3. Fil-​ministeru pubbliku tiegħu, Ġesù ġibed l-​attenzjoni lejn liema opportunità?

³ Wara li Ġwanni l-​Għammied ġie kkalzrat minn Erodi Antipas, Ġesù daħal għax-​xogħol taʼ kampanja intensiva taʼ ppridkar pubbliku fejn iffoka l-​attenzjoni fuq “is-​saltna tas-​smewwiet.” (Matt. 4:​12, 17) Hu għamel lin-​nies konxji tal-​fatt li kellu jkun hemm opportunità għalihom biex jidħlu f’dik is-​Saltna, u d-​dixxipli tiegħu stinkaw bis-​serjetà għal dak il-​premju.​—Matt. 5:​3, 10, 20; 7:21; 11:12.

4. (a) L-​ewwel uħud tad-​dixxipli taʼ Ġesù meta ġew midlukin bl-​ispirtu qaddis? (b) X’juri li minn dak iż-​żmien ’il quddiem l-​attenzjoni bdiet tingħata għall-​ġbir tal-​werrieta tas-​Saltna?

⁴ F’Pentekoste tas-​sena 33 E.K. l-​ewwel fosthom ġew midlukin bl-​ispirtu qaddis. (Atti 2:​1-4; 2 Kor. 1:​21, 22) Il-​provvediment t’Alla għal salvazzjoni li twassal għal ħajja immortali fis-​sema ġie mgħarraf. Pietru uża “l-​imfietaħ tas-​saltna tas-​smewwiet” biex jiftaħ dan l-​għarfien​—l-​ewwel għal-​Lhud, wara għas-​Samaritani, u mbagħad għan-​nies tal-​ġnus Ġentili. (Matt. 16:19) Attenzjoni speċjali ngħatat għal li jiġi fformat il-​gvern li kellu jaħkem lill-​umanità għal 1,000 sena, u kważi l-​ittri mnebbħin kollha fl-​Iskrittura Griega Kristjana huma primarjament immirati lejn dan il-​grupp taʼ werrieta tas-​Saltna​—“l-​uħud qaddisin,” “dawk li jieħdu sehem mis-​sejħa għas-​sema.”a

5. Il-​fatt li huma kienu msejħin għal ħajja fis-​sema kien għaliex kienu qaddejja t’Alla aħjar minn dawk li kienu għexu qabel?

⁵ Il-​fatt li ġew imsejħin għal ħajja fis-​sema ma kienx għar-​raġuni li kienu b’xi mod aħjar mill-​qaddejja kollha t’Alla li mietu qabel Pentekoste tas-​sena 33 E.K. (Matt. 11:11) Minflok, Jehovah issa kien beda jagħżel lil dawk li kellhom ikunu ħakkiema mseħbin maʼ Ġesù Kristu. Għal xi 19-il seklu wara dan kien hemm biss sejħa waħda, dik għas-​sema. Kienet qalb tajba mhix mistħoqqa li Jehovah irregala lil numru limitat bi tkomplija taʼ l-​iskopijiet għorrief u taʼ mħabba tiegħu stess.​—Ef. 2:​8-10.

6. (a) Għala jrid jiġi ż-​żmien meta s-​sejħa għas-​sema kellha tagħlaq? (b) Min kellu jidderieġi l-​affarijiet sabiex il-​profezija rigward il-​“folla kbira” titwettaq ukoll, u attwalment x’ġara?

⁶ Maż-​żmien in-​numru preskritt imma limitat taʼ 144,000 kellu jimtela. L-​issiġillar finali taʼ dawn l-​Iżraeliti spiritwali bħala approvati kellu jkun fil-​qrib. (Riv. 7:​1-8) Imbagħad Jehovah, permezz taʼ l-​ispirtu tiegħu u l-​fehma tal-​Kelma tiegħu li għamel possibbli għall-​organizzazzjoni viżibbli tiegħu, kellu jidderieġi l-​affarijiet sabiex iwettaq parti oħra mill-​iskop tiegħu, bħalma huwa deskritt f’​Rivelazzjoni 7:​9-17. “Folla kbira” mill-​ġnus kollha kellha tinġabar, bil-​prospett eċċitanti li jibqgħu ħajjin wara t-​tribulazzjoni l-​kbira u li jgħixu għal dejjem fil-​perfezzjoni f’Ġenna taʼ l-​art. Meta nikkunsidraw dak li attwalment ġara, jidher evidenti li s-​sejħa inġenerali għas-​sema ġiet kompluta madwar is-​sena 1935 E.K., meta t-​tama għall-​art tal-​“folla kbira” ġiet mifhuma b’mod ċar. Minn dak iż-​żmien ’l hawn inġiebu fi sħubija maʼ dawk il-​komparattivament ftit eluf taʼ wħud li fadal tal-​klassi tas-​sema miljuni t’adoraturi taʼ Jehovah li qegħdin jittamaw bis-​serjetà li jgħixu għal dejjem hawnhekk fuq l-​art.

7. Huwa possibbli li xi wħud saħansitra llum jistgħu jirċievu s-​sejħa għas-​sema, u għala twieġeb hekk?

⁷ Ifisser dan li m’hemm ħadd issa li qiegħed jiġi msejjaħ minn Alla għal ħajja fis-​sema? Sakemm isir l-​issiġillar finali, huwa possibbli li xi ftit minn dawk li għandhom dik it-​tama jistgħu jagħtu prova li jkunu żleali, u oħrajn ikollhom jiġu magħżulin biex jieħdu posthom. Imma jidher raġonevoli li din tkun xi ħaġa rari.

ULIED SPIRITWALI​—KIF JAFU?

8. Liema spjegazzjoni jagħti Pawlu li turi kif dawk imnisslin bl-​ispirtu qaddis huma konxji taʼ dak il-​fatt?

⁸ L-​ispirtu t’Alla jagħti assiguranza pożittiva t’adozzjoni bħala wlied spiritwali lil Kristjani mgħammdin li rċevew is-​sejħa għas-​sema. L-​appostlu Pawlu wera dan meta kiteb lil “uħud qaddisin” f’Ruma, billi ddeskriva x’kienet is-​sitwazzjoni dak iż-​żmien tal-​veri Kristjani kollha. Hu qal: “Dawk kollha li huma mmexxijin mill-​ispirtu t’Alla, dawn huma wlied Alla. Għax intom ma rċevejtux spirtu taʼ jasar li qiegħed jikkaġuna biżaʼ mill-​ġdid, imma rċevejtu spirtu t’adozzjoni bħala wlied, b’liema spirtu aħna ngħajtu: ‘Abba, Missier!’ L-​ispirtu nnifsu jagħti xiehda maʼ l-​ispirtu tagħna li aħna t-​tfal t’Alla. Jekk, allura, aħna tfal, aħna wkoll werrieta: werrieta tabilħaqq t’Alla, imma werrieta bi sħab maʼ Kristu, basta nsofru flimkien biex nistgħu wkoll inkunu gglorifikati flimkien.”​—Rum. 1:7; 8:​14-17.

9. “L-​ispirtu nnifsu” kif “jagħti xiehda” maʼ l-​ispirtu taʼ dawk li verament huma wlied Alla?

⁹ Żewġ użijiet tal-​kelma “spirtu” huma hawnhekk miġjubin għall-​attenzjoni tagħna: “L-​ispirtu nnifsu” u “l-​ispirtu tagħna.” Taʼ l-​ewwel huwa l-​forza attiva u inviżibbli t’Alla. Din tispira fit-​tfal spiritwali tiegħu konvinzjoni li huma ġew adottati bħala t-​tfal liberi t’Alla. Dak l-​ispirtu jagħti xiehda wkoll permezz tal-​Kelma mnebbħa t’Alla, il-​Bibbja, li hija bħal ittra persunali għat-​tfal spiritwali tiegħu. (1 Piet. 1:​10-12) Meta dawk li kienu ġew imnisslin mill-​ispirtu qaddis jaqraw dak li l-​Iskrittura tgħid lil dawk li huma wlied spiritwali t’Alla, b’mod xieraq iwieġbu: ‘Dak japplika għalija.’ B’hekk il-​forza attiva t’Alla stess b’diversi modi tagħti xiehda maʼ l-​ispirtu tagħhom, il-​forza motivanti taʼ moħħhom u qalbhom stess, li huma t-​tfal t’Alla. Fi qbil maʼ dak li l-​ispirtu t’Alla b’hekk jindika, imħuħhom u qlubhom jiġu orjentati fuq il-​prospett li jkunu werrieta sħab maʼ Kristu, u huma jaċċettaw ir-​responsabbiltajiet tat-​tfal spiritwali t’Alla.​—Fil. 3:​13, 14.

10. (a) Liema huma xi fatturi li waħedhom ma jidentifikawx lil dak li jkun bħala Kristjan midluk? (b) X’ħarsa jieħdu n-​“ngħaġ oħrajn” rigward posthom fl-​iskop t’Alla?

¹⁰ Huwa dak veru fil-​każ tiegħek? Jekk inhu hekk, għandek privileġġ taʼ l-​għaġeb. Madankollu, ikun żball għal kwalunkwe wieħed li jikkonkludi li minħabba li wieħed ikollu apprezzament akkanit għal affarijiet spiritwali iktar profondi jew hu żeluż fil-​ministeru taʼ l-​għalqa jew għandu mħabba intensa għal ħutu jrid għalhekk ikun Kristjan midluk bl-​ispirtu. Dawk l-​istess affarijiet jikkaratterizzaw lil ħafna min-​“ngħaġ oħrajn.” Il-​qlub tagħhom, ukoll, huma mqanqlin b’dak li jaqraw fl-​Iskrittura rigward il-​werrieta sħab maʼ Kristu, imma ma jippretendux li jitolbu bi dritt għalihom infushom xi ħaġa li Alla ma rriżervax għalihom. (Qabbel Numri 16:​1-40.) Huma jirrikonoxxu l-​iskop oriġinali t’Alla għall-​art u jaħdmu b’apprezzament lejn li jieħdu sehem fih.

JIEĦDU SEHEM B’MOD MISTĦOQQ

11. Min jattendi għall-​kommemorazzjoni annwali tal-​mewt taʼ Ġesù, u għala?

¹¹ Kull sena, fl-​14 taʼ Nisan, wara nżul ix-​xemx, is-​segwaċi midlukin taʼ Ġesù Kristu fil-​partijiet kollha taʼ l-​art jikkommemoraw il-​mewt tiegħu, f’armonija maʼ l-​istruzzjonijiet li hu ta lill-​appostli tiegħu. (Luqa 22:​19, 20) In-​“ngħaġ oħrajn” ukoll jattendu, mhux bħala wħud li jieħdu sehem mill-​ħobż u l-​inbid, imma bħala osservaturi li juru rispett.

12. Uħud mill-​Kristjani bikrin f’Korintu kif kienu qegħdin jonqsu li juru apprezzament xieraq lejn l-​Ikla taʼ Fil-​Għaxija tal-​Mulej?

¹² Dan m’huwiex xi ritwal reliġjuż vojt imma huwa mimli b’tifsir qawwi. Lill-​Kristjani taʼ l-​ewwel seklu f’Korintu, il-​Greċja, li xi wħud minnhom kienu naqsu li juru apprezzament xieraq lejn l-​okkażjoni, l-​appostlu Pawlu kiteb parir serju, billi qal: “Kulmin jiekol il-​ħobża jew jixrob il-​kies tal-​Mulej b’mod mhux mistħoqq se jkun ħati rigward il-​ġisem u d-​demm tal-​Mulej.” X’kien li għamilhom uħud li jieħdu sehem b’mod ‘mhux mistħoqq’? Ma kinux qegħdin jippreparaw erwieħhom fil-​qalb u l-​moħħ b’mod xieraq. Kien hemm firdiet fil-​kongregazzjoni. Ukoll, xi wħud tħanżru fl-​ikel u x-​xorb qabel il-​laqgħa. Ittrattaw l-​Ikla taʼ Fil-​Għaxija tal-​Mulej b’indifferenza. Ma kinux f’kundizzjoni li jagħrfu s-​sinjifikat serju tal-​ħobż u l-​inbid.​—1 Kor. 11:​17-34.

13. X’inhu s-​sinjifikat tal-​ħobż u l-​inbid servuti fil-​Mafkar?

¹³ X’inhu dak is-​sinjifikat? Ma jinstabx f’xi trasformazzjoni taparsi mirakoluża tal-​ħobż u l-​inbid. Kristu bl-​ebda mod m’hu ssagrifikat mill-​ġdid f’kull Mafkar. L-​Iskrittura tistqarr li “Kristu kien offrut darba għaż-​żmien kollu biex iġorr id-​dnubiet taʼ ħafna.” (Eb. 9:28; 10:10; Rum. 6:9) Il-​ħobża bla ħmira u l-​inbid aħmar huma sempliċement emblemi li jirrappreżentaw il-​ġisem litterali li Ġesù ssagrifika u d-​demm litterali li xerred. Imma kemm huma prezzjużi dawn ir-​realtajiet! Il-​ġisem uman bla dnub taʼ Ġesù ġie mogħti sabiex id-​dinja taʼ l-​umanità setgħet ikollha l-​opportunità li tgħix għal dejjem. (Ġwn. 6:51) U d-​demm imxerred tiegħu jservi għal skop doppju​—li jnaddaf mid-​dnub lil dawk il-​bnedmin li jeżerċitaw fidi fih, kif ukoll jagħmel effettiv il-​patt il-​ġdid bejn Alla u l-​kongregazzjoni taʼ Iżrael spiritwali, li hija magħmula minn Kristjani midlukin bl-​ispirtu. (1 Ġwn. 1:7; 1 Kor. 11:25; Gal. 6:​14-16) Huma dawn il-​provvedimenti prezzjużi li jagħmluha possibbli għall-​membri tal-​“merħla ċkejkna” li jkunu ddikjarati twajbin minn Alla, billi attwalment ikollhom perfezzjoni umana kkreditata lilhom. (Luqa 12:32) Dan isir sabiex huma jistgħu jitnisslu mill-​ispirtu qaddis bħala wlied Alla, bil-​prospett li jieħdu sehem maʼ Kristu fis-​Saltna tiegħu tas-​sema. Waqt li kull sena jieħdu sehem mill-​emblemi tal-​Mafkar u b’hekk jagħtu xiehda għat-​tama tagħhom għas-​sema, l-​apprezzament tagħhom talli huma fil-​“patt ġdid” bi Kristu bħala l-​medjatur jiġi mġedded u jsir iktar profond.​—Eb. 8:​6-12.

“AĦNA SE MMORRU MAGĦKOM”

14. (a) In-​“ngħaġ oħrajn” għala ma jiħdux sehem mill-​emblemi tal-​Mafkar, imma x’jantiċipaw bil-​ħerqa? (b) Kif iħarsu huma lejn is-​sħubija tagħhom mal-​fdal tal-​werrieta tas-​Saltna?

¹⁴ In-​“ngħaġ oħrajn” jagħrfu kif Jehovah kien qiegħed jittratta maʼ l-​uħud midlukin tiegħu, u ngħaqdu magħhom, billi qalu: “Aħna se mmorru magħkom, għax smajna li Alla hu magħkom.” (Żakk. 8:​20-23) Mhux talli jiltaqgħu flimkien imma wkoll jaqsmu flimkien f’li jagħmlu magħrufa l-​aħbar tajba tas-​Saltna fl-​art abitata kollha. Madankollu, in-​“ngħaġ oħrajn” m’humiex meħudin fil-​“patt ġdid” maʼ Iżrael spiritwali u lanqas m’huma inklużi fil-​“patt . . . għal saltna” magħmul minn Ġesù maʼ dawk magħżulin biex jaqsmu miegħu l-​ħajja fis-​sema, u għalhekk, kif jixraq, ma jiħdux sehem mill-​emblemi tal-​Mafkar. (Luqa 22:​20, 29) Imma hekk kif il-​“patt ġdid” jilħaq l-​iskop tiegħu, billi jiġbor l-​aħħar membri tal-​“merħla ċkejkna” għas-​Saltna tas-​sema, in-​“ngħaġ oħrajn” jirrealizzaw li dan jindika li l-​barkiet li se jirċievu fuq l-​art permezz taʼ dik is-​Saltna qegħdin joqorbu. Huma jgħodduh privileġġ, matul l-​“aħħar jiem,” li jaqdu magħqudin mal-​fdal leali taʼ werrieta tas-​Saltna.

[Nota taʼ taħt]

Diskussjoni Bħala Reviżjoni

● Għala tant mill-​Iskrittura Kristjana Griega jidderieġi l-​attenzjoni lejn it-​tama tas-​sema?

● Dawk li ġew imnisslin bħala wlied Alla kif jafuh dan? X’inhi t-​tifsira taʼ l-​emblemi tal-​Mafkar li minnhom jieħdu sehem?

● In-​“ngħaġ oħrajn” kif juru li huma verament magħqudin mal-​“merħla ċkejkna”?