Kunu Wħud Li Tagħmlu
—Mhux Semmiegħa Biss
1 Il-Kristjani veri llum idaħħlu f’qalbhom il-parir tal-Bibbja biex ikunu wħud li jagħmlu l-kelma, mhux jisimgħuha biss. (Ġak. 1:22) Dan ipoġġihom f’kuntrast qawwi maʼ dawk li, għalkemm jgħidu li huma Kristjani, jagħtu lil Alla servizz bix-xofftejn biss. (Isa. 29:13) Ġesù stqarr b’mod ċar li dawk biss li qegħdin jagħmlu r-rieda t’Alla se jsalvaw.—Matt. 7:21.
2 Qima mingħajr xogħlijiet kif irid Alla ma tfisser xejn. (Ġak. 2:26) Mela aħna rridu nistaqsu lilna nfusna, ‘Ix-xogħlijiet tiegħi kif jagħtu prova li l-fidi tiegħi hija ġenwina? X’juri li jien verament ngħix fi qbil maʼ dak li nemmen? Kif nistaʼ nimita lil Ġesù iktar bis-sħiħ?’ Tweġibiet sinċieri għal dawn il-mistoqsijiet se jgħinuna naraw xi progress għamilna jew għad baqgħalna x’nagħmlu f’li nwettqu r-rieda t’Alla.
3 Bħala segwaċi fil-passi taʼ Ġesù, irid ikollna l-istess mira primarja fil-ħajja bħal dik espressa mis-salmista: “F’Alla aħna se noffru tifħir il-jum kollu, u għal żmien indefinit lil ismek se nfaħħru.” (Salm 44:8) Il-Kristjanità hija mod taʼ ħajja li turi lilha nfisha kuljum u f’kull ħaġa li nagħmlu. X’sodisfazzjon insibu hekk kif nuru fl-attivitajiet kollha tagħna x-xewqa mill-qalb li nfaħħru lil Jehovah!—Fil. 1:11.
4 Li Nfaħħru Lil Jehovah Jinvolvi Iktar Milli Ngħixu Ħajja Retta: Li kieku kondotta tajba kienet dak kollu li Alla jeħtieġ, konna sempliċement nikkonċentraw f’li nirfinaw il-personalità tagħna. Madankollu, il-qima tagħna tinvolvi wkoll li niddikjaraw barra l-pajjiż l-eċċellenzi taʼ Jehovah u li nagħmlu dikjarazzjoni pubblika għal ismu!—Eb. 13:15; 1 Piet. 2:9.
5 L-ippridkar pubbliku taʼ l-aħbar tajba huwa wieħed mill-iktar xogħlijiet importanti li nwettqu. Ġesù ddedika lilu nnifsu għal dan ix-xogħol għax kien jaf li dan kien ifisser ħajja taʼ dejjem għal dawk li kienu se jagħtu widen. (Ġwann 17:3) Illum il-“ministeru tal-kelma” m’hu xejn inqas importanti; huwa l-uniku mezz li bih in-nies jistgħu jiġu salvati. (Atti 6:4; Rum. 10:13) Billi nirrealizzaw x’benefiċċji hemm li jeffettwaw lil ħafna, nistgħu napprezzaw għala Pawlu widdibna biex ‘nippridkaw il-kelma,’ u biex ‘inkunu qegħdin nagħmlu dan b’urġenza.’—2 Tim. 4:2.
6 Sa liema punt għandu t-tifħir lil Jehovah jokkupa l-ħajjiet tagħna? Is-salmista qal li dan kien f’moħħu l-ġurnata kollha. Ma nħossuniex aħna hekk? Iva, u aħna se nħarsu lejn kull kuntatt maʼ persuna oħra bħala okkażjoni potenzjali biex nitkellmu dwar l-isem taʼ Jehovah. Se nfittxu opportunitajiet addattati biex nidderieġu l-konversazzjoni tagħna lejn affarijiet spiritwali. Se nagħmlu wkoll ħilitna biex nieħdu sehem regolarment fl-attivitajiet tas-servizz taʼ l-għalqa organizzati mill-kongregazzjoni. Dawk li ċ-ċirkostanzi tagħhom jippermettu jistgħu jikkunsidraw bis-serjetà s-servizz taʼ pijunier, għax dan jgħinna biex inpoġġu x-xogħol taʼ l-ippridkar fuq quddiem fil-ħajja tagħna kuljum. Il-Kelma t’Alla tassigurana li billi nkunu wħud li b’mod persistenti nagħmlu r-rieda t’Alla, se nkunu henjin.—Ġak. 1:25.