Kun Moħħok f’Loku—It-Tmiem Huwa Qrib

“[I]t-tmiem tal-​affarijiet kollha qorob. Kunu moħħkom f’loku, għalhekk, u oqogħdu għassa rigward it-​talb.”—1 PIETRU 4:7.

1. (a) Wieħed mexxej reliġjuż u s-​segwaċi tiegħu liema diżappunt ġarrbu? (b) Minħabba li ċerti stennijiet ma ġewx imwettqin, liema mistoqsijiet jistgħu jiġu mistoqsijin?

“IRĊEVEJT sejħa mingħand Alla matul it-​talba finali tal-​lejla. Hu qal li 116,000 persuna kellhom jitilgħu fis-​sema u li l-​oqbra taʼ 3.7 miljuni kredenti mejtin kienu se jinfetħu lejn is-​sema.” Hekk qal wieħed mexxej tal-​Missjoni għall-​Jiem li Ġejjin lejlet it-​28 t’Ottubru, 1992, jum il-​kontijiet ipprofetizzat minnhom. Madankollu, hekk kif gerbeb id-​29 t’Ottubru, lanqas persuna waħda ma kienet telgħet lejn is-​sema, u ebda qabar tal-​mejtin ma kien infetaħ. Minflok ma ġew maħtufin ’il fuq f’tgħannieqa lejn is-​sema, dawk il-​kredenti taʼ jum il-​kundanna fil-​Korea raw biss jum ieħor jisbaħ. Dati taʼ jum il-​kundanna ġew u marru, imma dawk li jisħqu l-​kundanna jibqgħu bla mittiefsa. X’għandhom jagħmlu l-​Kristjani? Għandhom jieqfu jemmnu li t-​tmiem qiegħed joqrob b’mod imgħaġġel?

2. Min tkellem mal-​appostli dwar jum futur taʼ ħaqq, u taħt liema ċirkostanzi saru jafu b’dan?

² Biex inwieġbu, ejjew niftakru l-​okkażjoni meta Ġesù kien f’konversazzjoni privata mad-​dixxipli tiegħu. Hemm, fid-​distrett taʼ Ċesarea Filippi, lejn il-​Grigal tal-​Baħar tal-​Galilija, bl-​isfond drammatiku tal-​Muntanja Ħermon maestuża, huma semgħuh igħid ċar u tond li kellu jiġi maqtul. (Mattew 16:21) Kliem ieħor taʼ min jaħseb fuqu kellu jsegwi. Wara li spjegalhom illi li tkun dixxiplu jfisser li tgħix ħajja taʼ sagrifiċċju kontinwu tiegħek innifsek, Ġesù wissa: “Bin il-​bniedem iddestinat li jiġi fil-​glorja taʼ Missieru mal-​anġli tiegħu, u mbagħad se jħallas lil kull wieħed skond l-​imġieba tiegħu.” (Mattew 16:27) Ġesù tkellem dwar miġja futura. F’din l-​okkażjoni, madankollu, kellu jkun Imħallef. F’dak iż-​żmien kollox kien se jiddependi minn jekk kienx se jsib lil xi ħadd isegwih fedelment jew le. Il-​ġudizzju taʼ Ġesù kellu jkun ibbażat fuq l-​imġieba, għandu kemm għandu ġid materjali dak li jkun. Dan il-​fatt id-​dixxipli tiegħu kellhom iżommuh sew f’moħħhom. (Mattew 16:​25, 26) Għalhekk, huwa Ġesù Kristu nnifsu li jgħid lis-​segwaċi tiegħu biex ifittxu l-​miġja glorjuża tiegħu, bil-​ġudizzju tagħha.

3. Ġesù kif ta stampa taċ-​ċertezza tal-​miġja futura tiegħu?

³ Dak li Ġesù mbagħad igħid jagħti stampa taċ-​ċertezza tal-​miġja futura tiegħu. B’mod awtorevoli jistqarr: “Verament ingħidilkom li hemm xi wħud minn dawk bil-​wieqfa hawn li mhux se jduqu l-​mewt assolutament sakemm l-​ewwel jaraw lil Bin il-​bniedem ġej fis-​saltna tiegħu.” (Mattew 16:28) Dawn il-​kelmiet twettqu sitt ijiem wara. Viżjoni brillanti taʼ Ġesù trasfigurat tgħaġġeb lid-​dixxipli intimi tiegħu. Huma attwalment jaraw lil wiċċ Ġesù jiddi bħax-​xemx u lil ħwejġu bojod ilellxu. It-​trasfigurazzjoni kienet ħarsa bil-​quddiem tal-​glorja u s-​Saltna taʼ Kristu. X’konferma li ssaħħaħ il-​profeziji tas-​Saltna! X’inċentiv qawwi għad-​dixxipli biex ikunu moħħhom f’loku!—2 Pietru 1:​16-19.

Għala Huwa Urġenti li Tkun Moħħok f’Loku

4. Il-​Kristjani għala jridu jkunu attenti spiritwalment għall-​miġja tiegħu?

⁴ Inqas min sena wara, insibu lil Ġesù bil-​qiegħda fuq il-​Muntanja taż-​Żebbuġ, jerġaʼ f’konversazzjoni privata mad-​dixxipli tiegħu. Hekk kif huma jiċċassaw lejn il-​belt taʼ Ġerusalemm, hu jispjega x’se jkun is-​sinjal tal-​preżenza futura tiegħu u mbagħad iwissi: “Ibqgħu għassu, għalhekk, għaliex ma tafux f’liema jum ġej il-​Mulej tagħkom.” Is-​segwaċi tiegħu jridu jkunu għajnejhom miftuħin il-​ħin kollu għaliex ħin il-​miġja tiegħu mhux magħruf. Iridu jkunu dejjem għal-​lest għalih.—Mattew 24:42.

5. Il-​ħtieġa taʼ li wieħed joqgħod għassa kif tistaʼ tingħata stampa tagħha?

⁵ Fil-​manjiera tal-​miġja tiegħu, il-​Mulej jixbah lil ħalliel. Hu jissokta jgħid: “Imma kunu afu ħaġa waħda, li kieku l-​inkwilin kien jaf f’liema għassa kien ġej il-​ħalliel, kien ikun baqaʼ mqajjem u ma ħalliex lil daru tiġi misruqa.” (Mattew 24:43) Ħalliel li jisraq mid-​djar ma jagħmilx avviż biex jinforma lill-​inkwilin meta se jiġi; l-​arma ewlenija tiegħu hija s-​sorpriża. Għalhekk, l-​inkwilin irid ikun għassa l-​ħin kollu. Madankollu, għall-​Kristjan leali, viġilanza sħiħa ma ssirx minħabba xi tħassib ikkaġunat mill-​biżaʼ. Anzi, hija mqanqla minn stennija ħerqana għall-​miġja taʼ Kristu fil-​glorja biex tagħti bidu għal Millennju taʼ paċi.

6. Aħna għala rridu nkunu moħħna f’loku?

⁶ Minkejja l-​għassa kollha, ħadd qatt ma jistaʼ jiffigura minn qabel il-​jum eżatt taʼ meta għandu jiġi. Ġesù jgħid: “Minħabba f’dan intom ukoll uru li intom lesti, għaliex f’siegħa li ma taħsbux li hi, ġej Bin il-​bniedem.” (Mattew 24:44) Għalhekk hemm il-​ħtieġa taʼ moħħ f’loku. Jekk Kristjan kellu jaħseb li f’ċertu jum, Kristu ma kellux jiġi, forsi dak ikun sewwa sew il-​jum li fih jiġi! M’għandniex xi ngħidu, Kristjani leali, b’intenzjoni tajba, fil-​passat ipprovaw b’mod sinċier li jbassru meta kellu jiġi t-​tmiem. Madankollu, it-​twissija taʼ Ġesù ntweriet għal darba wara l-​oħra li hi vera: “Dwar dak il-​jum u s-​siegħa ħadd ma jaf, la l-​anġli tas-​smewwiet u lanqas l-​Iben, imma l-​Missier biss.”—Mattew 24:36.

7. Biex inkunu segwaċi taʼ Kristu, kif irridu ngħixu l-​ħajjiet tagħna?

⁷ X’għandna, għalhekk, nikkonkludu? Li biex inkunu segwaċi taʼ Kristu, irridu ngħixu dejjem nemmnu li t-​tmiem taʼ din is-​sistema mill-​agħar hu imminenti.

8. Liema ħaġa kienet għelm tal-​Kristjani mill-​jiem l-​iktar bikrin tal-​Kristjanità?

⁸ Attitudni bħal din minn dejjem kienet xi ħaġa li timmarkahom lill-​Kristjani, bħalma jagħrfu kittieba tal-​istorja sekulari u studjużi tal-​Bibbja. Per eżempju, l-​edituri taʼ The Translator’s New Testament, taħt il-​kelma “Jum” fil-​glossarju tagħhom, jistqarru: “Il-​Kristjani taʼ żminijiet it-​T[estment il-​]Ġ[did] għexu fi stennija għall-​Jum (jiġifieri ż-​żmien) meta d-​dinja preżenti bil-​kruha u l-​ħażen kollu tagħha kellha tinġieb fi tmiem u Ġesù kellu jirritorna lejn l-​art biex jiġġudika lill-​bnedmin kollha, jinawgura era ġdida taʼ paċi u jidħol fl-​Istat taʼ Sid tiegħu fuq id-​dinja kollha.” L-​Encyclopædia Britannica tinnota: “L-​espansjoni globali unika tal-​Kristjanità hi relatata direttament mal-​istennija Kristjana taʼ żmien it-​tmiem, fil-​forma taʼ stennija imminenti tar-​ritorn taʼ Kristu. L-​istennija Kristjana taʼ żmien it-​tmiem qatt ma kkonsistiet sempliċement f’xenqa passiva għas-​Saltna t’Alla li ġejja.”

Xi Jfisser li Tkun Moħħok f’Loku

9. Għalkemm xi wħud mill-​istennijiet taʼ Pietru dwar il-​Messija ma kinux korretti, hu għala setaʼ jibqaʼ fiduċjuż?

⁹ L-​appostlu Pietru, xi 30 sena wara dawk il-​konversazzjonijiet intimi li Ġesù kellu mad-​dixxipli l-​iktar qrib tiegħu, ma għejjiex jistenna biex jiġi t-​tmiem. Avolja l-​istennijiet inizzjali tiegħu u tad-​dixxipli sħabu dwar il-​Messija ma kinux korretti, hu baqaʼ fiduċjuż li l-​imħabba u l-​qawwa taʼ Jehovah kienu jiggarantixxu t-​twettieq tat-​tama tagħhom. (Luqa 19:11; 24:21; Atti 1:6; 2 Pietru 3:​9, 10) Hu jolqot nota li tidwi l-​ħin kollu tul l-​Iskrittura Griega meta jgħid: “[I]t-tmiem tal-​affarijiet kollha qorob.” Imbagħad iħeġġeġ lil Kristjani sħabu: “Kunu moħħkom f’loku, għalhekk, u oqogħdu għassa rigward it-​talb.”—1 Pietru 4:7.

10. (a) Xi jfisser li tkun moħħok f’loku? (b) X’inhu nvolut f’li tara l-​affarijiet fir-​relazzjoni xierqa tagħhom mar-​rieda t’Alla?

¹⁰ Li tkun ‘moħħok f’loku’ ma jfissirx li jkun jilħaqlek mill-​ħarsa tad-​dinja. Jehovah igħid: “Jien se nagħmel lill-​għerf tal-​irġiel għorrief igħib, u l-​intelliġenza tal-​irġiel intellettwali se nimpalaha fil-​ġenb.” (1 Korintin 1:19) Il-​kelma li juża Pietru tistaʼ tfisser “li tkun moħħok f’sensik.” Dan li tkun spiritwalment f’sensik għandu x’jaqsam mal-​qima tagħna. Għalhekk, billi nkunu sodi fil-​moħħ, aħna naraw l-​affarijiet fir-​relazzjoni xierqa tagħhom mar-​rieda taʼ Jehovah; nifhmu liema affarijiet huma importanti u liema m’humiex. (Mattew 6:​33, 34) Iffaċċjati mit-​tmiem imminenti, ma nitkaxkrux fi stil taʼ ħajja sfrenata; lanqas m’aħna indifferenti għall-​perijodu taʼ żmien li qegħdin ingħixu fih. (Qabbel Mattew 24:​37-39.) Anzi, aħna mmexxijin mill-​moderazzjoni u bilanċ taʼ ħsieb, dispożizzjoni, u kondotta, li nesprimuhom l-​ewwel lejn Alla (“għassa rigward it-​talb”) u mbagħad lejn ġarna (“ħa jkollkom imħabba intensa lejn xulxin”).—1 Pietru 4:​7, 8.

11. (a) Xi jfisser li nkunu “mġeddin fil-​forza li qiegħda tħaddem lil moħħ[na]”? (b) Forza mentali ġdida kif tgħinna biex nieħdu deċiżjonijiet tajbin?

¹¹ Li nkunu moħħna f’loku jinvolvi li nkunu ġejna “mġeddin fil-​forza li qiegħda tħaddem lil moħħ[na].” (Efesin 4:23) Għala mġeddin? Peress li writna l-​imperfezzjoni u ngħixu f’ambjent midneb, moħħna hu ddominat minn tendenza li hi opposta għall-​ispiritwalità. Dik il-​forza l-​ħin kollu timbotta ħsibijiet u inklinazzjonijiet f’direzzjoni materjalistika u egoista. Għalhekk, meta wieħed isir Kristjan, jeħtieġ forza ġdida, jew attitudni mentali dominanti, li se timbotta l-​ħsibijiet tiegħu fid-​direzzjoni t-​tajba, id-​direzzjoni spiritwali, lejn li jkun lest li jissagrifika lilu nnifsu. B’hekk, meta teżisti għażla, per eżempju, fl-​edukazzjoni, fil-​karriera, fl-​impjieg, fid-​divertiment, fir-​rikreazzjoni, fl-​istil tal-​ilbies, jew tkun xi tkun, l-​ewwel inklinazzjoni tiegħu se tkun li jikkunsidra l-​ħaġa minn ħarsa spiritwali minflok minn waħda tal-​laħam u egoista. Din l-​attitudni mentali ġdida tagħmilha eħfef biex wieħed jiddeċiedi l-​affarijiet b’moħħ f’loku u bil-​konoxxenza li t-​tmiem hu qrib.

12. Kif nistgħu nibqgħu “f’saħħit[na] fil-​fidi”?

¹² Li nkunu moħħna f’loku jimplika li ninsabu f’saħħitna spiritwalment. Kif nistgħu aħna nibqgħu “f’saħħit[na] fil-​fidi”? (Titus 2:2) Irridu nitimgħu lil moħħna x-​xorta tajba taʼ ikel. (Ġeremija 3:15) Dieta soda fuq il-​Kelma t’Alla taʼ verità appoġġjata mill-​operazzjoni tal-​ispirtu qaddis tiegħu se tgħinna nżommu l-​bilanċ spiritwali tagħna. Għalhekk, regolarità fl-​istudju persunali, kif ukoll fis-​servizz tal-​għalqa, fit-​talb, u fis-​sħubija Kristjana, hija vitali.

Kif il-​Moħħ f’Loku Jissalvagwardjana

13. Li jkollna moħħ f’loku kif jissalvagwardjana milli nikkommettu żballji taʼ bluha?

¹³ Moħħ f’loku jistaʼ jissalvagwardjana milli nikkommettu xi żball taʼ bluha li jistaʼ jiswielna l-​ħajja taʼ dejjem tagħna. Dan kif inhu possibbli? L-​appostlu Pawlu jitkellem dwar ‘il-​liġi tal-​moħħ.’ Għal wieħed li hu f’saħħtu fil-​fidi, dik il-​liġi tal-​moħħ hi ggvernata minn xi ħaġa li jitgħaxxaq biha, jiġifieri “l-​liġi t’Alla.” Veru, “[i]l-liġi tad-​dnub” tiggwerra kontra l-​liġi tal-​moħħ. Madankollu, il-​Kristjan jistaʼ joħroġ rebbieħ bil-​għajnuna taʼ Jehovah.—Rumani 7:​21-25.

14, 15. (a) Liema żewġ influwenzi jissieltu biex jikkontrollaw il-​moħħ? (b) Kif nistgħu aħna nirbħu l-​battalja tal-​moħħ?

¹⁴ Pawlu jkompli billi jiġbed kuntrast qawwi bejn il-​moħħ iddominat mil-​laħam midneb, li jiffoka fuq ħajja taʼ paxximent għalih innifsu, u l-​moħħ iddominat mill-​ispirtu t’Alla, li jiffoka fuq ħajja taʼ sagrifiċċju tiegħu nnifsu fis-​servizz lil Jehovah. Pawlu jikteb f’​Rumani 8:​5-7: “Dawk li huma fi qbil mal-​laħam jitfgħu l-​imħuħ tagħhom fuq l-​affarijiet tal-​laħam, imma dawk fi qbil mal-​ispirtu fuq l-​affarijiet tal-​ispirtu. Għax li tieħu ħsieb il-​laħam ifisser mewt, imma li tieħu ħsieb l-​ispirtu jfisser ħajja u paċi; għaliex li tieħu ħsieb il-​laħam ifisser għadwa maʼ Alla, għax m’huwiex sottomess lejn il-​liġi t’Alla, lanqas, fil-​fatt, ma jistaʼ jkun.”

¹⁵ Pawlu, fil-​vers 11, imbagħad jispjega kif il-​moħħ li jikkopera mal-​ispirtu qaddis jirbaħ il-​battalja: “Jekk, issa, l-​ispirtu taʼ dak li qajjem lil Ġesù mill-​imwiet igħammar fikom, dak li qajjem lil Kristu Ġesù mill-​imwiet se jagħmel ukoll lill-​iġsma mortali tagħkom ħajjin permezz tal-​ispirtu tiegħu li jgħammar fikom.”

16. Li jkollna moħħ f’loku jipproteġina minn liema tħajjir?

¹⁶ Għalhekk, billi nkunu moħħna f’loku, m’aħniex se niġu sseduċuti mit-​tħajjir dejjem preżenti taʼ din id-​dinja, li hi kkaratterizzata minn li wieħed ipaxxi lilu nnifsu bla rażan f’kull xorta taʼ pjaċiri, affarijiet materjali, u kondotta sesswali ħażina. Il-​moħħ f’loku tagħna se jgħidilna biex ‘naħarbu miż-​żina’ u niskansaw il-​konsegwenzi diżastrużi tagħha. (1 Korintin 6:18) L-​attitudni mentali f’lokha tagħna se tqanqalna biex inpoġġu l-​interessi tas-​Saltna l-​ewwel u se tgħasses lill-​ħsieb tagħna meta niġu ttantati b’offerti taʼ karriera sekulari li tistaʼ ddgħajjef ir-​relazzjoni tagħna maʼ Jehovah.

17. Oħt li hi pijuniera kif uriet moħħ f’loku meta kienet iffaċċjata b’obbligi finanzjarji?

¹⁷ Per eżempju, f’pajjiż tropikali fix-​Xlokk tal-​Asja, hemm oħt żagħżugħa li żammet l-​interessi tas-​Saltna fl-​ewwel post f’moħħha. Kienet rawmet imħabba għas-​servizz full-​time. F’dak il-​pajjiż il-​biċċa l-​kbira tal-​impjiegi jeħtieġu sitta jew sebat ijiem taʼ xogħol full-​time. Wara li ggradwat mill-​università, missierha, li ma kienx wieħed mix-​Xhieda taʼ Jehovah, ippretenda li taqlaʼ ħafna flus għall-​familja. Imma peress li kellha xewqa qawwija biex tkun pijuniera, hi sabet impjieg part-​time u bdiet fis-​servizz taʼ pijuniera. Dan għaddab lil missierha, li heddidha li jixħet ħwejjiġha f’nofs taʼ triq. Peress li kien jilgħabhom, kellu djun kbar, u ppretenda li bintu tħallas id-​djun tiegħu. Ħuha ż-​żgħir kien qiegħed jistudja fl-​università, u minħabba fid-​djun, ma kienx hemm flus biex jitħallsu l-​miżati tat-​tagħlim tiegħu. Ħuha ż-​żgħir wiegħed li jekk hi tgħinu, hu kien se jieħu ħsieb tal-​familja meta jibda jaħdem. Qalbha kienet maqsuma bejn l-​imħabba tagħha lejn ħuha u mħabbitha għas-​servizz taʼ pijuniera. Wara li qieset il-​ħaġa bir-​reqqa, hi ddeċidiet li tibqaʼ bħala pijuniera u tfittex impjieg differenti. Bi smigħ għat-​talbiet tagħha, hi sabet impjieg tajjeb fejn mhux biss setgħet tgħin lill-​familja tagħha u lil ħuha finanzjarjament imma wkoll tkompli bl-​ewwel imħabba tagħha, is-​servizz taʼ pijuniera.

Fittex il-​Għajnuna taʼ Jehovah f’li Żżomm Moħħ f’Loku

18. (a) Xi nies għala jistgħu jibdew jaqtgħu qalbhom? (b) Liema skritturi jistgħu jfarrġu lil dawk li jaqtgħu qalbhom?

¹⁸ Xi segwaċi taʼ Kristu forsi jsibuha diffiċli li jżommu moħħhom f’loku. Is-​sabar tagħhom forsi beda jmajna minħabba li din is-​sistema preżenti ħażina taʼ affarijiet qiegħda ddum iktar milli ppretendew huma. Forsi jibdew jaqtgħu qalbhom minħabba f’hekk. Madankollu, it-​tmiem se jiġi. Jehovah iwiegħed dan. (Titus 1:2) Hekk ukoll se tiġi l-​Ġenna tal-​art imwiegħda tiegħu. Jehovah jiggarantiha. (Rivelazzjoni 21:​1-5) Meta d-​dinja ġdida fil-​fatt tiġi, se jkun hemm “siġra tal-​ħajja” għal dawk kollha li jkunu żammew moħħhom f’loku.​—Proverbji 13:12.

19. Il-​moħħ f’loku kif jistaʼ jinżamm?

¹⁹ Kif nistgħu aħna nżommu moħħna f’loku? Fittex il-​għajnuna taʼ Jehovah. (Salm 54:4) Żomm qrib tiegħu. Kemm aħna ferħanin li Jehovah jixtieq l-​intimità tagħna! “Ersqu qrib lejn Alla, u hu se jersaq qrib lejkom,” jikteb id-​dixxiplu Ġakbu. (Ġakbu 4:8) Pawlu jgħid: “Dejjem ifirħu fil-​Mulej. Għal darb’oħra se ngħid, Ifirħu! Ħallu s-​sens tar-​raġuni tagħkom isir magħruf mill-​bnedmin kollha. Il-​Mulej qrib. Tkunu anzjużi fuq xejn, imma f’kollox bit-​talb u bit-​tħannin flimkien maʼ radd il-​ħajr ħalli jkunu l-​petizzjonijiet tagħkom imgħarrfin lil Alla; u l-​paċi t’Alla li tisboq kull ħsieb se tgħasses lil qlubkom u l-​qawwiet mentali tagħkom permezz taʼ Kristu Ġesù.” (Filippin 4:​4-7) U meta t-​tagħbijiet taʼ din is-​sistema taʼ affarijiet moribonda jidhru li huma kbar wisq biex tibqaʼ ġġorrhom, ixħethom fuq Jehovah, u hu nnifsu se jsostnik.​—Salm 55:22.

20. F’liema korsa għandna nibqgħu sejrin, skond 1 Timotew 4:10?

²⁰ Iva, it-​tmiem huwa qrib, u għalhekk kun moħħok f’loku! Kien parir tajjeb 1,900 sena ilu; huwa parir vitali llum. Ejjew inkomplu nużaw il-​fakultajiet mentali f’lokhom tagħna biex infaħħru lil Jehovah hekk kif hu jkompli jiggwidana biex nibqgħu ħajjin fid-​dinja ġdida tiegħu.​—1 Timotew 4:10.

Kif Twieġeb Int?

◻ Il-​moħħ f’loku x’inhu?

◻ Għala huwa daqshekk urġenti li jkollok moħħ f’loku?

◻ Kif nistgħu niġu mġeddin fil-​forza li qiegħda tħaddem lil moħħna?

◻ Liema battalja kostanti rridu niġġieldu f’imħuħna?

◻ Il-​moħħ f’loku kif inżommuh?

[Stampa f’paġna 15]

Billi nkunu moħħna f’loku, m’aħniex se niġu mwaqqgħin bit-​tħajjir tad-​dinja