Int se Tkun Hemm?
1 Wieħed Xhud li ilu jaqdi għal żmien twil darba qal: “Jekk titlef l-ewwel jum tal-konvenzjoni, diġà tkun tlift wisq!” Għala ħassu hekk? Għax l-ewwel jum hu l-bidu taʼ pranzu spiritwali abbundanti li l-organizzazzjoni taʼ Jehovah tkun ħejjiet għalina. (Is. 25:6) Li nkunu hemmhekk mill-bidunett juri li aħna naqblu mas-sentimenti tas-salmista: “Fraħt meta qaluli: ‘Sejrin f’dar il-Mulej!’”—Salm 122:1.
2 Madankollu, f’xi Konvenzjonijiet Distrettwali intitolati “Il-Kelma Profetika t’Alla” li saru s-sena l-oħra, l-attendenza tal-Ġimgħa kienet sostanzjalment inqas minn dik tas-Sibt u l-Ħadd. Dan ifisser li persentaġġ kbir minn ħutna ma bbenefikawx għax naqsu li jisimgħu partijiet tal-konvenzjoni li ppreżentaw tagħrif vitali dwar il-kelma profetika. Huma tilfu wkoll sħubija pjaċevoli maʼ kredenti sħabhom.
3 Tħallix ix-Xogħol Sekulari Jfixklek: Tħassib li dak li jkun setaʼ jitlef xogħlu tistaʼ tkun ir-raġuni għala xi wħud m’attendewx il-Ġimgħa. Madankollu, ħafna Xhieda sabu li l-imgħallmin tagħhom ikunu lesti li jikkooperaw magħhom f’din il-kwistjoni jekk jistaqsu għal-leave minn ħafna qabel. Wieħed mgħallem tant baqaʼ impressjonat bid-determinazzjoni soda taʼ waħda oħt pijuniera biex tattendi għal-laqgħat tal-kongregazzjoni u l-assembleat kollha, li hu qattaʼ ġurnata sħiħa fil-konvenzjoni li hi kienet attendiet!
4 Int m’għandekx taqtagħha li l-imgħallem tiegħek m’hux se jkun lest li jagħtik il-leave, u lanqas m’għandek tikkonkludi li ma jimpurtax jekk titlef jum wieħed mill-konvenzjoni. B’konvinzjoni mill-qalb, ipprepara biex lill-imgħallem tiegħek turih bit-tattika mill-Iskrittura għala li tattendi għall-konvenzjoni hija parti importanti mill-qima tiegħek. (Lhud 10:24, 25) Imbagħad poġġi fiduċja sħiħa fil-wegħdi taʼ Jehovah, billi tirrikonoxxi li dak kollu li teħtieġ materjalment se jiġi provdut lilek jekk iżżomm il-bżonnijiet spiritwali bħala l-iktar ħaġa importanti f’ħajtek.—Mt. 6:33; Lhud 13:5, 6.
5 Il-fattur fundamentali huwa l-apprezzament għall-“affarijiet iktar importanti.” (Flp. 1:10, 11, New World Translation; Salm 27:4) Dan iqanqalna biex nagħmlu pjanijiet sabiex nibbenefikaw bis-sħiħ minn dan il-provvediment vitali li ġej mingħand Jehovah. Ibda agħmel il-pjanijiet definiti tiegħek minn issa, u kun determinat li int se tkun hemm it-tlett ijiem kollha!