Tqanqlek Qalbek biex Tagħmel Sagrifiċċji għall-​Verità?

¹ L-​apprezzament għal dak li Ġesù Kristu wettaq mingħajr egoiżmu għall-​umanità għandu jqanqal lilna lkoll biex nagħmlu sagrifiċċji billi nużaw il-​kapaċitajiet, l-​enerġiji, u s-​saħħa tagħna. L-​Iskrittura titlob bil-​ħniena: “Offru ġisimkom b’sagrifiċċju ħaj, qaddis, jogħġob lil Alla, jiġifieri l-​qima spiritwali tagħkom.” (Rum. 12:1) Li kultant żmien teżamina lilek innifsek se jgħinek tara jekk intix qed turi din l-​attitudni bis-​sħiħ skond kemm jippermettu ċ-​ċirkustanzi persunali tiegħek.

² F’li Ssegwi Għarfien Bibliku: Warrabt ħin għal qari u studju persunali tal-​Bibbja fuq bażi regulari? Iżżomm maʼ dik l-​iskeda? Hija fir-​rutina tiegħek li tipprepara sew għal-​laqgħat tal-​kongregazzjoni? Jekk int kap tal-​familja, għandek studju regulari tal-​Bibbja mal-​familja tiegħek? Biex tagħmel dawn l-​affarijiet jistaʼ jirrikjedi li tissagrifika l-​ħin li tqattaʼ quddiem it-​televixin jew il-​kompjuter jew f’affarijiet oħrajn. Madankollu, kemm ikun sagrifiċċju żgħir dan, meta taf li l-​ħin li tqattaʼ mal-​Kelma t’Alla se jgħinek tasal għall-​ħajja taʼ dejjem!—Ġw. 17:3.

³ Fit-​Taħriġ taʼ Wliedek: L-​aħjar żmien biex wieħed jibda jitgħallem jagħmel sagrifiċċji hu minn ċkunitu. Għallem lil uliedek li bħalma hemm ħin għal-​logħob, irid ikun hemm ħin ukoll għax-​xogħol u għall-​attivitajiet teokratiċi. (Efes. 6:4) Agħtihom jagħmlu xi xogħol tad-​dar li jkun hemm bżonn. Stabbilixxi skeda regulari biex tieħu sehem magħhom fil-​ministeru. Saħħaħ l-​istruzzjoni tiegħek permezz taʼ l-​eżempju tajjeb tiegħek stess.

⁴ Fl-​Attivitajiet tal-​Kongregazzjoni: Kongregazzjoni ssir aħjar meta kull membru jkun lest li jagħmel sagrifiċċji sabiex iwettaq affarijiet għall-​ġid taʼ kulħadd. (Lhud 13:16) Tistaʼ tqattaʼ iktar ħin fl-​ippridkar tas-​Saltna u fix-​xogħol taʼ li tagħmel dixxipli? Tistaʼ toffri minn jeddek biex tgħin lill-​morda jew lil dawk imdaħħlin fiż-​żmien, forsi billi ġġibhom miegħek għal-​laqgħat?

⁵ Qabel m’għamel l-​aħħar sagrifiċċju fil-​ħajja tiegħu bħala bniedem, Ġesù wissa lid-​dixxipli tiegħu biex jiffokaw għajnejhom fuq l-​interessi tas-​Saltna, billi jpoġġu l-​affarijiet l-​oħra kollha fil-​ħajja fit-​tieni post. (Mt. 6:33) Se nkunu ferħanin l-​iktar jekk ikollna qalb li tqanqalna nagħmlu sagrifiċċji hekk kif inkomplu naqdu lil Jehovah bil-​ferħ.