Privileġġ Preżentat liż-Żgħar
1 Ħafna li llum huma ġenituri jiftakru b’affezzjoni privileġġ li gawdew bħala tfal li trabbew fil-verità—l-attività tal-Ġurnata tar-Rivisti. Dan ix-xogħol inbeda fl-1949 fil-kongregazzjonijiet kollha. Darba fil-ġimgħa, kulħadd kellu jikkonċentra f’li jqassam It-Torri taʼ l-Għassa u Stenbaħ! fit-toroq, minn dar għal dar, minn ħanut għal ieħor, u f’modi oħra. Il-pubblikaturi żgħar kienu b’mod speċjali jħarsu ’l quddiem biex jipparteċipaw f’dan ix-xogħol għax kien jagħtihom l-opportunità li jieħdu sehem fl-istess attività bħall-adulti fil-kongregazzjoni. Hekk kont tagħmel int meta kont żgħir?
2 Involvi lil Uliedek: Tfal tassew żgħar li għadhom mhux lesti biex jibdew diskussjoni Skritturali fuq il-bibien xorta jistgħu joffru r-rivisti. Dan ifisser li jitgħallmu biss preżentazzjoni sempliċi taʼ ftit sentenzi qosra. Kumment qasir, forsi fuq is-suġġett tal-qoxra tar-rivista, jistaʼ jkun biżżejjed. Ħafna inkwilini jkunu lesti li jaċċettaw ir-rivisti mingħand iż-żgħar, u taʼ spiss jikkummentaw tajjeb dwar is-sinċerità u l-kondotta tajba taʼ dawn iż-żgħar. Bi ftit għajnuna, it-tfal jistgħu jagħmlu dan is-servizz tassew tajjeb, billi jagħtu s-sehem prezzjuż tagħhom f’li jxerrdu l-messaġġ tas-Saltna. M’għandniex xi ngħidu, hekk kif it-tfal jikbru, il-ġenituri tagħhom għandhom jgħinuhom biex ikomplu jagħmlu progress f’li jiżviluppaw il-kapaċitajiet tagħhom fl-għoti taʼ xiehda.
3 Manuel beda jippriedka minn dar għal dar fl-età taʼ tliet snin. Il-ġenituri tiegħu għenuh jitgħallem preżentazzjoni qasira bl-amment. Hu jippriedka b’mod żeluż flimkien magħhom, billi jqassam ħafna rivisti, browxers, u fuljetti. Hu jagħti xiehda wkoll b’mod informali. F’okkażjoni waħda meta l-ġenituri tiegħu ħaduh fi ġnien għar-rikreazzjoni, hu ħa l-inizjattiva li jqassam xi fuljetti maʼ nies oħrajn li kienu hemmhekk. Għalkemm għadu żgħir ħafna, l-entużjażmu taʼ Manuel għall-ministeru verament huwa sors taʼ inkuraġġiment għall-ġenituri tiegħu u għall-kongregazzjoni kollha.—Prov. 22:6.
4 Fuq il-kalendarju tas-Soċjetà għas-sena 2000, kull nhar taʼ Sibt huwa mmarkat bħala “Ġurnata tar-Rivisti.” Ġenituri, aħna nissuġġerulkom li ġġeddu l-interess tagħkom f’dan ix-xogħol, billi tgħinu lil uliedkom jieħdu sehem regolarment kemm jistaʼ jkun f’dan il-privileġġ taʼ servizz.