Ġenituri​—Ħarrġu Lil Uliedkom Biex Jippridkaw

¹ Il-​kongregazzjonijiet tagħna huma mberkin b’ħafna tfal li għandhom xewqa sinċiera li jaqdu ’l Alla. (Koħ. 12:1) Dawn huma inklużi maʼ dawk mistednin minn Jehovah biex jieħdu sehem f’li jfaħħruh. (Salm 148:​12-​14) B’hekk, it-​taħriġ li l-​ġenituri jagħtu minn jum għal jum lil uliedhom għandu jinkludi struzzjoni fuq kif jaqsmu l-​fidi tagħhom m’oħrajn fix-​xogħol taʼ l-​ippridkar tas-​Saltna.​—Dewt. 6:​6, 7.

² Ħarrġu Lit-​Tfal B’Passi Progressivi: It-​tfal jistħoqqilhom li jiġu mħarrġin minn età żgħira ħafna biex jakkumpanjaw lill-​ġenituri tagħhom fil-​ministeru. Qabel ma tmorru fis-​servizz, ħejju lil uliedkom biex jipparteċipaw b’mod taʼ fejda. Iddeterminaw minn qabel dak li triduhom jagħmlu fuq il-​bieb. Tfal żgħar ħafna jistgħu jqassmu xi fuljetti jew karti u jistiednu lin-​nies għas-​Sala tas-​Saltna. Uħud żgħar li jaqraw tajjeb jistgħu jiġu mistednin biex jaqraw l-​iskritturi waqt li jkunu fil-​bieb. Jistgħu joffru r-​rivisti, billi jużaw preżentazzjoni qasira. Hekk kif jiksbu l-​esperjenza, ħarrġuhom biex jużaw il-​Bibbja fil-​preżentazzjoni tagħhom. Ħafna pubblikaturi żgħar bdew rotot bir-​rivisti huma stess u jagħmlu żjajjar lura regulari. Ikun aħjar jekk tifel jew tifla jaħdmu maʼ xi adult minflok maʼ xi ħadd ieħor taʼ mparhom. L-​adult jistaʼ jispjega lill-​inkwilin li ċ-​ċkejken qiegħed jiġi mħarreġ fil-​ministeru.

³ Tifla ċkejkna staqsiet lill-​anzjani għall-​għajnuna tagħhom sabiex tkun tistaʼ tikkwalifika bħala pubblikatriċi tas-​Saltna. Saħansitra minkejja li dak in-​nhar din kellha biss ħames snin u ma kinitx taf taqra, kienet kapaċi tippreżenta l-​messaġġ tas-​Saltna b’mod effettiv minn bieb għal bieb. Hi kienet iżżomm f’moħħha fejn kienu l-​iskritturi, kienet tqalleb għall-​post fejn jinsabu, tistaqsi lill-​inkwilin biex jaqrahom, u mbagħad tagħti l-​ispjegazzjoni.

⁴ It-​tfal għandhom jiġu mgħallmin ukoll permezz taʼ l-​eżempju tal-​ġenituri l-​valur taʼ li wieħed ikollu skeda tajba biex jieħu sehem regolarment fil-​ministeru. Il-​ġenituri għandhom bżonn jistabbilixxu rutina taʼ kull ġimgħa konsistenti u jżommu magħha, sabiex it-​tfal ikunu jafu liema parti tal-​ġimgħa hija dejjem imwarrba għax-​xogħol taʼ l-​ippridkar.

⁵ Meta t-​tfal jiġu mħarrġin minn età tenera biex iħobbu u jgawdu l-​ministeru, dawn se jiġu mqanqlin biex fil-​futur jimmiraw lejn privileġġi akbar, u forsi inkluż is-​servizz taʼ pijunier. (1 Kor. 15:58) Ilkoll kemm aħna għandna ninkuraġġixxu lit-​tfal li hemm fostna biex jagħmlu progress bħala wħud li jfaħħru lil Jehovah.