Ġenituri—Ħarrġu lil Uliedkom minn Ċkunithom

¹ “Ħarreġ tifel jimxi fit-​triq it-​tajba; ma joħroġx minnha lanqas meta jixjieħ.” (Prov. 22:6) Ġenituri, jekk ma tridux li wliedkom ‘joħorġu’ mit-​triq tal-​verità, meta għandkom tibdew taħriġ bħal dan? Miċ-​ċokon!

² Meta Pawlu qal li l-​edukazzjoni spiritwali taʼ Timotju kienet ilha ‘minn żgħoritu,’ l-​evidenza turi li kien qed ifisser minn meta kien għadu tarbija. (2 Tim. 3:​14, 15) Bħala riżultat, Timotju sar raġel spiritwali mill-​aqwa. (Flp. 2:​19-22) Ġenituri, intom ukoll tridu tibdew tħarrġu lit-​tfal ‘minn żgħorithom’ bit-​tagħlim li għandhom bżonn sabiex ‘jibqgħu jikbru’ maʼ Jehovah.—1 Sam. 2:21.

³ Agħtuhom l-​Ilma li Għandhom Bżonn biex Jikbru: L-​istess bħalma xitla għandha bżonn provvista kontinwa taʼ l-​ilma sabiex tikber f’siġra enormi, tfal taʼ kull età għandhom bżonn jissaqqew kemm jifilħu bl-​ilma tal-​verità tal-​Bibbja sabiex jikbru u jsiru qaddejja t’Alla maturi. Il-​mod ewlieni kif tgħallem il-​verità lit-​tfal u tgħinhom isiru midħla sew taʼ Jehovah hu permezz taʼ studju tal-​Bibbja regulari bħala familja. Iżda ġenituri, tridu tikkunsidraw kemm huma kapaċi jikkonċentraw uliedkom b’mod individwali. Għat-​tfal iż-​żgħar, x’aktarx li sessjonijiet taʼ taħriġ qosra imma taʼ sikwit, se jkunu iktar effettivi minn ftit sessjonijiet fit-​tul.—Dt. 11:​18, 19.

⁴ Qatt iċċekknu l-​potenzjal li għandhom uliedkom biex jitgħallmu. Irrakkontawlhom stejjer dwar karattri Bibliċi. Ħalluhom ipinġu stampi taʼ xeni li jinsabu fil-​Bibbja jew jirreċtaw ġrajjiet Bibliċi. Użaw tajjeb il-​vidjos u l-​kasetts, inkluż xi dramm Bibliku. Addattaw l-​istudju tal-​familja skond l-​etajiet u l-​abbiltà li għandhom uliedkom biex jitgħallmu. It-​taħriġ tal-​bidu se jkun bażiku, li jingħata ftit ftit; iżda hekk kif it-​tfal jibdew jikbru, it-​taħriġ għandu jiżdied u jkun progressiv. Agħtu t-​taħriġ mill-​Bibbja b’entużjażmu u b’mod varjat. Intom tridu li wliedkom jifformaw ‘xenqa’ għall-​Kelma; għalhekk agħmlu l-​istudju wieħed pjaċevoli kemm jistaʼ jkun.—1 Pt. 2:2.

⁵ Għinuhom Jieħdu Sehem fl-​Attivitajiet tal-​Kongregazzjoni: Lit-​tfal agħmlulhom miri progressivi biex jieħdu sehem bis-​sħiħ fl-​attivitajiet tal-​kongregazzjoni. X’tistaʼ tkun l-​ewwel mira tagħhom? Il-​ġenituri taʼ żewġt itfal żgħar qalu: “It-​tnejn li huma bdew jirċievu taħriġ biex joqogħdu bil-​qiegħda kwieti fis-​Sala tas-​Saltna.” Imbagħad, għinu lit-​tfal jikkummentaw fi kliemhom fil-​laqgħat u biex jagħmluha l-​mira tagħhom li jinkitbu fl-​Iskola tal-​Ministeru Teokratiku. Fis-​servizz taʼ l-​għalqa, miri li tajjeb jilħqu huma li joffru xi fuljett fuq il-​bibien, jaqraw xi skrittura, jagħmlu preżentazzjoni bir-​rivisti, u jinvolvu lill-​inkwilini f’konversazzjonijiet effettivi.

⁶ Agħtu Eżempju Mimli Entużjażmu: Qegħdin it-​tfal tagħkom jisimgħukom titkellmu dwar Jehovah u titolbuh kuljum? Jarawkom tistudjaw il-​Kelma tiegħu, tattendu l-​laqgħat, tieħdu sehem fil-​ministeru taʼ l-​għalqa, u titgħaxxqu f’li tagħmlu r-​rieda t’Alla? (Salm 40:9 [40:​8, New World Translation]) Huwa vitali li jisimgħukom u jarawkom tagħmlu dan u li dawn l-​affarijiet tagħmluhom flimkien. Tifla li issa kibret qalet dwar ommha, li rabbiet sitt itfal biex isiru Xhieda leali: “Dak li impressjonana l-​iktar kien l-​eżempju t’ommi stess—dan kien iktar effettiv mill-​kliem.” Omm taʼ erbat itfal qalet: “‘Jehovah jiġi l-​ewwel’ ma kinitx biss frażi komuni imma l-​mod kif għexna ħajjitna.”

⁷ Ġenituri, ibdew minn kmieni f’li tħarrġu ’l uliedkom, waqt li tgħallmuhom il-​verità mill-​Kelma t’Alla, tagħmlulhom miri li se jgħinuhom jagħmlu progress, u tagħtuhom l-​aħjar eżempju li tistgħu. Se tkunu henjin li għamiltu hekk!