Ħarreġ lil Uliedek Biex Ikunu Ministri
1. Salm 148:12, 13 xi jqanqalhom jagħmlu l-ġenituri Kristjani?
1 Ġeħova jistieden liż-żgħar biex ifaħħruh. (Salm 148:12, 13) Għalhekk, ġenituri Kristjani jagħmlu iktar milli jgħallmu lil uliedhom il-veritajiet Bibliċi u l-liġijiet morali t’Alla. Iħarrġuhom ukoll biex ikunu ministri tal-aħbar tajba. Dan kif jistaʼ jsir b’mod progressiv?
2. L-eżempju tajjeb taʼ ġenitur kif jistaʼ jeffettwa lil uliedu?
2 Eżempju Tajjeb: L-imħallef Gidegħon qal lit-300 raġel tiegħu: “Tgħallmu minn dak li tarawni nagħmel.” (Mħ. 7:17) It-tfal naturalment iħarsu lejn il-ġenituri tagħhom u jimitawhom. Wieħed missier jaħdem bil-lejl, imma minflok ma jmur jorqod meta jasal id-dar is-Sibt filgħodu, jieħu lil uliedu fil-ministeru avolja jkun għajjien mejjet. Mingħajr ma jgħid kelma, qed jgħallimhom li l-ministeru hu prijorità. (Mt. 6:33) Josservawk uliedek tieħu sehem bil-ferħ f’diversi forom tal-qima, bħal li titlob, taqra l-Bibbja, tikkummenta, u tipprietka? M’għandniex xi ngħidu, m’intix se tkun eżempju perfett. Imma wliedek se jkunu iktar lesti biex iwieġbu għall-isforzi tiegħek biex tgħallimhom iqimu lil Ġeħova jekk jaraw id-diliġenza tiegħek f’li taqdih.—Dt. 6:6, 7; Rum. 2:21, 22.
3. Il-ġenituri liema miri spiritwali progressivi għandhom jgħinu lil uliedhom jagħmlu u jilħqu?
3 Miri Progressivi: Il-ġenituri bla heda jħarrġu lil uliedhom biex jimxu, jitkellmu, ilibbsu lilhom infushom, u affarijiet oħrajn. Hekk kif it-tfal jilħqu ċerti livelli fit-tkabbir tagħhom, quddiemhom jitpoġġew miri ġodda. Jekk il-ġenituri huma Kristjani, jgħinu lil uliedhom ukoll jagħmlu u jilħqu miri spiritwali fi qbil mal-età u l-abbiltajiet tagħhom. (1 Kor. 9:26) Qed tgħallem lil uliedek biex jikkummentaw fi kliemhom stess u biex jippreparaw it-taħditiet tagħhom stess fl-Iskola tal-Ministeru Teokratiku? (Salm 35:18) Qed tħarriġhom biex jieħdu sehem f’aspetti differenti tal-ministeru? Qed tpoġġilhom quddiemhom il-mira tal-magħmudija u s-servizz full-time? Qed tgħinhom jassoċjaw maʼ evanġelizzaturi ferħanin u entużjastiċi li se jinkuraġġuhom?—Prov. 13:20.
4. It-tfal kif jibbenefikaw mill-fatt li jkollhom ġenituri li jibdew iħarrġuhom fil-ministeru minn età żgħira?
4 Is-salmista qal: “O Alla, int għallimtni minn żgħożiti ’l quddiem, u s’issa għadni nitkellem dwar l-għemejjel tiegħek taʼ l-għaġeb.” (Salm 71:17) Ibda ħarreġ lil uliedek minn età żgħira biex isiru ministri. Il-pedament spiritwali li tgħinhom ipoġġu ċertament li se jgħinhom hekk kif isiru adulti!—Prov. 22:6.