Għallem lil Uliedek Ifaħħru lil Ġeħova
1. Jistgħu t-tfal iż-żgħar ifaħħru lil Ġeħova?
1 Salm 148:12, 13 jinkuraġġixxi lit-tfal subien u bniet biex “ifaħħru isem” Ġeħova. L-Iskrittura fiha diversi eżempji taʼ tfal żgħar li għamlu dan. Per eżempju, “Samwel kien iservi quddiem il-Mulej; kien għadu żgħir.” (1 Sam. 2:18) Kienet “tifla żgħira” li qalet lil mart Nagħman li profeta taʼ Ġeħova f’Iżrael setaʼ jfejjaq lil Nagħman mill-ġdiem. (2 Slat. 5:1-3, Karm Żammit) Meta Ġesù daħal fit-tempju u wettaq xogħlijiet taʼ qawwa, kienu “subien” dawk li bdew jgħajtu: “Salva, nitolbuk, lil Bin David!” (Mt. 21:15) Il-ġenituri kif jistgħu jgħallmu lil uliedhom ifaħħru lil Ġeħova?
2. Għala huwa importanti li lġenituri jagħtu eżempju tajjeb lil uliedhom?
2 Bl-Eżempju: Qabel ma jnaqqxu l-verità fil-qlub taʼ wliedhom, il-missirijiet Iżraelin ġew istruwiti li l-ewwel huma kellhom iħobbu lil Ġeħova u jkollhom il-kmandi tiegħu fil-qlub tagħhom stess. (Dt. 6:5-9) Jekk titkellem b’mod pożittiv dwar il-ministeru u tagħmlu parti mill-iskeda taʼ kull ġimgħa tiegħek, uliedek se jibdew iqisu l-ministeru bħala li hu importanti u sodisfaċenti.
3. Waħda oħt kif ibbenefikat mill-eżempju tal-ġenituri tagħha?
3 Waħda oħt tiftakar b’għożża: “Meta kont qed nikber, ir-rutina tal-familja tagħna kienet tinkludi li nieħdu sehem fil-ministeru taʼ l-għalqa kull tmiem il-ġimgħa. Stajt nara li l-ġenituri tiegħi tassew kienu jieħdu pjaċir jippridkaw. Aħna u nikbru bdejna nqisu l-ministeru bħala xi ħaġa pjaċevoli.” Din l-oħt saret pubblikatriċi mhux mgħammda meta kellha sebaʼ snin u ilha fis-servizz full-time għal iktar minn 32 sena.
4. Xi jfisser li tħarreġ lit-tfal b’mod progressiv?
4 Taħriġ b’Mod Progressiv: Hekk kif tieħdu sehem fil-ministeru, involvu lil uliedkom. Forsi jistgħu jċemplu l-qanpiena, jagħtu xi fuljett lill-inkwilin, jew jaqraw xi skrittura. Dan se jżidilhom iktar il-ferħ u jgħinhom jiksbu fiduċja fl-abbiltà tagħhom biex jaqsmu l-messaġġ tas-Saltna. Hekk kif jikbru, il-parteċipazzjoni tagħhom fil-ministeru għandha tiżdied. Għalhekk, għinhom biex jagħmlu progress u jaħsbu dwar liema miri jistgħu jagħmlu biex itejbu s-servizz tagħhom.
5. Tifel x’jeħtieġ biex jikkwalifika bħala pubblikatur mhux mgħammed?
5 Meta tħoss li wliedek huma kwalifikati biex isiru pubblikaturi mhux mgħammdin u t-tfal juru li jixtiequ jagħmlu dan, tkellem maʼ l-anzjani. Il-fatt li jsiru pubblikaturi se jenfasizza r-responsabbiltà persunali tagħhom li jfaħħru lil Ġeħova. Żomm f’moħħok li tifel m’għandux għalfejn ikun jaf daqs l-adulti mgħammdin qabel ma jikkwalifika. Jifhem ibnek it-tagħlim bażiku tal-Bibbja? Iżomm mal-livelli morali tal-Bibbja? Jixtieq jieħu sehem fil-ministeru u jiġi identifikat bħala wieħed mix-Xhieda taʼ Ġeħova? Jekk iva, l-anzjani għandhom mnejn jiddeterminaw li hu jikkwalifika bħala pubblikatur mhux mgħammed.—Ara l-ktieb Organizzati biex Nagħmlu r-Rieda taʼ Ġeħova, pġi. 79-82.
6. Għala jiswa li l-ġenituri jħarrġu lil uliedhom?
6 Li tgħallem lit-tfal ifaħħru lil Ġeħova minn qalbhom jirrikjedi sforz. Madankollu, x’jistaʼ jferraħ lill-ġenituri iktar milli jaraw lil uliedhom jagħmlu progress spiritwali? Iktar importanti, Ġeħova jieħu gost meta t-tfal jitkellmu dwar ix-xogħlijiet meraviljużi tiegħu.