“Ma Nistgħux Ma Nitkellmux”
1 Ġesù Kristu qed jifli mill-qrib ix-xogħol taʼ l-ippridkar. (Mt. 28:20; Mk. 13:10) Għalkemm hemm kważi sitt miljun proklamatur attiv li qed jagħti xiehda f’234 pajjiż, aħna ma rridux naħsbu li x-xogħol taʼ l-ippridkar spiċċa. Sakemm Alla jiddikjara li x-xogħol lest, “ma nistgħux ma nitkellmux” dwar l-affarijiet li tgħallimna.—Atti 4:20.
2 Nistrieħu fuq l-Ispirtu t’Alla: Satana jitfaʼ pressjoni kbira fuqna sabiex jiskuraġġina. (Apk. 12:17) Ukoll, il-ġisem imperfett tagħna stess jitturmentana b’ħafna problemi. Dawn l-affarijiet jistgħu jdawrulna l-attenzjoni tagħna mill-iktar xogħol importanti taʼ l-ippridkar. Minkejja dan, jekk aħna nafdaw f’Jehovah, l-ispirtu tiegħu se jgħinna niffaċċjaw kwalunkwe ostaklu.
3 Meta l-kongregazzjoni Kristjana taʼ l-ewwel seklu ġiet persegwitata bl-aħrax, l-aħwa talbu lil Alla biex jgħinhom ikomplu jitkellmu dwar il-kelma tiegħu bil-qlubija kollha. Jehovah wieġeb it-talba tagħhom, billi sawwab fuqhom l-ispirtu tiegħu kif ukoll tahom iż-żelu u d-determinazzjoni meħtieġa biex ikomplu jippridkaw. Bħala riżultat, huma baqgħu jiddikjaraw bil-qlubija l-aħbar tajba mingħajr waqfien.—Atti 4:29, 31; 5:42.
4 Ma Nibżgħux minn Diskors Skuraġġanti: L-opinjoni ġenerali jew l-għajdut li jimmalafama għandu mnejn ibeżżagħna. Madankollu, ftakar l-istqarrija li Pietru u l-appostli l-oħrajn għamlu bil-qlubija quddiem is-Sinedriju, dokumentata f’Atti 5:29-32. Bħalma ammetta Gamaljel, l-għalliem tal-Liġi, ix-xogħol t’Alla ma jistax jinġieb fix-xejn. Dan ix-xogħol kbir ma jitwettaqx permezz tal-qawwa tagħna imma għandu l-appoġġ t’Alla, u hu biss jistaʼ jwettqu!—Żak. 4:6.
5 Ejja nitolbu kuljum bil-ħrara lil Jehovah għall-ispirtu tiegħu sabiex jgħinna nipproklamaw l-aħbar tajba biż-żelu. Jalla ngħidu, bħalma qal Ġeremija, li l-messaġġ tas-Saltna huwa bħal nar jaqbad fl-għadam tagħna. (Ġer. 20:9) Ma nistgħux noqogħdu siekta!