Ġenituri—Nisslu Drawwiet Tajbin f’Uliedkom

¹ Drawwiet tajbin ma jintirtux, u lanqas ma jinkisbu b’kumbinazzjoni. Iktar minn hekk, li tnissel drawwiet tajbin fit-​tfal jieħu ż-​żmien. Meta ngħidu tnissel jiġifieri li tagħti tagħrif ftit ftit jew li ddaħħal bin-​naqra n-​naqra. Il-​ġenituri jeħtieġu li jkunu konsistenti sabiex ‘irabbu [lil uliedhom] fid-​dixxiplina u t-​twiddib tal-​Mulej.’—Efes. 6:4.

² Ibda mill-​Infanzja: Il-​kapaċità li għandhom it-​tfal ċkejknin li jitgħallmu u jagħmlu affarijiet ġodda hija taʼ l-​għaġeb. Għalkemm xi kultant l-​adulti jsibuha diffiċli biex jitgħallmu xi lingwa ġdida, it-​tfal li jkunu għadhom ma bdewx l-​iskola jistgħu jitgħallmu żewġ lingwi jew tlieta f’daqqa. Qatt m’għandek taħseb li t-​tfal tiegħek huma żgħar wisq biex jiżviluppaw drawwiet tajbin. Jekk huma jingħataw l-​istruzzjoni tal-​verità tal-​Bibbja minn kmieni u tibqaʼ tingħatalhom, sakemm dawn ikollhom ftit snin, moħħhom se jkun mimli bl-​għarfien li jistaʼ jagħtihom “l-​għerf li jwassal għas-​salvazzjoni.”—2 Tim. 3:15.

³ Agħmel is-​Servizz taʼ l-​Għalqa Bħala Drawwa: Drawwa tajba li għandha tiġi mnissla fit-​tfal matul is-​snin taʼ l-​iżvilupp tagħhom hi dik taʼ l-​ippridkar taʼ l-​aħbar tajba tas-​Saltna t’Alla b’mod regulari. Ħafna ġenituri jibdew billi jieħdu lil uliedhom fil-​ministeru minn dar għal dar mindu t-​tfal ikunu għadhom trabi. Il-​fatt li l-​ġenituri jkunu involuti regolarment fix-​xogħol taʼ għoti taʼ xiehda jgħin lil uliedhom jiżviluppaw apprezzament u żelu għall-​ministeru. Il-​ġenituri jistgħu juru lil uliedhom kif għandhom jieħdu sehem f’li jagħtu xiehda f’kull aspett tas-​servizz taʼ l-​għalqa.

⁴ Li jkunu miktubin fl-​Iskola tal-​Ministeru Teokratiku huwa t’għajnuna wkoll għat-​tfal. Din tgħallimhom drawwiet tajbin taʼ l-​istudju u kif jaqraw b’mod li juru li qed jifhmu. Jitgħallmu jitkellmu dwar il-​Bibbja, jagħmlu ż-​żjajjar lura, u jikkonduċu studji tal-​Bibbja. Taħriġ bħal dan jistaʼ jħeġġiġhom biex jagħmlu x-​xogħol taʼ pijunier u jilħqu privileġġi speċjali tas-​servizz. Għal ħafna Beteliti u missjunarji, il-​memorji taʼ meta bdew jieħdu sehem fl-​Iskola tal-​Ministeru Teokratiku huma għal qalbhom ħafna u jqisu dan il-​provvediment bħala wieħed li għenhom jiżviluppaw drawwiet tajbin.

⁵ Aħna lkoll qisna tafal f’idejn il-​Fuħħari l-​Kbir, Jehovah. (Is. 64:7 [64:​8, NW]) Iktar ma t-​tafal ikun artab, iktar ikun faċli tifformah. Iktar ma jinxef, iktar jibbies. L-​istess jiġri min-​nies. Meta jkunu għadhom żgħar, ikunu iktar flessibbli—u iktar ma t-​tfal ikunu żgħar, iktar ikun hemm riżultati tajbin. L-​ewwel snin tagħhom huma s-​snin taʼ l-​iżvilupp, meta jkunu qed jiġu fformati għat-​tajjeb jew għall-​ħażin. Bħala ġenitur li tieħu ħsieb uliedek, ibda minn kmieni f’li tnissel fihom drawwiet tajbin fil-​ministeru Kristjan.