Oqgħod Attent biex Tgħin lil Nies Neqsin mis-​Smigħ fit-​Territorju Tiegħek

¹ Jehovah qed jagħmel l-​istedina:“‘Ejja!’ . . . Ħa jieħu b’xejn min irid l-​ilma tal-​Ħajja.” (Apk. 22:17) Numru li dejjem jikber taʼ nies neqsin mis-​smigħ huma fost dawk li qed iwieġbu għal din is-​sejħa. Bħala riżultat, matul dawn l-​aħħar snin, fil-​Britannja ġew ifformati kongregazzjoni waħda u 23 grupp li jikkomunikaw permezz tal-​lingwa bis-​sinjali.

² Il-​kongregazzjonijiet u l-​gruppi tal-​lingwa bis-​sinjali jiffokaw l-​isforzi taʼ l-​ippridkar tagħhom f’li jikkuntattjaw lil dawk neqsin ftit jew għalkollox mis-​smigħ fit-​territorju tagħhom. Iżda bħalissa m’hemmx kongregazzjonijiet jew gruppi bħal dawn f’Malta. Għalhekk jaf hemm ħafna wħud neqsin mis-​smigħ li għad iridu jinstabu u jingħataw xiehda f’dan il-​pajjiż.

³ Kif Tistaʼ Tgħin? Waqt li tkun f’postijiet pubbliċi, qatt osservajt xi nies li jużaw il-​lingwa bis-​sinjali? Taf lil xi ħadd fuq il-​post tax-​xogħol jew l-​iskola li għandu membru tal-​familja nieqes mis-​smigħ? Oqgħod attent biex issib lil dawk neqsin mis-​smigħ hekk kif tkun qed tagħmel l-​attivitajiet tiegħek taʼ kuljum. Iżda kif tistaʼ tkun ċert li se jingħataw xiehda dwar is-​Saltna?

⁴ Kif Tagħti Xiehda: Jekk taf lil xi ħadd, fil-​kongregazzjoni tiegħek jew f’kongregazzjonijiet oħrajn, li jaf jikkomunika maʼ dawk neqsin mis-​smigħ permezz tal-​lingwa bis-​sinjali, nagħtuk il-​parir li tistaqsih biex jagħti għajnuna spiritwali lill-​persuna nieqsa mis-​smigħ li tkun ikkuntattjajt. Ġie nnotat li ħafna minn dawk neqsin mis-​smigħ jagħmlu progress iktar malajr f’li jitgħallmu l-​verità meta jissieħbu m’aħwa li jistgħu jikkomunikaw magħhom permezz tal-​lingwa bis-​sinjali. Barra minn hekk, jekk jogħġbok informa lis-​segretarju tal-​kongregazzjoni tiegħek dwar l-​interess li sibt u x’qed tagħmel biex tgħin lil dak nieqes mis-​smigħ. Peress li f’Malta m’hawnx kongregazzjoni jew grupp tal-​lingwa bis-​sinjali, qed nitolbu lis-​segretarji kollha tal-​kongregazzjonijiet, biex jgħaddu kull informazzjoni dwar nies neqsin mis-​smigħ fit-​territorju tagħhom lill-​uffiċċju tas-​Soċjetà.

⁵ Xi ngħidu jekk m’hemm ħadd fil-​qrib li jistaʼ jagħti għajnuna spiritwali lil dawk neqsin mis-​smigħ fil-​komunità tiegħek? Kif tistaʼ tgħin? Għax ma tagħmilx żjara lura u titkellem mal-​membri li m’humiex neqsin mis-​smigħ f’dik id-​dar? Offri li turihom il-​vidjo tal-​browxer X’Jirrikjedi li qiegħed fil-​Lingwa bis-​Sinjali bl-​Ingliż Britanniku sabiex tqajjem l-​interess taʼ dak nieqes mis-​smigħ. Xi pubblikaturi saħansitra tgħallmu l-​Lingwa bis-​Sinjali bl-​Ingliż Britanniku (British Sign Language) sabiex ikunu jistgħu jilħqu lil dawk neqsin mis-​smigħ b’mod iktar effettiv. (Atti 16:​9, 10) Il-​browxer X’Jirrikjedi u l-​ktieb Għarfien ukoll huma disponibbli fuq vidjo tal-​Lingwa bis-​Sinjali bl-​Ingliż Britanniku. L-​istudji tal-​Bibbja li qed isiru permezz taʼ dawn l-​għodod diġà taw ħafna riżultati tajbin.

⁶ Billi toqgħod attent biex tgħin lil nies neqsin mis-​smigħ fl-​inħawi tiegħek, int tistaʼ tagħtihom l-​opportunità biex jieħdu l-​ilma tal-​ħajja b’xejn.​—Mt. 10:11.